ຄະນະສະເພາະກິດ ລົງຊຸກຍູ້ການບໍລິການຄ່ຽນຖ່າຍສິນຄ້າຢູ່ດ່ານພາສີສາກົນບໍ່ເຕ່ນ


...

03.09.2019 9:20     

   ຄະນະສະເພາະກິດນຳໂດຍທ່ານ ສົມດີ ດວງດີ ຮອງນາຍົກລັດຖະມົນຕີ ລັດ ຖະມົນຕີກະຊວງການເງິນ ພ້ອມດ້ວຍຄະນະ ໄດ້ລົງຊີ້ນໍາ ແລະ ກຳນົດພື້ນທີ່-ຈຸດທີ່ຕັ້ງຕົວຈິງການບໍລິການດຳເນີນທຸລະກິດສາງພັກ ແລະ ສະຖານທີ່ຄ່ຽນຖ່າຍສິນຄ້າຢູ່ດ່ານພາສີສາ ກົນບໍ່ເຕ່ນ ແຂວງຫຼວງນ້ຳທາຂອງບໍລິສັດ ແອວເອັສການຄ້າຂາອອກ-ຂາເຂົ້າ ຈຳກັດ ແລະ ບໍລິສັດ ລາວສາກົນ ໂອຊີດີ ຈຳກັດ ໃນລະຫວ່າງວັນ 1-2 ກັນຍານີ້.
ໃນການລົງກວດກາ, ຊີ້ນໍາໃນຄັ້ງນີ້, ເພື່ອເກັບກໍາຂໍ້ມູນ, ປຶກສາຫາລື ແລະ ຮັບຟັງບັນຫາຫຍຸ້ງຍາກ, ເພື່ອພ້ອມກັນຄົ້ນຄວ້າຊອກວິທີທາງແກ້ໄຂບັນຫາໃນສະເພາະໜ້າ ແລະ ຍາວນານຮັບປະກັນໃຫ້ມີຄວາມສະຫງົບ ແລະ ຍືນຍົງຕາມທິດເຊື່ອມຈອດ, ເຊື່ອມໂຍງທາງດ້ານການຂົນສົ່ງທາງບົກກັບສປ ຈີນ ແລະ ພາກພື້ນຢ່າງມີປະສິດທິຜົນສູງ.
    ພ້ອມດຽວກັນນີ້, ໄດ້ປືກສາຫາລືກ່ຽວກັບການດໍາເນີນທຸລະກິດບໍລິການສາງພັກສິນຄ້າ ແລະ ສະຖານທີ່ຄ່ຽນຖ່າຍສິນຄ້າດ້ວຍຮູບແບບການແຂ່ງຂັນຕາມກົນໄກເສດຖະກິດຕະຫຼາດ; ຮັບປະກັນການບໍລິການໃຫ້ມີຄວາມວ່ອງໄວ, ໂປ່ງໃສ, ທັນສະໄໝໃຫ້ແກ່ລູກຄ້າຜູ້ມາໃຊ້ບໍລິການແຕ່ຕ້ອງຢູ່ພາຍໃຕ້ການຄຸ້ມຄອງຂອງລັດດ້ານລາຄາຄ່າບໍລິການ ໂດຍໃຫ້ທັງສອງບໍລິສັດຕ້ອງປະຕິບັດຢ່າງເຂັ້ມງວດຕາມລາຄາທີ່ໄດ້ຮັບຮອງຈາກກະຊວງອຸດສາຫະກຳ ແລະ ການຄ້າຢ່າງເຂັ້ມງວດ.
    ໂອກາດນີ້, ທ່ານ ສົມດີ ດວງດີ ໄດ້ມີຄຳເຫັນກ່ຽວກັບການລົງກວດກາ, ຊີ້ນໍາ ແລະ ກຳນົດພື້ນທີ່-ຈຸດທີ່ຕັ້ງຕົວຈິງການບໍລິການດຳເນີນທຸລະກິດສາງພັກ ແລະ ສະຖານທີ່ຄ່ຽນຖ່າຍສິນຄ້າຢູ່ດ່ານພາສີສາກົນບໍ່ເຕ່ນ ໂດຍອີງຕາມການລາຍງານຈາກກະຊວງ ຍທຂ ໃນນາມຫົວໜ້າຄະນະສະເພາະກິດສະເໜີໃຫ້ກົມຄຸ້ມຄອງ, ພັດທະນາລັດວິສາຫະກິດ ແລະ ການປະກັນໄພ ແລະ ກົມພາສີ, ກະຊວງການເງິນເຈລະຈາກັບບໍລິສັດລາວສາກົນ ໄອຊີດີ ເພື່ອມອບຂອບເຂດພື້ນທີ່ຈຳນວນໜຶ່ງທີ່ຕິດກັບເສັ້ນທາງ R3, ພ້ອມທັງອາຄານ ແລະ ວັດຖຸອຸປະກອນທີ່ນໍາໃຊ້ເຂົ້າໃນການບໍລິຫານດ່ານສາກົນໃຫ້ລັດເປັນຜູ້ຄຸ້ມຄອງເພື່ອຈັດລະບົບການແຈ້ງເອກະສານຕ່າງໆທັງຂາເຂົ້າ-ຂາອອກມາຢູ່ບ່ອນດຽວ (ລະບົບການກວດກາແຈ້ງພາສີ, ກວດກາຄົນເຂົ້າ-ອອກເມືອງ ແລະ ກັກກັນພືດສັດ ແລະ ຂະແໜງການອື່ນທີ່ຈໍາເປັນ) ຄືກັນກັບດ່ານຊາຍແດນສາກົນອື່ນໆໃນສປປ ລາວ.
    ພາຍຫຼັງການກໍ່ສ້າງທ່າບົກ (Dry Port) ຢູ່ເຂດນາເຕີຍແຂວງຫຼວງນໍ້າທາສໍາເລັດຈະເປັນປະຕູເຂົ້າ-ອອກຂອງສິນຄ້າສາກົນ (ສິນຄ້າລະຫວ່າງປະເທດ ແລະ ຜ່ານແດນ) ເຫັນດີໃຫ້ທັງສອງບໍລິສັດສືບຕໍ່ດຳເນີນທຸລະກິດ, ແຕ່ຈະຫັນຮູບການບໍລິການໃຫ້ເປັນສາງພັກ, ຄ່ຽນຖ່າຍສິນຄ້າ (ICD) ຄືເກົ່າກໍໄດ້ ຫຼື ຈະເປັນບ່ອນເຕົ້າໂຮມ ແລະ ແຈກຢາຍສິນຄ້າສຳລັບເຂດອຸດສາຫະກຳ ແລະ ເປັນສະຖານທີ່ປຸງແຕ່ງ, ສ້າງມູນຄ່າເພີ່ມຂອງສິນຄ້າເພື່ອການນຳເຂົ້າ-ສົ່ງອອກໂດຍຜ່ານທ່າບົກ ຢູ່ເຂດນາເຕີຍ ແຂວງຫຼວງນໍ້າທາບ່ອນດຽວ.
ທ່ານ ສົມດີ ດວງດີ ເນັ້ນຕື່ມອີກວ່າ: ອີງຕາມທິດຊີ້ນໍາຂອງລັດຖະບານໄດ້ເຫັນດີດ້ານຫຼັກການຕາມການສະເໜີວິທີແກ້ໄຂກ່ຽວກັບສະພາບການດຳເນີນສາງພັກສິນຄ້າ ແລະ ສະຖານທີ່ຄ່ຽນຖ່າຍສິນຄ້າຢູ່ດ່ານພາສີສາກົນບໍ່ເຕ່ນຂອງບໍລິສັດ ແອວເອັສ ຂາອອກ-ຂາເຂົ້າ ຈຳກັດ ແລະ ບໍລິສັດ ລາວສາກົນ ໄອຊີດີ ຈຳກັດ ໂດຍໃຫ້ບໍລິສັດ ແອວເອັສ ຂາອອກ-ຂາເຂົ້າ ຈຳກັດ ແລະ ບໍລິສັດ ລາວສາກົນ ໄອຊີດີ ຈຳກັດ ສືບຕໍ່ດຳເນີນທຸລະກິດບໍລິການສາງພັກສິນຄ້າ ແລະ ສະຖານທີ່ຄ່ຽນຖ່າຍສິນຄ້າຢູ່ດ່ານພາສີສາກົນບໍ່ເຕ່ນ ດ້ວຍຮູບການແຂ່ງຂັນຕາມກົນໄກເສດຖະກິດຕະຫຼາດ, ຮັບປະກັນຄຸນນະພາບການບໍລິການໃຫ້ມີຄວາມວ່ອງໄວ, ໂປ່ງໃສ ແລະ ທັນສະໄໝໃຫ້ແກ່ລູກຄ້າທີ່ມາໃຊ້ບໍລິການ.
    ພ້ອມດຽວກັນນີ້, ໃຫ້ຍົກ ຍ້າຍຫ້ອງການພາສີ, ບ່ອນກວດກັກກັນພືດ ແລະ ຕູ້ສະແກນເນີທີ່ນໍາໃຊ້ປັດຈຸບັນໄປຢູ່ສະຖານທີ່ເບື້ອງ ບໍລິສັດ ລາວສາກົນ ໄອຊີດີ ຈຳກັດເພື່ອຈັດລະບົບການແຈ້ງເອກະສານຕ່າງໆທັງຂາເຂົ້າ-ຂາອອກໃຫ້ມີຄວາມສະດວກ.
ສ່ວນດ່ານຕຳຫຼວດກວດຄົນເຂົ້າເມືອງ ແລະ ກົງສຸນແມ່ນໃຫ້ຮັກສາໄວ້ຢູ່ບ່ອນເກົ່າໄປກ່ອນໃຫ້ກະຊວງການເງິນໂດຍສະເພາະແມ່ນກົມກ່ຽວຂ້ອງສົມທົບກັບພາກສ່ວນຕ່າງໆເຈລະຈາກັບ ບໍລິສັດ ລາວສາກົນ ໄອຊີດີ ເພື່ອມອບເຂດພື້ນທີ່ຈຳນວນໜຶ່ງທີ່ຕິດກັບທາງ R3 ພ້ອມທັງອາຄານ ແລະ ວັດຖຸອຸປະກອນທີ່ນໍາໃຊ້ເຂົ້າໃນການບໍລິຫານດ່ານສາກົນໃຫ້ລັດເປັນຜູ້ຄຸ້ມຄອງ ແລະ ເຫັນດີໃຫ້ກະຊວງກ່ຽວຂ້ອງຄົ້ນຄວ້າ ແລະ ປຶກສາຫາກັບບໍລິສັດ ນູເທັກ (ຜູ້ສະໜອງອຸປະກອນສະແກນເນີ) ໃນການປະກອບເຄື່ອງສະແກນເນີອີກຈຳນວນ 1 ເຄື່ອງເຂົ້າຕື່ມເພື່ອສາມາດຮັບຮອງການເພີ່ມຂຶ້ນຈຳນວນລົດຂົນສົ່ງສິນຄ້າໃນຕໍ່ໜ້າ ແລະ ອໍານວຍຄວາມສະດວກບໍລິສັດຕ່າງໆສາມາດ ນໍາໃຊ້ໄດ້ໃນການຈໍລະຈອນສິນຄ້າຂາເຂົ້າ-ຂາອອກຢ່າງສະດວກສະບາຍ.
    ນອກຈາກນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະໄປຢ້ຽມຊົມ ແລະ ຕິດຕາມໂຄງການກໍ່ສ້າງທາງລົດໄຟ, ການດໍາເນີນທຸລະກິດ ໄອຊີດີ, ດ່ານພາສີສາກົນບໍ່ເຕ່ນກ່ຽວກັບການເກັບຄ່າທຳນຽມຜ່ານລະບົບທັນສະໄໝ, ຕິດຕາມຄວາມຄືບໜ້າໂຄງການກໍ່ສ້າງເຂດເສດຖະກິດພິເສດບໍ່ເຕ່ນ, ສູນການຄ້າທີ່ທັນສະໄໝ ແລະ ທະນາຄານລາວຈີນ ໂດຍການຕ້ອນຮັບຂອງທ່ານປະທານເຂດເສດຖະກິດພິເສດບໍ່ເຕ່ນ ອີກດ້ວຍ.
(ຂ່າວ-ພາບ: ກະຊວງການເງິນ)