3 ພາກສ່ວນ ຮ່ວມທຶນດຳເນີນທຸລະກິດ ດ້ານກະສິກຳ


...

09.09.2019 10:29     

   ລັດວິສາຫະກິດບໍລິການ ກະສິກຳ ຕາງໜ້າໃຫ້ລັດຖະ ບານລາວ ເຊັນສັນຍາຮ່ວມທຶນໃນການສ້າງຕັ້ງບໍລິສັດຮ່ວມທຶນ ກັບ 2 ບໍລິສັດ ຄື: ບໍລິສັດກວາງໂຈຊົງເຮຢວນພັດທະນາກະສິກຳ ຈຳກັດ ຈາກ ສປ ຈີນ ແລະ ບໍລິສັດຢູເອບີໂກລໂບລ ຈຳກັດ ຈາກຮົງກົງ ເພື່ອແນໃສ່ການຮ່ວມມືດຳເນີນທຸລະກິດໃນຂົງເຂດດ້ານກະສິກຳ ລວມທັງການຕະຫຼາດ ແລະ ການລ້ຽງສັດ ສົ່ງອອກໄປ ສປ ຈີນ ແລະ ຕະຫຼາດສາກົນ ຊຶ່ງເປັນວິສາຫະກິດ ແນໃສ່ສົ່ງເສີມການສ້າງວຽກເຮັດງານທຳໃຫ້ແກ່ຊາວກະສິກອນລາວ ພາຍໃຕ້ຊື່ "ບໍລິສັດ ຊີເອັສ ຢູພັດ ທະນາກະສິກຳ ຈຳກັດ" (CSU Agricultural Innovation Co.,LTD) ດ້ວຍທຶນຈົດທະ ບຽນເບື້ອງຕົ້ນທັງໝົດ 83 ຕື້ກວ່າກີບ.
ພິທີເຊັນສັນຍາດັ່ງກ່າວໄດ້ຈັດຂຶ້ນໃນວັນທີ 6 ກັນຍາ ທີ່ຫໍປະຊຸມແຫ່ງຊາດ ໂດຍການ ເຂົ້າຮ່ວມເປັນສັກຂີພິຍານຂອງ ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະ ສິກຳ ແລະ ປ່າໄມ້ ແລະ ທ່ານ ນາງ ຈັນຄຳ ວົງແສງບຸນ ຮອງລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍບັນດາແຂກຈາກພາກສ່ວນ ກ່ຽວຂ້ອງເຂົ້າຮ່ວມ.
ສັນຍາຮ່ວມທຶນຄັ້ງນີ້ແມ່ນທ່ານ ວຽງທອງ ພົມມະ ຫາໄຊ ຫົວໜ້າລັດວິສາຫະກິດບໍລິການກະສິກຳ ລົງນາມເຊັນສັນຍາກັບທ່ານ ນາງ ແຄດທະລີນ ຫົວໜ້າບໍລິສັດຢູເອບີໂກລໂບລ ແລະ ທ່ານ ຊົງມິງ ຫົວໜ້າບໍລິສັດກວາງໂຈຊົງເຮຢວນພັດທະນາກະສິກຳ.
ສັນຍາຮ່ວມທຶນສະບັບດັ່ງກ່າວ ສ້າງຂຶ້ນເພື່ອສ້າງຕັ້ງບໍລິສັດຮ່ວມທຶນໄດ້ກຳນົດຫຼັກ ການ, ລະບຽບການ, ຂໍ້ກຳ ນົດ ແລະ ຄວາມເຂົ້າໃຈລະ ຫວ່າງຄູ່ສັນຍາ ຊຶ່ງເປັນວິສາຫະກິດທີ່ດຳເນີນທຸລະກິດດ້ານ ກະສິກຳເຊັ່ນ: ປູກຝັງ-ລ້ຽງສັດ ລວມທັງການປຸງແຕ່ງ, ພັດທະ ນາ ເພື່ອສ້າງວຽກເຮັດງານທຳໃຫ້ແກ່ຊາວກະສິກອນ; ດຳ ເນີນການສົ່ງອອກສັດລ້ຽງໄປ ສປ ຈີນ ແລະ ຕະຫຼາດສາກົນ ເພື່ອຂະຫຍາຍຕະຫຼາດ, ຜະ ລິດຕະພັນກະສິກຳໃຫ້ແກ່ປະ ຊາຊົນໃນ ສປປ ລາວ ຢ່າງກວ້າງຂວາງ ແລະ ທັງເປັນການສົ່ງເສີມຜະລິດຕະພັນທີ່ໄດ້ຈາກສັດ ເປັນຕົ້ນ ງົວ, ຄວາຍ, ແກະ ແລະ ຜະລິດຕະພັນກະສິກຳປອດສານພິດທີ່ມີຄຸນນະພາບ ແນໃສ່ສົ່ງເສີມການທ່ອງທ່ຽວ ໂດຍນຳໃຊ້ຜະລິດຕະພັນຈາກສັດເປັນສິ່ງດຶງດູດ.
ສຳລັບການຈົດທະບຽນເບື້ອງ ຕົ້ນທັງໝົດ 83.500.000.000 ກີບ ໃນນີ້ ລັດວິສາຫະກິດບໍລິການກະສິກໍາຖືຫຸ້ນ 150. 000 ຫຸ້ນ, 15% ເທົ່າກັບ 12.525.000.000 ກີບ; ຝ່າຍຄູ່ຮ່ວມທຶນຖືຫຸ້ນ 850.000 ຫຸ້ນ 85% ເທົ່າກັບ 70.975.000.000 ກີບ ໂດຍແມ່ນບໍລິສັດກວາງໂຈຊົງເຮຢວນ ພັດທະນາກະສິກໍາຈຳກັດ ຖືຫຸ້ນ 340.000 ຫຸ້ນ, 34% ເທົ່າກັບ 28.390.000.000 ກີບ ແລະ ບໍລິສັດຢູເອບີໂກລໂບລ ຈໍາກັດ ຖືຫຸ້ນ 510.000 ຫຸ້ນ 51% ເທົ່າກັບ 42.585.000.000 ກີບ, ມີຈຳນວນຫຸ້ນ ເປັນຫຸ້ນສາມັນ ທັງໝົດ 1.000.000 ຫຸ້ນ, ຫຸ້ນລະ 83.500 ກີບ.
(ຂ່າວ: ສຸກສະຫວັນ, ພາບ: ພູວຽງຄຳ)