ປະຊາຊົນ ບ້ານທາດຫ້ວຍ ມີນ້ຳບາດານໃຊ້

...

01.11.2019 9:13     

  ບ້ານທາດຫ້ວຍ ເມືອງ ແລະ ແຂວງສາລະວັນ ມີພົນ ລະເມືອງທັງໝົດ 998 ຄົນ ຍິງ 530 ຄົນ, ມີ 225 ຄອບຄົວ, ມີ 192 ຫຼັງຄາເຮືອນ, ປະຊາຊົນສ່ວນໃຫຍ່ແມ່ນມີອາຊີບເຮັດນາປູກເຂົ້າເປັນຕົ້ນຕໍ ແລະ ປູກຝັງ, ລ້ຽງສັດ, ຄ້າຂາຍເປັນອາຊີບສຳຮອງ, ຜ່ານມາປະຊາຊົນແມ່ນມີຄວາມຫຍຸ້ງຍາກ ເພາະນໍ້າບໍ່ພຽງພໍກັບຄວາມຮຽກຮ້ອງຕ້ອງການຂອງປະຊາ ຊົນ ດັ່ງນັ້ນ, ຂະແໜງການທີ່ກ່ຽວຂ້ອງຈຶ່ງນຳສະເໜີຂໍການຊ່ວຍເຫຼືອ ໂດຍໄດ້ຮັບການຊ່ວຍເຫຼືອຈາກມູນນິທິໂດງສານ ສ.ເກົາຫຼີ ໃນການກໍ່ສ້າງນໍ້າບາດານ 1 ບໍ່ ມູນຄ່າ 3.600 ໂດລາ ຫຼື 30 ລ້ານກວ່າກີບ. ໂຄງການເຈາະນໍ້າບາ ດານ ໄດ້ເລີ່ມລົງມືຈັດຕັ້ງປະ ຕິບັດ 1 ເດືອນກວ່າ ຈຶ່ງສຳເລັດ ໂດຍໄດ້ແບ່ງອອກເປັນ 4 ໜ້າວຽກຄື: ວຽກເຈາະລວມວັດສະດຸລົງບໍ່ (ແບບປິດ) ໄດ້ເລີ່ມເຈາະບໍ່ນໍ້າບາດານ ຂະໜາດ 150 ມີລີແມັດ, ຄວາມເລິກ 36,5 ແມັດ, ລົງທໍ່ PVC 100, ຊີມັງປິດກັນຊຶມ, ອະນາໄມບໍ່ນໍ້າບາດານ ໃຫ້ນໍ້າໃສສະອາດ, ວຽກປໍ້າຟີແດັບ, ເທກັນເປື້ອນ, ຕິດຕັ້ງໂປມອາຟີແດັບ ແລະ ກວດກາຄຸນນະພາບຂອງນໍ້າ (ຢັ້ງຢືນຄຸນນະພາບນໍ້າຈາກພະແນກສາທາລະນະສຸກແຂວງ). ນອກນັ້ນ ໄດ້ສ້າງຮົ້ວອ້ອມ, ມຸງຫຼັງຄາ ແລະ ອະ ນາໄມສະຖານທີ່ບໍລິເວນອ້ອມຂ້າງຢ່າງສະອາດຈົບງາມ. ຍ້ອນມີໂຄງການເຈາະນໍ້າບາດານ ຈຶ່ງເຮັດໃຫ້ພໍ່ແມ່ປະຊາຊົນພາຍໃນບ້ານສະດວກສະບາຍຂຶ້ນ ໃນການຊົມໃຊ້ນໍ້າເຂົ້າໃນຊີວິດປະຈຳວັນດີຂຶ້ນ, ໃນໂອກາດນີ້, ມູນນິທິໂດງສານ ສ.ເກົາຫຼີ ກໍໄດ້ມອບເຄື່ອງຮັບໃຊ້ຄົວເຮືອນອີກຈຳນວນໜຶ່ງເປັນຕົ້ນ: ຄຸ 200 ໜ່ວຍ, ໂອຕັກນໍ້າ 200 ໜ່ວຍ ແລະ ສັງກະສີມຸງຫຼັງຄາ ມູນຄ່າເກືອບ 6 ລ້ານກີບ. ພິທີມອບ-ຮັບ ແລະ ເປີດນຳໃຊ້ ໄດ້ຈັດຂຶ້ນໃນວັນທີ 28 ຕຸລາຜ່ານມາ ຢູ່ບ້ານທາດຫ້ວຍ ເມືອງ ແລະ ແຂວງສາ ລະວັນ ໂດຍການເຂົ້າຮ່ວມຂອງ ທ່ານ ທຶງ ຈອມມະນີ ເຈົ້າເມືອງໆ ສາ ລະວັນ, ທ່ານ ແບັກ ຊ໋ອງ ຢ໋ອງ ຜູ້ປະສານງານມູນນິທິ ໂດງ ສານ ປະຈຳ ສປປ ລາວ, ມີຄະນະປະ ຈຳພັກເມືອງ, ກຳມະການພັກເມືອງ, ຜູ້ປະສານງານມູນນິທິ ພ້ອມດ້ວຍອົງການຈັດຕັ້ງຂັ້ນເມືອງ, ບ້ານຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມເປັນສັກຂີພິຍານ. (ພາບ-ຂ່າວ: ທິດລານີ ໂຄດໂຍທາ)