ຂົວຂ້າມແມ່ນ້ຳຂອງ ໂຄງການກໍ່ສ້າງທາງລົດໄຟ ລາວ-ຈີນ ເຊື່ອມຈອດກັນຮຽບຮ້ອຍແລ້ວ


...

30.07.2019 13:14     

   ການກໍ່ສ້າງຂົວຂ້າມນ້ຳ ຂອງໂຄງການທາງລົດໄຟລາວ-ຈີນ ທີ່ແຂວງຫຼວງພະບາງ ໄດ້ເຊື່ອມຈອດກັນເປັນທີ່ຮຽບຮ້ອຍແລ້ວ ໃນເວລາປະມານ 2:00 ໂມງເຊົ້າຂອງວັນທີ 28 ກໍລະກົດນີ້, ກ່ອນຈະມາຈັດພິທີສະເຫຼີມສະຫຼອງການເຊື່ອມຈອດ ໃນຕອນເຊົ້າຂອງວັນດຽວກັນນີ້ ໂດຍມີທ່ານບົວທອງ ແພງສະຫວັນ ປະທານກວດກາພັກ-ລັດ ແຂວງຫຼວງພະບາງ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ຟາປາວ ເຊຍ (FABAOXIA) ຜູ້ຊ່ວຍຜູ້ ອຳນວຍການກຸ່ມບໍລິສັດວິສາວະກຳທາງລົດໄຟເລກ 8 ສປ ຈີນ ໃນນາມບໍລິສັດຜູ້ຮັບເໝົາກໍ່ສ້າງກ່າວວ່າ: ຂົວຂ້າມແມ່ນໍ້າ ຂອງ ທີ່ແຂວງຫຼວງພະບາງໄດ້ສຳເລັດການເຊື່ອມຈອດ ຊຶ່ງສຳເລັດກ່ອນແຜນທີ່ກຳນົດໄວ້ 7 ເດືອນ, ສາມາດບັນລຸເປົ້າໝາຍການເຊື່ອມຈອດເສັ້ນທາງລົດໄຟ ລາວ-ຈີນ, ການບັນລຸການເຊື່ອມຈອດກັນຂອງຂົວແຫ່ງນີ້ ເປັນບາດລ້ຽວສຳຄັນຕໍ່ໂຄງການກໍ່ສ້າງທາງລົດໄຟ ລາວ-ຈີນ, ນອກຈາກນີ້ ຍັງມີຄວາມໝາຍສຳຄັນຕໍ່ຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຂອງລັດຖະບານ ຈີນ, ທັງເປັນສັນຍາລັກມິດຕະພາບ ລາວ-ຈີນ ທີ່ໄດ້ຮັບໝາກຜົນອັນເປັນທີ່ໜ້າປະທັບໃຈ. ຂົວຂ້າມແມ່ນໍ້າຂອງແຂວງ ຫຼວງພະບາງຕັ້ງຢູ່ເມືອງມໍລະ ດົກໂລກນະຄອນ-ຫຼວງພະບາງ, ມີຄວາມຍາວ 1.458,9 ແມັດ, ມີ 34 ເສົາ, ມີເສົາຂົວຫຼັກ 5 ເສົາຕັ້ງຢູ່ກາງແມ່ນໍ້າຂອງ, ນຳໃຊ້ຂາງຂົວແບບຫຼໍ່ກັບທີ່ ຊຶ່ງເປັນຈຸດໜຶ່ງທີ່ມີຄວາມຫຍຸ້ງຍາກໃນການກໍ່ສ້າງ ແລະ ນຳໃຊ້ເຕັກນິກການກໍ່ສ້າງທີ່ຂ້ອນຂ້າງຍາກ. ຂົວແຫ່ງນີ້ ໄດ້ເລີ່ມລົງມືກໍ່ ສ້າງນັບແຕ່ ວັນທີ 29 ມິຖຸນາ 2017 ເປັນຕົ້ນມາ, ບໍລິສັດກໍ່ ສ້າງ, ອອກແບບ, ທີ່ປຶກສາ ແລະ ພາກສ່ວນທີ່ມີສ່ວນຮ່ວມໄດ້ຕັ້ງ ໜ້າຈັດຕັ້ງປະຕິບັດຕາມທິດຊີ້ນໍາຂອງການນຳຂອງສອງພັກ-ສອງລັດ,ໃນເດືອນ ກັນຍາ ການນໍາຂັ້ນສູງຂອງສອງພັກ-ສອງລັດໄດ້ມາຢ້ຽມຢາມກວດກາຂົວແຫ່ງນີ້ ແລະ ໄດ້ໃຫ້ທິດ ຊີ້ນຳ ໃນວຽກງານກໍ່ຄືຕ້ອງຢຶດໝັ້ນຄຸນນະພາບເປັນຫຼັກ, ແບ່ງສ່ວນຊັບພະຍາກອນກໍ່ສ້າງຢ່າງເປັນລະບົບ ແລະ ມີເຕັກນິກວິທະຍາສາດ, ອອກແບບການກໍ່ສ້າງຄຽງຄູ່ກັບການອະນຸລັກສິ່ງແວ້ດລ້ອມ, ຖືເອົາຄວາມປອດໃສເປັນສິ່ງຊັກຈູງພຶດຕິກຳການກໍ່ສ້າງ, ບາກບັ່ນອົດທົນຜ່ານຜ່າຕໍ່ຂໍ້ຫຍຸ້ງຍາກ ເປັນຕົ້ນແມ່ນນໍ້າເລິກ ແລະ ໄຫຼແຮງ, ລະດູຝົນລະດັບນໍ້າຂຶ້ນສູງ ແລະ ໄຫຼແຮງ, ພື້ນຖານພື້ນນໍ້າມີຄວາມຫຍຸ້ງຍາກ ໃນການຂຸດເຈາະເຮັດໃຫ້ການກໍ່ສ້າງມີຄວາມຫຍຸ້ງຍາກ ແຕ່ວິສາວະກອນ ແລະ ກຳມະກອນກໍມີຄວາມມານະອົດທົນຜ່ານຜ່າຕະຫຼອດ 25 ເດືອນທີ່ຈັດຕັ້ງປະຕິບັດ, ສາມາດສ້າງສໍາເລັດ ແລະ ເຊື່ອມຈອດກ່ອນແຜນ 7 ເດືອນ ຊຶ່ງກໍເປັນເງື່ອນໄຂອັນດີທີ່ຈະສາມາດເປີດແລ່ນລົດໄຟໃນເດືອນທັນວາ 2021. ທາງລົດໄຟ ລາວ-ຈີນ ເປັນໂຄງການທີ່ການນຳຂັ້ນສູງ ຂອງສອງພັກ-ສອງລັດໃຫ້ ການຊຸກຍູ້,ເປັນໂຄງການໃນການເຊື່ອມຈອດຕາມຍຸດທະ ສາດ ຫັນປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດເຊື່ອມຈອດ, ເຊື່ອມໂຍງກັບພາກພື້ນ ແລະ ສາກົນຂອງ ສປປ ລາວ ກັບຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຂອງ ສປ ຈີນ, ທິດເໜືອເລີ່ມຈາກດ່ານບໍ່/ບໍ່ເຕັ່ນຮອດນະຄອນຫຼວງວຽງຈັນ, ມີຄວາມຍາວທັງໝົດ 414 ກວ່າກິໂລແມັດ, ກຳນົດໃຫ້ເປີດການນຳໃຊ້ໃນເດືອນທັນວາ 2021. (ຂ່າວ: ຄຳເຮືອງ)