ຮອງນາຍົກ ຮຽກຮ້ອງໃຫ້ບໍລິສັດຜູ້ຮັບເໝົາ ກໍ່ສ້າງໂຄງການສາຍສົ່ງ-ສະຖານີ-ເຂື່ອນໄຟຟ້າປະກອບສ່ວນເສຍພັນທະອາກອນ


...

05.11.2018 10:55     

   ກົມສ່ວຍສາອາກອນກະຊວງການເງິນ ໄດ້ຈັດກອງປະຊຸມປຶກສາຫາລືກັບລັດວິສາຫະກິດໄຟຟ້າລາວ(ຟຟລ) ແລະ ບັນດາບໍລິສັດຜູ້ຮັບເໝົາກໍ່ສ້າງໂຄງການສາຍສົ່ງ-ສະຖານີ ແລະ ເຂື່ອນ ໄຟຟ້າ ຂຶ້ນໃນຫວ່າງບໍ່ດົນມານີ້, ທີ່ກະຊວງການເງິນໂດຍການໃຫ້ກຽດໂອ້ລົມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ, ທ່ານ ໂກມົນຈັນ ເພັດອາສາ ຮອງຜູ້ອຳນວຍ ການລັດວິສາຫະກິດໄຟຟ້າລາວ, ມີຜູ້ອຳນວຍ ການບໍລິສັດ, ພ້ອມດ້ວຍພະນັກ ງານກ່ຽວຂ້ອງເຂົ້າຮ່ວມ. ໃນກອງປະຊຸມໄດ້ພ້ອມກັນປຶກສາຫາລືກ່ຽວກັບການເສຍພັນທະອາກອນກຳໄລ 1% ຂອງມູນຄ່າການກໍ່ສ້າງຕົວຈິງໃນໂຄງການກໍ່ສ້າງສາຍສົ່ງ-ສະຖານີໄຟຟ້າ ແລະ ເຂື່ອນໄຟຟ້າ ຊຶ່ງອີງຕາມການເຫັນດີໃຫ້ເກັບຕາມມະຕິຕົກລົງຂອງຄະນະປະຈໍາສະພາແຫ່ງຊາດເລກທີ 0163/ຄປຈ, ລົງວັັນທີ 14 ທັນວາ 2014 ກ່ຽວກັບການອະນຸຍາດເກັບອາກອນກຳໄລຂອງມູນຄ່າຮັບເໝົາກໍ່ສ້າງໂຄງການສາຍສົ່ງ ແລະ ເຂື່ອນໄຟຟ້າ. ຊຶ່ງໃນໄລຍະຜ່ານມາບັນດາໂຄງການທີ່ເຊັນສັນຍາຮັບເໝົາກໍ່ສ້າງ (EPC) ກັບ ຟຟລ ແມ່ນໄດ້ລະບຸເສຍແຕ່ອາກອນລາຍໄດ້ຈາກເງິນເດືອນ ແລະ ໃຫ້ມີການຍົກເວັ້ນ: ອາກອນກຳໄລ, ອາກອນມູນຄ່າເພີ່ມ ແລະ ອາກອນຊົມໃຊ້ ແລະ ໃນສັນຍາເງິນກູ້ລະຫວ່າງລັດຖະບານຂອງ ສປປ ລາວ ແລະ (EXIM BANK) ຂອງຈີນແມ່ນໄດ້ລະບຸວ່າ: ຖ້າຕ້ອງໄດ້ຈ່າຍອາກອນຕ່າງໆແມ່ນໃຫ້ເປັນພາລະຂອງຜູ້ກູ້ຢືມ. ສະນັ້ນ, ນິຕິກຳດັ່ງກ່າວແມ່ນບໍ່ສອດຄ່ອງຕາມກົດໝາຍວ່າດ້ວຍສ່ວຍສາອາກອນທີ່ກຳນົດວ່າ: ການຍົກເວັ້ນພັນທະອາກອນແມ່ນຕ້ອງໄດ້ຜ່ານການຮັບຮອງເຫັນດີຈາກສະພາແຫ່ງຊາດ ແລະ ບໍ່ສອດຄ່ອງກັບຂໍ້ຕົກລົງຂອງກະຊວງການເງິນ ສະບັບເລກທີ 2695/ກງ ລົງວັນທີ 1 ຕຸລາ 2010 ມາດຕາ13 ທີ່ກຳນົດວ່າ: ຖ້າສັນຍາກູ້ຢືມເງິນໄດ້ລະບຸໃຫ້ມີການຍົກເວັ້ນອາກອນຕ່າງໆແມ່ນຕ້ອງໃຫ້ເສຍອາກອນກຳໄລ ແລະ ອາກອນເງິນເດືອນ, ສ່ວນອາກອນມູນຄ່າເພີ່ມ ແລະ ອາກອນຊົມໃຊ້ແມ່ນຍົກເວັ້ນ. ມາຮອດປັດຈຸບັນໄດ້ມີຜູ້ຮັບເໝົາຈໍານວນ 3 ບໍລິສັດຍິນດີປະກອບສ່ວນຈ່າຍອາກອນກຳໄລ 1%ຂອງມູນຄ່າກໍ່ສ້າງຕົວຈິງໃຫ້ລັດຖະບານເປັນຈຳນວນເງິນ 9.820.816 ໂດລາ. ໃນນີ້, ມີສອງບໍລິສັດຈະຈ່າຍພາຍໃນປີ 2018 ເປັນຈຳນວນເງິນ 6.869.846 ໂດລາ. ສໍາລັບບໍລິສັດຮັບເໝົາອື່ນໆແມ່ນຍັງຈະໄດ້ສົມທົບກັບພາກສ່ວນກ່ຽວຂ້ອງສືບຕໍ່ລະດົມຕື່ມ, ເພື່ອໃຫ້ມີຄວາມຍຸຕິທຳ ແລະ ປະຕິບັດພັນ ທະອາກອນກຳໄລໃຫ້ຖືກ ຕ້ອງຕາມລະບຽບກົດໝາຍຄື ກັນກັບໂຄງການທີ່ໄດ້ຈ່າຍຜ່ານມາ. ໂອກາດດັ່ງກ່າວ, ທ່ານ ສົມດີ ດວງດີ ໄດ້ສະແດງຄວາມຄິດເຫັນຢ່າງກົງໄປກົງມາ, ພ້ອມທັງຮຽກຮ້ອງເຖິງບັນດາໂຄງການທີ່ຍັງບໍ່ທັນໄດ້ປະກອບສ່ວນເສຍພັນທະອາກອນນັ້ນໃຫ້ປະຕິບັດໃຫ້ຖືກຕ້ອງຕາມລະບຽບກົດໝາຍ, ເພື່ອໃຫ້ມີຄວາມຍຸຕິທຳຊຶ່ງກັນ ແລະ ກັນກັບໂຄງການທີ່ໄດ້ປະກອບສ່ວນພັນທະອາກອນກຳໄລໃຫ້ລັດຖະບານມາແລ້ວໃນໄລຍະຜ່ານມາ. (ພາບ-ຂ່າວ:ກະຊວງການເງິນ)