ສາລະວັນ ທຳລາຍສິນຄ້າໝົດອາຍຸ

...

22.11.2019 9:32     

  ພາຍຫຼັງເຈົ້າໜ້າທີ່ໆກ່ຽວ ຂ້ອງຂອງແຂວງສາລະວັນໄດ້ລົງເຄື່ອນໄຫວກວດກາສິນຄ້າປະເພດຕ່າງໆທີ່ຈຳໜ່າຍຕາມທ້ອງຕະຫຼາດ ເພື່ອປ້ອງກັນຜູ້ອຸປະໂພກ ແລະ ບໍລິໂພກ ຊຶ່ງສາມາດກວດພົບເຫັນສິນຄ້າໝົດອາຍຸ, ເສື່ອມຄຸນນະພາບ ແລະ ຈຳໜ່າຍນອກລະບົບ, ທັງໄດ້ກັກຢຶດສິນຄ້າ ຈຳນວນ 7 ລາຍການ. ທ່ານ ສຸກໄຊ ຈັນທະນາຄອນ ຫົວໜ້າຂະແໜງການຄ້າພາຍໃນໄດ້ລາຍງານໃຫ້ຮູ້ວ່າ: ສິນຄ້າທີ່ນຳມາທຳລາຍໃນຄັ້ງນີ້ ສ່ວນໃຫຍ່ແມ່ນສິນຄ້າໝົດອາຍຸ, ເສື່ອມຄຸນນະພາບເປັນຕົ້ນ ຈັກສະຕິນ, ວັດຖຸປະ ກອບເປັນອາວຸດລ່າເນື້ອ ແລະຈານດາວທຽມທີ່ມີການນຳເຂົ້າບໍ່ຖືກຕ້ອງຕາມລະບຽບການ ຊຶ່ງເຈົ້າໜ້າທີ່ພະແນກອຸດສາຫະກໍາ ແລະ ການຄ້າຮ່ວມກັບພາກສ່ວນທີ່ກ່ຽວຂ້ອງໄດ້ລົງກວດກາຕາມທ້ອງຕະຫຼາດ, ຮ້ານຄ້າ ແລະ ສະຖານທີ່ຈຳ ໜ່າຍຂອບເຂດທົ່ວແຂວງໄດ້ກວດພົບເຫັນ ແລະ ຮ່ວມກັນກັກຢຶດສິນຄ້າທີ່ໝົດອາຍຸ, ເສື່ອມຄຸນນະພາບ ແລະ ສິນ ຄ້າຈຳໜ່າຍນອກລະບົບທີ່ວາງຂາຍໃນຕະຫຼາດ ຈຳນວນ 47 ຮ້ານ, ກວດພົບເຫັນ ແລະ ກັກຢຶດໄດ້ 7 ລາຍການຄື: ສິນ ຄ້າປະເພດຈານດາວທຽມ ແລະ ຊິ້ນສ່ວນຂອງຈານທີ່ນຳເຂົ້າ ນອກລະບົບ ຈຳນວນ 243 ກ່ອງ, ສິນຄ້າປະເພດເຂົ້າໜົມ ມີ 196 ແຟັກ, ອາຫານ ແລະ ເຄື່ອງດື່ມຈຳນວນ 671 ຖົງ, ເຄື່ອງສຳອາງຈຳນວນ 255 ກັບ, ສິນຄ້າປະເພດຢາສູບຈຳນວນ 6 ຕຸດ ແລະ ຊິ້ນສ່ວນສັດ (ແຊ່ແຂງ) ທີ່ມີສານປົນເປື້ອນເກີນ ຄ່າມາດຕະຖານຈຳນວນ 358,9 ກິໂລ. ນອກນີ້ຍັງໄດ້ນຳ ເອົາສິນຄ້າຫ້າມຈຳໜ່າຍທີ່ໄດ້ກັກຢຶດໃນສົກປີຜ່ານມາ ທຳລາຍຮ່ວມກັນ ເປັນຕົ້ນຈັກສະຕິນ, ຊິ້ນສ່ວນຂອງຈັກ ແລະ ອາໄຫຼ່ ຈຳນວນ 274 ຊິ້ນສ່ວນ ຊຶ່ງລວມມູນຄ່າການທຳລາຍປະເພດສິນຄ້າດັ່ງກ່າວນີ້ 116 ລ້ານກວ່າກີບ. ນອກຈາກການກັກຢຶດແລ້ວຍັງໄດ້ປຸກລະດົມພໍ່ຄ້າຊາວຂາຍໃຫ້ຜູ້ປະກອບການຕ້ອງເຄົາລົບລະບຽບກົດ ໝາຍ ແນໃສ່ສົ່ງເສີມ ແລະ ປົກ ປ້ອງບັນດາຫົວໜ່ວຍທຸລະກິດ ການຄ້າທີ່ເຄື່ອນໄຫວຢ່າງຖືກ ຕ້ອງ, ສອດຄ່ອງກັບລະບຽບກົດ ໝາຍໃຫ້ເປັນໄປຕາມກົນໄກເສດຖະກິດຕະຫຼາດທີ່ມີການດັດສົມຂອງລັດສົ່ງເສີມການຜະລິດສິນຄ້າ ແລະ ປົກປ້ອງສິດຜົນປະໂຫຍດຂອງຜູ້ຊົມໃຊ້. ພີທີທຳລາຍສິນຄ້າດັ່ງ ກ່າວໄດ້ຈັດຂຶ້ນໃນວັນທີ 20 ພະ ຈິກນີ້ ຢູ່ເດີ່ນບິນແຂວງສາລະ ວັນ ໂດຍການເຂົ້າຮ່ວມຂອງທ່ານ ບຸນຊູ ລັດສະໝີ ຮັກສາການຫົວໜ້າພະແນກອຸດສາຫະກຳ ແລະ ການຄ້າ, ທ່ານ ສົມຄິດ ວົງສາລີ ຕາງໜ້າຫ້ອງວ່າການປົກຄອງແຂວງ ພ້ອມດ້ວຍແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງ, ພະນັກງານວິຊາການ ແລະ ຜູ້ປະກອບການຈຳນວນໜຶ່ງເຂົ້າຮ່ວມ. (ພາບ-ຂ່າວ: ທິດລານີ ໂຄດໂຍທາ)