ລາວ ຈະມີສູນບໍລິການດ້ານຄວາມປອດໄພ ລະບົບເຕັກໂນໂລຊີ


...

30.07.2019 13:13     

   ສປປ ລາວ ຈະມີສູນໃຫ້ຄຳປຶກສາດ້ານຄວາມປອດໄພ ຂອງລະບົບເຕັກໂນໂລຊີຂໍ້ມູນ ຂ່າວສານ ເພື່ອເຮັດໜ້າທີ່ຄົ້ນ ຄວ້າ ແລະ ພັດທະນາໃຫ້ແກ່ຜູ້ ໃຫ້ບໍລິການ, ຜູ້ໃຊ້ບໍລິການໃນ ສັງຄົມລາວໄດ້ນຳໃຊ້ ແລະ ພັດ ທະນາວຽກງານໄອທີ ດີຈີຕອນມີຄວາມປອດໄພສູງສຸດ, ຫຼີກລຽງຜົນກະທົບທີ່ອາດຈະເກີດຂຶ້ນໃນອະນາຄົດ. ພິທີເຊັນສັນຍາ ວ່າດ້ວຍການຮ່ວມມືສ້າງສູນບໍລິການ ໃຫ້ຄຳປຶກສາດ້ານຄວາມປອດໄພຂອງລະບົບເຕັກໂນໂລຊີ ຂໍ້ມູນຂ່າວສານໄດ້ຈັດຂຶ້ນໃນວັນທີ 26 ກໍລະກົດນີ້ ທີ່ໂຮງແຮມດອນຈັນພາເລດ ລະຫວ່າງທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີ ດີຈີຕອນ ກະ ຊວງວິທະຍາສາດ ແລະ ເຕັກໂນໂລຊີ ແລະ ທ່ານ ວົງພູທອນ ສີຈັນທະລາດ ປະທານບໍລິສັດ ເຈແອວເອັສ ໄອທີ ໂຊລູເຊີ້ນ ຈຳກັດ ໂດຍມີທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ວິທະຍາສາດ ແລະ ເຕັກໂນ ໂລຊີ (ກວຕ), ມີບັນດາຮອງລັດ ຖະມົນຕີ ແລະ ພາກສ່ວນກ່ຽວ ຂ້ອງເຂົ້າຮ່ວມເປັນສັກຂີພິຍານນຳ. ທ່ານ ສຸລິຍາ ແສງດາລາ ຮອງຫົວໜ້າກົມເຕັກໂນໂລຊີດີຈີຕອນ ກ່າວວ່າ: ເພື່ອຜັນຂະຫຍາຍເນື້ອໃນຈິດໃຈທີ່ໄດ້ຕົກລົງກັນ ໃນໄລຍະທີ່ຜ່ານມາ ແລະ ເພື່ອເຮັດໃຫ້ສັງຄົມໄດ້ນໍາໃຊ້ລະບົບໄອທີ ດີຈີຕອນ ທີ່ມີຄວາມປອດໄພສູງ; ຄະນະພັກ-ຄະນະນຳຂອງ ກວຕ ໄດ້ຕົກລົງເຫັນດີມອບໃຫ້ກົມເຕັກໂນໂລຊີດີຈີຕອນ ຮ່ວມມືກັບບໍລິສັດ JLS IT SOLUTION ຈຳກັດ ເພື່ອສ້າງສູນບໍລິການ ໃຫ້ຄຳປຶກສາດ້ານຄວາມປອດໄພຂອງລະບົບເຕັກໂນໂລຊີຂໍ້ມູນຂ່າວສານ ຊຶ່ງສູນດັ່ງກ່າວຈະເຮັດໜ້າທີ່ຄົ້ນຄວ້າ ແລະ ພັດທະນາລະບົບຄວາມປອດໄພ ດ້ານໄອທີ ປະກອບມີດ້ານນິຕິກຳ, ລະບຽບການກ່ຽວຂ້ອງ, ນະໂຍບາຍສົ່ງເສີມ ແລະ ການພັດທະນາລະບົບເຕັກນິກ, ບໍ ລິການໃຫ້ຄຳປຶກສາ ແລະ ຝຶກອົບຮົມກ່ຽວກັບລະບົບຄວາມປອດໄພດ້ານໄອທີ ໃຫ້ໄດ້ຕາມມາດຕະຖານສາກົນ "ISO 27001, ISO ກ່ຽວຂ້ອງ, ທົດສອບຄວາມປອດໄພລະບົບໄອທີ (Pen-Test) ແລະ ນຳສະເໜີ ຂໍການຢັ້ງຢືນຄວາມປອດໄພ ດ້ານໄອທີ ຕາມມາດຕະຖານ ISO 27001 ຈາກໜ່ວຍງານທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ. ໂຄງການດັ່ງກ່າວຈະສ້າງຜົນປະໂຫຍດຫຼາຍດ້ານໃຫ້ແກ່ ຜູ້ໃຫ້ບໍລິການ ແລະ ຜູ້ໃຊ້ບໍລິ ການໃນສັງຄົມລາວ ຊຶ່ງຈະເຮັດ ໃຫ້ການນຳໃຊ້ ແລະ ການພັດ ທະນາວຽກງານເຕັກໂນໂລຊີດີຈີຕອນ ມີຄວາມປອດໄພສູງສຸດ ຫຼີກລຽງຜົນກະທົບ, ຄວາມເສຍຫາຍທີ່ອາດຈະເກີດຂຶ້ນໃນອະນາຄົດ. ທ່ານ ວົງພູທອນ ສີຈັນທະລາດ ກ່າວວ່າ: ເຕັກໂນໂລຊີຂໍ້ມູນຂ່າວສານ ເປັນສິ່ງສຳຄັນ ໂດຍສະເພາະ ໃນຍຸກແຫ່ງຂໍ້ມູນຂ່າວສານ, ຍຸກແຫ່ງການເຊື່ອມໂຍງດ້ວຍລະບົບໄອທີ/ໄອຊີທີ (ຍຸກ4.0). ດ້ວຍເຫດນີ້ ຫຼາຍປະເທດໃນທົ່ວໂລກ ຈຶ່ງໄດ້ຖືສຳຄັນຕໍ່ກັບບັນຫາຄວາມປອດໄພ ແລະ ມາດຕະຖານລະບົບ ໄອທີ ເນື່ອງຈາກມີກຸ່ມຄົນທີ່ບໍ່ຫວັງດີ ໄດ້ສວຍໃຊ້ເຕັກໂນໂລຊີ ທີ່ທັນສະໄໝ ເພື່ອເຈາະເຂົ້າໃນລະບົບຂໍ້ມູນຂ່າວສານຂອງບັນດາອົງກອນທີ່ສຳຄັນ ທັງພາກລັດ-ເອກະຊົນ ຊຶ່ງຕິດພັນກັບຄວາມໝັ້ນຄົງ ດ້ານຂໍ້ມູນຂ່າວສານ ແລະ ສປປ ລາວ ກໍເປັນໜຶ່ງໃນບັນດາປະເທດ ທີ່ພົບບັນຫາດັ່ງກ່າວ. ສະນັ້ນບໍລິ ສັດເຈແອວເອັສ ໄອທີໂຊລູ ເຊີ້ນ ຈຳກັດ ຈຶ່ງເຫັນວ່າ ບັນຫາ Cyber Security ເປັນສິ່ງທີ່ສຳ ຄັນທີ່ສຸດ, ບໍລິສັດຂອງຂ້າພະ ເຈົ້າໄດ້ມີບົດຮຽນ ໃນການສຶກ ສາຄົ້ນຄວ້າ ແລະ ຮ່ວມມືກັບຫຼາຍບໍລິສັດທີ່ມີຊື່ສຽງທາງດ້ານການຮັກສາຄວາມປອດໄພ ໃນລະບົບໄອທີ. (ຂ່າວ: ແສງຈັນ)