ປະຊາຊົນ ແຂວງສະຫວັນນະເຂດ ສະເໜີໃຫ້ລັດຖະບານ ແກ້ໄຂ 7 ບັນຫາສຳຄັນ

...

25.11.2019 9:11     

  ທ່ານ ບຸນເຕັມ ຊ່ວງສາຍະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 13 ແຂວງສະຫວັນນະເຂດໄດ້ໃຫ້ສຳພາດຕໍ່ສື່ມວນຊົນ ໃນໂອກາດເຂົ້າຮ່ວມກອງປະຊຸມສະໄໝສາ ມັນ ເທື່ອທີ 8 ຂອງສະພາແຫ່ງຊາດຊຸດທີ VIII ວ່າ: ຜ່ານການ ເຄື່ອນໄຫວພົບປະເຜີຍແຜ່ຜົນ ສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນແຂວງຊຸດທີ I ແລະ ຜ່ານການເຄື່ອນໄຫວຕິດຕາມກວດກາແຜນພັດ ທະ ນາເສດຖະກິດ-ສັງຄົມ ຮ່ວມກັບຄະນະປະຈຳສະພາແຫ່ງຊາດ, ຮ່ວມກັບກຳມະການບັນດາເຜົ່າໄດ້ເຄື່ອນໄຫວຕິດ ຕາມກວດກາ ແລະ ຊຸກຍູ້ວຽກງານພັດທະນາ ແລະ ລຶບ ລ້າງຄວາມທຸກຍາກ, ວຽກງານສາ ສະໜາເຂດຊົນນະບົດຫ່າງ ໄກສອກຫຼີກ ແລະ ເຄື່ຶອນໄຫວຮ່ວມກັບກຳມາທິການວັດທະນະທຳສັງຄົມ ໃນວຽກງານໂພຊະນາການ, ການສ້າງວິຊາຊີບ ແລະ ພັດທະນາສີມືແຮງງານ ພ້ອມກັນນັ້ນໄດ້ເຂົ້າຮ່ວມການພັດທະນາຂອງແຂວງ, ເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານໃນຫຼາຍຂົງເຂດ,ແຕ່ຫຼາຍກວ່າໝູ່ແມ່ນໄດ້ໃກ້ຊິດຕິດແທດກັບປະຊາຊົນເຂດທີ່ໄດ້ຮັບຜົນກະທົບຈາກເຂື່ອນໄຟຟ້າເຊລະນອງ I, ໂຄງການປູກໄມ້ກິນໝາກຂອງບໍລິສັດສຸກຮຸ່ງເຮືອງ ແລະ ເຄື່ອນໄຫວຊ່ວຍເຫຼືອປະຊາຊົນບັນດາເຜົ່າທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນໄລຍະຜ່ານມາ ຊຶ່ງມີສ່ວນຮ່ວມໃນການແກ້ໄຂບັນດາບັນຫາຕ່າງໆທີ່ເກີດຂຶ້ນໃນເຂດເລືອກຕັ້ງຂອງຕົນ. ຜ່ານການເຄື່ອນໄຫວພົບປະກັບຜູ້ມີສິດເລືອກຕັ້ງກໍໄດ້ຮັບຄຳສະເໜີຈາກອົງການຈັດຕັ້ງ ແລະ ປະຊາຊົນບັນດາເຜົ່າ ຊຶ່ງສະເໜີມີດັ່ງນີ້: ໜຶ່ງ: ສະເໜີໃຫ້ລັດຖະບານຊ່ວຍສ້າງໂຮງ ຮຽນ, ສຸກສາລາ ພ້ອມທັງອຸ ປະກອນຮັບໃຊ້ການຮຽນການ ສອນ ກໍຄືອຸປະກອນການແພດທີ່ຈຳເປັນເພື່ອຮັບໃຊ້ໃນວຽກງານດັັ່ງກ່າວເພາະວ່າບາງບ່ອນຍັງຂາດເຂີນ, ສອງ: ສະເໜີລັດຖະບານໃຫ້ສືບຕໍ່ເພີ່ມໂຕເລກລັດຖະກອນໃໝ່ຕິດພັນກັບການກວດກາການສອບເສັງໃຫ້ຮັບປະກັນທາງດ້ານຄຸນນະພາບບໍ່ໃຫ້ເຫັນແກ່ຄົນເພິ່ນຄົນໂຕ ໂດຍສະເພາະໂຕເລກລັດຖະກອນຄູ, ແພດ ແລະ ຂະແໜງການອື່ນໆທີ່ເຮັດວຽກຮັບໃຊ້ໃນເຂດຊົນນະບົດຫ່າງໄກສອກຫຼີກ, ສາມ: ຊຸກຍູ້ວຽກງານພັດທະນາຊົນນະບົດແກ້ໄຂຄວາມທຸກຍາກໃຫ້ກາຍເປັນຮູບປະທຳ ໂດຍການສົ່ງພະ ນັກງານວິຊາການແນະນຳການປູກ, ການລ້ຽງເພື່ອຍົກສູງສະມັດຖະພາບການຜະ ລິດ, ຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ຄ່ອຍໆກ້າວຂຶ້ນຜະລິດເພຶື່ອສົ່ງອອກສ້າງລາຍຮັບໃນລະດັບທີ່ແນ່ນອນ, ສີ່: ສະເໜີລັດຖະບານປະຕິບັດນະໂຍບາຍໂຕເລກລັດຖະກອນໃໝ່ໃຫ້ລູກຫຼານປະຊາຊົນບັນດາເຜົ່າຜູ້ທີ່ທຸກ ຍາກເມື່ອຮຽນຈົບແລ້ວໃຫ້ມີ ວຽກເຮັດງານທຳຕາມນະໂຍ ບາຍຂອງພັກ-ລັດທີ່ມີຕໍ່ເພດ-ເຜົ່າ, ເພາະວ່າຜ່ານມາບໍ່ໄດ້ຮັບໂຕເລກລັດຖະກອນໃໝ່, ຫ້າ: ສຳລັບປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້າເຊລະນອງ I ເຂົາເຈົ້າສະເໜີໃຫ້ລັດຖະບານຮີບຮ້ອນບຸກເບີກເນື້ອທີ່ທຳການຜະລິດບ່ອນໃໝ່ເພື່ອທົດແທນບ່ອນເກົ່າ, ຊ່ວຍແກ້ໄຂນໍ້າກິນ, ນໍ້າໃຊ້, ເຂົ້າ-ອາຫານ ຕາມທີ່ໄດ້ຕົກລົງກັນໃຫ້ທັນການ ແລະ ເສັ້ນທາງໃຫ້ສາມາດທຽວໄດ້ສອງລະດູໃຫ້ສະດວກສະບາຍກວ່າເກົ່າທຽບໃສ່ໃນໄລຍະຜ່ານມາ, ຫົກ: ສະເໜີໃຫ້ລັດຖະບານຮີບຮ້ອນຟື້ນຟູພື້ນຖານໂຄງລ່າງທີ່ໄດ້ຮັບຜົນກະທົບຈາກໄພນໍ້າຖ້ວມໃນໄລຍະຜ່ານມາ ເພື່ອຮັບໃຊ້ການຜະລິດລະດູແລ້ງພ້ອມທັງແນວພັນພືດໃຫ້ທັນການ ແລະ ຟື້ນຟູເສັ້ນທາງໃຫ້ສາມາດສັນຈອນໄດ້ເປັນປົກກະຕິ ແລະ ເຈັດ: ພິເສດຜູ້ທີ່ມີສິດເລືອກຕັ້ງສະເໜີໃຫ້ລັດຖະບານໃຫ້ຄວາມສຳຄັນຮີບຮ້ອນແກ້ໄຂປະກົດການຫຍໍ້ທໍໍ້ທີ່ແຜ່ລາມໃນປັດຈຸບັນເຊັ່ນ: ການຊື້-ຂາຍ ມົ້ວສຸມຢາເສບຕິດ, ການໃຊ້ ໜ້າທີ່ຕໍາແໜ່ງຂອງເຈົ້າໜ້າທ່ີພະນັກງານລັດຖະກອນຈຳ ນວນໜຶ່ງ ເພາະວ່າບັນຫາເຫຼົ່ານີ້ພາໃຫ້ການ ຈັດຕັ້ງພັກ-ລັດ ເສື່ອມເສຍພາບພົດບົດບາດ. ສັງລວມແລ້ວ ຄຳສະເໜີຂອງຜູ້ມີສິດເລືອກຕັ້ງ, ຂອງປະຊາຊົນບັນດາເຜົ່າແມ່ນສົມເຫດສົມຜົນສິ່ງທີ່ເຂົາເຈົ້າເຮັດບໍ່ໄດ້ ແລະ ລັດຖະບານຜູ້ທີ່ມີສິດອຳນາດສາມາດຊ່ວຍໃຫ້ເຂົາເຈົ້າ. (ພາບ: ແສງຈັນ, ຂ່າວ: ບຸນອູ້ມ)