ມອບ-ຮັບເງິນຊົດເຊີຍໂຄງການທາງດ່ວນ ນະຄອນຫຼວງວຽງຈັນ ໝາຍເລກ I

20.11.2019 9:49     

  ພິທີມອບ-ຮັບເງິນຊົດເຊີຍ ແລະ ທົດແທນຄ່າເສຍຫາຍໂຄງການທາງດ່ວນ ນະ ຄອນຫຼວງວຽງຈັນ ໝາຍເລກ I ໄດ້ຈັດຂຶ້ນໃນວັນທີ 19 ພະຈິກ ນີ້ ທີ່ສະໂມສອນເມືອງໄຊທາ ນີ ນະຄອນຫຼວງວຽງຈັນ ໂດຍການເຂົ້າຮ່ວມມອບຄ່າຊົດເຊີຍຂອງທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ, ມີບັນດາຫົວໜ້າພະ ແນກການ ພ້ອມພໍ່ແມ່ປະຊາ ຊົນທີ່ມີສ່ວນຮ່ວມ ໃນໂຄງການເຂົ້າຮ່ວມ. ທ່ານ ບຸນທາມ ພຸດທະວົງສາ ຫົວໜ້າຄະນະໄກ່ເກ່ຍ ໂຄງການໄດ້ລາຍງານເຖິງເປົ້າ ໝາຍ ການພັດທະນາຂອງໂຄງການດັ່ງກ່າວວ່າ: ໂຄງການກໍ່ສ້າງທາງດ່ວນໝາຍເລກ I ນະຄອນ ຫຼວງວຽງຈັນ ມີຕອນດິນທີ່ມີສ່ວນຮ່ວມໂຄງການ ລວມມີ 2 ເມືອງ ແລະ 21 ບ້ານທ່ີຖືກໂຄງການກໍ່ສ້າງຄື: ເມືອງໄຊເສດຖາຈຳນວນ 14 ບ້ານ ແລະ ເມືອງໄຊທານີ 7 ບ້ານ ລວມຂອບເຂດພື້ນທີ່ ທີ່ພັດທະນາຢູ່ເມືອງໄຊທານີ ປະກອບມີການຂະຫຍາຍເສັ້ນທາງເຊື່ອມຕໍ່ລະຫວ່າງທາງດ່ວນວຽງຈັນ ໝາຍເລກ I ຫາສະຖານີລົດໄຟ ລາວ-ຈີນ, ເຂດສາທາລະນຸປະໂພກທີ່ອຳ ນວຍຄວາມສະດວກ, ເຂດພັດ ທະນາທີ່ຈຳເປັນ ແລະ ພື້ນທີ່ຮອງຮັບກິດຈະກຳໂຄງການ ຊຶ່ງມີໄລຍະແລວທາງທັງໝົດ 15.933 ກິໂລແມັດ ແຕ່ບໍລິເວນ ເຂດສະເພາະບຶງທາດຫຼວງ - ດົງໝາກຄາຍ. ຜ່ານການຈັດຕັ້ງປະຕິບັດ ສັງລວມຂໍ້ມູນແຜນທີ່ດິນ, ສຳເນົາທີ່ດິນ ແລະ ປະສານສົມທົບກັບຂະແໜງການທີ່ກ່ຽວຂ້ອງ ແລະ ສົມທົບກັບເຈົ້າຂອງຕອນດິນທີ່ຖືກຂອບເຂດໂຄງການເພື່ອລົງສຳຫຼວດວັດແທກເກັບກຳຂໍ້ມູນສິດນຳໃຊ້ທີ່ດິນ ພ້ອມທັງເຮັດບົດບັນທຶກຮັບເອົາຄ່າຊົດເຊີຍໂຄງການນີ້ ເມືອງໄຊເສດຖາມີຕອນດິນທັງໝົດ 535 ຕອນ, ວັດແທກແລ້ວທັງໝົດ 324 ຕອນ ແລະ ປະກອບສຳ ນວນ ແລະ ເຊັນບົດບັນທຶກເບື້ອງຕົ້ນ 209 ຕອນ ແລະ ເມືອງໄຊທານີມີຕອນດິນທັງໝົດ 333 ຕອນ, ແທກແລ້ວທັງໝົດ 177 ຕອນ ແລະ ປະກອບສຳນວນ ແລະ ເຊັນບົດບັນທຶກເບື້ອງຕົນ 156 ຕອນ, ລວມຕອນດິນ ໃນໂຄງການມີ 868 ຕອນມີສິ່ງປຸກສ້າງ 160 ຫຼັງ (ເມືອງໄຊເສດຖາ 134 ຫຼັງ ແລະ ເມືອງໄຊທານີ 26 ຫຼັງ) ເນື້ອ ທີ່ໂຄງການທັງໝົດປະມານ 293,16 ເຮັກຕາ ແລະ ມູນຄ່າຊົດເຊີຍເບື້ອງຕົ້ນ ປະມານ 353.295.706.956 ກີບ ທຽບເທົ່າ 41.564.200 ໂດລາ. ປັດຈຸບັນມີຜູ້ທີ່ປະກອບເອ ກະສານຄົບຖ້ວນ ແລະ ພ້ອມຮັບ ຄ່າຊົດເຊີຍຈຳນວນ 19 ຕອນ ແລະ ມອບຮັບງວດທີ 1 ລວມມີ 19 ຄອບຄົວ ລວມມູນຄ່າການຊົດເຊີຍ 4.608.907.996 ກີບ ມີເນື້ອທີ່ຖືກໂຄງການ 19 ຕອນ, 41.209 ຕາແມັດ ຫຼື 4,12 ເຮັກຕາ ຊຶ່ງສ່ວນຫຼາຍເຈົ້າຂອງຜູ້ມີສ່ວນຮ່ວມ ໃນໂຄງການແມ່ນມີອາຊີບພະນັກງານບຳ ນານຊາວນາ ແລະ ຄ້າຂາຍ, ໃນການຮັບເງິນຄ່າຊົດເຊີຍມີ 2 ແບບຄືຮັບເປັນແຊັກເງິນ ແລະ ໂອນຊຳລະຜ່ານທະນາຄານທີ່ກຳນົດໃຫ້. (ຂ່າວ: ກົງມະລີ)