ເຊັນ​ສັນ­ຍາ​ຟື້ນ​ຟູ ແລະ ບູ­ລະ­ນະ​ທາງແຕ່​ສີ​ເກີດ​-​ໂພນ​ໂຮງ

...

21.10.2019 10:33     

   ພິທີ​ເຊັນ​ສັນຍາ​ວຽກ​ງານ​ຟື້ນ​ຟູ ແລະ ບູລະນະ​ຮັກສາ​ທາງ​ເລກ 13 ເໜືອ​ ໄລ​ຍະສີ ເກີດ ແລະ ໂພນ​ໂຮງ ​ຍາວ 58 ກິໂລແມັດ ລະຫວ່າງ​ກົມຂົວທາງ​ກະຊວງ​ໂຍທາ​ທິ​ການ ແລະ ຂົນສົ່ງ ແລະ ບໍລິສັດຮູ​ເປີ​ຍຊາງ​ຈຽງ​ກໍ່ ສ້າງຂົວ​ທາງ ຈັດ​ຂຶ້ນ​ໃນ​ວັນ​ທີ 18 ຕຸລາ ຜ່ານ​ມາ​ ທີ່​ໂຮງແຮມ​ດອນ​ຈັນ​ພາ​ເລດ ນະຄອນຫຼວງ​ວຽງ​ຈັນ ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ​ໂຍທາ​ທິ​ການ ແລະ ຂົນສົ່ງ (ຍທຂ), ທ່ານ ລັດສະໝີ ອະລິຍະ​ວົງ​ສິງ ຫົວໜ້າ​ໂຄງການ, ທ່ານ ລີ​ເລີຍ ປະທານ​ບໍລິສັດຮູ​ເປີ​ຍ​ຊາງ​ຈຽງ​ກໍ່ສ້າງ​ຂົວ​ທາງ ພ້ອມ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

   ໂຄງການ​ປັບປຸງ ແລະ ສ້ອມແປງ​ເສັ້ນທາງ​ເລກ 13 ເໜືອ ​ແຕ່​ສີ​ເກີດ ​ນະຄອນຫຼວງ​ວຽງ​ຈັນ ຫາ ໂພນ​ໂຮງ ແຂວງ ວຽງ​ຈັນ ມີ​ຄວາມ​ຍາວ​ທັງ​ໝົດ 58 ກິໂລແມັດ​ ໄດ້​ຮັບການ​ສະ ໜັບສະໜູນ​ເງິນ​ກູ້​ດອກ​ເບ້ຍ​ຕໍ່າ​ຈາກ 3 ສະ​ຖາ​ບັນ​ການ​ເງິນ​ຄື: ທະນາຄານ​ໂລກ (World Bank) ມູນ​ຄ່າ 40 ລ້ານ​ໂດ​ລາ, ທະນາຄານ​ການ​ລົງທຶນ​ພື້ນຖານ​ໂຄງ​ລ່າງ​ອາຊີ (AIIB)ມູນ​ຄ່າ 40 ລ້ານ​ໂດ​ລາ, ກອງ​ທຶນ​ນໍ​ດີ​ ເພື່ອ​ການ​ພັດທະນາ (NDF) ມູນ​ຄ່າ 9,5 ລ້ານ​ໂດ​ລາ ແລະ ລັດຖະບານ​ລາວ​ສົມທົບ​ທັງ​ໝົດ​ມູນ​ຄ່າ 38,5 ລ້ານໂດ​ລາ ລວມ​ມູນ​ຄ່າ​ການ​ກໍ່ສ້າງ​ທັງ​ໝົດ 128 ລ້ານ​ໂດ​ລາ ໃນ​ມູນ​ຄ່າ​ລວມ​ໂຄງການ​ນີ້​ ປະກອບ​ມີຄ່າ​ກໍ່ສ້າງ ແລະ ບູລະນະ​ຮັກ ສາ​ທາງ, ຄ່າ​ເວນ​ຄືນ​ທີ່​ດິນ ແລະ ສິ່ງ​ກີດ​ຂວາງ ຄ່າ​ທີ່​ປຶກສາ ແລະ ອື່ນໆ.

   ໄລຍະ​ກະກຽມ​ໂຄງການ 1 ປີ (2018) ແລະ ໄລຍະ​ປະ​ຕິ​ບັດ​ໂຄງການ​ແມ່ນ 10 ປີ (ແຕ່​ປີ 2019-2028 ) ນີ້​ໄລຍະນີ້​ກໍ່ສ້າງ ແລະ ໄລຍະ​ບູລະນະ​ຮັກສາ 7 ປີ, ການ​ອອກແບບ​ເພື່ອ​ປັບປຸງ, ຍົກ​ລະດັບ​ຕອນ​ທາງ​ເປັນການປັບປຸງ, ຍົກ​ລະດັບ​ໂຄງ​ສ້າງ ແລະ ຂະຫຍາຍ​ໜ້າ​ທາງ​ຕາມ​ແລວ​ທາງ​ເກົ່າ​ໃຫ້​ ກວ້າງ​ອອກ​ຕື່ມ​ ເພື່ອໃຫ້ສາ ມາດ​ຮັບ​ນໍ້າ​ໜັກການບັນທຸກ​ຕາມ​ມາດຕະຖານ​ຂອງ​ອາ ຊຽນຄື: 11 ໂຕນ​ຕໍ່​ເພົາ ແລະ ສາມາດຮັບປະກັນ​ລະບາຍ​ການສັນຈອນ​ໄດ້​ເຖິງ​ປີ 2030 ສຳລັບ​ໂຄງ​ສ້າງ​ທາງ​ໄດ້​ອອກ​ແບບ​ເປັນ​ໜ້າ​ທາງ​ເບ​ຕົງ​ເສີມ​ເຫຼັກ​ແບ່ງ​ອອກ​ເປັນ​ສອງສັນ ຍາ, ສັນຍາ​ທີ 1 ແຕ່​ສາມ​ແຍກ​ສີ​ເກີດ (ກິໂລແມັດ​ທີ 12) ຫາ ບ້ານ​ສົງ​ເປືອຍ (ກິໂລແມັດ​ທີ 31) ປັບປຸງ ແລະ ຂະຫຍາຍ​ໜ້າ​ທາງ​ຈາກ 2 ເລນ ເປັນ 4 ເລນ​ໃຫຍ່, ມີ​ເລນ ​ສຳລັບ​ລົດຈັກ​ສອງ​ເບື້ອງ​ເພີ່ມ​ຕື່ມ, ມີ​ທາງ​ຍາງ​ສອງ​ເບື້ອງ​ ສຳລັບ​ຊຸມ​ຊົນ ແລະ ມີ​ດອນ​ກາງ​ທາງ ຊຶ່ງ​ຄວາມ​ກວ້າງ​ຂອງ​ໜ້າ​ທາງ​ທັງ​ໝົດ​ແມ່ນ 23 ແມັດ, ສັນຍາ​ທີ 2 ແຕ່​ບ້ານ​ສົງ​ເປືອຍ (ກິໂລແມັດ​ທີ 31) ຫາ​ໂພນ​ໂຮງ (ກິໂລແມັດ​ທີ 70) ປັບປຸງ​ເປັນ​ທາງ​ສອງ​ເລນ​ໃຫຍ່, ມີ​ສອງ​ເລນ​ນ້ອຍ ສຳລັບ​ລົດຈັກ​ສອງ​ເບື້ອ​ງ​ເພີ່ມ​ຕື່ມ​ບໍ່​ມີ​ດອນ​ກາງ​ທາງ​ແຕ່​ມີ​ໄລຍະ​ຫ່າງ​ ໃນ​ການ​ແລ່ນ​ສວນ​ກັນ ແລະ ທາງ​ຄົນ​ຍ່າງ​ສຳລັບ​ຊຸມ​ຊົນ ສຳລັບ​ເຂດ​ບໍ່​ມີ​ຊຸມ​ຊົນ​ຈະ​ເປັນ​ບ່າ​ທາງ​ທຳ​ມະ​ດາ​ບໍ່​ມີ​ທາງ​ຄົນ​ຍ່າງ​ ຊຶ່ງ​ຄວາມ​ກວ້າງ​ໜ້າ​ທາງ​ທັງ​ໝົດ​ແມ່ນ​ແຕກ​ຕ່າງ​ກັນ​ຈາກ 13 ແມັດ ຫາ 16 ແມັດ ເປັນ​ໄລຍະໆ​ໄປ.

   ຮູບ​ການ​ຊຳ​ລະ​ໃຫ້​ແກ່​ຜູ້ຮັບ​ ເໝົາ​ແມ່ນ​ແບ່ງ​ອອກ​ເປັນ​ສອງ​ໄລຍະ​ຄື: ໄລຍະ​ທີ 1 ແມ່ນ​ໄລ ຍະ​ການ​ດຳເນີນ​ການ​ກໍ່ສ້າງ 3 ປີ​ ໂດຍ​ນຳ​ໃຊ້​ງົບປະມານເງິນກູ້​ ຢືມ​ຈາກ​ທະ​ນາ​ຄານ​ໂລກ ແລະ ທະນາຄານການ​ລົງທຶນພື້ນ ຖານ​ໂຄງ​ລ່າງ​ອາຊີຊຳ​ລະ​ໃຫ້ບໍ ລິສັດ​ຮັບ​ເໝົາ​ກໍ່ສ້າງ​ປະມານ 80% ຂອງ​ມູນ​ຄ່າ​ສັນຍາ, ໄລຍະ​ທີ 2 ແມ່ນ​ໄລຍະ​ການ​ນຳ​ໃຊ້ ແລະ ບູລະນະ​ຮັກສາ​ທາງ ໂດຍ​ນຳ​ໃຊ້​ເງິນ​ສົມທົບ​ຂອງ​ລັດຖະ ບານ ສປປ​ ລາວ (ກອງ​ທຶນ​ທາງ) ຊຳລະ​ໃຫ້​ແກ່​ບໍລິສັດ​ຜູ້​ຮັບ​ເໝົາ​ໄລຍະ 7 ປີ​ ປະມານ 20% ຂອງ​ມູນ​ຄ່າ​ສັນຍາ, ການ​ຄັດ​ເລືອກ​ຜູ້​ຮັບ​ເໝົາ​ແມ່ນ​ນຳ​ໃຊ້​ຮູບ​ແບບ​ການ​ຈັດ​ຊື້​-​ຈັດ​ຈ້າງ​ດ້ວຍ​ການ​ປະມູນ​ເປີດ​ກວ້າງ (ສາກົນ) ຕາມ​ລະບຽບ​ການ​ຂອງ​ຜູ້​ໃຫ້​ທຶນ, ເອກະສານ​ການ​ປະມູນ​ທີ່​ນຳ​ໃຊ້​ແມ່ນ​ເອກະສານ​ມາດຕະຖານ​ຂອງ​ທະນາຄານ​ໂລກ​ໃນ​ຮູບ​ສັນຍາ​ແບບມອບ​ເໝົາ, ໝາຍ​ຄວາມ​ວ່າ​ຜູ້​ຮັບ​ເໝົາ​ເປັນຜູ້ດຳ ເນີນ​ການ​ກໍ່ສ້າງ​ສຳເລັດ​ແລ້ວ ​ສືບ​ຕໍ່​ບູລະນະ​ຮັກສາ​ໄປ​ອີກ 7 ປີ​ ຈຶ່ງ​ມອບ​ໃຫ້​ເຈົ້າ​ຂອງ​ໂຄງ ການ, ຜ່ານ​ການ​ປະມູນ​ທີ່​ໄດ້​ເລີ່ມ​ຕົ້ນ​ດຳເນີນ​ມາ​ແຕ່​ເດືອນ​ມັງກອນ​ປີ 2019 ຈົນ​ເຖິງ​ເດືອນ​ສິງຫາ 2019 ຈຶ່ງ​ສຳເລັດ ແລະ ໄດ້​ຮັບ​ເອົາ​ບໍລິສັດຮູ​ເປີຍ​ຊາງ​ຈຽງ​ກໍ່ສ້າງ​ຂົວ​ທາງເປັນ​ຜູ້​ທີ່​ມີ​ເງື່ອນໄຂ​ຄົບ​ຖ້ວນ ແລະ ມີລາ​ຄາ​ຕໍ່າ​ກວ່າ​ໝູ່​ເປັນ​ຜູ້​ຊະ ນະການປະມູນ​ ສໍາ​ລັບ​ສັນຍາ 1 ມີມູນຄ່າ 31.588.888 ໂດ​ລາ ແລະ ສັນຍາ​ທີ 2 ມີ​ມູນ​ຄ່າ 36.988.888 ໂດ​ລາ ລວມ​ມູນ​ຄ່າ​ ທັງ​ໜົດ 68.577.776 ໂດ​ລາ.

   ໃນ​ພີ​ທີ​ເຊັນ​ສັນຍາ​ດັ່ງກ່າວ ​ຕາງໜ້າ​ຝ່າຍ​ເຈົ້າ​ຂອງ​ໂຄງ ການ​ເຊັນ​ໂດຍ ທ່ານ ລັດສະໝີ ອະລິຍະ​ວົງ​ສິງ ຫົວໜ້າ​ໂຄງ ການ, ຕາງໜ້າບໍລິສັດ​ເຊັນ​ໂດຍ ທ່ານ ລີ​ ເລີຍ ປະທານ​ບໍລິສັດ ຮູ​ເປີ​ຍ​ຊາງ​ຈຽງ​ກໍ່ສ້າງ​ຂົວ​ທາງ ໂດຍ​ຊ້ອງ​ໜ້າ​ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ​ໂຍທາ​ທິ​ການ ແລະ ຂົນສົ່ງ ພ້ອມ ດ້ວຍ​ພ້ອມ​ພາກສ່ວນ​ກ່ຽວ ຂ້ອງ​ເປັນ​ສັກຂີ​ພິຍານ.
(ຂ່າວ-ພາບ: ບຸນ​ອູ້ມ)