ເປີດນຳໃຊ້ໂຄງການກໍ່ສ້າງທາງ ໄຊຍະບູລີ ແລະ ບໍ່ແກ້ວ


...

31.07.2019 8:51     

   ພິທີມອບ-ຮັບ ແລະ ເປີດການນໍາໃຊ້ໂຄງການກໍ່ສ້າງທາງແຕ່ບ້ານຮວກເມືອງຄອບບ້ານປາກຄອນບ້ານກ້ອນຕື່ນ ແຂວງໄຊຍະບູລີ ແລະ ແຂວງບໍ່ແກ້ວ ແລະ ໂຄງການກໍ່ສ້າງທາງແຕ່ເມືອງຊຽງຮ່ອນເມືອງ ຄອບ ແຂວງໄຊຍະບູລີ ໄດ້ຈັດຂຶ້ນໃນວັນທີ 26 ກໍລະກົດຜ່ານມາ ໂດຍການເຂົ້າຮ່ວມຂອງທ່ານ ບຸນຈັນ ສິນທະວົງ ລັດຖະມົນ ຕີ ກະຊວງໂຍທາທິການ ແລະ ຂົນສົ່ງ, ທ່ານ ພົງສະຫວັນ ສິດທະວົງ ເຈົ້າແຂວງ ແຂວງໄຊຍະບູລີ, ທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດແຫ່ງຣາຊະອານາ ຈັກໄທ ປະຈຳ ສປປລາວ ແລະ ທ່ານ ປີຣະເມດ ວຸດທິທອນຕິຣັກ ຜູ້ອຳນວຍການ ອົງ-ການເນດາ ບັນດາ, ມີພາກສ່ວນກ່ຽວຂ້ອງເຂົ້າຮ່ວມ. ໂຄງການກໍ່ສ້າງດັ່ງກ່າວ ແມ່ນລັດຖະບານແຫ່ງຣາຊະ ອານາຈັກໄທ ໄດ້ສະໜອງທຶນຜ່ານອົງການນີດາ ຈຳນວນ 1.390 ລ້ານບາດ, ໃນນັ້ນຊ່ວຍ ເຫຼືອ 20%, ເທົ່າກັບ 278 ລ້ານບາດ ແລະ ກູ້ຢືມດອກເບ້ຍຜ່ອນ 80% ເທົ່າກັບ 1.112 ລ້ານບາດ. ໂຄງການດັ່ງກ່າວ ເປັນໂຄງການຍຸດທະສາດທີ່ສຳຄັນຂອງລັດຖະບານໃນການປະ ຕິບັດເຊື່ອມໂຍງ ແລະ ເຊື່ອມຈອດ ດ້ານຄົມມະນາຄົມຂົນສົ່ງ ກັບບັນດາປະເທດໃກ້ຄຽງ ແລະ ພາກພື້ນ ໂດຍສະເພາະແມ່ນການເຊື່ອມຈອດລະຫວ່າງ ສປປ ລາວ ກັບ ຣາຊະອານາຈັກໄທ, ຜ່ານດ່ານປາງມອນ ສປປລາວ, ດ່ານບ້ານຮວກ ແຂວງພະເຍົາ ປະເທດໄທ ແລະ ເຊື່ອມຕໍ່ໄປຍັງພາກເໜືອຂອງ ສປປລາວ ເຊື່ອມຕໍ່ໃສ່ຊາຍແດນ ສປ ຈີນ ຢູ່ແຂວງຫຼວງນ້ຳທາ ແລະ ເຊື່ອມຕໍ່ໃສ່ ສສ ຫວຽດນາມ ຢູ່ເມືອງຂວາ ແຂວງຜົ້ງສາລີ. ສຳລັບມາດຕະຖານເຕັກ ນິກການອອກແບບຂອງໂຄງ ການທາງດັ່ງກ່າວ ແມ່ນເປັນທາງຊັ້ນ IV ມາດຕະຖານເຕັກ ນິກຂອງກະຊວງ ໂຍທາທິການ ແລະ ຂົນສົ່ງ ຊຶ່ງໂຄງສ້າງຂອງທາງປະກອບມີ ຊັ້ນຍົກລະດັບ, ຊັ້ນວັດສະດຸຄັດເລືອກໜາ 20 ຊັງຕີແມັດ, ຊັ້ນຮອງພື້ນທາງໜາ 20 ຊັງຕີແມັດ, ຊັ້ນພື້ນທາງປູດ້ວຍຫີນຂົບໜາ 20 ຊັງຕີແມັດ, ຄວາມກ້ວາງໜ້າທາງ 8 ແມັດ ເຂດພູດອຍ ແລະ 9 ແມັດ ເຂດທົ່ງພຽງ, ປູຢາງ 2 ຊັ້ນ, ສາມາດຮັບນ້ຳໜັກໄດ້ 11 ໂຕນຕໍ່ເພົາ ຊຶ່ງໂຄງການກໍ່ສ້າງເສັ້ນທາງດັ່ງກ່າວແມ່ນນອນຢູ່ໃນ ເສັ້ນທາງຫຼວງແຂວງໂດຍແບ່ງອອກເປັນ 2 ສັນຍາຄຶ: ສັນຍາ1: ເລີ່ມແຕ່ບ້ານຮວກ ເມືອງຄອບບ້ານປາກຄອບບ້ານກ້ອນຕື່ນແຂວງໄຊຍະບູລີ ແລະ ແຂວງບໍ່ແກ້ວ: ລວງຍາວທັງໝົດ 54 ກິໂລແມັດ,ໃນນັ້ນປະກອບມີເສັ້ນທາງສາຍຫຼັກຍາວ 44,5 ກິໂລແມັດ, ປັບປຸງເສັ້ນທາງພາຍໃນເທດສະບານເມືອງຄອບຍາວ 7,5 ກິໂລແມັດ, ກໍ່ສ້າງທາງແຍກໄປຫາບ້ານປາກຄອບຍາວ 2 ກິໂລແມັດ. ນອກຈາກນີ້ ຍັງໄດ້ກໍ່ສ້າງທໍ່ 4 ຫຼ່ຽມ 28 ແຫ່ງ, ກໍ່ສ້າງຂົວເບຕົງເສີມເຫຼັກ 5 ແຫ່ງ, ວາງທໍ່ກົມ ກໍ່ສ້າງຮ່ອງລະບາຍນ້ຳ, ກໍ່ສ້າງຕ້ານເຈື່ອນ, ກໍ່ສ້າງອາຄານດ່ານຊາຍແດນ ແລະ ຕິດຕັ້ງໄຟເຍືອງທາງບາງໄລຍະ, ມີມູນຄ່າກໍ່ສ້າງທັງໝົດ 656.999.000 ບາດ ໂດຍແມ່ນ ບໍລິສັດຊີໂນໄທເອັນຈີເນຍລິງແອນຄອນສະຕຼັກຊັນຈຳກັດມະຫາຊົນເປັນຜູ້ຮັບເໝົາກໍ່ສ້າງ. ສັນຍາ 2: ເລີ່ມຈາກເມືອງຊຽງຮ່ອນເມືອງຄອບ ແຂວງໄຊຍະບູລີ ມີໄລ ຍະທາງ 56 ກິໂລແມັດ ໃນນັ້ນປະກອບມີເສັ້ນທາງສາຍຫຼັກຍາວ 45 ກິໂລແມັດ, ປັບປຸງເສັ້ນທາງພາຍໃນເທດສະບານເມືອງຊຽງຮ່ອນ 11 ກິໂລແມັດ, ນອກຈາກນີ້ຍັງໄດ້ກໍ່ສ້າງທໍ່ຫຼ່ຽມ 21 ແຫ່ງ, ກໍ່ສ້າງຂົວເບຕົງເສີມເຫຼັກ 2 ແຫ່ງ, ວາງທໍ່ກົມ, ກໍ່ສ້າງຮ່ອງລະບາຍນ້ຳ, ກໍ່ສ້າງຕ້ານເຈື່ອນ ແລະ ວຽກງານອື່ນໆອີກຈຳນວນໜຶ່ງ, ຊຶ່ງມີມູນຄ່າກໍ່ສ້າງທັງໝົດ 612.995.000 ບາດ ໂດຍແມ່ນບໍລິສັດເນົາວະລັດ ພັດທະນາການ ຈຳກັດ (ມະຫາຊົນ) ເປັນຜູ້ຮັບເໝົາກໍ່ສ້າງ ໂຄງການດັ່ງກ່າວ ແມ່ນກົມຂົວທາງເປັນເຈົ້າຂອງໂຄງການ ແລະ ມີບໍລິສັດ ເອຊຽນເອັນຈີເນຍລິງ ຄອນຊາວຕັນຈຳກັດ ຮ່ວມກັບ ລັດວິສາຫະກິດ ວິສະວະກຳຄົມມະນາຄົມ ເປັນທີ່ປຶກສາ ແລະ ຄຸມງານກໍ່ສ້າງ ໂດຍມີໄລຍະປະຕິບັດສັນຍາແມ່ນ 30 ເດືອນ, ມາເຖິງປັດຈຸບັນໂຄງການດັ່ງກ່າວໄດ້ສ້າງສໍາເລັດ 100% ແລະ ເປີດການນໍາໃຊ້ຢ່າງເປັນທາງການ. (ຂ່າວ-ພາບ: ນັກຂ່າວ ຍທຂ)