ນາຍົກ ເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກ ກ່ຽວກັບອາຊຽນ ຄັ້ງທີ 27


...

05.11.2018 10:46     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມ ກອງປະຊຸມເວທີປຶກສາຫາລືເສດຖະກິດໂລກ ກ່ຽວກັບອາຊຽນ ຄັ້ງທີ 27 ທີ່ ສສ ຫວຽດນາມ ຊຶ່ງ ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 12 ກັນຍາ 2018 ທີ່ນະຄອນຫຼວງຮ່າໂນ້ຍ. ກ່າວໃນພິທີເປີດ ຢ່າງເປັນທາງການໂດຍແມ່ນທ່ານ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ທ່ານ ກະໂຣດ ຊາເວບ (Klaus Schwab) ປະທານຜູ້ບໍລິຫານເວທີເສດຖະກິດໂລກ. ກອງ ປະຊຸມຄັ້ງນີ້, ສະຫາຍ ຫງວຽນ ຝູ ຈ້ອງ ເລຂາທິການໃຫຍ່ພັກກອມມູນິດ ຫວຽດນາມ ກໍໄດ້ໃຫ້ກຽດ ເຂົ້າຮ່ວມ ແລະ ໄດ້ມີບັນດາຜູ້ນຳອາຊຽນ ແລະ ປະເທດຕ່າງໆ ທີ່ເປັນຕົວແທນຈາກລັດຖະບານ ແລະ ຫົວໜ່ວຍທຸລະກິດໃນພາກພື້ນ ແລະ ໃນໂລກເຂົ້າຮ່ວມ.ກອງປະຊຸມດັ່ງກ່າວ ບັນ ດາຜູ້ນຳຂອງແຕ່ລະປະເທດສະມາຊິກອາຊຽນໄດ້ປະກອບຄຳເຫັນ ແລະ ແລກປ່ຽນຄຳຄິດຄຳເຫັນກ່ຽວກັບວິໄສທັດ ໃນການປະກອບທຸລະກິດ, ການປະຕິຮູບອຸດສາຫະກຳ 4.0 ໃນການພັດທະນາເສດ ຖະກິດ-ສັງຄົມໃນພາກພື້ນອາຊຽນ ແລະ ສາກົນ. ໃນກອງ ປະຊຸມທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຂຶ້ນປະກອບຄຳເຫັນໃນກອງປະຊຸມກ່ຽວກັບບັນດາກາລະໂອກາດ ແລະ ສິ່ງທ້າທາຍຕ່າງໆໃນຍຸກສະໄໝການປະຕິວັດອຸດສາຫະກຳ 4.0 ທີ່ປະເທດອາຊຽນ ລວມທັງ ສປປລາວ ກຳລັງປະເຊີນ ຢູ່ ນັບທັງກຽມຄວາມພ້ອມ ເພື່ອສາມາດຮັບມືກັບສິ່ງທ້າທາຍນາໆປະການໃນຊຸມປີຕໍ່ໜ້າ. ພ້ອມດຽວກັນນັ້ນ ທ່ານນາຍົກລັດຖະມົນຕີ ໄດ້ເປັນກຽດຕ້ອນຮັບທ່ານນາຍົກລັດຖະມົນຕີ ສີລັງກາ ເພື່ອປຶກສາຫາລືກັນໃນກອບການຮ່ວມມືສອງຝ່າຍ ລະຫວ່າງ ສອງປະເທດ ລາວ-ສີລັງກາ ໃນອະນາຄົດ, ໃນຂະນະດຽວກັນ, ທ່ານ ທອງລຸນ ສີສຸລິດ ກໍໄດ້ເຂົ້າຮ່ວມກອງປະຊຸມພົບປະບໍ່ເປັນທາງການຂອງຜູ້ນຳເສດຖະກິດໂລກກັບຜູ້ນຳອາຊຽນ. ນອກຈາກນັ້ນ, ທ່ານນາຍົກລັດຖະມົນຕີ ແລະ ຄະນະ ກໍໄດ້ຕ້ອນຮັບການເຂົ້າຢ້ຽມຂາໍ່ນັບຂອງທ່ານ ກະໂຣດ ຊາເວບ ປະທານບໍລິຫານເວທີເສດຖະກິດໂລກ ເພື່ອປຶກສາຫາລືແລກປ່ຽນຄຳຄິດຄຳເຫັນກ່ຽວກັບສະພາບການເສດຖະກິດ-ສັງຄົມ ໃນ ສປປ ລາວ ກໍຄືໃນພາກພື້ນອາຊຽນ. ຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີ ແລະ ຄະນະ ກໍໄດ້ເຂົ້າຮ່ວມກອງປະຊຸມທາງການ ພາຍໃຕ້ຫົວຂໍ້ "ວິໄສທັດໃໝ່ ສຳລັບພາກພື້ນແມ່ນຳ້ຂອງ" ຊຶ່ງມີຜູ້ນຳ ຈາກບັນດາປະເທດແມ່ນຳ້ຂອງເຂົ້າຮ່ວມ ເພື່ອປຶກສາຫາລື ແລະ ແລກປ່ຽນຄຳເຫັນກ່ຽວກັບການຮ່ວມມືການພັດທະນາເສດຖະກິດ-ສັງຄົມ ໃນພາກພື້ນແມ່ນຳ້ຂອງ ໃນໄລຍະການປະຕິວັດອຸດສາຫະກຳ 4.0. (ຂ່າວ: ກົມການຂ່າວ)