ກອງປະຊຸມພາກທຸລະກິດ: ບັນຫາໃນປັດຈຸບັນ ແລະ ທາງອອກ


...

05.11.2018 11:26     

   ກອງປະຊຸມກ່ຽວກັບພາກທຸລະກິດ: ບັນຫາໃນປັດຈຸບັນ ແລະ ທາງອອກໃນຕໍ່ໜ້າ ໄດ້ຈັດຂຶ້ນທີ່ຫ້ອງວ່າການສູນກາງພັກ ໃນຕອນເຊົ້າວັນທີ 4 ຕຸລານີ້ ໂດຍການໃຫ້ກຽດເຂົ້າຮ່ວມຊີ້ນຳກອງປະຊຸມຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ, ພາຍໃຕ້ການເປັນປະທານຂອງສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຫ້ອງວ່າການສູນກາງພັກ, ມີບັນດາສະຫາຍຮອງລັດຖະມົນຕີ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ສະຫາຍ ບຸນຍັງ ວໍລະຈິດ ໄດ້ມີຄຳເຫັນຕໍ່ກອງປະຊຸມຄັ້ງນີ້ວ່າ: ໃນຊຸມປີຜ່ານມາພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຂອງພັກເວົ້າລວມ, ການພັດທະນາເສດຖະກິດຂອງຊາດເວົ້າສະເພາະ ໄດ້ຮັບໝາກຜົນ ທີ່ສຳຄັນຫຼາຍດ້ານ, ຈັງຫວະການເຕີບໂຕທາງດ້ານເສດຖະ ກິດຢູ່ໃນລະດັບໄວສົມຄວນ, ລາຍຮັບສະເລ່ຍໃສ່ຫົວຄົນຕໍ່ປີເພີ່ມຂຶ້ນຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງຂຶ້ນເລື້ອຍໆ, ໃນນັ້ນນັບທັງພາກທຸລະກິດກໍໄດ້ມີໂອກາດໃນການພັດທະນາຢ່າງເທົ່າທຽມກັນ ແລະ ນັບມື້ຂະຫຍາຍຕົວບໍ່ຢຸດຢັ້ງ, ຈາກຜົນສຳເລັດໃນການພັດທະນາເສດຖະກິດ ທີ່ສຳຄັນໄດ້ປະກອບສ່ວນໂດຍກົງໃນການຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມຂອງປະເທດເຮົາ. ເຖິງຢ່າງໃດກໍຕາມ, ໃນຫຼາຍປີຜ່ານມາເຖິງປະຈຸບັນ ເສດຖະກິດຂອງປະເທດເຮົາ,ໂດຍສະເພາະແມ່ນເສດຖະກິດມະຫາພາກພົບຄວາມຫຍຸ້ງຍາກ,ໃນນັ້ນແມ່ນບັນຫາການຂາດດຸນງົບປະມານ,ບັນຫາໜີ້ສິນ,ການຂາດສະພາບຄ່ອງດ້ານການເງິນຊຶ່ງໜຶ່ງໃນບັນດາສາເຫດສຳຄັນແມ່ນຈາກຄວາມອອ່ນແອໃນວຽກງານແຜນການແລະການເງິນ ກໍຄືຄວາມອອ່ນແອໃນພາກການຜະລິດຂອງປະເທດເຮົາ, ຕະຫຼອດໄລຍະທີ່ຜ່ານມາສູນກາງພັກ, ລັດຖະບານໄດ້ພະຍາຍາມຄົ້ນຄວ້າ, ວາງບັນດາວິທີການ, ມາດຕະການເພື່ອແກ້ໄຂບັນຫາຢ່າງຈິງຈັງ, ສະເພາະເບື້ອງສູນກາງພັກ, ຜ່ານມາກໍໄດ້ຄົ້ນຄວ້າ ແລະ ມີມະຕິຂອງຄະນະບໍລິຫານງານສູນກາງຫຼາຍສະບັບ ແລະ ກົມການເມືອງ, ຄະນະເລຂາທິການສູນກາງພັກ ກໍໄດ້ມີມະຕິຄຳສັ່ງ ກໍ່ຄືການເຄື່ອນໄຫວຊີ້ນຳຕົວຈິງຢ່າງຕໍ່ເນື່ອງ ເພື່ອຫາທາງ ແລະ ດຳເນີນການແກ້ໄຂຄວາມຫຍຸ້ງຍາກທີ່ເກີດຂຶ້ນ ຊຶ່ງໃນກາງເດືອນນີ້ຄະນະບໍລິຫານງານສູນກາງພັກ ກໍຈະດຳເນີນກອງປະຊຸມຄົບຄະນະບໍລິຫານງານຄັ້ງທີ 7 (ສະໄໝທີ X) ໜຶ່ງໃນເນື້ອໃນທີ່ເປັນໃຈກາງແມ່ນພິຈາລະນາບັນດາວິທີການ, ມາດຕະການຕົວຈິງເພື່ອແກ້ໄຂຄວາມຫຍຸ້ງຍາກດ້ານການເງິນ-ງົບປະມານ ໜີ້ສິນ ແລະ ຂົງເຂດມະຫາພາກອື່ນໆ, ບັນດາຜູ້ປະກອບການຂອງປະເທດເຮົາຊຶ່ງມີຈຳນວນບໍ່ໜ້ອຍ ພວມຕົກຢູ່ໃນສາຍພົວພັນຕ່ອງໂສ້ຂອງຄວາມຫຍຸ້ງຍາກທາງດ້ານເສດຖະກິດໃນປັດຈຸບັນ. ແຕ່ໂດຍເຊື່ອໝັ້ນຕໍ່ບົດບາດສຳຄັນຂອງບັນດາຜູ້ປະກອບການໃນຖານະເປັນຜູ້ສ້າງຄຸນຄ່າໃໝ່ຂອງເສດຖະກິດແຫ່ງຊາດ ທີ່ພວມຊອກຫາທາງອອກສຳລັບການພັດທະນາ ຂອງຕົນໃນຕໍ່ໜ້າ, ກົມການເມືອງສູນກາງພັກ ຈຶ່ງໄດ້ຊີ້ນຳຄະນະກຳມະການເນື້ອໃນກະກຽມກອງປະຊຸມໃຫຍ່ຄັ້ງທີ XI ຂອງພັກທັງເປັນຄະນະຮັບຜິດຊອບກະກຽມກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 (ສະໄໝທີX) ຈັດກອງປະຊຸມພາກທຸລະກິດ: ບັນຫາໃນປັດຈຸບັນ ແລະ ທາງອອກໃນຕໍ່ໜ້ານີ້ຂຶ້ນ ເພື່ອລະດົມຄວາມຄິດເຫັນຂອງບັນດາຜູ້ປະກອບການໃນທຸກຂົງເຂດກໍຄືຕົວແທນຈາກກະຊວງ, ອົງການທີ່ເຮັດໜ້າທີ່ຄົ້ນຄວ້າວິໄຈ ແລະ ມີບົດບາດຄຸ້ມຄອງມະຫາພາກຕໍ່ເສດຖະກິດ, ໂດຍສຸມໃສ່ຄົ້ນຄວ້າປະກອບຄວາມເຫັນກ່ຽວກັບບັນຫາກໍຄືມາດຕະການແກ້ໄຂບັນຫາທີ່ເກີດຂຶ້ນໃນພາກທຸລະກິດຂອງປະເທດ. ທຸກຄວາມຄິດເຫັນກອງປະຊຸມມື້ນີ້ ຈະໄດ້ຮັບການສັງລວມ, ວິເຄາະວິໄຈ ແລະ ນຳໄປພິຈາລະນາເຂົ້າໃນເນື້ອໃນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7, ພ້ອມທັງຖືເປັນພື້ນຖານຂໍ້ມູນອັນສຳຄັນໃຫ້ແກ່ການສ້າງເນື້ອໃນບົດລາຍງານການເມືອງກອງປະຊຸມໃຫຍ່ຄັ້ງທີ XI ຂອງພັກ ເພື່ອເຮັດໃຫ້ກອງປະຊຸມທີ່ມີຄວາມໝາຍສຳຄັນນີ້ ສາມາດລົງເລິກໃສ່ບັນຫາຕົວຈິງ ແລະ ບັນລຸວັດຖຸປະສົງລະດັບຄາດໝາຍທີ່ວາງອອກ. ສະຫາຍເລຂາທິການໃຫຍ່ ປະທານປະເທດ ໄດ້ຊີ້ນຳໃຫ້ສຸມໃສ່ບາງປະເດັນຄື:

1/ ບັນຫາຫຍັງແນ່ ທີ່ພາກທຸລະກິດເວົ້າລວມ, ຂົງເຂດທຸ ລະກິດຂອງຕົນເວົ້າສະເພາະກຳລັງປະເຊີນຢູ່?

2/ ຈຸດເລັ່ງໃນການຂະຫຍາຍກິດຈະການຂອງຕົນ (ສ້າງຜະລິດຕະພັນອອກສູ່ຕະຫຼາດ) ໃນຕໍ່ໜ້າອັນຫຼັກໆ ແມ່ນອັນໃດ?

3/ ສິ່ງທີ່ພາກທຸລະກິດເວົ້າລວມ ແລະ ຂົງເຂດຂອງຕົນຕ້ອງປັບປຸງແກ້ໄຂເພື່ອສ້າງປັດໄຈຄຳ້ປະກັນແກ່ການແຂ່ງຂັນຢູ່ຕະຫຼາດພາຍໃນ ແລະ ຕ່າງປະເທດມີຫຍັງແນ່?

4/ ເພື່ອສະໜັບສະໜຸນ ແລະ ສ້າງເງື່ອນໄຂອັນຈຳ ເປັນໃຫ້ແກ່ພາກທຸລະກິດແກ້ໄຂຄວາມຫຍຸ້ງຍາກ, ຈັດຕັ້ງປະຕິບັດບັນດາເປົ້າໝາຍພັດທະນາທາງທຸລະກິດ (ທີ່ຕົນສະເໜີມາ) ເຫັນວ່າຕ້ອງມີການກຳນົດນະໂຍບາຍສົ່ງເສີມ ແລະ ສ້າງ, ປັບປຸງບັນດານິຕິກຳຕົ້ນຕໍຫຍັງແນ່?

5/ ສິ່ງທີ່ເປັນອຸປະສັກກົດໜ່ວງຖ່ວງດຶງຕົ້ນຕໍ ໃນການສ້າງທຸລະກິດໃໝ່ການດໍາເນີນທຸລະກິດຢູ່ລາວປັດຈຸບັນທີ່ເກີດຈາກບັນດາອົງການພາກລັດ ຊຶ່ງຕ້ອງໄດ້ແກ້ໄຂມີຫຍັງແນ່?. (ຂ່າວ-ພາບ: ພູວຽງຄຳ)