ເປີດງານວາງສະແດງສິນຄ້າ ນະຄອນໂຮ່ຈິມິນທີ່ີສະຫວັນນະເຂດ ຫວັງຈັບຄູ່ຮ່ວມທຸລະກິດ


...

05.11.2018 10:54     

   ນະຄອນໂຮ່ຈິມິນ ແຫ່ງ ສສ ຫວຽດນາມ ໄດ້ເປີດງານວາງ ສະແດງສິນຄ້າມິດຕະພາບການຄ້າ-ການບໍລິການ-ການທ່ອງທ່ຽວ ຢູ່ແຂວງສະຫວັນນະເຂດ ໂດຍງານດັ່ງກ່າວຈັດຂຶ້ນເປັນຄັ້ງທີ 2 ເຫັນວ່າມີສຽງຕອບຮັບເປັນຢ່າງດີ ເຫັນໄດ້ຈາກການບໍລິໂພກ-ອຸປະໂພກຂອງສິນຄ້າຫວຽດນາມຢູ່ແຂວງສະຫວັນນະເຂດເພີ່ມຂຶ້ນ ຊຶ່ງໃນ 7 ເດືອນຂອງປີ 2018 ການເຄື່ອນໄຫວສົ່ງເສີມທາງດ້ານການຄ້າ ແລະ ການລົງທຶນຂອງນະຄອນໂຮ່ຈິມິນ ໄດ້ປະກອບສ່ວນຢ່າງສຳຄັນ ເຂົ້າໃນການພັດທະນາເສດຖະ ກິດລະຫວ່າງປະເທດ ໃນນີ້ໄດ້ແນໃສ່ຍົກສູງເຮັດໃຫ້ປະເພດສິນຄ້າທີ່ນຳເຂົ້າ ແລະ ສົ່ງອອກມີວົງເງິນ ຊື້-ຂາຍ ລະຫວ່າງຫວຽດນາມ-ລາວ ບັນລຸເຖິງ 611 ລ້ານໂດລາ ເພີ່ມຂຶ້ນ 17% ທຽບໃສ່ກັບປີ 2017 ທີ່ຜ່ານມາ. ພິທີເປີດງານວາງສະແດງສິນຄ້າມິດຕະພາບ ນະຄອນໂຮ່ຈິມິນ ສສ ຫວຽດນາມ-ລາວ ຄັ້ງທີ 2 ທີ່ແຂວງສະຫວັນນະເຂດ ໄດ້ຈັດຂຶ້ນທ້າຍອາທິດຜ່ານມານີ້ ຢູ່ສູນການຄ້າ ສະຫວັນ-ໄອເຕັກ ໂດຍມີທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ຮິ່ງ ແກັກ ແມ້ງ ຮອງປະທານຄະນະກຳມະການປະຊາຊົນ, ນະຄອນໂຮ່ຈິມິນ, ມີຜູ້ປະກອບການຈາກລາວ-ຫວຽດນາມ ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານ ຮິ່ງ ແກັກ ແມ້ງ ກ່າວ ວ່າ: ງານວາງສະແດງສິນຄ້າມິດຕະພາບ ດ້ານການຄ້າ-ການບໍລິການ-ການທ່ອງທ່ຽວຂອງນະຄອນໂຮ່ຈິມິນ ຈັດຂຶ້ນທີ່ແຂວງສະຫວັນນະເຂດຄັ້ງນີ້ມີຄວາມໝາຍສຳຄັນເປັນຢ່າງຍິ່ງ ເປັນການປະກອບສ່ວນຊຸກຍູ້ສາຍພົວພັນການຮ່ວມມືດ້ານການຄ້າ ລະຫວ່າງປະຊາຊົນ ແລະ ວິສາຫະກິດຂອງຫວຽດ ນາມ-ລາວ ເວົ້າລວມ, ເວົ້າສະ ເພາະແມ່ນນະຄອນໂຮ່ຈິມິນ ແລະ ແຂວງສະຫວັນນະເຂດ ຊຶ່ງງານວາງສະແດງຄັ້ງນີ້ມີຜູ້ປະກອບການທັງລາວ ແລະ ຫວຽດນາມ ນຳຜະລິດຕະພັນເຂົ້າມາວາງສະແດງກວ່າ 250 ຮ້ານ ຊຶ່ງປະກອບມີຜະລິດຕະພັນກະສິກຳ, ເຕັກໂນໂລຊີຂັ້ນສູງ, ອຸປະກອນກະສິກໍາ, ເຕັກໂນໂລຊີ ຊີວະພາບ, ກົນຈັກ-ເຄື່ອງຈັກ, ເຄື່ອງໄຟຟ້າ, ສິນຄ້າປະເພດເສື້ອຜ້າ, ເກີບ, ອາຫານ ແລະ ສິນຄ້າອຸປະໂພກອື່ນໆ. ທ່ານ ສັນຕິພາບ ພົມວິ ຫານ ກ່າວວ່າ: ຄວາມສາມັກຄີຮັກແພງທີ່ແໜ້ນແຟ້ນລະຫວ່າງລາວ-ຫວຽດນາມ, ຫວຽດນາມ-ລາວກໍຄືແຂວງສະຫວັນນະເຂດ-ນະຄອນໂຮ່ຈິມິນ ແລະ ບັນດາແຂວງຂອງຫວຽດນາມ ໄດ້ມີການພົວພັນຮ່ວມມືທາງດ້ານການເມືອງ, ປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ, ສຶກສາ ໃນນີ້ ການ ເຄື່ອນໄຫວສົ່ງເສີມການລົງທຶນ-ການຄ້າ-ການທ່ອງທ່ຽວ-ການບໍລິການແມ່ນສືບຕໍ່ເພີ່ມທະວີການຮ່ວມມືອັນເປັນການປະກອບສ່ວນ ແລະ ຊຸກຍູ້ການພັດທະນາດ້ານເສດຖະກິດລະ ຫວ່າງສອງປະເທດກໍຄືແຂວງສະຫວັນນະເຂດ-ນະຄອນໂຮ່ຈິມິນ. (ຂ່າວ: ສະຫວັນນະເຂດ)