ການພົວພັນຮ່ວມມື ລະຫວ່າງ ສປປ ລາວ - ສ.ເກົາຫຼີ


23.09.2019 17:45     

   ສາທາລະນະລັດ ເກົາຫຼີ (ສ.ເກົາຫຼີ) ຕັ້ງຢູ່ທິດຕາເວັນອອກສ່ຽງເໜືອຂອງທະວີບອາຊີ, ມີພົນລະເມືອງປະມານ 51,41 ລ້ານຄົນ, ເປັນປະເທດໜຶ່ງທີ່ມີຄວາມເຂັ້ມແຂງທາງດ້ານເສດຖະກິດຢູ່ໃນໂລກ ແລະ ກໍເປັນສະມາຊິກຂອງກຸ່ມປະເທດ G-20. ສປປ ລາວ ແລະ ສ.ເກົາຫຼີ ໄດ້ສ້າງຕັ້ງສາຍພົວພັນການທູດນຳກັນໃນປີ 1995. ຕະຫຼອດໄລຍະຫຼາຍກວ່າ 2 ທົດສະວັດຜ່ານມາ, ສອງປະເທດໄດ້ເພີ່ມທະວີ ແລະ ເສີມຂະຫຍາຍການພົວພັນຮ່ວມມື 2 ຝ່າຍ, ໃນຫຼາຍດ້ານ ຊຶ່ງສະແດງອອກໃນການແລກປ່ຽນການຢ້ຽມຢາມສອງຝ່າຍ ລະຫວ່າງການນຳສອງປະເທດ ເປັນຕົ້ນແມ່ນລະດັບປະມຸກລັດ, ຫົວໜ້າລັດຖະບານ, ຄະນະລັດຖະບານ ຕະຫຼອດຮອດການໄປມາຫາສູ່ກັນ ລະຫວ່າງປະຊາຊົນລາວ ແລະ ປະຊາຊົນ ສ.ເກົາຫຼີ.
    ການພົວພັນທີ່ດີດ້ານການເມືອງລະຫວ່າງສອງປະເທດໄດ້ສ້າງເງື່ອນໄຂ ແລະ ສະພາບແວດລ້ອມທີ່ດີໃຫ້ແກ່ການຂະຫຍາຍການຮ່ວມມື ໃນຂົງເຂດເສດຖະກິດ, ການຄ້າ, ການຮ່ວມມືດ້ານການພັດທະນາເຊັ່ນ: ໃນປີ 2018 ມູນຄ່າການຄ້າສອງຝ່າຍສາມາດບັນລຸ 69,5 ລ້ານໂດລາ ຊຶ່ງເພີ່ມຂຶ້ນເກືອບ 10% ເມື່ອທຽບກັບປີທີ່ຜ່ານມາ, ໃນນີ້ ສິນຄ້າສົ່ງອອກໄປ ສ.ເກົາຫຼີ ປະກອບດ້ວຍສິ່ງປຸງແຕ່ງຈາກພືດຜັກ, ໝາກໄມ້ ແລະ ໝາກໄມ້ເປືອກແຂງ, ກາເຟ,ເບຍ ແລະ ອື່ນໆ. ສ່ວນສິນຄ້ານຳເຂົ້າຈາກ ສ.ເກົາຫຼີ ກໍມີພາຫະນະທາງບົກ, ສິ້ນສ່ວນອາໄຫຼ່ລົດ, ອຸປະກອນກົນຈັກເຄື່ອງໄຟຟ້າ, ອຸປະກອນໄຟຟ້າ ແລະ ອື່ນໆ.
ດ້ານການລົງທຶນ, ສ.ເກົາຫຼີ ຈັດຢູ່ໃນອັນດັບ 5 ຂອງການລົງທຶນຕ່າງປະເທດທັງໝົດ ຢູ່ ສປປ ລາວ ລວມມູນຄ່າ 750 ລ້ານກວ່າໂດລາ, ໃນນັ້ນ ໂຄງການໃຫຍ່ທີ່ພົ້ນເດັ່ນຄື: ໂຄງການເຂື່ອນໄຟຟ້າເຊປຽນ-ເຊນໍ້ານ້ອຍ, ໂຄງການປູກໄມ້ວິກ ແລະ ສ້າງຕັ້ງໂຮງງານປຸງແຕ່ງໄມ້ ແລະ ອື່ນໆ.
ສ.ເກົາຫຼີ ເປັນປະເທດໜຶ່ງທີ່ໃຫ້ການສະໜັບສະໜູນ, ຮ່ວມມື ແລະ ຊ່ວຍເຫຼືອ ສປປ ລາວ ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ໃນຫຼາຍດ້ານເຊັ່ນ: ການຮ່ວມມືດ້ານສາທາລະນະສຸກ, ສ.ເກົາຫຼີ ໄດ້ໃຫ້ການຊ່ວຍເຫຼືອທາງດ້ານວິຊາການ ແລະ ເຕັກນິກການແພດແກ່ ສປປ ລາວ ຕໍ່ເນື່ອງ ໂດຍໄດ້ມີການຍົກລະດັບວິຊາການຂອງໂຮງໝໍຕ່າງໆຂອງ ສປປ ລາວ ທັງໄລຍະສັ້ນ ແລະ ໄລຍະຍາວ ຊ່ວຍສ້າງໂຮງໝໍເດັກ, ຊ່ວຍເຫຼືອຜ່າຕັດເດັກນ້ອຍລາວຜູ້ທຸກຍາກທີ່ເປັນພະຍາດຫົວໃຈ ແລະ ພະຍາດອື່ນໆ ໂດຍບໍ່ເສຍຄ່າ.
    ໃນຂົງເຂດການຮ່ວມມືດ້ານການສຶກສາ ແລະ ກິລາ, ສອງຝ່າຍໄດ້ມີການແລກປ່ຽນນັກສຶກສາ, ຄູ-ອາຈານ, ຄູຝຶກ ແລະ ສ.ເກົາຫຼີ ກໍໄດ້ຊ່ວຍສະໜອງທຶນການສຶກສາໃນລະດັບຕ່າງໆທັງໃນໄລຍະສັ້ນ ແລະ ໄລຍະຍາວໃຫ້ແກ່ນັກສຶກສາລາວໄປຮຽນ-ສຶກສາທີ່ ສ.ເກົາຫຼີ ໃນແຕ່ລະປີ ຫຼາຍສົມຄວນ. ພ້ອມນີ້ກໍໄດ້ຊ່ວຍສ້າງສະໜາມກິລາເບັສບອນແຫ່ງທໍາອິດຂອງ ສປປ ລາວ.
    ການຮ່ວມມືດ້ານແຮງງານ, ນັບແຕ່ປີ 2016 ເປັນຕົ້ນມາທີ່ ສອງຝ່າຍໄດ້ມີການລົງນາມບົດບັນທຶກຄວາມເຂົ້າໃຈວ່າດ້ວຍການຈັດສົ່ງແຮງງານໄປເຮັດວຽກຢູ່ ສ.ເກົາຫຼີ ຮ່ວມກັນມາເຖິງປັດຈຸບັນກໍໄດ້ມີແຮງງານລາວຈຳນວນ 200 ກວ່າຄົນ ທີ່ເດີນທາງໄປເຮັດວຽກຢູ່ ສ.ເກົາຫຼີ.
ການຮ່ວມມືດ້ານການທ່ອງທ່ຽວ ແຕ່ປີ 2012 ເປັນຕົ້ນມາ ສອງປະເທດໄດ້ເປີດສາຍການບິນໂດຍກົງ ຊຶ່ງເຮັດໃຫ້ການໄປມາຫາສູ່ລະຫວ່າງປະຊາຊົນສອງຊາດມີຄວາມສະດວກຫຼາຍຂຶ້ນ. ພ້ອມນີ້ ສປປ ລາວ ກໍໄດ້ຍົກເວັ້ນວີຊາໃຫ້ແກ່ພົນລະເມືອງ ສ.ເກົາຫຼີ ແລະ ສາມາດພັກເຊົາ ຢູ່ ສປປ ລາວ ໄດ້ 30 ວັນຕໍ່ຄັ້ງ. ໃນປີ 2018 ໄດ້ມີນັກທ່ອງທ່ຽວຈາກ ສ.ເກົາຫຼີ ເດີນທາງເຂົ້າລາວຫຼາຍກວ່າໜຶ່ງແສນເຈັດສິບພັນເທື່ອຄົນ.
    ການຮ່ວມມືດ້ານພະລັງງານ, ສອງຝ່າຍໄດ້ມີບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນການພັດທະນາໂຄງການຕົວແບບໝູ່ບ້ານເປັນມິດຕໍ່ສິ່ງແວດລ້ອມດ້ານພະລັງງານ ແລະ ບົດບັນທຶກຄວາມເຂົ້າໃຈວ່າດ້ວຍການເພີ່ມທະວີການຮ່ວມມືທາງດ້ານຊັບພະຍາກອນພະລັງງານ ແລະ ດ້ານແຮ່ທາດ. ປັດຈຸບັນ ແມ່ນມີຫຼາຍໂຄງການເຊັ່ນ: ໂຄງການສາທິດການນຳໃຊ້ນ້ຳມັນກາຊວນຊີວະພາບ; ໂຄງການສຶກສາຄວາມເປັນໄປໄດ້ໃນການສະໜອງພະລັງງານໄຟຟ້າແສງຕາເວັນ ແລະໂຄງການອື່ນໆ.
    ນອກຈາກນັ້ນ, ຍັງມີການຮ່ວມມືທາງດ້ານວິທະຍາສາດ-ເຕັກໂນໂລຊີ, ຂ່າວສານ, ສິລະປະ-ວັດທະນະທຳ, ກົດໝາຍ, ການເກັບກູ້ລະເບີດທີ່ບໍ່ທັງແຕກໃນປາງສົງຄາມ ແລະ ການຮ່ວມມືດ້ານອື່ນໆອີກ. ໃນໂອກາດການຢ້ຽມຢາມ ສປປ ລາວ ຂອງປະທານາທິບໍດີ ມູນແຈອິນ ແຫ່ງ ສ.ເກົາຫຼີ ໃນວັນທີ 5-6 ກັນຍາ ທີ່ຈະມາເຖິງນີ້ ຄາດວ່າສອງປະເທດຈະໄດ້ລົງນາມເອກະສານຮ່ວມມືອີກ 4 ສະບັບ.