ຫວຽດນາມ ຊ່ວຍກໍ່ສ້າງສະຖາບັນເສດຖະກິດ-ການເງິນ ໄລຍະ 3


...

23.07.2019 9:48     

   ລັດຖະບານ ແຫ່ງ ສສ ຫວຽດນາມໄດ້ໃຫ້ການຊ່ວຍ ເຫຼືອແກ່ລັດຖະບານແຫ່ງ ສປປ ລາວ ໂຄງການກໍ່ສ້າງສະຖາບັນເສດຖະກິດ-ການເງິນ (ດົງຄໍາຊ້າງ) ໄລຍະ 3 ລວມມູນຄ່າທັງໝົດ 65,25 ຕື້ກວ່າກີບ, ລັດຖະບານ ແຫ່ງ ສປປ ລາວ ສົມທົບທຶນຈຳນວນໜຶ່ງ. ພິທີວາງສີລາລືກໂຄງການກໍ່ສ້າງສະຖາບັນດັ່ງກ່າວມີຂຶ້ນໃນວັນທີ 19 ກໍລະກົດນີ້ ທີ່ສະຖາບັນເສດຖະກິດ-ການເງິນ ໂດຍການເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາ ຍົກລັດຖະມົນຕີ ລັດຖະມົນຕີກະຊວງການເງິນ ແລະ ທ່ານ ດິງ ຕຽນ ຢຸງ ລັດຖະມົນຕີກະຊວງການເງິນ ສສ ຫວຽດນາມ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ ຫົວໜ້າຄະນະຄຸ້ມຄອງໂຄງການຝ່າຍລາວ ໄດ້ລາຍງານຫຍໍ້ກ່ຽວກັບໂຄງການກໍ່ສ້າງສະຖາບັນເສດຖະກິດ-ການເງິນ ໄລຍະ 3 ວ່າ: ເພື່ອເປັນການສືບຕໍ່ຜົນ ສຳເລັດໂຄງການກໍ່ສ້າງສະຖາບັນເສດຖະກິດ-ການເງິນໄລຍະ 1, 2 ແລະ ແຜນພັດທະນາສະຖາບັນເສດຖະກິດ-ການເງິນ, ແຜນພັດທະນາເສດຖະກິດ-ສັງຄົມແຫ່ງຊາດໃນປັດຈຸບັນ ແລະ ອະນາຄົດ; ລັດຖະບານຂອງສອງປະເທດ ສສ ຫວຽດນາມ ແລະ ສປປ ລາວໄດ້ອະນຸຍາດໃຫ້ລົງທຶນກໍ່ສ້າງສະຖາບັນເສດຖະກິດ-ການເງິນໄລຍະ 3 ນັບແຕ່ປີ 2017-2021. ລັດຖະບານ ສສ ຫວຽດ ນາມ ຈຶ່ງໄດ້ສືບຕໍ່ໃຫ້ການຊ່ວຍເຫຼືອການກໍ່ສ້າງອາຄານຮຽນ, ອາຄານຫໍພັກນັກສຶກສາ, ສະໜາມກິລາກາງແຈ້ງ, ກໍ່ ສ້າງໂຄງລ່າງພື້ນຖານນອກອາຄານ, ປ້ອມສູບນໍ້າ, ປ້ອມໄຟຟ້າ, ເສັ້ນທາງ, ໜອງນໍ້າເພື່ອປັບອາກາດ, ລະບົບສະໜອງນໍ້າ, ລະບາຍນໍ້າ, ສະໜອງໄຟຟ້ານອກອາຄານ, ປ້ອງກັນປວກ ແລະ ອຸປະກອນຄົບຊຸດ ລວມມູນຄ່າທັງໝົດ 176,19 ຕື້ດົງ ຫຼື ປະມານ 65,25 ຕື້ກີບ. ໃນນັ້ນ, ທຶນຊ່ວຍເຫຼືອຂອງລັດຖະບານ ສສ ຫວຽດນາມ 158,57 ຕື້ດົງ ຫຼື ປະມານ 58,73 ຕື້ກີບ, ທຶນສົມທົບຂອງລັດຖະບານ ສປປ ລາວ 17,61 ຕື້ດົງ ຫຼື ປະມານ 6,52 ຕື້ກີບ. ໂຄງການກໍ່ສ້າງສະຖາບັນເສດຖະກິດ-ການເງິນ ໄລຍະ 3 ເປັນການສືບຕໍ່ຜົນສໍາເລັດໂຄງການກໍ່ສ້າງສະຖາບັນເສດຖະກິດ-ການເງິນໄລຍະ 1, 2 ທີ່ຜ່ານມາອັນເປັນການປະກອບສ່ວນອັັນໃຫຍ່ຫຼວງເຂົ້າໃນວຽກສ້າງສາພັດທະນາແຫຼ່ງກຳລັງຂອງຂະແໜງການເງິນຂອງ ສປປ ລາວ; ຕອບສະໜອງຄວາມຕ້ອງການໃນການພັດທະນາເສດຖະກິດຂອງສປປ ລາວ, ໂດຍສະເພາະຄວາມຕ້ອງການໃນການຄຸ້ມຄອງລັດດ້ານການເງິນໃນໄລຍະໃໝ່, ທັງເປັນການເພີ່ມທະວີຄວາມສາມັກຄີມິດຕະພາບອັນເລິກເຊິ່ງລະຫວ່າງສອງພັກ, ສອງລັດຖະບານ ແລະ ປະຊາຊົນສອງຊາດລາວ-ຫວຽດນາມ-ລາວ "ໝັ້ນຄົງຂະນົງແກ່ນຕະຫຼອດໄປ"; ທີ່ສຳຄັນຈະສ້າງໃຫ້ສະຖາບັນເສດຖະກິດ-ການເງິນໃຫ້ກາຍເປັນສູນກາງການສຶກສາລະດັບປະເທດ, ຍົກລະດັບຖັນແຖວພະນັກງານເສດຖະກິດ-ການເງິນຂອງລາວ; ຮັບປະກັນໃນການຕອບສະໜອງຄວາມຕ້ອງການກໍ່ສ້າງນັກສຶກສາຈຳນວນ 4.000 ຄົນ ແລະ ພະນັກງານຂະແໜງການເງິນມາຝຶກອົບຮົມຈຳນວນ 320 ຄົນ; ຄວາມຕ້ອງການທີ່ພັກອາໃສໃຫ້ແກ່ນັກສຶກສາຈຳນວນ 1.000 ຄົນ ແລະ ພະນັກງານຝຶກອົບຮົມຂະ ແໜງການເງິນຈຳນວນ 100 ຄົນ. ໃນໄລຍະຜ່ານມາລັດ ຖະບານ ສສ ຫວຽດນາມໄດ້ໃຫ້ການຊ່ວຍເຫຼືອລັດຖະບານສປປ ລາວໂດຍສະເພາະກະຊວງການເງິນໃນການກໍ່ສ້າງສະຖາບັນເສດຖະກິດ-ການເງິນດົງຄໍາຊ້າງນັບແຕ່ປີ 2006-2008 ເຊັ່ນກໍ່ສ້າງອາຄານຫ້ອງການ, ອາຄານຮຽນ ແລະ ອາຄານຄົ້ນຄວ້າວິທະຍາສາດ, ຫໍພັກນັກສຶກສາ 2, ຮ້ານອາຫານສຳລັບນັກສຶກສາ ແລະ ພະນັກງານ, ສະໂມສອນໂຮງຮຽນ, ລະບົບໂຄງລ່າງນອກອາຄານ (ເດີ່ນ, ລະບົບລະບາຍນ້ຳ, ປ້ອມບຳບັດນ້ຳ, ໝໍ້ແປງ, ປະຕູຂົງ, ກຳແພງ, ປ້ອມຍາມ, ເສັ້ນທາງພາຍໃນ) ລວມມູນຄ່າທັງໝົດ 85,73 ຕື້ດົງ. ສຳລັບໄລຍະ 2 ແຕ່ປີ 2012 ຮອດປີ 2014 ໄດ້ໃຫ້ການຊ່ວຍເຫຼືອອາຄານຮຽນ, ຫ້ອງສຳມະນາ-ຫ້ອງອາເນກປະສົງ, ຫໍສະໝຸດ, ຫໍພັກພະນັກງານທີ່ມາຝຶກອົບຮົມ, ລະບົບໂຄງລ່າງນອກອາຄານໄລຍະ 2 ລວມມີປັບໜ້າດິນ, ລະບົບຄົມມະນາຄົມນອກອາຄານ (ເດີ່ນ, ທາງ, ທາງຄົນຍ່າງ ) ລະບົບສະໜອງປ່ອຍນໍ້າ, ລະບົບສະໜອງໄຟຟ້າລວມມູນຄ່າທັງໝົດ 100,49 ຕື້ດົງ. (ແຫຼ່ງຂ່າວ: ກະຊວງການເງິນ)