ສນຊ ສຳມະນາວ່າດ້ວຍການປະຕິບັດ ຮີດຄອງປະເພນີຂອງຊົນເຜົ່າ


...

07.10.2019 9:31     

   ສູນກາງແນວລາວສ້າງຊາດ (ສນຊ) ໄດ້ຈັດກອງປະຊຸມສຳມະນາຫົວຂໍ້: ຄຳແນະນຳວ່າດ້ວຍການປະຕິບັດ ຮີດຄອງປະເພນີຂອງຊົນເຜົ່າມົ້ງຢູ່ ສປປລາວ ຂຶ້ນໃນລະຫວ່າງວັນທີ 2-3 ຕຸລາຜ່ານມາ ທີ່ ສນຊ ໂດຍການເປັນປະທານຂອງ ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານ ສນຊ, ມີບັນດາທ່ານຮອງປະທານ ສນຊ, ປະທານແນວລາວສ້າງຊາດບັນດາແຂວງພາກເໜືອ, ພາກກາງ, ນະຄອນຫຼວງວຽງຈັນ ແລະ ຜູ້ຊົງຄຸນວຸດທິຂອງຊົນເຜົ່າມົ້ງເຂົ້າຮ່ວມ.
    ຈຸດປະສົງຕົ້ນຕໍຂອງກອງປະຊຸມຄັ້ງນີ້ ແມ່ນປຶກສາຫາລືໃສ່ຮ່າງຄຳແນະນຳ ໃນການປັບປຸງຮີດຄອງປະເພນີຂອງຊົນເຜົ່າມົ້ງ ເປັນຕົ້ນແມ່ນວັນເວລາຈັດງານບຸນກິນຈຽງ, ການສ້າງຄອບຄົວ (ແຕ່ງດອງ) ແລະ ງານ ສົບຂອງຊົນເຜົ່າມົ້ງໃຫ້ມີຄວາມເປັນເອກະພາບກັນ ຊຶ່ງກອງປະຊຸມໄດ້ປະກອບຄຳຄິດຄຳເຫັນຢ່າງກົງໄປກົງມາໃສ່ບັນດາຮີດຄອງປະເພນີດັ່ງກ່າວ.
   ກອງປະຊຸມໄດ້ສະຫຼຸບຕີລາຄາ ຕົກລົງເຫັນດີໃຫ້ຈັດງານບຸນກິນຈຽງໃສ່ເດືອນ 12 ສາກົນ ຂອງທຸກໆປີ ໝາຍຄວາມວ່າພາຍຫຼັງສະເຫຼີມສະຫຼອງວັນ ຊາດທີ 2 ທັນວາ.
    ໂອກາດນີ້, ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ເນັ້ນວ່າ:ງານບຸນກິນຈຽງ ແມ່ນປະເພນີສົ່ງທ້າຍປີເກົ່າ ຕ້ອນຮັບ ປີໃໝ່ ຊຶ່ງຈັດຂຶ້ນທຸກໆປີ ຂອງເດືອນ 12 ພສ ຕາມປະຕິທິນລາວ ໂດຍກຳນົດເວລາ 3 ວັນ, ໃຫ້ມີຄວາມ ເປັນເອກະພາບກັນໃນຂອບເຂດທົ່ວປະເທດ ບົນພື້ນຖານປະຢັດມັດທະຍັດ ແລະ ຖືໂອກາດນີ້ໂຄສະນາ, ເຜີຍແຜ່, ສຶກສາອົບຮົມ, ຮຽນຮູ້ມູນເຊື້ອ, ຮີດຄອງປະເພນີ, ວັດທະນະທຳອັນດີງາມ ຂອງເຜົ່າໃຫ້ຊາວໜຸ່ມ-ເຍົາວະຊົນ ໄດ້ຮັບຮູ້; ການສ້າງຄອບຄົວ ແມ່ນໃຫ້ຢຶດຖືກົດໝາຍການສ້າງຄອບຄົວ ເປັນຕົ້ນການສ້າງຄອບຄົວຜົວໜຶ່ງເມຍດຽວ ທີ່ມີອາຍຸກະສຽນ 18 ປີຂຶ້ນໄປ ໂດຍດຳເນີນຕາມຂັ້ນຕອນຂອງລະບຽບການສ້າງ ຄອບຄົວ, ບົນຈິດໃຈຄວາມເຂົ້າ ອົກເຂົ້າໃຈເປັນເອກະພາບຂອງສອງຝ່າຍ, ສຳລັບແມ່ຍິງທີ່ສ້າງຄອບຄົວແລ້ວ ແຕ່ບໍ່ສຸດກົກສຸດປາຍ ໃຫ້ຜູ້ປົກຄອງເຮັດພິທີທາງປະເພນີຮັບກັບມາເປັນສະມາຊິກພາຍໃນຄອບຄົວຄືນ; ການເຊື່ອຖືໃຫ້ຕິດພັນກັບວິທະຍາສາດ, ສອດຄ່ອງຕາມແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ລະບຽບການຂອງລັດ, ເວລາເຈັບເປັນໃຫ້ໄປປິ່ນປົວຕາມໂຮງໝໍ ແລະ ສຸກສາລາ.
     ການເສັນເຢົາ, ການດູມໍ ແລະ ອື່ນໆ ໃນແຕ່ລະຄັ້ງບໍ່ໃຫ້ຮຽກຮ້ອງເອົາຄ່າຕັ້ງຄາຍ, ບໍ່ໃຊ້ສັດຫຼາຍໂຕ ແລະ ບໍ່ໃຊ້ສັດຫຼາຍປະເພດ; ງານປົງສົບ ແລະ ສົ່ງສະການໃຫ້ປະຕິບັດຕາມຮີດຄອງປະເພນີທີ່ເຄີຍປະ ຕິບັດກັນມາ ເປັນຕົ້ນກຳນົດສະຖານທີ່-ເວລາຄົບງັນ ແລະ ໃຫ້ຫຼີກລ້ຽງການເອົາໄປປະຊະ ຊາຍຕາມໃຈມັກຂອງລູກຫຼານ, ພີ່ນ້ອງ ແລະ ພິໄນກຳຂອງຜູ້ເສຍຊີວິດ ເພື່ອຮັບປະກັນຫຼັກອະນາໄມ ແລະ ສິ່ງແວດລ້ອມ.
(ຂ່າວ-ພາບ: ສນຊ)