ລາວ - ຫວຽດນາມ ປຶກສາຫາລືຮ່າງສົນທິສັນຍາ ວ່າດ້ວຍ ການຊ່ວຍເຫຼືອທາງດ້ານກົດໝາຍອາຍາ

...

01.11.2019 9:13     

  ໂດຍຕອບສະໜອງຕາມການເຊື້ອເຊີນຂອງອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ, ໃນລະຫວ່າງ ວັນທີ 24 ຫາ 26 ຕຸລາຜ່ານມາ, ຄະນະຜູ້ແທນ ສປປ ລາວ ຊຶ່ງນຳໂດຍ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ພ້ອມດ້ວຍຄະນະ ທີ່ຕາງໜ້າ ກະຊວງການຕ່າງປະເທດ, ກະຊວງຍຸຕິທຳ, ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເດີນທາງໄປຢ້ຽມຢາມ ແລະ ເຈລະຈາ ຮ່າງສົນທິສັນຍາ ວ່າດ້ວຍການຊ່ວຍເຫຼືອຊຶ່ງກັນ ແລະ ກັນ ທາງດ້ານກົດໝາຍອາຍາລາວ-ຫວຽດນາມ ຢູ່ນະ ຄອນຫຼວງຮ່າໂນ້ຍ ສສ ຫວຽດ ນາມ. ການເຈລະຈາໃນຄັ້ງນີ້, ແມ່ນ ການເຈລະຈາຮອບທີ ສອງໂດຍໄດ້ພ້ອມກັນສືບຕໍ່ແລກປ່ຽນຄຳຄິດຄຳເຫັນໃສ່ເນື້ອໃນແຕ່ລະມາດຕາຂອງຮ່າງສົນທິສັນຍາວ່າດ້ວຍການຊ່ວຍເຫຼືອຊຶ່ງກັນ ແລະ ກັນ ທາງດ້ານກົດໝາຍອາຍາລາວ - ຫວຽດນາມ ທີ່ຍັງບໍ່ທັນໄດ້ເຈລະຈາໃນຮອບທີໜຶ່ງ ທີ່ນະຄອນ-ຫຼວງພະບາງ ສປປ ລາວ ໃນເດືອນກັນຍາທີ່ຜ່ານມາ ພ້ອມທັງ ໄດ້ກວດກາຄືນເນື້ອໃນທັງໝົດຂອງສົນທິສັນຍາ ເພື່ອເປັນພື້ນຖານໃຫ້ແກ່ການສະເໜີລັດຖະບານ ອະນຸມັດລົງນາມ ໃນຕົ້ນປີໜ້ານີ້ ແລະ ນຳໄປຈັດຕັ້ງປະຕິບັດເຂົ້າສູ່ຊີວິດຕົວຈິງ ຢ່າງມີປະສິດທິຜົນ. ໃນວາລະການຢ້ຽມຢາມ ຄະນະຜູ້ແທນ ສປປ ລາວ ຍັງໄດ້ເຂົ້າຢ້ຽມຂໍ່ານັບ ທ່ານ ເລມິງຈິ ກຳມະການສູນກາງພັກກອມມູນິດຫວຽດນາມ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ, ທ່ຽວຊົມສະຖານທີ່ທ່ອງທ່ຽວທຳມະຊາດຈຳນວນໜຶ່ງ ຢູ່ແຂວງນິງບິງ, ສສ ຫວຽດນາມ ແລະ ໄດ້ເດີນທາງກັບຄືນປະເທດ ດ້ວຍຄວາມສະຫວັດດີພາບ. ຮ່າງສົນທິສັນຍາດັ່ງກ່າວ ຈະເປັນພື້ນຖານສໍາຄັນໃຫ້ແກ່ ການຮ້ອງຂໍ ແລະ ການພິຈາ ລະນາ ການຊ່ວຍເຫຼືອຊຶ່ງກັນ ແລະ ກັນທາງດ້ານກົດໝາຍອາຍາ, ຮັບປະກັນໃຫ້ການ ປະກອບຫຼັກຖານກໍຄືການດຳ ເນີນຄະດີອາຍາຄົບຖ້ວນ, ຮອບ ດ້ານ, ພາວະວິໄສ, ຕ້ານອາຊະຍາກໍາຂ້າມຊາດ, ຈຳກັດ, ສະກັດກັ້ນການກະທຳຜິດ, ປົກປ້ອງຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບ ທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ສ້າງເງື່ອນ ໄຂໃຫ້ປະຊາຊົນຂອງສອງປະເທດລາວ - ຫວຽດນາມ, ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດຂອງຕົນກ້າວຂຶ້ນຢ່າງບໍ່ຢຸດຢັ້ງ.