ກະຊວງ ຖວທ ມອບບັດພະນັກງານ ລັດຖະກອນ

...

28.10.2019 9:25     

   ກະຊວງຖະແຫຼງຂ່າວ,ວັດ ທະນະທຳ ແລະ ທ່ອງທ່ຽວ (ຖວທ) ໄດ້ຈັດພິທີມອບບັດພະນັກງານ-ລັດຖະກອນຂຶ້ນເມື່ອວັນທີ 25 ຕຸລາຜ່ານມາທີ່ຫໍວັດທະນະທຳແຫ່ງຊາດໂດຍການເປັນປະທານຮ່ວມຂອງ ທ່ານ ຂັນແກ້ວ ພົມມະໄກສອນ ຫົວໜ້າກົມຈັດຕັ້ງ ແລະ ພະນັກງານກະຊວງ ຖວທ , ທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດ ຖະກອນ ກະຊວງພາຍໃນ ຊຶ່ງມີພະນັກງານ-ລັດຖະກອນ ອ້ອມຂ້າງກະຊວງເຂົ້າຮ່ວມ. ທ່ານ ຂັນແກ້ວ ພົມມະ ໄກສອນ ກ່າວວ່າ: ກອງປະ ຊຸມເຜີຍແຜ່ນິຕິກຳກ່ຽວກັບການອອກບັດພະນັກງານ -ລັດຖະກອນ ແລະ ມອບ-ຮັບ ບັດພະນັກງານ - ລັດຖະກອນຊຶ່ງວຽກງານດັ່ງກ່າວ ຖືເປັນວຽກໜຶ່ງທີ່ສຳຄັນ ແລະ ມີຜົນປະໂຫຍດຫຼາຍ ເພາະເປັນການຢັ້ງຢືນ ແລະ ກວດກາຈໍານວນພົນພະນັກງານ-ລັດຖະກອນຜູ້ມີໜ້າ ຫຼື ບໍ່ມີໜ້າຕົວຈິງ. ທັງເປັນການປັບປຸງຂໍ້ມູນປະຫວັດລັດຖະກອນໃຫ້ຖືກຕ້ອງສອດ ຄ່ອງກັບລະບຽບການ, ຫັນການຄຸ້ມຄອງພະນັກງານ-ລັດ ຖະກອນ ໃຫ້ສອດຄ່ອງຕາມກົດໝາຍ, ລະບຽບການ ແລະເຮັດໃຫ້ການຄຸ້ມຄອງພະນັກງານ-ລັດຖະກອນຫັນເປັນທັນສະໄໝເຮັດໃຫ້ການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍຕ່າງໆຖືກຕ້ອງຕາມຕົວຈິງ. ເພື່ອເປັນບ່ອນອີງໃຫ້ມີຄວາມສະດວກ ແລະ ເປັນເອກະພາບໃນການຈັດຕັ້ງປະຕິບັດໃນຂອບເຂດທົ່ວປະເທດ. ທ່ານກ່າວໃຫ້ຮູ້ຕື່ມວ່າ: ວຽກງານອອກບັດພະນັກງານ-ລັດຖະກອນນີ້ ກະຊວງພາຍໃນໄດ້ເລີ່ມຕົ້ນມາຕັ້ງແຕ່ ປີ 2017, ໂດຍໄດ້ເລີ່ມຈາກການສັງລວມແນວຄວາມຄິດຈາກບັນດາພາກສ່ວນຕ່າງໆ ແລະ ໄດ້ສົມທົບກັບອົງການຮັບຜິດຊອບເປັນຕົ້ນແມ່ນທະນາຄານ ແລະ ກະຊວງແຮງງານ ແລະ ສະ ຫວັດດີການ-ສັງຄົມ. ຕົກມາໃນປີ 2018 ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີການແຕ່ງຕັ້ງຄະນະຮັບຜິດຊອບຊີ້ນຳລວມ ແລະ ຄະນະວິຊາການ ກ່ຽວກັບການອອກບັດ ພະນັກງານ-ລັດຖະກອນ ຕາມບົດແນະນຳຂອງກະຊວງພາຍໃນ ສະບັບເລກທີ 06/ພນ ລົງວັນທີ 19 ຕຸລາ 2019 ເພື່ອເປັນຂົວຕໍ່ລະຫວ່າງກະຊວງ ຖວທ ກັບ ອົງການຄຸ້ມຄອງພະນັກງານ-ລັດຖະກອນ ມະຫາພາກ, ຜ່ານການປະສານສົມທົບບົນພື້ນຖານຄວາມຖືກຕ້ອງຊັດເຈນ ຂອງຂໍ້ມູນພະນັກງານ-ລັດຖະກອນ ຜູ້ມີສິດຮັບບັດໃນຄັ້ງນີ້ມີຈຳນວນ 673 ຄົນ ຈາກຈຳນວນພະນັກງານຢູ່ສູນກາງ ທັງໝົດ 1.479 ຄົນ (ສະແດງວ່າຍັງເຫຼືອ 806 ຄົນ ທີ່ຍັງບໍ່ທັນຮັບບັດ), ແຕ່ຄະນະຮັບຜິດຊອບຂອງພວກເຮົາຍັງຈະໄດ້ສືບຕໍ່ປະສານສົມທົບກວດກາຄວາມຖືກຕ້ອງ ຊັດເຈນຂອງຂໍ້ມູນຄືນໃໝ່ ເພື່ອໃຫ້ພະນັກງານ-ລັດຖະກອນ ພາຍໃນກະຊວງ ຖວທ ຂັ້ນສູນກາງ ໄດ້ຮັບບັດທັງໝົດໃນງວດຕໍ່ໆໄປ. (ຂ່າວ: ສຳນານ)