ຫົວເຫວີຍ ໃຫ້ທຶນນັກສຶກສາລາວ ໄປທັດສະນະດ້ານໄອຊີທີ ຢູ່ ສປ ຈີນ


...

19.07.2019 9:05     

   ນັກສຶກສາຈາກມະຫາວິ ທະຍາໄລແຫ່ງຊາດ, ມະຫາວິ ທະຍາໄລສຸພານຸວົງ, ມະຫາວິ ທະຍາໄລສະຫວັນນະເຂດ ແລະ ມະຫາວິທະຍາໄລຈຳປາສັກ ຈຳນວນ 10 ຄົນ ທີ່ມີພອນສະ ຫວັນດ້ານໄອຊີທີ ໄດ້ຮັບທຶນຈາກບໍລິສັດຫົວເຫວີຍ ເພື່ອໄປທັດສະນະສຶກສາດ້ານ ໄອຊີທີ ຢູ່ ສປ ຈີນ ໃນໂຄງການ Seeds for the Future. ພິທີສົ່ງນັກສຶກສາຈຳນວນດັ່ງກ່າວໄດ້ຈັດຂຶ້ນໃນວັນທີ 17 ກໍລະກົດຜ່ານມາ ທີ່ບໍລິສັດຫົວເຫວີຍ ປະຈຳລາວ ນະຄອນ ຫຼວງວຽງຈັນ ໂດຍມີ ທ່ານ ພຸດ ສິມມາລາວົງ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ມາກ ວອງ (Mark Wong) ປະທານບໍລິສັດຫົວເຫວີຍ ປະຈຳລາວ, ມີນັກສຶກສາ ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານ ມາກ ວອງ ກ່າວວ່າ: ICT ໄດ້ກາຍເປັນເຄື່ອງມືສຳຄັນໃນການພັດທະນາຫຼາຍຂະແໜງການ, ໃນຖານະທີ່ເປັນຜູ້ນຳດ້ານ ICT ລະດັບໂລກຫົວເຫວີຍຍັງມຸ່ງໝັ້ນທີ່ຈະສົ່ງເສີມການພັດທະນາອຸດສາຫະກຳ ICT ໃນປະເທດທີ່ກໍາລັງດຳເນີນການ ແລະ ມີເປົ້າໝາຍທີ່ຈະຂັບເຄື່ອນຄວາມຍືນຍົງທາງເສດຖະກິດ-ສັງຄົມ ແລະ ສິ່ງແວດລ້ອມໃນໄລຍະຍາວ ແລະ ພວກເຮົາເຊື່ອວ່າການເຂົ້າເຖິງການສຶກສາມີຄວາມສຳຄັນຕໍ່ການພັດທະນາທີ່ເປັນທຳ ແລະ ຍືນຍົງໃນປະເທດລາວ ດັ່ງນັ້ນໂຄງການ CSR ສ່ວນໃຫຍ່ແມ່ນມຸ່ງເນັ້ນໄປທີ່ການສຶກສາ ແລະ ການຖ່າຍທອດຄວາມຮູ້. ພວກເຮົາຫວັງວ່າກິດຈະກຳນີ້ຈະຊ່ວຍໃຫ້ນັກສຶກສາໄດ້ພັດທະນາຄວາມຮູ້ດ້ານ ICT ແລະ ໃນອະນາຄົດສາມາດຍົກລະດັບຄວາມຮູ້ດ້ານ ICT ເພີ່ມຂຶ້ນເລື້ອຍໆ ເພື່ອຊ່ວຍໃຫ້ປະເທດລາວກາຍເປັນປະເທດທີ່ມີຄວາມກ້າວໜ້າທາງດ້ານເຕັກໂນໂລຊີດີຈີຕອນ. ທ່ານ ພຸດ ສິມມາລາວົງ ໄດ້ກ່າວສະແດງຄວາມຂອບໃຈມາຍັງ ບໍລິສັດ ຫົວເຫວີຍກັບຄວາມມຸ່ງໝັ້ນໃນການພັດທະນາປັບປຸງລະບົບ ICT ແລະ ມອບໂອກາດທີ່ດີໃຫ້ແກ່ການສຶກສາຂອງ ສປປ ລາວ, ເຊັ່ນດຽວກັນກັບໂຄງການ Seeds for the future ເປັນໂຄງການທີ່ເຮັດໃຫ້ນັກສຶກສາລາວໄດ້ມີໂອກາດຮຽນຮູ້ສິ່ງໃໝ່ໆໃນສິ່ງແວດລ້ອມໃໝ່ໆທີ່ສົມບູນແບບ. ທ່ານ ພຸດ ສິມມາລາວົງ ຍັງໄດ້ກ່າວວ່າ: ບໍລິສັດ ຫົວເຫວີຍ ເປັນບໍລິສັດທີ່ໄດ້ມີການພັດທະນາຂະຫຍາຍຕົວຢ່າງວ່ອງໄວ ແລະ ເປັນບໍລິສັດຊັ້ນນຳຂອງໂລກໃນດ້ານ ໄອຊີທີ. ບໍໍ່ວ່າຈະເປັນປະເທດມະຫາອຳນາດ ຫຼື ປະເທດທີ່ພັດທະນາແລ້ວ ລວມທັງ ສປປ ລາວ ບົດບາດຂອງ ໄອຊີທີ ແມ່ນມີຄວາມສໍາຄັນຫຼາຍ ແລະ ກໍຍັງຄົງມຸ່ງເນັ້ນພັດທະນາລະບົບ ໄອຊີທີ ຢ່າງຕໍ່ເນື່ອງ. ໂຄງການ Seeds for the future ເປັນໂຄງການທີ່ສຳຄັນຫຼາຍໃຫ້ແກ່ການພັດທະນາບຸກຄະລາກອນ ແລະ ອວຍພອນໃຫ້ນັກສຶກສາທັງ 10 ຄົນຈົ່ງຕັ້ງໃຈເກັບກ່ຽວເອົາຄວາມຮູ້ ແລະ ປະສົບການໃນການລົງຕົວຈິງມາເປັນບົດຮຽນທີ່ດີ ແລະ ເອົາມາພັດທະນາບ້ານເມືອງໃນອະນາຄົດ. ຫົວເຫວີຍ ໄດ້ເລີ່ມຕົ້ນດຳເນີນໂຄງການນີ້ມາແຕ່ປີ 2008 ເພື່ອພັດທະນາຄວາມຮູ້ຄວາມສາມາດຂອງນັກສຶກສາຜູ້ມີພອນສະຫວັນ ICT, ຍົກສູງການຖ່າຍທອດຄວາມຮູ້ ໃຫ້ມີການພັດທະນາຂຶ້ນເລື້ອຍໆ ໃນຂະແໜງການເຕັກໂນໂລຊີຂໍ້ມູນຂ່າວສານ, ປັບປຸງ ແລະ ຊຸກຍູ້ການຫັນດີຈີຕອນຢູ່ໃນພາກພື້ນ ທຸກໆປີ ຫົວເຫວີຍ ໄດ້ເຊື້ອເຊີນເອົານັກສຶກສາ 1.000 ຄົນ ຈາກທົ່ວໂລກ ເພື່ອໄປທັດສະນະສຶກສາຢູ່ທີ່ສຳນັກງານໃຫຍ່ຂອງບໍລິສັດຫົວເຫວີຍ ທີ່ ສປ ຈີນ. (ຂ່າວ-ພາບ: ຄຳເຮືອງ)