ພັດທະນາວຽກງານສື່ມວນຊົນ ແລະ ການພິມຈຳໜ່າຍຕາມທິດຫັນເປັນ ທັນສະໄໝ


23.09.2019 18:01     

   ວັນທີ 13 ສິງຫາ ເປັນວັນທີ່ມີຄວາມໝາຍສຳຄັນສຳລັບວົງການສື່ມວນຊົນ ແລະ ການພິມຈຳໜ່າຍ ຊຶ່ງເປັນວັນທີ່ກົດໝາຍວ່າດ້ວຍສື່ມວນຊົນ ແລະ ກົດໝາຍວ່າດ້ວຍການພິມຈຳໜ່າຍໄດ້ກຳນົດເອົາວັນດັ່ງກ່າວເປັນວັນສື່ມວນຊົນແຫ່ງ ຊາດ ແລະ ການພິມຈຳໜ່າຍ ໂດຍປີນີ້ແມ່ນຄົບຮອບ 69 ປີ (13/8/1950-13/8/2019).
    ວຽກງານຖະແຫຼງຂ່າວສື່ມວນຊົນ ແລະ ການພິມຈຳໜ່າຍແມ່ນວຽກງານສຳຄັນອັນໜຶ່ງໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຊຶ່ງມີບົດບາດເປັນເຄື່ອງມື ເປັນກະບອກສຽງທີ່ແຫຼມຄົມໃນການເຜີຍແຜ່ແນວທາງນະໂຍບາຍຂອງ ພັກ-ລັດ, ເຮັດໜ້າທີ່ໂຄສະນາສຶກສາອົບຮົມນ້ຳໃຈຮັກຊາດ, ຮັກລະບອບໃໝ່, ລະບອບປະຊາທິປະໄຕ ແລະ ສ້າງສະຕິເຄົາລົບກົດໝາຍໃຫ້ປະຊາຊົນ, ສົ່ງເສີມໃຫ້ປະຊາຊົນຮູ້ອະນຸລັກຮັກສາ ແລະ ເສີມຂະຫຍາຍວັດທະນະທຳອັນດີງາມຂອງຊາດ ແລະ ບັນດາເຜົ່າກໍຄືການພັດທະນາເສດຖະກິດສັງຄົມໃຫ້ມີບາດກ້າວຂະຫຍາຍຕົວ.
    ໃນໄລຍະຜ່ານມາ, ເຖິງແມ່ນສະພາບການສາກົນມີການຜັນແປໄປຢ່າງໄວວາ ແລະ ສັບສົນ, ມີທັງກາລະໂອກາດອັນດີ ແລະ ມີທັງອັນທ້າທາຍທົດສອບກໍຕາມ ແຕ່ຂະແໜງການສື່ມວນຊົນ ແລະ ການພິມຈຳໜ່າຍກໍໄດ້ມີຄວາມພະຍາຍາມໃນການປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ ແລະ ໄດ້ຮັບຜົນສຳເລັດໃນຫຼາຍດ້ານ ໂດຍສະເພາະໄດ້ເຮັດບົດບາດສຳຄັນຢຶດໝັ້ນໃນແນວທາງນະໂຍບາຍ ແລະ ອຸດົມການຂອງພັກຢ່າງໜັກແໜ້ນ, ໄດ້ປະກອບສ່ວນເຂົ້າໃນການຕໍ່ສູ້ຕ້ານບັນດາຖ້ອຍທຳນອງໃສ່ຮ້າຍປ້າຍສີ ແລະ ທັດສະນະຜິດພາດ, ຕ້ານການສໍ້ລາດບັງຫຼວງ, ສິ່ງຫຍໍ້ທໍ້ໃນສັງຄົມ, ປຸກລະດົມນຳ້-ໃຈ ຮັກຊາດຮັກລະບອບໃໝ່ຂອງປະຊາຊົນບັນດາຊັ້ນຄົນ, ເປັນເຈົ້າການສຸມໃສ່ກໍ່ສ້າງ ແລະ ປົກປັກຮັກສາປະເທດຊາດ, ດຳເນີນພາລະກິດປ່ຽນແປງໃໝ່ ເພື່ອຈຸດໝາຍປະເທດຊາດເຂັ້ມແຂງ, ປະຊາຊົນຮັ່ງມີຜາສຸກ ມີປະຊາທິປະໄຕ, ຍຸຕິທຳ ແລະ ສີວິໄລຕາມທິດສັງຄົມນິຍົມ. ພ້ອມນີ້, ຂະແໜງການສື່ມວນຊົນ ແລະ ການພິມຈຳ-ໜ່າຍຍັງໄດ້ມີການພັດທະນາຕົນເອງທັງດ້ານປະລິມານ ແລະ ຄຸນນະພາບ, ບັນດາພາຫະນະສື່ມວນຊົນໄດ້ນຳໃຊ້ວິທະຍາສາດທີ່ກ້າວໜ້າ ເຕັກໂນໂລຊີຂໍ້ມູນຂ່າວສານທັນສະໄໝ. ສື່ມວນຊົນຈຳນວນໜຶ່ງໄດ້ບືນຕົວຊອກແຫຼ່ງລາຍຮັບກຸ້ມຕົນເອງ ເພື່ອຫຼຸດຜ່ອນການແບກຫາບດ້ານງົບປະມານຂອງລັດ. ປັດຈຸບັນ, ສື່ມວນຊົນ ແລະ ການພິມຈຳໜ່າຍໄດ້ເຄື່ອນໄຫວເຮັດໜ້າທີ່ຕາມຫຼັກຈັນຍາບັນວິຊາຊີບ, ເນື້ອໃນທີ່ຕອບສະໜອງຄວາມຕ້ອງການຂອງປະຊາຊົນດີຂຶ້ນກວ່າເກົ່າ. ຖັນແຖວພະນັກງານສື່ມວນຊົນກໍຄືການຈຳໜ່າຍກໍໄດ້ຮັບການປັບປຸງຍົກລະດັບໃຫ້ສູງຂຶ້ນກວ່າເກົ່າ, ພື້ນຖານວັດຖຸຕິກນິກໄດ້ຄ່ອຍໆຫັນປ່ຽນໄປສູ່ ຄວາມທັນສະໄໝເທື່ອລະກ້າວ, ສາມາດສົ່ງຂໍ້ມູນຂ່າວສານ ແລະ ເຜີຍແຜ່ອອກສູ່ພາຍໃນ ແລະ ຕ່າງປະເທດ ໄດ້ຢ່າງວ່ອງໄວທັນການ ແລະ ກວ້າງຂວາງກວ່າເກົ່າ. ເຮັດໃຫ້ມາດຕະຖານ ແລະ ຄຸນນະພາບຂອງສື່ມວນຊົນ ແລະ ການພິມຈຳໜ່າຍໄດ້ຮັບການພັດທະນາຍົກລະດັບຂຶ້ນເປັນກ້າວໆ.
    ຕະຫຼອດໄລຍະ 69 ປີ ທີ່ຜ່ານມາ, ວຽກງານສື່ມວນຊົນ ແລະ ການພິມຈຳໜ່າຍໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວເປັນກ້າວໆ ໃນປີ 2018 ໄດ້ມີສະຖານີໂທລະພາບຈຳນວນ 40 ກວ່າສະຖານີ, ວິທະຍຸກະຈາຍສຽງມີ 70 ກວ່າສະຖານີ, ໂທລະໂຄ່ງ 5.000 ກວ່າໜ່ວຍ, ໜັງສືພິມມີ 30 ກວ່າສຳນັກພິມ ແລະ ວາລະສານມີ 100 ກວ່າສຳນັກພິມ.
    ປັດຈຸບັນທົ່ວປະເທດມີໂຮງພິມ, ຮ້ານພິມ ແລະ ຮ້ານອອກແບບພິມຫຼາຍກວ່າ 100 ແຫ່ງ ຊຶ່ງລວມທັງຂອງລັດ ແລະ ເອກະຊົນ, ມີຮ້ານຈຳໜ່າຍປຶ້ມ ແລະ ສິ່ງພິມອື່ນໆ ຈຳນວນຫຼາຍສາມາດຈັດພິມປຶ້ມ ແລະ ຜະລິດຕະພັນສິ່ງພິມອື່ນໆ ໄດ້ເປັນຈຳ-ນວນຫຼາຍລ້ານຫົວ-ຕໍ່ປີ.
    ອີງໃສ່ຄວາມຮຽກຮ້ອງຕ້ອງການໜ້າທີ່ການເມືອງຂອງພັກໃນໄລຍະໃໝ່, ວຽກງານສື່ມວນຊົນ ແລະ ການພິມຈຳໜ່າຍຕ້ອງໄດ້ພັດທະນາຕົນເອງໃຫ້ກ້າວສູ່ຄຸນນະພາບ, ຕາມທິດຫັນເປັນທັນສະໄໝ ເພື່ອເປັນເຄື່ອງມືອັນແຫຼມຄົມ ແລະ ມີໝາກຜົນໃນການໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ກົດໝາຍຂອງລັດ ເພື່ອປຸກລະດົມຊຸກຍູ້ປະຊາຊົນບັນດເຜົ່າປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເປັນເວທີແຫ່ງການເສີມຂະຫຍາຍປະຊາທິປະໄຕ ແລະ ສິດເປັນເຈົ້າປະເທດຊາດຂອງປະຊາຊົນບັນດາເຜົ່າ, ເປັນແຫຼ່ງຂໍ້ມູນຂ່າວສານ, ໃຫ້ສາລະຄວາມຮູ້ ແລະ ຄວາມບັນ-ເທີງແກ່ມະຫາຊົນ ຕອບຕ້ານຖ້ອຍທຳນອງຂອງຄົນບໍ່ດີ ແລະ ອິດທິກຳລັງປໍລະປັກໃຫ້ທັນການ, ເອົາໃຈໃສ່ປະຕິບັດກົດໝາຍວ່າດ້ວຍສື່ມວນຊົນ ແລະ ກົດໝາຍວ່າດ້ວຍການພິມ ຈຳໜ່າຍຢ່າງເຂັ້ມງວດ ແລະ ມີໝາກຜົນຕົວຈິງ, ເອົາໃຈໃສ່ເພີ່ມທະວີບຳລຸງຍົກລະດັບ ແລະ ກໍ່ສ້າງພະນັກ-ງານໃຫ້ມີລະດັບຄວາມຮູ້ທາງດ້ານວິຊາການ, ມີຄວາມຫ້າວຫັນ, ເປັນເຈົ້າການ ແລະ ມີສະຕິຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນ ແລະ ມີປະສິດທິຜົນ, ເອົາໃຈໃສ່ວຽກງານກໍ່ສ້າງພື້ນຖານໂຄງລ່າງ, ການນຳໃຊ້ເຕັກນິກໃໝ່ທີ່ກ້າວໜ້າທັນສະໄໝຢ່າງເປັນລະບົບຄົບຊຸດສາມາດເຊື່ອມໂຍງຂໍ້ມູນຂ່າວ-ສານກັບສາກົນ ຢ່າງກົມກືນ ແລະ ສອດຄ່ອງ, ເພີ່ມທະວີການຮ່ວມມືກັບສາກົນ ເພື່ອພັດທະນາວຽກງານສື່ມວນຊົນ ແລະ ການພິມຈຳໜ່າຍໃຫ້ເຂັ້ມແຂງຂຶ້ນເລື້ອຍໆ.