ທ່ານ ຈັນສີ ໂພສີຄຳ ເນັ້ນໃຫ້ເມືອງດັກຈຶງເອົາກະສິກຳສ້າງເສດຖະກິດໃຫ້ເຂັ້ມແຂງ


...

05.11.2018 10:55     

   ທ່ານ ຈັນສີ ໂພສີຄຳ ກໍາມະການກົມການເມືອງ, ສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກໄດ້ເນັ້ນໜັກໃຫ້ຄະນະພັກ, ອຳນາດການປົກຄອງເມືອງດາກຈຶງເລັ່ງສ້າງຄວາມເຂັ້ມແຂງດ້ານເສດຖະກິດ ໂດຍຖືເອົາວຽກງານປູກຝັງ ແລະ ລ້ຽງສັດເປັນທ່າແຮງ ໂດຍມີການນຳໃຊ້ເຕັກນິກ, ວິທະຍາສາດອັນໃໝ່ເຂົ້າໃນການຜະລິດເປັນຕົ້ນແມ່ນການປູກກາເຟ, ປູກຜັກປອດສານພິດ ແລະ ການລ້ຽງສັດໃຫຍ່ ແນໃສ່ສ້າງໃຫ້ໄດ້ຕົວແບບດ້ານກະສິກຳ ແລະ ການເປັນເມືອງເຂັ້ມແຂງຮອບດ້ານໃນຕໍ່ໜ້າ. ວັນທີ 10 ຕຸລາຜ່ານມາ ທ່ານ ຈັນສີ ໂພສີຄຳ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມຄະນະພັກ-ອຳນາດການປົກຄອງເມືອງດາກຈຶງ ໂດຍມີທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ, ທ່ານຮອງເຈົ້າແຂວງ, ເຈົ້າເມືອງ-ຮອງເຈົ້າເມືອງ ແລະພາກສ່ວນທີ່ກ່ຽວຂ້ອງ ຕ້ອນຮັບຢ່າງອົບອຸ່ນ. ໃນໂອກາດນີ້ ທ່ານ ຈັນສີ ໂພສີຄຳ ໄດ້ມີທິດຊີ້ນຳ ແລະ ເນັ້ນໜັກໃຫ້ຄະນະພັກ-ການນຳ ເມືອງດາກຈຶງນຳພາປະຊາຊົນເມືອງຂອງຕົນພັດທະນາເສດຖະກິດ-ສັງຄົມໃຫ້ຂະຫຍາຍຕົວເພີ່ມຂຶ້ນຕໍ່ເນື່ອງ, ຍາດແຍ່ງດຶງດູດການລົງທຶນຈາກປະເທດເພື່ອນມິດຍຸດທະສາດ, ອົງການຈັດຕັ້ງສາກົນ, ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ເພື່ອພັດທະນາພື້ນຖານໂຄງລ່າງ ແລະ ສ້າງສິ່ງອຳນວຍຄວາມສະດວກແກ່ການພັດທະນາ, ຂຸດຄົ້ນ ແລະ ນຳໃຊ້ທ່າແຮງທີ່ມີຂອງເມືອງໃຫ້ເກີດປະໂຫຍດສູງສຸດເປັນຕົ້ນແມ່ນທ່າແຮງດ້ານກະສິກຳການປູກກາເຟ, ໂສມ, ຜັກປອດສານພິດ ແລະ ການລ້ຽງສັດໃຫຍ່ ເນື່ອງຈາກເມືອງດາກຈຶງເປັນເມືອງທີ່ມີຄວາມອຸດົມສົມບູນ, ອາກາດຊຸ່ມເຢັນຕະຫຼອດປີ ແລະ ມີເນື້ອທີ່ກວ້າງຂວາງ ຊຶ່ງເປັນປັດໄຈຕົ້ນຕໍເຂົ້າໃນການຜະລິດກະສິກຳ. ຄຽງຄູ່ກັນນີ້ ກໍຕ້ອງນຳໃຊ້ເຕັກນິກວິທະຍາສາດອັນໃໝ່ເຂົ້າໃນການຜະລິດ ເພື່ອຍົກສະມັດຖະພາບການຜະລິດກາເຟ, ໂສມ ແລະ ພືດຜັກອື່ນໆ ທັງນີ້ ກໍເພື່ອສ້າງໃຫ້ເມືອງດາກຈຶງກາຍເປັນເມືອງປູກກາເຟ, ໂສມ, ພືດຜັກ ແລະ ລ້ຽງສັດເປັນສິນຄ້າ ແລະ ກາຍເປັນຕົວແບບດ້ານການປູກກາເຟ, ເປັນຕົວແບບດ້ານການປູກໂສມ, ເປັນຕົວແບບດ້ານການປູກຜັກປອດສານພິດ ແລະ ຕົວແບບດ້ານການລ້ຽງສັດໃຫຍ່ ເພື່ອນຳເອົາເມືອງດາກຈຶງກາຍເປັນເມືອງເຂັ້ມແຂງຮອບດ້ານຕາມທິດສາມສ້າງເພາະເມືອງດາກຈຶງມີເງື່ອນໄຂ ໂດຍສະເພາະແມ່ນເສັ້ນທາງຄົມມະນາຄົມອອກສູ່ ສສ ຫວຽດນາມ. ຄຽງຄູ່ກັນນີ້ ກໍຕ້ອງສ້າງຄະນະນຳຂອງເມືອງໃຫ້ມີຄວາມເຂັ້ມແຂງດ້ານການບໍລິຫານລັດ ເພື່ອໃຫ້ເມືອງເປັນອົງການທີ່ມີຄວາມສາມາດໃນການນຳພາຂັ້ນບ້ານໄດ້ຢ່າງມີປະສິດທິຜົນ, ເອົາໃຈໃສ່ສ້າງບ້ານພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍ ໂດຍສຸມໃສ່ແກ້ໄຂບັນຫາເສັ້ນທາງໃຫ້ມີຄວາມສະດວກໂລ່ງລ່ຽນ ເພື່ອຍູ້ແຮງຂະບວນການຜະລິດເປັນສິນຄ້າແກ້ໄຂຄວາມທຸກຍາກໂດຍມີພັກນຳພາ, ສ້າງໂຄງການພັດທະນາຢູ່ໃນຂັ້ນບ້ານ, ກວດກາບັນດາຄອບຄົວທີ່ຍັງທຸກຍາກ ແລະ ເຂົ້າໄປຮ່ວມຢູ່ໃນແຕ່ລະໂຄງການ ເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ. ທ່ານ ໄລສວນ ມິດສຸວັນ ເຈົ້າເມືອງໆດາກຈຶງ ກໍໄດ້ລາຍງານບາງສະພາບຈຸດພິເສດຂອງເມືອງວ່າ: ເມືອງດາກຈຶງ ມີເນື້ອທີ່ທັງໝົດ 273.220 ເຮັກຕາ, ມີ 54 ບ້ານ, ມີພົນ ລະເມືອງທັງໝົດ 24.006 ຄົນ,ຍິງ 12.037 ຄົນ, ມີເນື້ອທີ່ປູກກາເຟທັງໝົດ 3.845 ເຮັກຕາ ໃນນີ້ເນື້ອທີ່ໃຫ້ໝາກ 2.785 ເຮັກຕາ, ສະມັດຖະພາບ ໂດຍສະເລ່ຍ 2,7 ໂຕນຕໍ່ເຮັກຕາ, ຈັງຫວະການຂະຫຍາຍຕົວຂອງເສດຖະກິດ 16,38% ສະເລ່ຍລາຍໄດ້ GDP ໃສ່ຫົວຄົນ ບັນລຸ 12 ລ້ານກວ່າກີບ, ບ້ານມີເສັ້ນ ທາງທຽວໄດ້ຕະຫຼອດປີມີ 38 ບ້ານກວມເອົາ 70,37% ແລະ ມີບ້ານທີ່ໄດ້ໃຊ້ໄຟຟ້າ 34 ບ້ານກວມເອົາ 62,96%. ໃນວັນດຽວກັນນີ້ ທ່ານຫົວໜ້າຄະນະຈັດຕັ້ງສູນກາງພັກຍັງໄດ້ໄປຢ້ຽມຢາມດ່ານດາກຕະອອກ, ສວນປູກຜັກປອດສານພິດອີກດ້ວຍ. (ຂ່າວ : ສັນຍາ )