JDB ມອບລົດໂຕໂຍຕ້າ ວີອອດ ໂຄງການ ໂປຣໂມຊັນ ຍິ້ມຮັບ 3 ລະດູ


...

13.11.2019 10:20     

   ທະນາຄານຮ່ວມພັດທະ ນາ (JDB) ໄດ້ຈັດພິທີແຈກໂຊກໃນໂຄງການຍິ້ມຮັບສາມລະດູແຈກລາງວັນລົດເກັງ TOYOTA VIOS ໃຫ້ລູກຄ້າ ທີ່ໃຊ້ບໍລິການຜະລິດຕະພັນຂອງທະນາຄານຮ່ວມພັດທະນາຂຶ້ນເມື່ອວັນທີ 9 ພະຈິກຜ່ານມາ ທີ່ສູນການຄ້າ ແຟນຊີບມໍ ນະຄອນປາກເຊ ແຂວງຈໍາປາສັກ ເປັນກຽດເຂົ້າຮ່ວມໂດຍ ທ່ານ ສູນທອນ ຈັນທະວົງ ຮອງປະທານສະພາບໍລິຫານທະນາຄານຮ່ວມພັດທະນາ, ມີທ່ານ ວິໄລ ສີພະພອນ ຜູ້ອໍານວຍການໃຫຍ່ ທະນາຄານຮ່ວມພັດທະນາ ພ້ອມດ້ວຍຜູ້ບໍລິຫານລະດັບສູງ ແລະ ພະນັກງານທີ່ກ່ຽວຂ້ອງ ຕະຫຼອດລູກຄ້າ ແລະ ສື່ມວນຊົນຂອງແຂວງເຂົ້າຮ່ວມ. ໃນພິທີໄດ້ມີການຈົກສະ ຫຼາກ ມອບລາງວັນລົດເກັງ TOYOTA VIOS ໃຫ້ຜູ້ໂຊກດີ ທີ່ເຂົ້າຮ່ວມໂຄງການໂປຣໂມຊັນ ຍິ້ມຮັບສາມລະດູຂອງລູກຄ້າທີ່ໃຊ້ຜະລິດຕະພັນຂອງທະ ນາຄານຮ່ວມພັດທະນາ ໃນທົ່ວປະເທດ, ຜູ້ໂຊກດີ ທີ່ໄດ້ຮັບລາງວັນ ລົດເກັງ TOYOTA VIOS ທີ່ເຂົ້າຮ່ວມໂຄງການໃນຄັ້ງນີ້ ແມ່ນທ່ານ ນາງ ຄໍາແສງ ວິລະພັນ ບ້ານໜອງທາເໜືອ ນະຄອນຫຼວງວຽງຈັນ ໂທລະ ສັບ 020 99577781. ເພື່ອເປັນການສົ່ງເສີມການນໍາໃຊ້ທຸກຜະ ລິດຕະພັນຂອງທະນາຄານ ຮ່ວມພັດທະນາໃຫ້ຫຼາຍຂຶ້ນ ແລະ ເພື່ອເປັນການຄືນກຳໄລໃຫ້ລູກຄ້າທີ່ມານໍາໃຊ້ບໍລິການຜະລິດຕະພັນຂອງທະນາຄານ ແລະ ໃນຕອນຄາໍ່ຂອງວັນດຽວກັນ ກໍໄດ້ມີງານລ້ຽງພົບປະ ລູກຄ້າ 4 ແຂວງພາກໃຕ້ ຢູ່ທີ່ໂຮງແຮມຈໍາປາສັກແກຣນ ເພື່ອຮັດແໜ້ນຄວາມສາມັກຄີ ຮັກແພງ ລະຫວ່າງ ລູກຄ້າ ແລະ ທະນາຄານໃຫ້ແໜ້ນແຟ້ນຍິ່ງຂຶ້ນ. ງານລ້ຽງໄດ້ກ່າວຕ້ອນຮັບໂດຍ ທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານຮ່ວມພັດທະນາ ໄດ້ກ່າວເປີດພິທີ ແລະ ໄດ້ຍົກໃຫ້ເຫັນບາດ ກ້າວການຂະຫຍາຍຕົວຂອງທະນາຄານຮ່ວມພັດທະນາ ນັບແຕ່ປີ 2012 ມາເຖິງປັດຈຸບັນແມ່ນມີການຂະຫຍາຍຕົວຢ່າງກ້າວກະໂດດ ໄດ້ຂະຫຍາຍ ຕາໜ່າງການບໍລິການຈາກ 4 ໜ່ວຍບໍລິການ 60 ໜ່ວຍບໍລິ ການ ໃນຂອບເຂດທົ່ວປະເທດ ແລະ ການພັດທະນາລະບົບໄອທີ ໃຫ້ມີຄວາມທັນສະໄໝ ອອກຜະລິດຕະພັນຢ່າງຫຼວງຫຼາຍ ເພື່ອຕອບສະໜອງຄວາມຕ້ອງ ການ ແລະ ຄວາມເພິ່ງພໍໃຈຂອງ ລູກຄ້າ ໃນການເຂົ້າເຖິງແຫຼ່ງທຶນ, ເງິນກູ້ ເພື່ອສ້າງເສດຖະກິດຄອບຄົວຜູ້ທີ່ມີລາຍຮັບນ້ອຍ ແລະ ສົ່ງເສີມທຸລະກິດ SME ທຸລະກິດຂະໜາດນ້ອຍ ແລະ ຂະໜາດກາງ. ນອກຈາກນັ້ນ, ຍັງໄດ້ສະໜອງທຶນ ປ່ອຍສິນເຊື່ອໃຫ້ແກ່ໂຄງການຂອງລັດ ຖະບານຄື: ເສັ້ນທາງລົດໄຟ ລາວ-ຈີນ, ເສັ້ນທາງດ່ວນວຽງ ຈັນ (ບຶງທາດຫຼວງ-ດົງໝາກ ຄາຍ-ທ່າງ່ອນ) ໃນວັນທີ3 ຕຸລາ 1989 ຫາ 3 ຕຸລາ 2019 ໄດ້ຄົບຮອບວັນສ້າງຕັ້ງທະນາຄານ ຮ່ວມພັດທະນາ 30 ປີ ແລະ ທະນາຄານຮ່ວມພັດທະນາ ໜ່ວຍບໍລິການປາກເຊ ກໍຄົບ ຮອບ 6 ປີ ໄດ້ບັນລຸຜົນສໍາເລັດຫຼາຍຢ່າງໃນການບໍລິການ ທາງດ້ານການເງິນໃຫ້ກັບປະ ຊາຊົນບັນດາເຜົ່າ, ປັດຈຸບັນລູກຄ້າມີຄວາມເຊື່ອໝັ້ນ ແລະ ໄວ້ວາງໃຈໃຫ້ຄວາມສະໜັບສະ ໜູນທະນາຄານ JDB ຕະຫຼອດມາ ຊຶ່ງທັງໝົດນີ້, ກໍຍ້ອນການຊີ້ນຳ ນຳພາຢ່າງໃກ້ຊິດຈາກພັກ- ລັດຖະບານ ກໍຄືຂັ້ນເທິງ ໂດຍສະເພາະ ກໍແມ່ນທະນາຄານແຫ່ງ ສປປລາວ ເຮັດໃຫ້ເປັນທະນາຄານຮ່ວມພັດທະນາມີຄວາມທັນສະໄໝຕາມຍຸກ 4.0 ໄດ້ນໍາໃຊ້ເຕັກໂນໂລຊີທີ່ທັນສະ ໄໝເຂົ້າໃນການບໍລິການໃຫ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ເຮັດໃຫ້ສັງຄົມ ຫຼຸດຜ່ອນການນໍາໃຊ້ເງິນສົດເທື່ອລະກ້າວໂດຍໄປຕາມຄໍາຂວັນຂອງທະນາຄານຮ່ວມພັດທະນາ"ເຕີບໃຫຍ່ໄປພ້ອມກັນ ". (ຂ່າວ-ພາບ: ຄໍາຕົ້ນ ວໍລະຈັກ)