ເວທີ ປົວອ້າວ ໂອກາດການຮ່ວມມືຂອງນັກທຸລະກິດ ລາວ-ຈີນ


...

05.11.2018 10:53     

   ສະພາການຄ້າ ແລະ ອຸດ ສາຫະກຳແຫ່ງຊາດລາວ, ຮ່ວມ ກັບເວທີປຶກສາຫາລືພາກພື້ນ ກ່ຽວກັບການລົງທຶນ ສຳລັບ ອາຊີ (Boao Forum for Asia), ໄດ້ເປີດກອງປະຊຸມ ເພື່ອສົ່ງເສີມການລົງທຶນຈາກ ສປ ຈີນ ຂຶ້ນໃນວັນທີ 28 ກັນ ຍາ ຜ່ານມາ ທີ່ໂຮງແຮມແລນມາກ. ໂດຍການໃຫ້ກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດ ຖະມົນຕີກະຊວງເງິນ, ທ່ານ ຫຼີ ປາວຕົ່ງ ເລຂາທິການກອງປະຊຸມປົວອ້າວ ສຳລັບອາຊີ, ມີພາກສ່ວນກ່ຽວຂ້ອງເຂົ້າຮ່ວມ. ຈຸດປະສົງຂອງກອງປະ ຊຸມແມ່ນເພື່ອເປັນການສ້າງ ເຄືອຂ່າຍໃຫ້ແກ່ບັນດາທຸລະກິດ, ສົ່ງເສີມໃຫ້ມີການຮ່ວມມືກັນທາງດ້ານການຄ້າ ແລະ ການລົງທຶນ ໂດຍຕ່າງຝ່າຍຕ່າງໄດ້ຮັບຜົນປະໂຫຍດ ແລະ ຫວັງວ່າຈະເຮັດໃຫ້ບັນດານັກ ທຸລະກິດສາມາດສ້າງເຄືອຂ່າຍ ແລະ ມີການຮ່ວມມືກັນ ຊຶ່ງບໍ່ພຽງແຕ່ການຮ່ວມມືທຸລະກິດລະຫວ່າງ ລາວ-ຈີນ ແຕ່ຍັງເປັນການສົ່ງເສີມການລົງທຶນລະຫວ່າງ ລາວ ແລະ ບັນດາປະເທດຕ່າງໆ ໂດຍສະເພາະແມ່ນຜົນປະໂຫຍດຂອງ ສປປ ລາວ ທີ່ຍັງຂາດທຶນຮອນ ແລະ ເຕັກໂນໂລຊີທີ່ທັນສະໄໝ, ສາ ມາດນຳໃຊ້ເວທີດັ່ງກ່າວ ເພື່ອເຈລະຈາ ແລະ ປຶກສາຫາລື ຊອກຫາຊ່ອງທາງໃຫ້ມີການຮ່ວມມືກັນຢ່າງແທ້ຈິງ ແລະ ມີປະສິດທິຜົນ ເປັນໂອກາດອັນດີໃນການດຶງດູດການລົງທຶນຈາກນັກທຸລະກິດຈີນ ເພື່ອເຂົ້າມາດຳເນີນການລົງທຶນ ແລະ ຊ່ວຍຊຸກຍູ້ການພັດທະນາຂອງ ສປປ ລາວ ໂດຍສະເພາະແມ່ນການຮ່ວມມືກັບບໍລິສັດພາຍໃນຂອງລາວ ຊຶ່ງອາດລົງທຶນໃນຮູບແບບຕ່າງໆ ເພື່ອພ້ອມກັນພັດທະນາ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ທ່ານ ສົມດີ ດວງດີ ໄດ້ວ່າ: ໃນໄລຍະຜ່ານມາ ການເຊື່ອມໂຍງເສດຖະກິດແມ່ນມີຄວາມສຳຄັນຕໍ່ການພັດທະນາປະເທດ, ຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຂອງທ່ານປະ ທານ ສີ ຈິ້ນຜິງ ໂດຍຢຶດໝັ້ນ ຕາມຫຼັກການ "ຮ່ວມປຶກສາ, ຮ່ວມສ້າງ, ຮ່ວມຊົມໃຊ້" ໄດ້ ກາຍເປັນແລວທາງຍຸດທະສາດ ແລະ ນະໂຍບາຍໃໝ່ ເພື່ອເປີດປະຕູສູ່ໂລກພາຍນອກໃນຍຸກໃໝ່ຂອງ ສປ ຈີນ ແລະ ແລວທາງນີ້ຈະເປັນແລວທາງແຫ່ງສັນຕິພາບ, ແລວທາງແຫ່ງຄວາມຈະເລີນຮຸ່ງເຮືອງ ແລະ ແລວທາງແຫ່ງອະລິຍະທໍາ ອັນສູງສົ່ງ, ຊຶ່ງຈະສ້າງໂອກາດ ແລະ ເງື່ອນໄຂອັນດີໃຫ້ແກ່ການ ສົ່ງເສີມການພົວພັນການຄ້າ ລະ ຫວ່າງ ສປປ ລາວ - ສປ ຈີນກໍ ຄືອາຊຽນໃຫ້ນັບມື້ນັບຂະຫຍາຍ ຕົວ ແລະ ມີປະສິດທິຜົນ. ຂໍ້ລິເລີ່ມດັ່ງກ່າວແມ່ນສອດຄ່ອງ ກັບຍຸດທະສາດຂອງ ສປປ ລາວ ໃນການຫັນເປັນປະເທດໃຫ້ມີທາງອອກສູ່ທະເລ (Land Lock ເປັນ Land Linked). ໃນເດືອນພຶດສະພາ ປີ 2017, ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມ "ໜຶ່ງແລວໜຶ່ງເສັ້ນທາງ" ທີ່ນະ ຄອນຫຼວງປັກກິ່ງ ແລະ ໄດ້ລົງ ນາມໃນແຜນແມ່ບົດການຊຸກຍູ້ ຮ່ວມມືກໍ່ສ້າງ "ໜຶ່ງແລວໜຶ່ງເສັ້ນທາງ" ລະຫວ່າງລັດຖະບານ ສປປ ລາວ ແລະ ລັດຖະບານ ສປ ຈີນ ຊຶ່ງຈະຊຸກຍູ້ການຮ່ວມມື ເສດຖະກິດການຄ້າຂອງສອງ ປະເທດໃຫ້ມີການຂະຫຍາຍ ຕົວຢ່າງວ່ອງໄວ ແລະ ມີປະສິດທິຜົນ. ສປປ ລາວ ມີສະຖຽນລະພາບທາງດ້ານການເມືອງ ແລະ ການເຕີບໂຕດ້ານເສດຖະກິດ ສະເລ່ຍໃນລະດັບ 7% ຕໍ່ປີ, ລາຍຮັບຕໍ່ຫົວຄົນແມ່ນບັນລຸ 2.400 ໂດລາ. ປັດຈຸບັນ ລັດຖະບານ ໄດ້ປັບປຸງສະພາບແວດລ້ອມ ເພື່ອເອື້ອອຳນວຍໃຫ້ການດຳເນີນທຸລະກິດເຊັ່ນ: ການປັບປຸງກົດໝາຍສົ່ງເສີມການລົງທຶນໃນ ປີ 2016 ເພື່ອສ້າງສະພາບແວດລ້ອມການລົງທຶນໃຫ້ຜູ້ລົງທຶນ ສາມາດດຳເນີນທຸລະກິດໄດ້ຢ່າງສະດວກວ່ອງໄວ, ໂປ່ງໃສ, ຍຸຕິທຳ ແລະ ຖືກຕ້ອງຕາມກົດໝາຍ ພ້ອມທັງສຸມໃສ່ການພັດທະນາໂຄງລ່າງພື້ນ ຖານປ່ຽນຈາກປະເທດທີ່ບໍ່ມີ ຊາຍແດນຕິດກັບທະເລເປັນປະເທດເຊື່ອມຕໍ່ກັບປະເທດຕ່າງໆ ໃນພາກພື້ນ ແລະ ສາກົນ. ໂດຍສະເພາະແມ່ນໂຄງ ການກໍ່ສ້າງທາງລົດໄຟລາວ - ຈີນ, ຊຶ່ງຈະສຳເລັດໃນປີ 2021, ໂຄງການດັ່ງກ່າວ ຈະໄດ້ຮັບຜົນປະໂຫຍດຮ່ວມກັນໃນອະນາຄົດ, ເປັນຕົ້ນແມ່ນການຂົນສົ່ງສິນຄ້າ, ການຄົມມະນາຄົມຂົນສົ່ງພາກພື້ນ ທີ່ວ່ອງໄວ ປະຢັດເວລາ ຫຼຸດຜ່ອນຄ່າໃຊ້ຈ່າຍການຂົນສົ່ງ. ທ່ານຍັງໄດ້ກ່າວອີກວ່າ: ນັກທຸລະກິດຈາກ ສປ ຈີນ ອາດຈະເຂົ້າມາລົງທຶນ ແລະ ຊ່ວຍຊຸກຍູ້ການພັດທະນາຂອງ ສປປ ລາວ, ໂດຍສະເພາະແມ່ນດຳເນີນການຮ່ວມມືກັບບໍລິສັດ ພາຍໃນຂອງ ສປປ ລາວ ໃນຮູບແບບຕ່າງໆ ຕາມການຕົກລົງກັນ ເພື່ອພ້ອມກັນພັດທະນາ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ສປປ ລາວ ຍັງມີທ່າແຮງໃນຂະແໜງການຕ່າງໆ ເຊັ່ນ: ພະລັງງານ, ອະສັງຫາ ລິມະຊັບ, ກະສິກຳ, ທ່ອງທ່ຽວ, ອຸດສາຫະກຳ ແລະ ອື່ນໆ, ຊຶ່ງທ່ານສາມາດເລືອກລົງທຶນ ໃນ 12 ເຂດເສດຖະກິດພິເສດເຊັ່ນ: ເຂດໄຊເສດຖາ, VITA, ສະຫວັນ-ເຊໂນ ແລະ ອື່ນໆ. ການລົງທຶນໃນເຂດເສດຖະກິດພິເສດດັ່ງກ່າວ ແມ່ນຈະໄດ້ຮັບນະໂຍບາຍພິເສດ. (ຂ່າວ-ພາບ: ບຸນຕອມ)