ງານບຸນນະມັດສະການພະທາດຫຼວງປີນີ້ ມີຫຼາຍກິດຈະກຳທີ່ໜ້າທ່ຽວຊົມ

...

31.10.2019 12:07     

  ງານບຸນນະມັດສະການພະທາດຫຼວງປີນີ້ມີຫຼາຍກິດຈະກໍາທີ່ໜ້າທ່ຽວຊົມ ໂດຍສະເພາະແມ່ນງານວາງສະແດງສິນຄ້າ ຊຶ່ງມີສິນຄ້າຫຼາກຫຼາຍຊະນິດມາວາງຂາຍໃຫ້ຜູ້ມາທ່ຽວຊົມໄດ້ເລືອກຊື້, ນອກຈາກນີ້ ຍັງມີຫຼາຍກິດຈະກຳທີ່ໜ້າທ່ຽວຊົມ. ພິທີຖະແຫຼງຂ່າວການຈັດງານບຸນດັ່ງກ່າວໄດ້ມີຂຶ້ນໃນວັນທີ 29 ຕຸລາຜ່ານມາ ໂດຍມີທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ສີຫຸນ ສິດທິລືໄຊ ກ່າວວ່າ: ການຈັດງານ ບຸນນະມັດສະການພະທາດຫຼວງວຽງຈັນ ເພື່ອປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງບຸນນະມັດສະການພະທາດຫຼວງຂອງຊາດລາວກໍຄືຊາວ ນວ ທີ່ເຄີຍສືບທອດກັນມາແຕ່ບູຮານນະການໃຫ້ດໍາລົງຄົງຢູ່ນໍາຊາວລາວຕະຫຼອດໄປ ພ້ອມນັ້ນເປັນການສ້າງໂອກາດ ຊຸກຍູ້ສົ່ງເສີມການທ່ອງທ່ຽວ-ການຄ້າຂາຍ ໂດຍສະເພາະສິນຄ້າ "ໜຶ່ງເມືອງ ໜຶ່ງຜະລິດຕະພັນ" ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດ໋ອບ ທີ່ກາຍເປັນກາໝາຍແຫ່ງຊາດ ແລະ ສິນຄ້າຂອງບັນດາວິສາຫະກິດຂະໜາດນ້ອຍ-ກາງ ໄດ້ມາວາງສະແດງ ຈໍາໜ່າຍສິນຄ້າທັງພາຍໃນ ແລະ ຕ່າງປະເທດ ນອກນັ້ນ, ເພື່ອເຮັດໃຫ້ງານບຸນນະມັດສະການພະທາດຫຼວງວຽງຈັນ ແລະ ງານຕະຫຼາດນັດວາງສະແດງຂາຍສິນຄ້າ ມີບັນຍາກາດເບີກບານມ່ວນຊື່ນ ຮັກສາໄດ້ຄວາມສາມັກຄີເປັນປຶກແຜ່ນ, ຍົກສູງຄຸນຄ່າມໍລະດົກມິ່ງເມືອງຂອງຊາດລາວ ຮັບປະກັນໄດ້ຄວາມສະຫງົບ ຄວາມເປັນລະບຽບຮຽບຮ້ອຍ ທາງດ້ານການຄ້າຂາຍ ດ້ວຍການຄຸ້ມຄອງຢ່າງຖືກຕ້ອງ ແລະ ຫຼຸດຜ່ອນປະກົດການຫຍໍ້ທໍ້ທີ່ເກີດຂຶ້ນພາຍໃນງານຈາກປີທີ່ແລ້ວ ຮັກສາໄດ້ຄວາມສະອາດຈົບງາມ. ສໍາລັບການວາງສະແດງສິນຄ້າທີ່ເດີ່ນພະທາດຫຼວງ (ສະໜາມຫຼວງ) ປະກອບມີ ສິນຄ້າໂອດ໋ອບ ສິນຄ້າຄອບຄົວຕົວແບບ ສິນຄ້າຜະລິດຕະພັນພາຍໃນ ແລະ ວາງສະແດງປະເພດສິນຄ້າປະເພດທ່ອງທ່ຽວ 215 ຫ້ອງ, ສິນຄ້າປະເພດບໍລິສັດຂາເຂົ້າ-ຂາອອກ, ເສື້ອຜ້າ, ສິນຄ້າທົ່ວໄປ ແລະ ເຄື່ອງຫຼິ້ນ 669 ຫ້ອງ, ປະເພດອາຫານ, ເຄື່ອງດື່ມ, ເຂົ້າຫຼາມ, ປີ້ງໄກ່ ຢູ່ຂອບເຂດຮອບນອກ 134 ຫ້ອງ ລວມທັງໝົດປະມານ 1.018 ຫ້ອງ, ສ່ວນຢູ່ສູນການຄ້າລາວ-ໄອເຕັກ ໄດ້ກະກຽມຮ້ານໄວ້ 488 ຮ້ານ ເພື່ອຮອງຮັບຊາວຄ້າຂາຍ. ງານບຸນນະມັດສະການພະທາດຫຼວງຈັດຂຶ້ນແຕ່ວັນທີ 5-11 ພະຈິກ 2019 ຄື: ວັນທີ 5 ພະຈິກ ເວລາ 17:00 ໂມງ ພິທີເປີດງານວາງສະແດງສິນຄ້າ ແລະ ສະຫຼຸບການປະຕິສັງຂອນພະທາດຫຼວງວຽງຈັນຄັ້ງທີ IV ວັນທີ 9 ພະຈິກ ເວລາ 16:00 ໂມງ ພິທີສູດປະລິຕະມຸງຄຸນທີ່ພະທາດຫຼວງ ວັນທີ 10 ພະຈິກ ເວລາ 13:30 ໂມງ ພິທີແຫ່ຜາສາດເຜິ້ງ, ວັນທີ 11 ພະຈິກ ຕອນເຊົ້າເວລາ 7:00 ໂມງ ພິ ທີໃສ່ບາດຖວາຍສັງຂະທານ ເວລາ 13:00 ໂມງ ພິທີແຫ່ລູກຄີ ແລະ ການແຂ່ງຂັນກິລາພື້ນບ້ານຕີຄີ ເວລາ 19:00 ໂມງ ພິທີວຽນທຽນ ແລະ ຈູດທູບທຽນ ບັ້ງໄຟສັກກະລະບູຊາອົງພະທາດ ສ່ວນງານວາງສະແດງສິນຄ້າຢູ່ສູນການຄ້າລາວ-ໄອເຕັກ ຈັດຂຶ້ນວັນທີ 6-17 ພະຈິກ 2019. ນອກຈາກນີ້ ຍັງມີສິລະປະວັນນະຄະດີ-ກິລາປະກອບມີ ການສະແດງການຟ້ອນ, ຂັບລໍາ ຈາກກອງສິລະປະກອນສູນກາງ, ສິລະປະກອນກອງທັບ, ສິລະປະຈາກເມືອງ, ສູນວັດທະນະທໍາເດັກ ແລະ ສະໂມສອນດ່ານຊ້າງ ແລະ ກິລາຕີມວຍ ເພື່ອເປັນການສ້າງບັນຍາກາດເຮັດໃຫ້ງານມີຄວາມເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມຂອງຊາດລາວເຮົາໃຫ້ຍືນຍົງຄຽງຄູ່ກັບຊາດລາວຕະຫຼອດໄປ. (ພາບ-ຂ່າວ: ແສງຈັນ)