ຊູໂຈ ເມືອງທ່ອງທ່ຽວທີ່ສວຍງາມທາງດ້ານທຳມະຊາດ

...

01.11.2019 9:13     

  ສື່ມວນຊົນລາວໄດ້ມາທັດ ສະນະສຶກສາທີ່ນະຄອນຊ່າງໄຮ່ ລະຫວ່າງວັນທີ 14 ຫາ 24 ຕຸລາຜ່ານມາ ໄດ້ມີໂອກາດເດີນທາງໄປຢ້ຽມຢາມເມືອງຊູໂຈ (Su Zhuo) ແຂວງຈຽງຊູ (Jiang Su) ສປ ຈີນ. ເມືອງຊູໂຈເປັນເມືອງບູຮານອີກເມືອງໜຶ່ງ, ສ້າງຂຶ້ນໃນສະໄໝຂົງຈື້ ແລະ ມີອາຍຸປະມານ 1.500 ຫາ 1.600 ປີ, ເມືອງຊູໂຈມີປະ ຊາກອນທັງໝົດປະມານ 10 ລ້ານກວ່າຄົນເປັນເມືອງດຽວໃນ ສປ ຈີນ ທີ່ບໍ່ໄດ້ມີການປ່ຽນ ແປງໂຄງສ້າງຂອງເມືອງ, ເນື່ອງຈາກວ່າເມືອງຊູໂຈມີແມ່ນໍ້າອ້ອມຮອບຕົວເມືອງ. ປັດຈຸບັນຕົວເມືອງຊູໂຈໄດ້ແບ່ງອອກເປັນສອງເຂດຄື: ເຂດເມືອງເກົ່າ ແລະ ເຂດເມືອງໃໝ່ ສຳລັບເຂດເມືອງເກົ່າຍັງຄົງຮັກສາແບບບ້ານເຮືອນສະໄໝບູຮານໄວ້ ແລະ ຈະບໍ່ອະນຸຍາດໃຫ້ສ້າງ ຕຶກ ຫຼື ອາຄານສູງເພີ່ມ, ສ່ວນເຂດເມືອງໃໝ່ແມ່ນຕັ້ງຢູ່ແຖວເຂດທະເລສາບໄທຟູ ໂດຍມີການລົງທຶນສ້າງຕຶກ ແລະ ອາ ຄານສູງ, ມີຫ້າງສັບພະສິນຄ້າ, ມີລົດໄຟຟ້າ, ສິ່ງອໍານວຍຄວາມສະດວກຕ່າງໆທີ່ສໍາຄັນ ແລະ ຍັງເປັນສະຖານທີ່ທ່ອງທ່ຽວທີ່ສໍາຄັນຕື່ມອີກ. ໃນປັດຈຸບັນເມືອງຊູໂຈ ໄດ້ກາຍເປັນເມືອງອຸດສາຫະກໍາ ແລະ ການຄ້າທີ່ສໍາຄັນ ໂດຍໄດ້ມີນັກລົງທຶນຈາກປະເທດສິງກະໂປເຂົ້າມາລົງທຶນກ່ຽວກັບການຜະລິດເຄື່ອງອາໄຫຼ່ລົດທຸກຊະນິດລວມທັງເຄື່ອງອາໄຫຼ່ລົດລະບົບໂອໂຕ ທີ່ບໍ່ມີຄົນຂັບ, ມີສິນຄ້າເພື່ອການສົ່ງອອກທັງພາຍໃນ ແລະ ໄປທົ່ວໂລກຄື: ຜະລິດຕະພັນຜ້າໄໝ ແລະ ຊາຂຽວຫຼົງຈິງທີ່ມີລົດຊາດ ແລະ ມີກິ່ນຫອມມີສັບພະຄຸນດີຕໍ່ສຸຂະພາບເໝາະສຳລັບຊື້ເປັນຂອງຕ້ອນຂອງຝາກ. ນອກຈາກນີ້, ເມືອງຊູໂຈ ຍັງມີສວນທໍາມະຊາດທີ່ສວຍ ງາມຄື: ສວນຈົວເຈີ້ນທີ່ມີອາຍຸປະມານ 500 ກວ່າປີ, ມີເນື້ອທີ່ປະມານ 52 ພັນຕາແມັດ ແລະ ໄດ້ຂຶ້ນທະບຽນເປັນສວນມໍລະ ດົກໂລກຈາກອົງການອຸຍແນັສໂກ ໃນປີ 1997 ຢູ່ເມືອງຊູໂຈມີສວນທີ່ຄ້າຍຄືກັນກັບສວນຈົວເຈີ້ນ ຫຼາຍກວ່າ 50 ແຫ່ງ ແລະມີ 7 ແຫ່ງແມ່ນໄດ້ຂຶ້ນທະບຽນເປັນສວນມໍລະດົກໂລກແລ້ວ. ດ້ວຍເຫດນີ້ ເມືອງດັ່ງກ່າວ ໃນແຕ່ລະວັນຈະມີນັກທ່ອງທ່ຽວທັງພາຍໃນ ແລະ ຕ່າງປະເທດມາທ່ອງທ່ຽວຫຼາຍແສນຄົນຕໍ່ວັນ. (ຂ່າວ-ພາບ: ຍຸພິນທອງ)