ມອບ​-​ຮັບ ໂຄງ­ການ​ກໍ່­ສ້າງ​ອາ­ຄານ​ຫຼັງ​ໃໝ່ຂອງ​ກະ­ຊວງ​ພາຍ​ໃນ

...

29.10.2019 9:10     

  ພິທີ ມອບ​-​ຮັບ​ອາຄານ​ຫຼັງ​ໃໝ່ຂອງ​ກະຊວງ​ພາຍ​ໃນ ມີ​ຂຶ້ນ​ໃນ​ວັນ​ທີ 28 ຕຸລາ​ນີ້ ທີ່​ກະຊວງ​ພາຍ​ໃນ ລະຫວ່າງທ່ານ ນາງ ສຸດ​ສະ​ດີ ລື​ໄຊ ປະທານ​ບໍລິສັດ​ວິ​ສາ​ຫະ​ກິດ​ສ່ວນບຸກຄົນລື​ໄຊ​ກໍ່ສ້າງ (ເປັນ​ຜູ້​ກ່າວ​ມອບ) ແລະ ທ່ານ ຄໍາ​ມູນ ວິ​ພົງ​ໄຊ ຮອງ​ລັດຖະມົນຕີ​ກະຊວງ​ພາຍ​ໃນ ຫົວໜ້າ​ຄະນະ​ຮັບຜິດຊອບ​ໂຄງການ​ກໍ່ສ້າງ (ເປັນ​ຜູ້​ກ່າວ​ຮັບ) ໂດຍ​ການ​ເຂົ້າ​ຮ່ວມ​ເປັນ​ສັກຂີ​ພິຍານ​ຂອງທ່ານ ຄໍາ​ໝັ້ນ ສູນ​ວິ​ເລີດ ລັດຖະມົນຕີ​ກະຊວງ​ພາຍ​ໃນ, ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

  ທ່ານ ຄໍາ​ມູນ ວິ​ພົງ​ໄຊ ໄດ້​ກ່າວ​ວ່າ: ອາ​ຄານ​ສໍາ​ນັກ​ງານ​ຫຼັງ​ໃໝ່ຂອງ​ກະຊວງ​ພາຍ​ໃນ ເປັນ​ສັນຍາ​ລັກ​ແຫ່ງ​ການເຕີບ​ໃຫຍ່​ຂະຫຍາຍຕົວຂອງ​ວຽກ​ງານ​ຂະແໜງ​ພາຍ​ໃນ ໂດຍ​ໄດ້​ສະແດງ​ໃຫ້​ເຫັນ​ເຖິງ​ຄວາມ​ເປັນ​ຫ່ວງ​ເປັນ​ໄຍ, ຄວາມ​ເອົາ ໃຈໃສ່​ໃນ​ການ​ຊີ້​ນໍາ-ນໍາ​ພາ​ຢ່າງ​ໃກ້ຊິດຕິດແທດ​ຂອງ​ພັກ ແລະ ລັດຖະບານ ໃນ​ການສືບ ຕໍ່​ປັບປຸງກໍ່ສ້າງ​ພື້ນຖານ​ໂຄງ​ລ່າງ​ອັນ​ຈໍາ​ເປັນ ເພື່ອ​ສ້າງ​ຄວາມ​ເຂັ້ມແຂງ​ໃຫ້​ແກ່​ຄະນະ​ພັກ​-​ຄະ​ນະ​ນໍາຕະຫຼອດ​ຮອດ ພະນັກງານ ​ລັດຖະກອນຂະ ແໜງ​ພາຍ​ໃນທົ່ວ​ປະເທດ, ພ້ອມ​ກັນ​ນີ້, ຄະນະ​ພັກ​-​ຄະ​ນະ​ນໍາ, ບັນດາ​ກົມ, ຫ້ອງການ, ສະ​ຖາ​ບັນ, ສູນ ແລະ ພະນັກ​ງານ​-​ລັດຖະກອນ​ທຸກ​ຄົນ ຕ້ອງ​ໄດ້​ພ້ອມ​ກັນ​ຍົກ​ສູງ​ຄວາມ​ຮັບຜິດຊອບ ໃນ​ການ​ປົກ​ປັກ​ຮັກສາ ແລະ ນໍາ​ໃຊ້​ອາຄານ​ຫຼັງ​ໃ​ໝ່​ນີ້​ໃຫ້​ດີ​ທີ່​ສຸດ, ໃຫ້​ຖື​ວ່າ​ເປັນ​ບ້ານ​ເຮືອນ​ຂອງ ພະນັກ​ງານ​-​ລັດຖະກອນ ທຸກ​ຄົນ​ມີ​ພັນທະ​ໃນ​ການ​ປົກ​ປັກ​ຮັກສາ​ຄວາມ​ສະຫງົບ, ຄວາມ​ປອດ​ໄພ, ອະນາ​ໄມ, ຮູ້​ປະ​ຢັດ​ນໍ້າ-​ໄຟ ຕາມ​ລະບຽບ​ການ​ຄຸ້ມ​ຄອງ​ນໍາ​ໃຊ້​ອາຄານ ສະຖານທີ່​ເຮັດ​ວຽກ​ໃຫ້​ດີ ແລະ ນໍາ​ໃຊ້​ໄດ້​ຍາວ​ນານ​ທີ່​ສຸດ.

  ໂຄງການ​ກໍ່ສ້າງ​ອາຄານ​ຫຼັງ​ໃໝ່, ເລີ່ມ​ລົງມື​ກໍ່ສ້າງ​ມາ​ແຕ່​ທ້າຍ​ປີ 2017 ຮອດ​ກາງ​ປີ 2019 ການກໍ່ສ້າງ​ ຈຶ່ງ​ສໍາ​ເລັດອາຄານ​ຫຼັງ​ດັ່ງກ່າວ​ເປັນ​ອາຄານ​ເບ​ຕົງ​ເສີມ​ເຫຼັກ, ມີ​ຂະໜາດ 17x41 ແມັດ ຊຶ່ງ​ປະກອບ​ມີ 5 ຊັ້ນ, ຊັ້ນ​ທີ 1-4 ເປັນ​ຫ້ອງ​ເຮັດ​ວຽກ ແລະ ຊັ້ນ​ທີ 5 ເປັນ​ຫ້ອງ​ປະຊຸມ ຊຶ່ງ​ປະກອບ​ເຟີ​ນີ​ເຈີ​ຄົບ​ຊຸດ ໂດຍ​ແມ່ນ​ໂຄງການ​ລົງທຶນ ແລະ ນໍາ​ໃຊ້​ງົບປະມານ ຂອງ​ລັດຖະບານ ຮ້ອຍ​ສ່ວນ​ຮ້ອຍ ເຂົ້າ​ໃນ​ການ​ກໍ່ສ້າງ ໃນ​ມູນ​ຄ່າ​ທັງ​​ໝົດ 29 ຕື້​ກວ່າ​ກີບ.
(ຂ່າວ: ແສງ​ຈັນ)