ງານມະຫະກຳບຸນຊ້າງ ປີ 2020 ແຂວງໄຊຍະບູລີ ຈະຈັດຂຶ້ນໃນເດືອນກຸມພາ

...

25.11.2019 9:14     

  ງານຖະແຫຼງຂ່າວງານມະຫະກຳບຸນຊ້າງ ປີ 2020 ທີ່ແຂວງໄຊຍະບູລີ ໄດ້ຈັດຂຶ້ນໃນວັນທີ 19 ພະຈິກຜ່ານມາ ຢູ່ທີ່ຫ້ອງວ່າການປົກຄອງແຂວງໄຊຍະບູລີ ຊຶ່ງແມ່ນ ທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງ ທັງເປັນປະທານຈັດງານມະຫະກຳບຸນຊ້າງແຂວງໄຊຍະບູລີ ໄດ້ຖະແຫຼງວ່າ: ສຳລັບການຈັດງານມະຫະກຳບຸນຊ້າງໄຊຍະບູລີໃນປີ 2020 ນີ້ ຖືວ່າເປັນຄັ້ງທີ 14 ຊຶ່ງປະກອບມີກິດຈະກຳຕ່າງໆເພື່ອໃຫ້ບັນດາທ່ານໄດ້ມາທ່ຽວມາຊົມ ໂດຍສະເພາະການວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ສິນຄ້າກະສິກຳ, ຫັດຖະກຳ, ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນພາຍໃນແຂວງ, ຕ່າງແຂວງ ແລະ ສິນຄ້າຈາກປະເທດໃກ້ຄຽງ ຊຶ່ງຈະເລີ່ມເປີດໃຫ້ບໍລິການໃນວັນທີ 18 ກຸມພາ 2020 ເປັນຕົ້ນໄປ ແລະ ໃນວັນທີ 21 ກຸມພາ 2020 ຈະໄດ້ຈັດພິທີເຮັດບຸນ ຕັກບາດອຸທິດກຸສົນໃຫ້ຊ້າງ ສໍາລັບພິທີເປີດເປັນທາງການແມ່ນຈະໄດ້ຈັດຂຶ້ນໃນວັນທີ 22 ກຸມພາ ປີ 2020 ເປັນຕົ້ນໄປຈົນເຖິງວັນທີ 28 ກຸມພາ 2020 ໂດຍຈະມີຊ້າງເຂົ້າຮ່ວມທັງໝົດ 71 ໂຕ ຊຶ່ງມີຄວາມໝາຍ ແລະ ມີຄວາມຜູກພັນກັບວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ພິເສດປີນີ້ມີຊ້າງເຜືອກເຂົ້າຮ່ວມ ຊຶ່ງເປັນຊ້າງມິ່ງຂວັນທີ່ຄູ່ບ້ານຄູ່ເມືອງຂອງຊາດລາວເຮົາ, ສ່ວນກິດຈະກຳຫຼັກໃນງານມະຫະກຳບຸນຊ້າງປີ 2020 ແມ່ນຈະເນັ້ນໃສ່ກິດຈະກຳທີ່ຕິດພັນກັບຊ້າງ ແລະ ການອະນຸລັກຊ້າງ ໂດຍສະເພາະແມ່ນການສະແດງຂອງຊ້າງຄຳຮູ້, ພິທີບາສີສູ່ຂວັນຊ້າງ, ການໃຫ້ອາຫານຊ້າງ, ຂີ່ຊ້າງຊົມເມືອງ ແລະ ກິດຈະກຳອື່ນໆ. ພ້ອມນັ້ນໃນແຕ່ລະວັນໄລຍະການຈັດງານແມ່ນຈະຈັດໃຫ້ມີກິດຈະກໍາທ່ອງທ່ຽວແຫຼ່ງທໍາມະຊາດທີ່ສວຍງາມ, ວັດທະນະທໍາຂອງປະຊາຊົນ 8 ເຜົ່າທີ່ເປັນເອກະລັກຂອງຊາວແຂວງໄຊຍະບູລີໃນຄໍ່າຄືນ ຈັດໃຫ້ມີການຄົບງັນ, ການສະແດງຄອນເສີດສິລະປະວັນນະຄະດີຂອງພາກສ່ວນຕ່າງໆ. ແຂວງໄຊຍະບູລີເປັນແຂວງໜຶ່ງຕັ້ງຢູ່ພາກເໜືອຂອງ ສປປ ລາວ, ມີເສັ້ນທາງຄົມມະນາຄົມທີ່ສະດວກໃນການເຊື່ອມຕໍ່ກັບບັນດາແຂວງຕ່າງໆ ແລະ ສາ ມາດເຊື່ອມຕໍ່ກັບປະເທດໃກ້ຄຽງ ແລະ ອະນຸພາກພື້ນທີ່ສໍາຄັນ, ມີປ່າສະຫງວນແຫ່ງຊາດທີ່ອຸດົມສົມບູນໄປດ້ວຍຊີວະນາໆພັນ ແລະ ເປັນແຂວງດຽວທີ່ມີປະຊາກອນຊ້າງຫຼາຍກວ່າໝູ່ ຖ້າທຽບໃສ່ກັບແຂວງອື່ນໆຂອງ ສປປ ລາວ. ດ້ວຍເຫດນີ້ເພື່ອເປັນການອະນຸລັກຮັກສາຊ້າງບໍ່ໃຫ້ສູນພັນ ແລະ ທັງເປັນການສືບຕໍ່ປົກປັກຮັກສາວັດທະນະທໍາຮີດຄອງປະເພນີອັນດີງາມ, ວິຖີການດໍາລົງຊີວິດຂອງປະຊາຊົນລາວບັນດາເຜົ່າ ທີ່ຕິດພັນກັບຊ້າງມາແຕ່ອະດີດຕະການໃຫ້ຍືນຍົງຄົງຕົວ ແລະ ຢູ່ກັບປະຊາຊົນລາວ; ເວົ້າລວມເວົ້າສະເພາະປະຊາຊົນຊາວແຂວງໄຊຍະບູລີ ຈຶ່ງໄດ້ພ້ອມພຽງກັນຈັດງານມະຫະກໍາບຸນຊ້າງຂຶ້ນໃນແຕ່ລະປີ ດັ່ງນັ້ນຂໍເຊີນຊວນບັນດາແຂກ, ນັກທ່ອງທ່ຽວທັງພາຍໃນ ແລະ ຕ່າງ ປະເທດເຂົ້າມາທ່ຽວຊົມງານ ມະຫະກໍາບຸນຊ້າງຢູ່ແຂວງໄຊຍະບູລີຂອງພວກເຮົາ. (ຂ່າວ+ພາບ: ບຸນທີ)