ລັດຖະບານ ອອກແຈ້ງການໃຫ້ຫຼາຍພາກສ່ວນ ລົງໄປຊ່ວຍເຫຼືອປະຊາຊົນຜູ້ປະສົບໄພນ້ຳຖ້ວມ


23.09.2019 17:42     

   ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການສະບັບເລກທີ 1522/ຫສນຍ ລົງວັນທີ 4/9/2019 ໃຫ້ກະຊວງແຮງງານ ແລະ ສະຫວັດດີການສັງຄົມ ສົມທົບກັບກຳລັງ ປກຊ-ປກສ ແລະ ພາກສ່ວນກ່ຽວຂ້ອງລົງໄປຊ່ວຍເຫຼືອປະຊາຊົນຜູ້ປະສົບໄພນ້ຳຖ້ວມຢູ່ບັນດາແຂວງພາກໃຕ້, ໃນຂະນະທີ່ຂະແໜງ ຍທຂ ໃຫ້ຕິດຕາມແກ້ໄຂສະພາບເສັ້ນທາງທີ່ເປ່ເພ ບໍ່ໃຫ້ການສັນຈອນຖືກຕັດຂາດຢ່າງເດັດຂາດ.
ແຈ້ງການລະບຸວ່າ: ຫ້ອງວ່າການສຳນັກງານນາຍົກ ລັດຖະມົນຕີ ຂໍຖືເປັນກຽດແຈ້ງການຊີ້ນຳກອງປະຊຸມລັດຖະບານ ມາຍັງທ່ານຊາບດັ່ງນີ້: ເນື່ອງຈາກໃນໄລຍະນີ້ໄດ້ເກີດມີສະພາບຝົນຕົກໜັກໃນຂອບເຂດທົ່ວປະເທດ ໂດຍສະເພາະຢູ່ບັນດາແຂວງພາກໃຕ້ ເຮັດໃຫ້ລະດັບນ້ຳຂອງ ແລະ ບັນດາແມ່ນ້ຳສາຂາຢູ່ເຂດພາກໃຕ້ ໄດ້ຂຶ້ນກາຍເຂດອັນຕະລາຍ ແລະ ມີທ່າອ່ຽງລະດັບນ້ຳຍັງຈະສືບຕໍ່ຂຶ້ນສູງຕື່ມອີກ. ສະນັ້ນ, ຈຶ່ງໃຫ້ບັນດາກະຊວງທີ່ກ່ຽວຂ້ອງ ແລະ ທ້ອງຖິ່ນໃນທົ່ວປະເທດ ສຸມທຸກກຳລັງແຮງ ເພື່ອຕ້ານ ແລະ ແກ້ໄຂໄພນ້ຳຖ້ວມ ທີ່ກຳລັງເກີດຂຶ້ນໃນປັດຈຸບັນ ແລະ ອາດຈະເກີດຂຶ້ນໜັກໜ່ວງໃນໄລຍະລະດູຝົນນີ້, ໃນນີ້ ໃຫ້ເອົາໃຈໃສ່ດັ່ງລຸ່ມນີ້:
1. ໃຫ້ນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດ ມີມາດຕະການຕ່າງໆ ໃນການແກ້ໄຂໄພນ້ຳຖ້ວມທີ່ເກີດຂຶ້ນຢ່າງຮອບດ້ານ ແລະ ທັນການ, ພ້ອມນີ້ ກໍໃຫ້ອອກແຈ້ງການເຕືອນໄປຍັງພໍ່ແມ່ປະຊາຊົນບັນດາເຜົ່າ, ອຳນາດການປົກຄອງເມືອງ ແລະ ອົງການຈັດຕັ້ງທຸກພາກສ່ວນໃນຂອບເຂດທົ່ວປະເທດ ໂດຍສະເພາະບັນດາແຂວງພາກໃຕ້ ຈົ່ງມີສະຕິລະວັງຕົວ ແລະ ເປັນເຈົ້າການໃນການເກັບມ້ຽນ ແລະ ເຄື່ອນຍ້າຍວັດຖຸສິ່ງຂອງ, ສັດລ້ຽງ ໄປໄວ້ບ່ອນສູງ ແລະ ປອດໄພ ເພື່ອໃຫ້ມີຜົນກະທົບໜ້ອຍທີ່ສຸດ.
2. ໃຫ້ກະຊວງແຮງງານ ແລະ ສະຫວັດດີການສັງຄົມ ສົມທົບກັບກຳລັງປ້ອງກັນຊາດ ແລະ ປ້ອງກັນຄວາມສະຫງົບ, ທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ລົງໄປຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ບັນດາແຂວງພາກໃຕ້ ເພື່ອແກ້ໄຂວຽກງານສຸກເສີນຮອບດ້ານ ທີ່ເກີດຂຶ້ນຍ້ອນໄພນ້ຳຖ້ວມໃຫ້ທັນສະພາບການ.
3. ໃຫ້ກະຊວງໂຍທາທິການ ແລະ ຂົນສົ່ງ ສົມທົບກັບບັນດາແຂວງ ຕິດຕາມ ແລະ ແກ້ໄຂສະພາບເສັ້ນທາງເປ່ເພຍ້ອນຜົນກະທົບຈາກໄພນ້ຳຖ້ວມໃຫ້ທັນການ, ເດັດຂາດ ບໍ່ໃຫ້ການສັນຈອນຕັດຂາດ.
4. ໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເປັນເຈົ້າການຕິດຕາມ ແລະ ເຝົ້າລະວັງສະພາບການປ່ຽນແປງດິນຟ້າອາກາດຢ່າງເປັນປົກກະຕິ ແລະ ໃຫ້ມີການອອກແຈ້ງເຕືອນ ແລະ ແນະນຳປະຊາຊົນໃນຂົງເຂດທີ່ມີຄວາມສ່ຽງ ໃຫ້ມີສະຕິ ແລະ ຕິດຕາມການແຈ້ງສະພາບອາກາດເປັນປົກກະຕິ. 5. ໃຫ້ກະຊວງກະສິກຳ ແລະ ປ່າໄມ້ ກະກຽມສະໜັບສະໜູນຊ່ວຍເຫຼືອທາງດ້ານເຕັກນິກວິຊາການ ແລະ ແນວພັນ ເພື່ອໃຫ້ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ສາມາດຟື້ນຟູການຜະລິດ ແລະ ດຳລົງຊີວິດເປັນປົກກະຕິ.
6. ໃຫ້ກະຊວງພະລັງງານ ແລະ ບໍ່ແຮ່ ຊີ້ນຳບັນດາເຂື່ອນໄຟຟ້າ ເປັນເຈົ້າການຕິດຕາມລະດັບນ້ຳ ແລະ ບໍລິຫານຈັດການນ້ຳໃນອ່າງ ຂອງບັນດາເຂື່ອນຕ່າງໆແຕ່ຫົວທີ ເພື່ອຮັບປະກັນການປ່ອຍນ້ຳ ບໍ່ໃຫ້ສົ່ງຜົນກະທົບຕໍ່ປະຊາຊົນ