ໂຄງການກໍ່ສ້າງທາງລົດໄຟ ລາວ-ຈີນຄືບໜ້າລື່ນແຜນການ


...

04.10.2019 8:27     

   ໂຄງການກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າເປັນກ້າວໆມາ ຫຼ້າສຸດມາຮອດທ້າຍເດືອນສິງຫາຜ່ານມານີ້ ສຳເລັດແລ້ວ 76,2%, ຄາດວ່າຈະສໍາເລັດຕາມກຳນົດເວລາ ພ້ອມເປີດຂະບວນປະຖົມມະລືກ ໃນວັນທີ 2 ທັນວາ 2021. ໃນຂະນະທີ່ການຈ່າຍເງິນຄ່າຊົດເຊີຍຈ່າຍໄປແລ້ວ 369 ຕື້ກີບ ເທົ່າກັບ 20,4% ຂອງຈຳ ນວນເງິນທີ່ຕ້ອງຈ່າຍຄ່າຊົດເຊີຍ ທັງໝົດ 2.492 ຕື້ກີບ.
  ທ່ານ ແທ່ນຄຳ ທອງບົນ ຮັກສາການຫົວໜ້າຄະນະຄຸ້ມຄອງໂຄງການທາງລົດໄຟ ລາວ - ຈີນ ໄດ້ເປີດເຜີຍເມື່ອວັນທີ 2 ຕຸລາຜ່ານມາວ່າ: ມາຮອດ ທ້າຍເດືອນສິງຫາຜ່ານມານີ້ ໂຄງການກໍ່ສ້າງທາງລົດໄຟ ລາວ - ຈີນ ສໍາເລັດແລ້ວ 76,2%, ໃນນີ້ຍັງບໍ່ລວມວຽກລະບົບລາງ, ລະບົບໄຟຟ້າ ແລະ ລະບົບຄວບ ຄຸມຕ່າງໆ ແຕ່ຖ້າສົມທຽບໃສ່ແຜນການແລ້ວ ຖືວ່າປະຕິບັດໄດ້ລື່ນແຜນການ.
    ສ່ວນການມອບພື້ນທີ່ໃຫ້ໂຄງການແມ່ນໄດ້ມອບແລ້ວ98,29% ຈາກພື້ນທີ່ທັງໝົດຂອງແລວລົດໄຟ ແລະ ພື້ນທີ່ສະຖານີ 3.000 ເຮັກຕາ ໃນນີ້ເນື້ອທີ່ສ້າງສະຖານີທັງໝົດ 10 ແຫ່ງ ລວມ 812,7 ເຮັກຕາ.
ສຳລັບການຈ່າຍຊົດເຊີຍຜ່ານມາແມ່ນໄດ້ຈ່າຍໄປແລ້ວ 20,4% ເປັນເງິນ 369 ຕື້ກີບ ແລະ ໃນສະເພາະປີ 2019 ນີ້ ມີໂຕເລກທີ່ຈະຕ້ອງຈ່າຍຊົດເຊຍ 450 ຕື້ກີບ ໃນນັ້ນເປັນງົບປະມານຂອງລັດຖະບານໃນສົກປີນີ້ 250 ຕື້ກີບ ຊຶ່ງປັດຈຸບັນໄດ້ຈ່າຍໄປຮອດບັນດາແຂວງທີ່ນອນໃນໂຄງການແລ້ວ 134 ຕື້ກີບ, ສ່ວນທີ່ຍັງເຫຼືອກໍາລັງດໍາເນີນເອກະສານຂໍເບີກຈ່າຍ, ນອກຈາກນີ້ ຍັງມີງົບຂອງບໍລິສັດລົດໄຟລາວ-ຈີນ ຈຳນວນ 200 ຕື້ກີບທີ່ໃຊ້ເຂົ້າໃນການຈ່າຍຊົດເຊີຍໃນສົກປີນີ້, ນອກນີ້ຍັງມີອີກ 317 ຕື້ ເປັນເງິນຊ່ວຍເຫຼືອຂອງລັດຖະບານຈີນ ທີ່ຈ່າຍຊົດເຊີຍໃນຮູບແບບສ້າງບ້ານຈັດສັນໃຫ້ 4 ຈຸດ.
    ທ່ານ ແທ່ນຄຳ ທອງບົນ ໄດ້ກ່າວອີກວ່າ: ຈຳນວນທີ່ໄດ້ຈ່າຍໄປແລ້ວ ບວກກັບໂຕເລກໃນສົກປີ 2019 ນີ້ ລວມມີ 1.136 ຕື້ກີບ ຈາກງົບປະມານທີ່ຕ້ອງການເພື່ອມາຊົດເຊີຍທັງໝົດ 2.492 ຕື້ກີບ, ນັ້ນໝາຍເຖິງວ່າ ຍັງຕ້ອງການງົບອີກ 1.356 ຕື້ກີບ ເພື່ອໃຊ້ໃນການຊົດເຊີຍ ຊຶ່ງລັດຖະບານໄດ້ມີແຈ້ງການອອກມາແລ້ວ ໂດຍໄດ້ເອົາເຂົ້າງົບປະມານໃນສົກປີ 2020 ຈຳນວນ 400 ຕື້ ສ່ວນທີ່ເຫຼືອແມ່ນມອບໃຫ້ທະນາຄານແຫ່ງ ສປປ ລາວ ຂາຍເປັນພັນທະບັດ ເພື່ອມາຈ່າຍຄ່າຊົດເຊີຍ.
    ໂຄງການກໍ່ສ້າງທາງລົດໄຟ ລາວ - ຈີນ ມີມູນຄ່າການລົງທຶນທັງໝົດປະມານ 5.956 ລ້ານໂດລາ ໂດຍລັດວິສາຫະກິດລົດໄຟແຫ່ງຊາດລາວຖືຫຸ້ນ 30% ແລະ 70% ຂອງ 3 ວິສາຫະກິດຈີນ ຄື: ບໍລິສັດທາງລົດໄຟບໍ່ເຕ່ນ - ວຽງຈັນ ຖືຫຸ້ນ 40%, ບໍລິສັດລົງທຶນປັກກິ່ງຢູ່ຄຸນ 20% ແລະ ບໍລິສັດລົງທຶນຫຸ້ນສ່ວນ ແຂວງຢຸນໜານ ຈຳ ກັດ ຖືຫຸ້ນ 10%.
    ໂຄງການດັ່ງກ່າວ ເລີ່ມແຕ່ຊາຍແດນລາວ - ຈີນ ຫາ ນະຄອນຫຼວງວຽງຈັນມີຄວາມຍາວ 414ກວ່າກິໂລແມັດ ໂດຍເລີ່ມແຕ່ບໍ່ເຕ່ນ ແຂວງຫຼວງນໍ້າທາ ຜ່ານ 1 ເມືອງ, ມີ 4 ບ້ານຂອງແຂວງຫຼວງນໍ້າທາ, ຍາວ 16,9 ກິໂລແມັດ; ຜ່ານແຂວງອຸດົມໄຊ ມີ 3 ເມືອງ, 41 ບ້ານ, ຍາວ 126,6 ກິໂລແມັດ; ຜ່ານແຂວງຫຼວງພະບາງ ຍາວ 80 ກິໂລແມັດ, ຜ່ານ 3 ເມືອງ, 28 ບ້ານ; ຜ່ານແຂວງວຽງຈັນຍາວ 145,5 ກິໂລແມັດ, ຜ່ານ 4 ເມືອງ, 60 ບ້ານ ແລະ ຮອດນະຄອນຫຼວງວຽງຈັນເຖິງສະຖານີປາຍທາງ ຍາວ 45 ກວ່າກິໂລແມັດ, ຜ່ານ 3 ເມືອງ, 34 ບ້ານ, ລວມມີ 10 ສະຖານີ ໃນນີ້ມີສະຖານີໃຫຍ່ 3 ສະຖານີ ຄື: ສະຖານີຫຼວງພະບາງ, ສະ ຖານີວັງວຽງ ແລະ ສະຖານີນະຄອນຫຼວງວຽງຈັນ. ໂດຍລວມແລ້ວ, ການກໍ່ສ້າງທາງລົດໄຟ ໄດ້ເຈາະອຸໂມງລວມທັງໝົດມີ 75 ແຫ່ງ ລວມຄວາມຍາວ 197 ກວ່າກິໂລແມັດ; ກໍ່ສ້າງຂົວທັງໝົດ 163 ແຫ່ງ ລວມຄວາມຍາວ 61 ກວ່າກິໂລແມັດ ແລະ ທີ່ເຫຼືອແມ່ນກໍ່ສ້າງທາງລຽບໜ້າດິນ.
    ທ່ານ ແທ່ນຄຳ ທອງບົນ ຍັງໄດ້ກ່າວໃຫ້ເຫັນເຖິງຄາດໝາຍຜົນໄດ້ຮັບຂອງໂຄງການດັ່ງກ່າວວ່າ: ສປປ ລາວ ຈະມີພື້ນຖານໂຄງລ່າງທາງດ້ານເສດຖະກິດທີ່ໝັ້ນຄົງ ຕອບສະໜອງຍຸດທະສາດ "ຫັນປະເທດຈາກປະເທດທີ່ບໍ່ມີຊາຍແດນຕິດກັບທະເລ ມາເປັນປະເທດເຊື່ອມຈອດກັບບັນດາພາກພື້ນ ແລະ ສາກົນ" ຊຶ່ງຈະເປັນການບັນລຸຍຸດທະສາດການຮ່ວມມື ແລະ ການເຊື່ອມຈອດລະຫວ່າງ ສປປ ລາວ ກັບປະເທດ ອາຊຽນ ແລະ ສປ ຈີນ ຊຶ່ງພາຍຫຼັງສຳເລັດໂຄງການ ເບື້ອງຕົ້ນຈະມີລົດໄຟແລ່ນ 18 ຂະບວນ/ມື້ ໂດຍໄດ້ແຍກເປັນຂະບວນໂດຍສານ 4 ຂະບວນ ແລະ ຂົນສົ່ງສິນຄ້າ 14 ຂະບວນ.
   ສະເພາະຂະບວນໂດຍ ສານ 1 ຂະບວນມີ 7 ຕູ້ ແຕ່ລະຕູ້ສາມາດບັນຈຸຜູ້ໂດຍສານໄດ້ຕູ້ລະ 96 ຄົນ, ລວມການຂົນສົ່ງຜູ້ໂດຍສານຂອງລົດໄຟ 1 ຂະບວນ ມີ 672 ຄົນ ໂດຍມີອັດຕາຄ່າຂົນສົ່ງໂດຍສານ 0,3 ຢວນ/ຄົນ/ກິໂລແມັດ ຫຼືປະມານ 350 ກີບ/ຄົນ/ກິໂລແມັດ, ຄ່າໂດຍສານແຕ່ວຽງຈັນ - ບໍ່ເຕ່ນ ປະມານ 140.000 ກີບ/ຄົນ ແລະ ໃຊ້ເວລາພຽງແຕ່ 4 ຊົ່ວໂມງເທົ່ານັ້ນ. ສ່ວນອັດຕາຄ່າຂົນສົ່ງສິນຄ້າ 0,5 ຢວນ/ໂຕນ/ກິໂລແມັດ ຫຼືປະມານ 600 ກີບ/ໂຕນ/ກິໂລແມັດ.
(ຂ່າວ-ພາບ: ສຸກສະຫວັນ)