ສະເຫຼີມສະຫຼອງວັນສ້າງຕັ້ງທະນາຄານ ແຫ່ງ ສປປ ລາວ ຄົບຮອບ 50 ປີ


...

05.11.2018 10:52     

   ທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງພິທີສະເຫຼີມສະຫຼອງວັນ ສ້າງຕັ້ງ ທຫລ ຄົບຮອບ 50 ປີ (7 ຕຸລາ 1968-7 ຕຸລາ 2018) ໃນວັນທີ 6 ຕຸລາ 2018 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ; ພ້ອມນີ້ ກໍມີທ່ານ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ; ທ່ານ ສົມດີ ດວງດີ ກໍາມະການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານສະພາບໍລິຫານ ທຫລ; ທ່ານ ສອນໄຊ ສິດພະໄຊ ກໍາມະການສໍາຮອງສູນກາງພັກ, ຮັກສາການຜູ້ວ່າການ ທຫລ, ບັນດາພະນັກງານຂັ້ນນຳຈາກກະຊວງ ແລະ ທຽບເທົ່າ, ພະນັກງານຫຼັກແຫຼ່ງ, ພະນັກງານປະຕິວັດອາວູໂສ ບຳນານ, ທະນາຄານທຸລະກິດ (ທທກ)-ສາຂາທະນາຄານຕ່າງປະເທດ, ສະຖາບັນການເງິນ ແລະ ພາກສ່ວນກ່ຽວຂ້ອງ ເຂົ້າຮ່ວມຢ່າງຫຼວງຫຼາຍ. ໃນພິທີດັ່ງກ່າວ ບັນດາການນໍາລະດັບສູງ ແລະ ພະ ນັກງານຂັ້ນຕ່າງໆ ຍັງໄດ້ເຂົ້າຊົມການວາງສະແດງຮູບພາບ-ຜະລິດຕະພັນ; ຊົມພາບວີດີໂອ ແລະ ການສະແດງສິລະປະ ທີ່ສ່ອງແສງໃຫ້ເຫັນເຖິງໝາກ ຜົນແຫ່ງການເຄື່ອນໄຫວວຽກງານຂອງຂະແໜງທະນາຄານ ໃນຕະຫຼອດໄລຍະ 50 ປີຜ່ານ ມາ ຊຶ່ງໄດ້ເປັນການປະກອບສ່ວນອັນສໍາຄັນ ແລະ ສົມກຽດ ເຂົ້າໃນພາລະກິດກູ້ຊາດ ແລະ ສ້າງຊາດ ໂດຍສະເພາະໃນພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກ ອັນໄດ້ເຮັດໃຫ້ຂະແໜງທະນາຄານມີຄວາມເຕີບໃຫຍ່ ແລະ ທັນສະໄໝ ເປັນກ້າວໆ. ທ່ານ ສອນໄຊ ສິດພະໄຊ ໄດ້ລາຍງານຜົນການ ເຄື່ອນໄຫວວຽກງານຂອງ ທຫລ ໃນໄລຍະ 50 ປີຜ່ານມາ ຊຶ່ງມີບາງຕອນວ່າ: ຂະແໜງທະນາຄານ ໄດ້ເຄື່ອນໄຫວໜ້າທີ່ຂອງຕົນຢ່າງຕັ້ງໜ້າຕິດພັນຢ່າງສະໜິດ ແໜ້ນກັບຂະບວນການປະຕິວັດຊາດ ກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ; ຂະແໜງການທະນາຄານ ຍາມໃດກໍ່ຍຶດໝັ້ນ ແລະ ຕັ້ງໜ້າປະກອບສ່ວນຈັດຕັ້ງປະຕິບັດແນວທາງນະ ໂຍບາຍຂອງພັກ-ລັດໃນແຕ່ໄລຍະ ໄດ້ສຳເລັດຜົນຢ່າງຈົບ ງາມ ແລະ ໄດ້ຮັບຄວາມເຊື່ອໝັ້ນຈາກພັກ-ລັດຖະບານ ແລະ ປະຊາຊົນໃນການປະຕິບັດໜ້າທີ່ການເມືອງຂອງຕົນ ໂດຍສະເພາະການຮັກສາສະຖຽນລະພາບເງິນຕາແຫ່ງຊາດ, ຮັກສາຄວາມໝັ້ນຄົງຂອງລະບົບສະຖາບັນການເງິນ-ເງິນຕາ ປະກອບສ່ວນແຫຼ່ງທຶນຢ່າງຫຼວງຫຼາຍໃຫ້ແກ່ການພັດທະນາເສດຖະກິດ-ສັງຄົມ, ສົ່ງເສີມການຜະລິດພາຍໃນ, ແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ ແລະ ການເຄື່ອນໄຫວຂອງທະນາຄານ ປຽບສະເໝືອນສາຍເລືອດຫຼໍ່ລ້ຽງເສດຖະກິດໃຫ້ມີການຂະຫຍາຍຕົວ. ດັ່ງທີ່ທ່ານປະທານ ໄກສອນ ພົມວິຫານ ໄດ້ໃຫ້ທິດຊີ້ນໍາຢູ່ກອງປະຊຸມທະນາຄານທົ່ວປະເທດ ຄັ້ງທີ I ໃນປີ 1989 ວ່າ: "ທະນາຄານເປັນສິ່ງຄ້ຳຊູຍູ້ໜູນເສດຖະກິດສິນຄ້າ…ການຂະຫຍາຍລະບົບທະນາຄານ ເຂັ້ມແຂງພຽງພໍ ແມ່ນເພື່ອສ້າງທ່ວງທ່າໃຫ້ແກ່ການຫັນປ່ຽນເສດຖະກິດທຳມະຊາດໄປສູ່ເສດຖະກິດສິນຄ້າ ມັນແມ່ນຄວາມຈຳເປັນພາວະວິໄສ ສຳລັບພາລະກິດກໍ່ສ້າງສັງຄົມນິຍົມຢູ່ປະເທດເຮົາ". ເພື່ອຢັ້ງຢືນເຖິງຜົນງານ ແລະ ຄຸນງາມຄວາມດີໃນການປະກອບສ່ວນປະຕິບັດໜ້າທີ່ວຽກງານຂອງຂະແໜງທະນາ ຄານ ແລະ ຂອງພະນັກງານທະນາຄານ ຕະຫຼອດໄລຍະ 5 ປີ (2013-2018) ແລະ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງ ທຫລ ຄົບຮອບ 50 ປີ ໂດຍມີກົມກອງລວມໝູ່ ໄດ້ຮັບການປະດັບຫຼຽນໄຊອິດສະຫຼະຄື: ທຫລ ໄດ້ຮັບການປະດັບຫຼຽນໄຊອິດສະຫຼະ ຊັ້ນ I; ທະນາຄານການຄ້າຕ່າງປະເທດລາວ ມະຫາຊົນ ຮັບການປະດັບຫຼຽນໄຊອິດສະຫຼະ ຊັ້ນ II ແລະ 2 ກົມຂອງ ທຫລ ຮັບການປະດັບຫຼຽນໄຊອິດສະຫຼະ ຊັ້ນ III; ສຳລັບບຸກຄົນມີ 4 ທ່ານ ໄດ້ຮັບການປະດັບຫຼຽນໄຊອິດສະຫຼະ ຊັ້ນ III; ປະດັບຫຼຽນໄຊ ແຮງງານ ຊັ້ນ I ໃຫ້ 27 ທ່ານ, ປະດັບຫຼຽນໄຊ ແຮງງານ ຊັ້ນ II ໃຫ້ 106 ທ່ານ- 12 ກົມກອງ ແລະ ປະດັບຫຼຽນໄຊ ແຮງງານ ຊັ້ນ III ໃຫ້ 347 ທ່ານ- 11 ກົມກອງ ແລະ ຮັບການຍ້ອງຍໍຈາກ ທຫລ ຈຳນວນ 4.294 ທ່ານ ຮັບການປະດັບຫຼຽນກາທີ່ລະນຶກ 50 ປີ ທຫລ, ມີ 1 ກົມກອງ-ບຸກຄົນ 2.193 ທ່ານໄດ້ຮັບໃບຍ້ອງຍໍ ແລະ ຮັບໃບຊົມເຊີຍຂັ້ນຜູ້ວ່າການ ທຫລ 1.425 ທ່ານ. ໃນໂອກາດທີ່ສະຫງ່າລາສີນີ້; ທ່ານນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍ, ຊົມເຊີຍ ແລະ ຕີລາຄາສູງຕໍ່ຜົນງານຂອງທົ່ວລະບົບທະນາຄານ ກໍ່ຄືບັນດາສະຫາຍຄະນະພັກ-ຄະນະນຳ ແລະ ພະນັກງານທີ່ຍາດມາໄດ້ໃນຕະຫຼອດໄລຍະເຄິ່ງສະຕະວັດຜ່ານມາ ແລະ ເພື່ອເປັນເຂັມຊີ້ທິດເຍືອງທາງວຽກງານທະນາຄານໃນຕໍ່ໜ້າໃຫ້ມີຜົນສຳເລັດສູງຂຶ້ນໂດຍທ່ານໄດ້ເນັ້ນໃຫ້ຄະນະພັກ-ຄະນະນຳ ທຫລ ເອົາໃຈໃສ່ການສຶກສາອົບຮົມການເມືອງ-ນໍາພາແນວຄິດ, ຍົກລະດັບຄວາມຮູ້ວິຊາສະເພາະໃຫ້ສະມາຊິກພັກ, ພະນັກງານ ຮັບຮູ້ເຂົ້າໃຈຕໍ່ແນວທາງນະໂຍບາຍຂອງ ພັກ-ລັດ, ມະຕິ, ຄຳສັ່ງຂອງ ພັກ, ລະບຽບກົດໝາຍ ສາມາດ ຕອບສະໜອງຄວາມຮຽກ ຮ້ອງຕ້ອງການຂອງລະບົບທະນາຄານໃຫ້ສາມາດເຊື່ອມໂຍງກັບພາກພື້ນ ແລະ ສາກົນ; ຈັດຕັ້ງປະຕິບັດ 8 ມາດຕະການກະຕຸ້ນເສດຖະກິດຂອງລັດ ຖະບານໃຫ້ມີຜົນດີ; ເຊື່ອໝັ້ນວ່າດ້ວຍມູນເຊື້ອ, ບົດຮຽນ ແລະ ຜົນງານອັນໂດດເດັ່ນທີ່ປະຕິບັດມາແລ້ວ ດ້ວຍກຳລັງແຮງຄວາມສາມັກຄີອັນແໜ້ນ ແຟ້ນບວກກັບຄວາມບຸກໜ້າບືນຕົວ ແລະ ຄວາມຮັບຜິດຊອບໜ້າທີ່ການເມືອງຂອງພະນັກ ງານລະບົບທະນາຄານ, ຂະ ແໜງທະນາຄານຈະສືບຕໍ່ເປັນແກນກາງທີ່ເຂັ້ມແຂງໃນລະບົບເສດຖະກິດແຫ່ງຊາດ ແລະ ເປັນກົງລໍ້ທີ່ສຳຄັນໃນລະບົບເສດຖະກິດຂອງ ສປປ ລາວ ສືບຕໍ່ປະກອບສ່ວນໃນການພັດທະນາປະເທດຊາດ ຕາມມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ແຫ່ງລັດຄັ້ງທີ VIII ໃຫ້ບັນລຸຜົນຕາມຄາດໝາຍທີ່ວາງໄວ້. ( ຂ່າວ: ຣັດສະໝີ ດວງສັດຈະ ,ພາບ:ສຳນານ)