ເປີດງານບຸນນະມັດສະການພະທາດຫຼວງວຽງຈັນ ປະຈຳປີ 2019 ຢ່າງເປັນທາງການ

...

06.11.2019 9:24     

  ງານບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າປະຈໍາປີ 2019 ໄດ້ເປີດຂຶ້ນຢ່າງເປັນທາງການ ໃນວັນທີ 5 ພະຈິກນີ້ ທີ່ເດີ່ນພະທາດຫຼວງວຽງຈັນ ໂດຍການເຂົ້າຮ່ວມເປັນກຽດໃນພິທີຂອງ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກ ລັດຖະມົນຕີ ປະທານຄະນະກວດກາສູນກາງພັກ ແລະ ອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ເຈົ້າຄອງນະຄອນຫຼວງວຽງຈັນ ຫົວໜ້າຄະນະຮັບຜິດຊອບລະດັບຊາດ ເພື່ອປະຕິສັງຂອນພະທາດຫຼວງ ຄັ້ງທີ IV ພ້ອມດ້ວຍບັນດາທ່ານຜູ້ນໍາພັກ-ລັດ, ບັນດາທ່ານທີ່ມາຈາກກະຊວງ -ອົງການອ້ອມຂ້າງສູນກາງ ແລະທ້ອງຖິ່ນ ແລະ ແຂກຖືກເຊີນ ເຂົ້າຮ່ວມຢ່າງຫຼວງຫຼາຍ. ໃນພິທີ ທ່ານ ສິນລະວົງ ຄຸດໄພທູນ ໄດ້ກ່າວວ່າ: ມື້ນີ້ ວັນທີ 5 ພະຈິກ 2019 ພໍດີກົງກັບມື້ຂຶ້ນ 9 ຄາໍ່ ເດືອນ 12 ຊຶ່ງເປັນວັນໜຶ່ງທີ່ມີຄວາມໝາຍ ສໍາຄັນຂອງຊາວລາວ ແລະ ຊາວນະຄອນຫຼວງວຽງຈັນ ນັ້ນເປັນໄລຍະຂອງວັນຄົບຮອບບຸນນະມັດສະການພະທາດຫຼວງອີກວາລະໜຶ່ງ. ການຈັດງານບຸນນະມັດສະການພະທາດຫຼວງປີນີ້ ແມ່ນຢູ່ໃນບັນຍາກາດທີ່ທົ່ວປະເທດລາວ ພວມອອກແຮງແຂ່ງຂັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ,ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ຢ່າງເປັນຂະບວນຟົດຟື້ນ ພິເສດປີນີ້ເປັນປີໜຶ່ງທີ່ເຮັດ ສໍາເລັດການປະຕິສັງຂອນອົງພະທາດຫຼວງ ຄັ້ງທີ IV ແລະ ພິພິທະພັນຫໍພະແກ້ວ ຄັ້ງທີ III; ດ້ວຍເຫດນັ້ນ ຈິດໃຈສໍາຄັນຂອງການຈັດງານບຸນປີນີ້ ນະຄອນຫຼວງວຽງຈັນຖືເອົາງານຄັ້ງນີ້ ເປັນງານບຸນແຫ່ງການຈາລຶກ ແລະ ສັນລະເສີນ ສັດທາຄຸນງາມຄວາມດີຂອງຜູ້ທີ່ໂມທະນາທານ ປະກອບສ່ວນບູລະນະອົງພະທາດ ແລະ ຫໍ ພະແກ້ວ, ເປັນການສົ່ງເສີມຄວາມສີວິໄລ, ອະລິຍະທໍາ ໄປພ້ອມໆກັນ ແລະ ເປັນງານບຸນທີ່ສົ່ງເສີມສ້າງເສດຖະກິດສີຂຽວ ປະກອບສ່ວນແກ້ໄຂການປ່ຽນແປງດິນຟ້າອາກາດ. ການຈັດງານປີນີ້, ຄະນະກໍາມະການຫວັງວ່າ ຈະເປັນອີກປີໜຶ່ງທີ່ສ້າງຄວາມປະທັບໃຈໃຫ້ແກ່ຜູ້ມາທ່ຽວຊົມ, ມີຄວາມເປັນລະບຽບຮຽບຮ້ອຍ ທັງມີຄວາມສີວິໄລ, ຄວາມງົດງາມ ສ່ອງແສງໃຫ້ເຫັນໝາກຜົນສໍາເລັດອັນໃໝ່ ໃນພາລະກິດສ້າງສາພັດທະນາປະເທດຊາດ; ການຈັດງານປີນີ້ ເລັ່ງໃສ່ພິທີທາງສາສະໜາເປັນເຄົ້າ ຄຽງຄູ່ກັນ ກໍມີກິດ ຈະກໍາອື່ນໆດັ່ງທີ່ເຄີຍປະຕິ ບັດຜ່ານມາເຊັ່ນ: ດົນຕີພື້ນ ເມືອງ, ການວາງສະແດງສິນ ຄ້າ, ວາງສະແດງທ່ອງທ່ຽວ, ຮູບພາບ, ການສ້າງເຮືອນຈໍາລອງຊົນເຜົ່າ ແລະ ກິດຈະກໍາອື່ນໆ ເພື່ອດຶງດູດຄວາມສົນໃຈແລະ ສ້າງສີສັນສະເໜ່ພາຍໃນງານໃຫ້ຄຶກຄື້ນມ່ວນຊື່ນ. ງານບຸນນະມັດສະການພະທາດຫຼວງວຽງຈັນຈະດໍາເນີນໄປຈົນຮອດວັນທີ 11/11/2019, ສໍາລັບງານວາງສະແດງສິນຄ້າ ທີ່ສູນການຄ້າ ລາວ-ໄອເຕັກ ຈະສືບຕໍ່ຈົນຮອດວັນທີ 17/ 11/2019. ( ຂ່າວ: ແສງຈັນ).