ຮອງປະທານປະເທດ ຢ້ຽມຢາມແຂວງຊຽງຂວາງ

...

27.11.2019 9:25     

  ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງປະທານປະເທດ ພ້ອມດ້ວຍຄະນະ ໄດ້ ຢ້ຽມຢາມ ແລະ ໂອ້ລົມການ ນຳຂອງແຂວງຊຽງຂວາງ ໃນ ວັນທີ 23-24 ພະຈິກຜ່ານມາ ໃນໂອກາດຢ້ຽມຢາມແຂວງດັ່ງ ກ່າວ ທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງກໍໄດ້ລາຍງານການພັດທະນາເສດຖະກິດ-ສັງຄົມຂອງແຂວງໄລຍະຜ່ານມາ ແລະ ແຜນການທິດທາງໃນຕໍ່ໜ້າ ຈາກນັ້ນທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ ໄດ້ມີຄຳຄິດເຫັນໂອ້ລົມ ວ່າ: ການກະກຽມ ແລະ ດຳ ເນີນກອງປະຊຸມໃຫຍ່ຂອງພັກ ຕ້ອງເອົາໃຈໃສ່ວຽກງານຂະບວນການສູ້ຊົນບັນດາຄາດໝາຍຂອງກອງປະຊຸມໃຫຍ່ທີ່ຮັບຮອງ ເປັນຕົ້ນແມ່ນ ການຜະລິດເປັນສິນຄ້າ, ການແກ້ໄຂຄວາມທຸກຍາກ ແລະ ການຫັນປ່ຽນຂອງປະຊາຊົນດີຂຶ້ນ, ດ້ານເນື້ອໃນ ຕ້ອງສອດຄ່ອງກັບສະພາບຕົວຈິງຂອງແຂວງ, ເມືອງ, ວາງແລ້ວຕ້ອງສູ້ຊົນປະຕິບັດໃຫ້ສຳເລັດ ພັດທະນາໃຫ້ດີກ່ວາເກົ່າ ຮັກສາໄດ້ເອກະລັກອັນໂດດເດັ່ນຂອງທ້ອງຖິ່ນ ການພັດທະນາຕ້ອງຕິດພັນກັບການຮັກສາສິ່ງແວດລ້ອມ ຍືນຍົງ ກົມກືນກັບທັດສະນີຍະພາບ, ດ້ານບຸກຄະລາກອນ ຕ້ອງຄັດເລືອກເອົາບຸກຄົນທີ່ມີມາດຖານເງື່ອນໄຂຕົວຈິງ, ຍົກສູງບົດບາດການນຳພາຂອງພັກ ຕ້ອງໃຫ້ກຽດ ເຄົາລົບນັບຖືຜູ້ທີ່ຮັບບຳນານ, ຜູ້ຮັບບຳນານຕ້ອງຊ່ວຍເບິ່ງແຍງ ປະກອບຄຳຄິດຄຳເຫັນຊ່ວຍໃນທາງສ້າງສັນ, ກຳນົດແຜນພະນັກງານ, ວຽກງານມະຫະກຳກິລາແຫ່ງຊາດ ຕ້ອງຈັດໃຫ້ສົມກຽດສັກສີຂອງແຂວງວິລະຊົນ ອັນໃດຍັງບໍ່ສອດຄ່ອງຕ້ອງປັບປຸງໃຫ້ໄວ, ມີແຜນການກະກຽມໃນການຈັດສັນໃນງານໃຫ້ດີ, ເປັນເຈົ້າພາບທີ່ດີ, ນັກກິລາ ແລະ ຜູ້ຊົມຕ້ອງຮັກສາມາລະຍາດ, ບັນດາອະນຸກຳມະການແຕ່ລະວຽກຕ້ອງເອົາໃຈໃສ່ໜ້າທີ່ຂອງຕົນ ເປັນຕົ້ນແມ່ນ ວຽກງານ ປກຊ-ປກສ ຕ້ອງເຂັ້ມແຂງ, ຫ້າມສວຍໂອກາດຂຶ້ນລາຄາສິນຄ້າ ແລະ ການບໍລິການ; ວຽກງານກໍ່ສ້າງພະເຈົ້າອົງຫຼວງ ຕ້ອງພ້ອມກັນສືບຕໍ່ສ້າງ, ຕ້ອງມີຄວາມເປັນເອກະພາບໃນການກໍ່ສ້າງເຮັດບຸນໃຫຍ່ ເປັນການສ້າງຂຶ້ນຕື່ມມໍລະດົກຂອງເມືອງພວນໄວ້ໃຫ້ລູກຫຼານ ຊຶ່ງ ທາງແຂວງ ແມ່ນຢາກໃຫ້ສຸມໃສ່ກໍ່ສ້າງໃຫ້ແລ້ວກ່ອນງານມະຫະກຳກິລາແຫ່ງຊາດຄັ້ງທີ11, ການກໍ່ສ້າງຕ້ອງຕິດພັນກັບຮີດຄອງປະເພນີ ມີຄວາມສາມັກຄີປອງດອງ ທັງພາຍໃນ ແລະ ພາຍນອກໃຫ້ກ້ວາງຂວາງ; ໂອກາດທີ່ທ່ານ ພັນຄຳ ວິພາວັນ ມາຢ້ຽມຢາມແຂວງຊຽງຂວາງໃນຄັ້ງນີ້ ທ່ານພ້ອມດ້ວຍຄະນະ ແລະ ການນຳຂອງແຂວງ ກໍໄດ້ກວດກາການກໍ່ສ້າງສະໜາມກິລາເປີດ-ປິດ ບ້ານຄັງໜອງຫຼວງ, ການກໍ່ສ້າງພະເຈົ້າອົງຫຼວງທີ່ວັດໄຫຫີນ ແລະ ການກໍ່ສ້າງເຂດອະນຸສອນສະຖານ ສຳນັກງານສູນກາງຊີ້ນຳການປະຕິວັດເຂດຊຽງຂວາງໃນໄລຍະປີ1964-1972 ທີ່ບ້ານຕ້າຍ ເມືອງແປກ. (ຂ່າວ: ບຸນມີ ແສງທຸມມີ)