ເພີ່ມທະວີເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດເຂົ້າໃນ ພາລະກິດສ້າງສາພັດທະນາປະເທດຊາດ


23.09.2019 17:48     

   ວັນທີ 13 ສິງຫາ ແມ່ນວັນສ້າງຕັ້ງແນວລາວສ້າງຊາດ ຊຶ່ງປີນີ້ ໄດ້ໝູນວຽນບັນຈົບ ຄົບຮອບ 69 ປີ (13/8/1950-13/8/2019).
ເມື່ອຫວນຄືນການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ ກ່ອນນີ້ 69 ປີ ຄືປີ 1930 ພັກກອມມູນິດອິນດູຈີນ ໄດ້ຮັບການສ້າງຕັ້ງຂຶ້ນ. ພັກໄດ້ວາງແນວທາງຍຸດທະສາດ, ຍຸດໂທບາຍການດຳເນີນການປະຕິວັດຢູ່ອິນດູຈີນ ໂດຍເຫັນແຈ້ງບົດບາດ ແລະ ໃຫ້ຄວາມສຳຄັນຂອງວຽກງານແນວໂຮມ. ປີ 1934 ອົງຄະນະພັກແຄວ້ນລາວໄດ້ຮັບການສ້າງຕັ້ງຂຶ້ນ ຊຶ່ງເປັນບາດກ້າວທຳອິດທີ່ມີການປັບປຸງ, ຂະຫຍາຍການຈັດຕັ້ງພັກ ແລະ ການຈັດຕັ້ງມະຫາຊົນ ຢູ່ລາວ ວັນທີ 1/12/1941 ຄະນະບໍລິຫານງານສູນກາງພັກກອມມູນິດ ອິນດູຈີນໄດ້ມີຄຳສັ່ງກ່ຽວກັບການສ້າງຕັ້ງສຳພັນທະມິດອ້າຍລາວເອກະລາດ ຊຶ່ງຄຳສັ່ງໄດ້ເວົ້າແຈ້ງວ່າ: "ສຳພັນທະມິດອ້າຍ ລາວເອກະລາດ ແມ່ນຮູບການແນວໂຮມຕ້ານຈັກກະພັດຜູ້ຮຸກຮານຂອງລາວ" ພັກໄດ້ຍູ້ແຮງວຽກງານປຸກລະດົມຂົນຂວາຍມະຫາຊົນຢູ່ເຂດຊົນນະບົດ ແລະ ບໍລິເວນຊົນເຜົ່າ, ມີຊາວໄຮ່ນາເປັນກຳລັງພື້ນຖານຂອງການປະຕິວັດ. ສະນັ້ນ ຂະບວນການຕໍ່ສູ້ລະເບີດຂຶ້ນຢູ່ຕົວເມືອງໃຫຍ່ຕ່າງໆ ກ້າວໄປສູ່ການຢຶດອຳນາດ 23 ສິງຫາ 1945 ແລະ ປະກາດເອກະລາດ 12 ຕຸລາ 1945.
    ເດືອນມັງກອນ 1950 ກອງປະຊຸມຄະນະບໍລິຫານງານສູນກາງພັກກອມມູນິດອິນດູຈີນ ໄດ້ເປີດຂຶ້ນ ຊຶ່ງກອງປະຊຸມໄດ້ກຳນົດໜ້າທີ່ສະເພາະໜ້າຂອງການປະຕິວັດຄື: ກໍ່ສ້າງຖານທີ່ໝັ້ນຕໍ່ຕ້ານໃຫ້ຕິດລ່ຽນ, ຂະຫຍາຍກຳລັງປະກອບອາວຸດ ເພື່ອດຳເນີນການສູ້ຮົບປະສານສົມທົບກັບສະໜາມຮົບລວມ, ກໍ່ສ້າງ ແລະ ເປີດກວ້າງແນວໂຮມເອກະພາບແຫ່ງຊາດ ແລະ ສ້າງຕັ້ງລັດ ຖະບານລາວຕໍ່ຕ້ານ. ປະຕິບັດຕາມທິດຊີ້ນຳຂອງກອງປະຊຸມ ດັ່ງກ່າວ ປີ 1950 ແນວລາວສ້າງຊາດໄດ້ຮັບການສ້າງຕັ້ງຂຶ້ນ ແລະ ຂະຫຍາຍຕົວເປັນແຕ່ລະໄລຍະຄື: ໄລຍະທີໜຶ່ງແມ່ນໄລຍະແນວລາວອິດສະຫຼະ ເພື່ອປະຕິບັດຕາມທິດທາງການເຄື່ອນໄຫວຕໍ່ຕ້ານຢູ່ລາວທີ່ກອງປະຊຸມສູນກາງພັກກອມມູນິດຈີນວາງອອກຕົ້ນປີ 1950 ມາຮອດ ໃນວັນທີ 13 ສິງຫາ 1950 ກອງປະຊຸມໃຫຍ່ຜູ້ແທນແນວລາວຕໍ່ຕ້ານທົ່ວປະເທດ ໄດ້ເປີດຂຶ້ນຢູ່ຕວຽນກວາງ ສສ ຫວຽດນາມ ໂດຍມີຜູ້ແທນເຂົ້າຮ່ວມທັງໝົດ 105 ທ່ານ ຊຶ່ງເປັນຕົວແທນຂອງກຳລັງປະກອບອາວຸດທຸກພາກ, ຕົວແທນຂອງບັນດາເຜົ່າ, ຊັ້ນຄົນ, ບັນດາອົງການຈັດຕັ້ງສັງຄົມ, ສາສະໜາ, ເພດ-ໄວ ຈາກເຂດຕໍ່ຕ້ານ ແລະ ເຂດກວດກາຂອງສັດຕູໃນທົ່ວປະເທດ. ກອງປະຊຸມດັ່ງກ່າວໄດ້ປະກາດສ້າງຕັ້ງແນວໂຮມແຫ່ງຊາດ ໂດຍໃຫ້ຊື່ວ່າ: ແນວລາວອິດສະຫຼະ ຊຶ່ງປະກອບມີຄະນະກຳມະການສູນກາງແນວລາວອິດສະຫຼະຈຳນວນ 15 ທ່ານ ໂດຍແມ່ນສົມເດັດເຈົ້າ ສຸພານຸວົງ ເປັນປະທານສູນກາງແນວລາວອິດສະຫຼະ. ໄລຍະທີສອງແມ່ນໄລຍະແນວລາວຮັກຊາດ ເພື່ອເປີດກວ້າງແນວໂຮມ ເອກະພາບແຫ່ງຊາດໃນວັນທີ 6-9/1/1956 ທີ່ບ້ານເລີຍ ຕາແສງ ເມືອງພູນ ເມືອງໂສຍ ແຂວງຫົວພັນ, ແນວລາວອິດສະຫຼະໄດ້ເປີດກອງປະຊຸມໃຫຍ່ຂຶ້ນ ໂດຍມີຜູ້ແທນເຂົ້າຮ່ວມທັງໝົດ 150 ທ່ານ, ຜູ້ແທນສົມບູນ 138 ທ່ານ ຊຶ່ງເປັນຕົວແທນໃຫ້ອົງການພັກ, ອົງການປົກຄອງ, ປະຊາຊົນບັນດາເຜົ່າ ແລະ ຜູ້ຊົງຄຸນວຸດທິທີ່ຮັກຊາດ. ກອງປະຊຸມຄັ້ງນີ້ໄດ້ຕົກລົງປ່ຽນຊື່ແນວລາວອິດສະຫຼະມາເປັນແນວລາວຮັກຊາດ ແລະ ໄດ້ຮັບຮອງເອົາການແຕ່ງຕັ້ງຄະນະກຳມະການສູນກາງແນວລາວຮັກຊາດ ຈຳນວນ 47 ທ່ານ, ໃນນັ້ນ, ແຕ່ງຕັ້ງສົມເດັດເຈົ້າ ສຸພານຸວົງ ເປັນປະທານສູນກາງແນວລາວຮັກຊາດ ແລະ ຮອງປະທານຈຳນວນ 6 ທ່ານ. ໄລຍະສາມແມ່ນໄລຍະແນວລາວສ້າງຊາດ. ຄະນະກຳມະການສູນກາງແນວລາວຮັກຊາດໄດ້ຮຽກໂຮມ ແລະ ເປີດກອງປະຊຸມໃຫຍ່ຂອງແນວລາວຮັກຊາດຂຶ້ນໃນລະຫວ່າງວັນທີ 16-20 ກຸມພາ 1979 ທີ່ສະໂມສອນໜອງບອນ ນະຄອນຫຼວງວຽງຈັນ ຊຶ່ງມີຜູ້ແທນເຂົ້າຮ່ວມກອງປະຊຸມ 200 ກວ່າທ່ານ. ກອງປະຊຸມໄດ້ມີມະຕິປ່ຽນ ຊື່ແນວລາວຮັກຊາດ ມາເປັນແນວລາວສ້າງຊາດ ແລະ ຮັບຮອງເອົາການສະເໜີແຕ່ງຕັ້ງຄະນະກຳມະການສູນກາງແນວລາວສ້າງຊາດ ຈຳນວນ 76 ທ່ານ. ໃນນັ້ນ, ແຕ່ງຕັ້ງສົມເດັດເຈົ້າ ສຸພານຸວົງ ເປັນປະທານສູນກາງແນວລາວສ້າງຊາດ, ຮອງປະທານ 3 ທ່ານ ແລະ ກຳມະການປະຈຳ 3 ທ່ານ.
    ໃນແຕ່ລະໄລຍະກໍຄືຕະຫຼອດໄລຍະ 69 ປີ ແນວລາວສ້າງຊາດໄດ້ຕັ້ງໜ້າປະຕິບັດພາລະບົດບາດໜ້າທີ່ຂອງຕົນ ແລະ ສ້າງໄດ້ມູນເຊື້ອທີ່ເປັນພື້ນຖານຂອງແນວລາວສ້າງຊາດ ໂດຍສະເພາະແນວລາວສ້າງຊາດມີມູນເຊື້ອເຕົ້າໂຮມຄວາມສາມັກຄີປະຊາຊົນບັນດາເຜົ່າທຸກຊັ້ນຄົນ, ສາສະໜາ, ເພດ-ໄວ ໃຕ້ຮົ່ມທຸງປະຕິວັດຂອງພັກ ປປ ລາວ, ແນວລາວສ້າງຊາດ ໄດ້ຢຶດໝັ້ນໃນພັນທະພາບກຳມະກອນ-ຊາວກະສິກອນ, ນັກຮຽນຮູ້-ປັນຍາຊົນ ໃຕ້ການນຳພາຂອງພັກ, ເດັດດ່ຽວໜຽວແໜ້ນສຶກສາອົບຮົມປະຊາຊົນໄປຕາມພັກແນວລາວສ້າງຊາດ ຍາມໃດກໍຕັ້ງໜ້າປະຕິບັດແນວທາງຍຸດທະສາດ, ຍຸດໂທບາຍ ແລະ ວິທີປະຕິວັດຂອງພັກ ໃນທຸກໄລຍະຂອງການປະຕິວັດ. ແນວລາວສ້າງຊາດມີມູນເຊື້ອຮ່ວມສຳພັນທາງການເມືອງ ແລະ ທາງດ້ານການ ທະຫານກັບກຳລັງເປັນກາງທີ່ກ້າວໜ້າ ແລະ ຊັ້ນຄົນຕ່າງໆ ນັບທັງຜູ້ຊົງຄຸນວຸດທິ, ເຈົ້າກົກເຈົ້າເຫຼົ່າດ້ວຍການໝູນໃຊ້ຫຼັກການ, ນະໂຍບາຍອັນຖືກຕ້ອງຂອງພັກ ແລະ ຂົນຂວາຍປຸກລະດົມດຶງດູດເອົາກຳລັງເປັນກາງເຂົ້າຮ່ວມໃນຂະບວນການປະຕິວັດເຮັດໃຫ້ຂະບວນການປະຕິວັດ ນັບມື້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ມີມູນເຊື້ອຮ່ວມສຳພັນສູ້ຮົບ, ສາມັກຄີພິເສດກັບກອງທັບ ແລະ ປະຊາຊົນຫວຽດນາມ, ປະຕິບັດການຮ່ວມສຳພັນ 3 ຊາດ ລາວ - ຫວຽດນາມ - ກຳປູເຈຍ ເພື່ອພ້ອມກັນຕີສັດຕູໂຕດຽວ, ມີມູນເຊື້ອເປັນທີ່ປຶກສາ, ແນະນຳ ແລະ ເປັນບ່ອນໃຫ້ປະຊາຊົນໄດ້ເພິ່ງພາ ແນວໂຮມເຮັດບົດບາດເປັນຂົວຕໍ່ທີ່ດີລະຫວ່າງມະຫາຊົນກັບພັກ ແລະ ລະຫວ່າງປະຊາຊົນກັບລັດ. ນອກນັ້ນ, ແນວລາວສ້າງຊາດ ຍັງສະແດງລັກສະນະທີ່ມີການຈັດຕັ້ງ ແລະ ເປັນພື້ນຖານການເມືອງຂອງອຳນາດລັດ ປະຊາທິປະໄຕ ປະຊາຊົນ.
ເພື່ອສືບຕໍ່ເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ ເຂົ້າໃນພາລະກິດສ້າງສາພັດທະນາປະເທດຊາດ ນັ້ນຕ້ອງສຸມໃສ່ໃນການເພີ່ມທະວີກ້ອນກຳລັງມະຫາສາມັກຄີທົ່ວປວງຊົນຢ່າງແໜ້ນແຟ້ນ ບົນພື້ນຖານຄວາມເປັນເອກະພາບໃນອຸດົມການແຫ່ງການສ້າງປະເທດໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ ແລະ ສັງຄົມ ມີປະຊາທິປະໄຕ, ສີວິໄລ ແລະ ຍຸຕິທຳ, ຖືຄວາມສາມັກຄີເປັນອັນໜຶ່ງອັນດຽວ ຂອງທົ່ວປວງຊົນເປັນປັດໄຈຕັດສິນການຄົງຕົວ ແລະ ຂະຫຍາຍຕົວຂອງຊາດ. ປຸກລະດົມກຳລັງແຮງຂອງປະຊາຊົນທຸກຊົນເຜົ່າ, ທຸກຊັ້ນຄົນ, ສາສະໜາ, ເພດ-ໄວ ເຂົ້າຮ່ວມໃນທຸກຂະບວນການວຽກງານແຫ່ງການພັດທະນາປະເທດຊາດຢ່າງຫ້າວຫັນ ແລະ ມີຜົນສຳເລັດຢ່າງຈົບງາມບົນພື້ນຖານຄວາມຮັກຊາດ, ຈິດໃຈເອກະລາດ, ເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ເພີ່ມທະວີບົດບາດ ແລະ ເຊີດຊູຄວາມສາມາດຂອງການຈັດຕັ້ງແນວລາວສ້າງຊາດ ເພື່ອເຕົ້າໂຮມຄວາມສາມັກຄີ ແລະ ເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າ, ສືບຕໍ່ປະຕິບັດພາລະກິດປ່ຽນແປງໃໝ່ໃຫ້ໄດ້ຮັບຜົນສຳເລັດໃຫຍ່ຫຼວງກວ່າເກົ່າ, ຮັບປະກັນສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ, ພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງຕໍ່ເນື່ອງ: ເພີ່ມທະວີ ຄວາມເຊື່ອໝັ້ນຂອງປະຊາຊົນຕໍ່ການນຳພາຂອງພັກ ແລະ ອົງການປົກຄອງຂັ້ນຕ່າງໆ. ໂຄສະນາສຶກສາອົບຮົມ, ປຸກລະດົມເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າ ໃນການປະຕິບັດແນວທາງນະໂຍບາຍ, ລັດຖະທຳມະນູນ ກົດໝາຍ ແລະ ແຜນພັດທະນາເສດຖະກິດ-ສັງຄົມ ຂອງຊາດແຕ່ລະໄລຍະ. ຫັນທິດລົງຮາກຖານເຂົ້າຮ່ວມວຽກງານ 3 ສ້າງ, ສຸມໃສ່ສ້າງບ້ານສາມັກຄີ, ກໍ່ສ້າງແນວໂຮມຂັ້ນເມືອງໃຫ້ເປັນ ຫົວໜ່ວຍເຂັ້ມແຂງຮອບດ້ານ, ສ້າງແນວໂຮມຂັ້ນບ້ານໃຫ້ເປັນຫົວໜ່ວຍພັດທະນາເປັນບ່ອນຈັດຕັ້ງປະຕິບັດຕົວຈິງໃນທຸກຂົງເຂດວຽກງານຂອງແນວໂຮມ, ສືບຕໍ່ປຸກລະດົມ ແລະ ຊຸກຍູ້ປະຊາຊົນສ້າງ-ປັບປຸງກອງທຶນພັດທະນາຂັ້ນບ້ານໃຫ້ເກີດດອກອອກຜົນ ເພື່ອເປັນມາດຖານຕົວຈິງອັນໜຶ່ງໃນການແກ້ໄຂຄວາມທຸກຍາກ, ສ້າງສາຍພົວພັນມິດຕະພາບກັບບັນດາອົງການຈັດຕັ້ງແນວໂຮມຂອງບັນດາປະເທດເພື່ອນມິດ ຍຸດທະສາດ, ເປີດກວ້າງການພົວພັນຮ່ວມມືກັບຕ່າງປະເທດ, ພາກພື້ນ ແລະ ສາກົນ, ປະກອບສ່ວນເພີ່ມທະວີສາຍພົວພັນມິດຕະພາບ ລະຫວ່າງ ປະຊາຊາດໃນການຮ່ວມມື ແລະ ການພັດທະນາ ລວມທັງການສະໜັບສະໜູນຂະບວນການຕໍ່ສູ້ ເພື່ອສັນຕິພາບ ແລະ ຄວາມກ້າວໜ້າທາງສັງຄົມໃນໂລກ. (ໂດຍ: ມິງໂກ້)