ຂໍ້ຂັດແຍ້ງເສດຖະກິດການຄ້າຈີນ-ອາເມຣິກາ ກໍ່ຜົນກະທົບທາງລົບທັງສອງຝ່າຍ ແຕ່ເສດຖະກິດຈີນ ຍັງມີບາດກ້າວຂະຫຍາຍຕົວ


...

07.06.2019 10:21     

   ການຂັດແຍ້ງເສດຖະກິດການຄ້າຈີນ - ອາເມຣິກາ ເຮັດໃຫ້ສອງປະເທດໄດ້ຮັບຜົນກະທົບທາງລົບ ແຕ່ສະເພາະ ເສດຖະກິດການຄ້າຂອງ ສປ ຈີນ ຍັງມີບາດກ້າວຂະຫຍາຍຕົວຢ່າງໝັ້ນທ່ຽງ, ເຂັ້ມແຂງ ແລະ ຍືນຍົງ ຊຶ່ງມີເງື່ອນໄຂສະໜັບສະໜູນອັນພຽງພໍດ້ວຍ 4 ທ່າແຮງຫຼັກ. ໃນຂະນະດຽວກັນ, ຜົນກະທົບຂອງການຂັດແຍ້ງເສດຖະກິດການຄ້າຈີນ - ອາເມຣິກາ ຝ່າຍຈີນເຫັນວ່າບໍ່ມີຜົນກະທົບຫຼາຍຕໍ່ກັບ ສປປ ລາວ ແຕ່ກົງກັນຂ້າມ ດ້ວຍການເປັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ ຈະເຮັດໃຫ້ການຮ່ວມມືລະຫວ່າງລາວ - ຈີນ ກ້າວເຂົ້າສູ່ໄລຍະໃໝ່.
ທ່ານ ຈຽງ ຈາຍ ດົງ ເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ ໄດ້ໃຫ້ສຳພາດຕໍ່ສື່ມວນຊົນລາວ ກ່ຽວກັບຂໍ້ຂັດແຍ້ງເສດຖະກິດການຄ້າຈີນ - ອາເມຣິກາ ເມື່ອວັນທີ 6 ມິຖຸນານີ້ ວ່າ: ມາດຕະການຂຶ້ນພາສີຂອງອາເມຣິກາຕໍ່ສິນຄ້າທີ່ນຳເຂົ້າຈາກຈີນ ແນ່ນອນຈະສົ່ງຜົນກະທົບຕໍ່ການພັດທະນາຂອງເສດຖະກິດຈີນ, ຈາກເດືອນມັງກອນ ຫາ ເມສາ ປີນີ້, ການສົ່ງອອກສິນຄ້າຂອງຈີນສູ່ອາເມຣິກາໄດ້ຫຼຸດໜ້ອຍລົງ 4,8%, ການເຕີບໂຕດ້ານການລົງທຶນຕົວຈິງຂອງອາເມຣິກາຕໍ່ຈີນ ຈາກ 11% ໃນປີ 2017 ໄດ້ລົງເຫຼືອ 1,5%. ແຕ່ໃນຂະນະດຽວກັນອາເມຣິກາກໍໄດ້ຮັບຜົນກະທົບທາງລົບຄື: ປະລິມານສົ່ງອອກຈາກອາເມຣິກາ ຕໍ່ຈີນໄດ້ຫຼຸດລົງຢ່າງຕໍ່ເນື່ອງໃນ 8 ເດືອນຜ່ານມາ, ປະລິມານການລົງທຶນຈາກວິສາຫະກິດຈີນຕໍ່ອາເມຣິກາ ໄດ້ຫຼຸດລົງ 10% ເມື່ອທຽບໃສ່ໄລຍະດຽວກັນຂອງປີຜ່ານມາ; ປະລິມານສົ່ງອອກຂອງຜະລິດຕະພັນກະສິກຳອາເມຣິກາຕໍ່ຈີນໄດ້ຫຼຸດລົງ 33% ເມື່ອທຽບໃສ່ໄລຍະດຽວກັນຂອງປີຜ່ານມາ, ໃນນັ້ນ ອັດຕາຫຼຸດລົງຂອງໝາກຖົ່ວໄດ້ມີເຖິງ 50%, ລາຍຮັບຂອງກະສິກຳຫຼຸດລົງ 12%, ສະເພາະແຕ່ເຄື່ອງເຟີນີເຈີ ແຕ່ລະປີ ຜູ້ບໍລິໂພກອາເມຣິກາຈະຕ້ອງຈ່າຍເງິນ 4,6 ຕື້ໂດລາ. ບົດລາຍງານຂອງສະຖາບັນການຄົ້ນຄວ້າອາເມຣິກາໄດ້ສະແດງໃຫ້ເຫັນວ່າ ອະນາຄົດໃນຕໍ່ໜ້າ ຖ້າວ່າເພີ່ມພາສີ 25% ຕໍ່ສິນຄ້າທັງໝົດຂອງຈີນທີ່ສົ່ງອອກສູ່ອາເມຣິກາຍອດມູນຄ່າຜະລິດຕະພັນພາຍໃນ (GDP) ຂອງອາເມຣິກາຈະຫຼຸດລົງ 1,01%, ໂອ ກາດ ປະກອບອາຊີບ ຈະຫຼຸດ ລົງ 2,16 ລ້ານຕຳແໜ່ງ, ລາຍຈ່າຍຕໍ່ປີຂອງຄອບຄົວໜຶ່ງທີ່ມີສີ່ຄົນ ຈະເພີ່ມຂຶ້ນ 2.294 ໂດລາ.
ທ່ານ ຈຽງ ຈາຍ ດົງ ຍັງໄດ້ກ່າວໃຫ້ຮູ້ວ່າ: ຈາກລະດັບຍຸດ ທະສາດ, ການຂະຫຍາຍຕົວຂອງເສດຖະກິດຈີນຢ່າງໝັ້ນທ່ຽງ, ເຂັ້ມແຂງ ແລະ ຍືນຍົງ ຊຶ່ງມີເງື່ອນໄຂສະໜັບສະໜູນອັນພຽງພໍດ້ວຍ 4 ທ່າແຮງຄື: 1). ທ່າແຮງບົ່ມຊ້ອນດ້ານຊັບພະຍາກອນ, ຈີນມີປະຊາກອນເກືອບ 1,4 ຕື້ຄົນ, ໃນນັ້ນ ຜູ້ອອກແຮງງານ 900 ລ້ານຄົນ, ມີ 170 ລ້ານຄົນ ທີ່ໄດ້ຮັບການສຶກສາສູງໄດ້ມີສີມືເຕັກນິກດີ ເປັນກຸ່ມຄົນລາຍຮັບກາງທີ່ໃຫຍ່ທີ່ສຸດໃນໂລກ ແລະ ໂຄງປະກອບຕະຫຼາດ100 ກ່ວາລ້ານຫົວໜ່ວຍ. 2). ເຫງົ້າພະລັງ ແລະ ການຂະຫຍາຍຕົວຂອງເສດຖະກິດຈີນຕົ້ນຕໍລະດົມ ໂດຍຄວາມຕ້ອງການພາຍໃນ ຊຶ່ງໃນປີ 2018 ໄດ້ປະກອບສ່ວນ 108,6% ຂອງການເຕີບໂຕເສດຖະກິດ ໃນນັ້ນ ການບໍລິໂພກປະກອບສ່ວນເຖິງ 76,2%. 3). ສປ ຈີນ ເປັນປະເທດທີ່ມີຄວາມແຮງປະດິດສ້າງໃໝ່ ຊຶ່ງຈີນແມ່ນປະເທດລົງທຶນຫຼາຍກ່ວາໝູ່ອັນດັບສອງໃນໂລກ ດ້ານການປະດິດສ້າງໃໝ່ ຊຶ່ງກວມເອົາ 2,18% ຂອງຍອດມູນຄ່າເສດຖະກິດ ແລະ ມີກຳລັງແຮງໃໝ່ທີ່ຖືອຸດສາຫະກຳຍຸດທະສາດ ແລະ ຊົມໃຊ້ເສດຖະກິດນຳກັນ ເປັນຕົວແທນນັ້ນໄດ້ເພີ່ມທະວີຢ່າງຕໍ່ເນື່ອງ ແລະ 4). ແມ່ນຄວາມສາມາດດ້ານການຄຸ້ມຄອງ, ມີການນຳພາອັນເຂັ້ມແຂງຂອງພັກກອມມູນິດຈີນ ມີທ່າແຮງການເມືອງທີ່ສຸມໃສ່ທຸກກຳລັງເຮັດວຽກຮ່ວມກັນ, ມີນາໍ້ໃຈຊົນຊາດທີ່ເປັນຈິດໜຶ່ງໃຈດຽວ ແລະ ສາມັກຄີ, ມີພື້ນຖານວັດຖຸເຕັກນິກໜັກແໜ້ນທີ່ສະສົມຈາກການພັດທະນາຢ່າງວ່ອງໄວຕັ້ງແຕ່ການເປີດປະຕູສູ່ໂລກພາຍນອກຜ່ານມາ, ມີຊ່ອງຫວ່າງ ພັດທະນາອັນກວ້າງໃຫຍ່ ອົດທົນໄດ້ ແລະ ດີງາມ, ມີປະສົບການ ແລະ ນະໂຍບາຍອຸດົມສົມບູນ, ສະນັ້ນ ຈີນມີເງື່ອນໄຂ, ມີຄວາມສາມາດ ແລະ ຄວາມໝັ້ນໃຈ ເພື່ອຮັບມືກັບວິກິດການ ແລະ ສິ່ງທ້າທາຍຕ່າງໆ.
ໃນໂອກາດໃຫ້ສຳພາດຄັ້ງນີ້, ທ່ານ ຈຽງ ຈາຍ ດົງ ຍັງໄດ້ ກ່າວເຖິງຜົນກະທົບຂອງການຂັດແຍ້ງເສດຖະກິດການຄ້າຈີນ - ອາເມຣິກາ ທີ່ມີຕໍ່ ສປປ ລາວ ວ່າ: ສປປ ລາວ ຈະບໍ່ຖືກຜົນກະທົບຕໍ່ການຂັດແຍ້ງດັ່ງກ່າວຫຼາຍ. ແຕ່ກົງກັນຂ້າມສອງປະເທດຈີນ - ລາວ ເປັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ, ສາຍພົວພັນສອງປະເທດກຳລັງຢູ່ໃນໄລຍະດີທີ່ສຸດຂອງປະຫວັດສາດ. ໂດຍສະເພາະໃນເດືອນເມສາປີນີ້, ທ່ານ ສີ ຈິ້ນຜິງ ເລຂາ ທິການໃຫຍ່ ປະທານປະເທດແຫ່ງ ສປ ຈີນ ແລະ ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ລົງນາມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ຈີນ - ລາວ, ລາວ-ຈີນ, ຊຸກຍູ້ສົ່ງເສີມສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງ ຈີນ - ລາວ ກ້າວເຂົ້າສູ່ໄລຍະໃໝ່. ຈີນຍິນດີທີ່ຮ່ວມກັບຝ່າຍລາວສຸດຄວາມພະຍາຍາມຈັດຕັ້ງປະຕິບັດໃຫ້ດີ, ສືບຕໍ່ຮັກສາການແລກປ່ຽນຍຸດທະສາດ, ຮັດແໜ້ນພື້ນຖານການເມືອງຂອງຄູ່ຮ່ວມຊາຕາກຳໃຫ້ດີ, ຍິນດີທີ່ຮ່ວມກັບຝ່າຍລາວ ຊຸກຍູ້ການເຊື່ອມໂຍງ ລະຫວ່າງ ຂໍ້ລິເລີ່ມໜຶ່ງແລວ ໜຶ່ງເສັ້ນທາງ ແລະ ຍຸດທະສາດຫັນປ່ຽນຈາກປະເທດທີ່ບໍ່ມີຊາຍແດນຕິດກັບທະເລມາເປັນປະເທດເຊື່ອມຈອດ, ກໍ່ສ້າງທາງລົດໄຟ ຈີນ-ລາວ ແລະ ແລວເສດຖະກິດ ຈີນ-ລາວ ຮ່ວມກັນ.
(ຂ່າວ + ພາບ: ສຸກສະຫວັນ)