ກະຊວງການເງິນ ດຳເນີນກອງປະຊຸມ ຄົບຄະນະບໍລິຫານງານພັກເປີດກວ້າງ ຄັ້ງທີ 8 ສະໄໝທີ II


...

03.07.2019 9:22     

   ກະຊວງການເງິນ ໄດ້ດຳເນີນກອງປະຊຸມຄົບຄະນະບໍລິຫານງານພັກກະຊວງ ຄັ້ງທີ 8 ສະໄໝທີ II ຂຶ້ນໃນວັນທີ 1 ກໍລະກົດຜ່ານມາ ທີ່ກະຊວງດັ່ງກ່າວ ໂດຍການເປັນເປັນປະທານຂອງສະຫາຍ ສົມດີ ດວງດີ ກໍາມະການສູນກາງພັກ ຮອງນາຍົກລັດຖະມົນຕີ ເລຂາຄະນະພັກ ລັດຖະມົນຕີກະຊວງການເງິນ; ມີສະຫາຍ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ; ມີບັນດາສະຫາຍຄະນະປະຈຳພັກ; ກຳມະການຄະນະບໍລິຫານງານພັກ; ເລຂາຄະນະພັກຮາກຖານ; ເລຂາໜ່ວຍພັກເຂົ້າຮ່ວມ. ໂອກາດນີ້,ສະຫາຍ ສົມດີ ດວງດີ ໄດ້ມີຄໍາເຫັນວ່າ: ການດໍາເນີນກອງປະຊຸມຄັ້ງນີ້, ໄດ້ພ້ອມກັນສຸມໃສ່ ບັນດາວຽກງານສໍາຄັນອັນຮີບດ່ວນຂອງຄະນະພັກ, ຄະນະນໍາແຕ່ລະຂັ້ນຂອງກະຊວງການເງິນ ເປັນຕົ້ນການສະຫຼຸບຕີລາຄາຜົນການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກເປີດກວ້າງ ຄັ້ງທີ 7 ສະໄໝທີ II ໄດ້ມອບໝາຍໜ້າວຽກສໍາຄັນຂອງພັກໃຫ້ບັນດາຮາກຖານພັກອ້ອມຂ້າງຄະນະບໍລິຫານງານພັກກະຊວງການເງິນ ຊີ້ນໍາ ແລະ ຈັດຕັ້ງປະຕິບັດໃຫ້ມີຜົນສໍາເລັດໃນ 6 ເດືອນຕົ້ນປີ 2019. ສະເໜີເຜີຍແຜ່ເອກະສານທີ່ຕິດພັນກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ, ເພື່ອເປັນການກະກຽມຮ່າງບົດລາຍງານການເມືອງຂອງກອງປະຊຸມໃຫຍ່ອົງຄະນະພັກກະຊວງ-ອົງ ການ, ແຂວງ-ນະຄອນຫຼວງ ແລະ ອົງຄະນະພັກເມືອງ-ນະຄອນ (ໄລຍະ 2019-2020) ສະບັບລົງວັນທີ 31 ພຶດສະພາ 2019 ແລະ ຄໍາແນະນໍາກ່ຽວກັບວຽກງານໂຄສະນາ ແລະ ສ້າງຂະບວນການ ເລກທີ 05/ອຄຂ, ລົງວັນທີ 20 ມິຖຸນາ 2019 ກ່ຽວກັບການໂຄສະນາເຜີຍແຜ່ການກະກຽມ ແລະ ດໍາເນີນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກຕິດພັນກັບກອງປະຊຸມໃຫຍ່ສາມຂັ້ນຂອງອົງຄະນະພັກກະຊວງການເງິນ. ພ້ອມດຽວກັນນີ້,ໄດ້ປະກອບຄໍາຄິດຄໍາເຫັນໃສ່ບົດສະຫຼຸບຕີລາຄາຜົນການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກເປີດກວ້າງ ຄັ້ງທີ 7 ສະໄໝທີ II ເພື່ອໃຫ້ມີເນື້ອໃນຄົບຖ້ວນ, ເລິກເຊິ່ງ, ສອດຄ່ອງກັບສະພາບເງື່ອນໄຂຕົວຈິງໃນແຕ່ລະຂົງເຂດຂະແໜງການເງິນ, ເພື່ອເປັນການສະຫຼຸບຕີລາຄາຄືນໃນການນໍາພາ, ຊີ້ນໍາຈັດຕັ້ງປະຕິບັດຂອງຄະນະພັກ, ຄະນະນໍາແຕ່ລະຂັ້ນ ແລະ ສະມາຊິກພັກແຕ່ລະສະຫາຍທີ່ຢູ່ໃນຄວາມຮັບຜິດຊອບຂອງຕົນໃນ 6 ເດືອນຕົ້ນປີ 2019 ຜ່ານມາ. ກອງປະຊຸມໄດ້ສືບຕໍ່ຄົ້ນຄວ້າປະກອບຄໍາຄິດຄໍາເຫັນຈາກບັນດາສະຫາຍເລຂາຄະນະພັກກ່ຽວຂ້ອງ ແລະ ໄດ້ພ້ອມກັນສະຫຼຸບຕີລາຄາຜົນຂອງການດໍາເນີນກອງປະຊຸມຄະນະບໍລິຫານງານພັກເປີດກວ້າງຄັ້ງທີ 8 ສະໄໝທີ II ເພື່ອສັງລວມລາຍງານໃຫ້ຄະນະພັກຂັ້ນເທິງຮັບຊາບ ແລະ ມີທິດຊີ້ນໍາໃນການຈັດຕັ້ງປະຕິບັດໃນຕໍ່ໜ້າ, ເພື່ອພ້ອມກັນສຸມໃສ່ຈັດຕັ້ງປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ມີປະສິດທິຜົນ ແລະ ມີຜົນສໍາເລັດຢ່າງພ້ອມພຽງ; ເພື່ອພ້ອມກັນນໍາພາບັນດາອົງການຈັດຕັ້ງມະຫາຊົນດໍາເນີນກອງປະຊຸມໃຫຍ່ຂອງແຕ່ລະອົງການໃຫ້ສໍາເລັດແລ້ວຈຶ່ງສືບຕໍ່ກ້າວເຂົ້າສູ່ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງການເງິນໃນທ້າຍປີ 2019 ແລະ ຕົ້ນປີ 2020 ໃຫ້ມີຜົນສໍາເລັດຕາມແຜນທີ່ກໍານົດໄວ້ ແລະ ເປັນຂະບວນຟົດຟື້ນ. (ຂ່າວ-ພາບ: ກະຊວງການເງິນ)