ສືບຕໍ່ເພີ່ມທະວີສຶກສາອົບຮົມ ແລະ ປຸກລະດົມ ຖັນແຖວນັກຮົບເກົ່າ ຮັກສາມູນເຊື້ອປະຕິວັດ


23.09.2019 17:40     

   ໂດຍປະຕິບັດຕາມມະຕິຕົກລົງຂອງກົມການເມືອງສູນກາງພັກ ສະບັບເລກທີ 68-69/ກມສພ ລົງວັນທີ 9/9/2002 ວ່າດ້ວຍການສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຈຶ່ງໄດ້ກຳນົດເອົາວັນທີ 9/9/2002 ເປັນວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຊຶ່ງປີນີ້ມີອາຍຸຄົບຮອບ 17 ປີ (9/9/2002-2019).
    ສະຫະພັນນັກຮົບເກົ່າແຫ່ງຊາດລາວ ເປັນອົງການຈັດຕັ້ງທາງການເມືອງຂອງພັກ ຊຶ່ງນອນຢູ່ໃນລະບົບການເມືອງແຫ່ງລະບອບໃໝ່ຂອງ ສປປ ລາວ ໂດຍຖືກສ້າງຂຶ້ນຕາມພາລະບົດບາດ ແລະ ຄວາມຮຽກຮ້ອງຕ້ອງການຂອງສັງຄົມ ໃນໄລຍະໃໝ່ ເພື່ອຄຸ້ມຄອງ, ດູແລເບິ່ງແຍງ, ສຶກສາອົບຮົມ ແລະ ເຕົ້າໂຮມຄວາມສາມັກຄີໃນຖັນແຖວພະນັກງານນັກຮົບເກົ່າ ທີ່ອອກພັກຜ່ອນຮັບບຳນານ ແລະ ເປັນພົນລະເມືອງດີ ສ້າງເສດຖະກິດຄອບຄົວຕາມລະບຽບກົດໝາຍຂອງລັດວາງອອກ. ສະຫະພັນມີບົດບາດທຽບເທົ່າກັບອົງການຈັດຕັ້ງການເມືອງຂອງພັກ, ອົງການຈັດຕັ້ງມະຫາຊົນ ແລະ ອົງການທຽບເທົ່າຂັ້ນຕ່າງໆ ເປັນເສນາທິການໃຫ້ແກ່ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ເພື່ອເຕົ້າໂຮມຖັນແຖວພະນັກງານນັກຮົບເກົ່າທີ່ອອກພັກຜ່ອນ, ບຳນານ ແລະ ສ້າງເສດຖະກິດແລ້ວໃຫ້ເຂົ້າຢູ່ໃນອົງການຈັດຕັ້ງຂອງນັກຮົບເກົ່າແຕ່ລະຂັ້ນ. ນອກນີ້ຍັງມີບົດບາດ ໃນການເປັນໃຈກາງໃຫ້ແກ່ຖັນແຖວນັກຮົບເກົ່າກ່ຽວກັບການພົວພັນລະຫວ່າງສາຍຕັ້ງ ແລະ ສາຍຂວາງ, ພົວພັນລະຫວ່າງຂັ້ນລຸ່ມ ແລະ ຂັ້ນເທິງ ເພື່ອປັບປຸງການຈັດຕັ້ງ, ວາງແນວທາງນະໂຍບາຍຕ່າງໆ ແລະ ຂໍ້ກຳນົດກົດລະບຽບ, ກົດໝາຍຂອງນັກຮົບເກົ່າ ເພື່ອໃຫ້ສອດຄ່ອງກັບແນວທາງນະໂຍບາຍຂອງພັກ ໃນແຕ່ລະໄລຍະ ພ້ອມນີ້ ສະຫະພັນແມ່ນມີໜ້າທີ່ສຶກສາອົບ ຮົມການເມືອງນຳພາແນວຄິດໃຫ້ແກ່ຖັນແຖວນັກຮົບເກົ່າທົ່ວປະເທດ ເຕົ້າໂຮມຄວາມສາມັກຄີເປັນປຶກແຜ່ນ, ເປັນພື້ນຖານຄວາມສາມັກຄີປອງດອງ ພາຍໃຕ້ການນຳພາຂອງຄະນະພັກແຕ່ລະຂັ້ນ ເພື່ອໃຫ້ທຸກຄົນສືບຕໍ່ຍົກສູງນ້ຳໃຈຮັກຊາດ, ຮັກລະບອບໃໝ່ ແລະ ຢຶດໝັ້ນອຸດົມການສັງຄົມນິຍົມ, ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງພັກ, ສ້າງລັດ ແລະ ພັດທະນາເສດຖະກິດ-ສັງຄົມໃນແຕ່ລະໄລຍະ. ນອກນີ້ ຍັງມີໜ້າທີ່ປັບປຸງອົງການຈັດຕັ້ງພັກ, ອົງການຈັດຕັ້ງມະຫາຊົນ ແລະ ການຈັດຕັ້ງຄຸ້ມຄອງນັກຮົບເກົ່າແຕ່ລະຂັ້ນໃຫ້ເຕີບໃຫຍ່ເຂັ້ມແຂງຮອບດ້ານ ລວມທັງດ້ານການເມືອງແນວຄິດ ແລະ ການຈັດຕັ້ງປຸກລະດົມຂະບວນການແຂ່ງຂັນຮັກຊາດ ແລະ ສ້າງບ້ານພັດທະນາ ຕິດພັນກັບຂະບວນການແຂ່ງຂັນສ້າງບຸກຄົນ ແລະ ອົງການນັກຮົບເກົ່າ 3 ດີ 6 ຮັກສາ ແລະ ປົກປັກຮັກສາມູນເຊື້ອນັກຮົບເກົ່າໄວ້ຢູ່ຄຽງຄູ່ກັບການປະຕິວັດຕະຫຼອດໄປ.
    ນັກຮົບເກົ່າແມ່ນຜູ້ທີ່ມີຄຸນງາມຄວາມດີຕໍ່ປະເທດຊາດຢ່າງລົ້ນເຫຼືອ, ເປັນຜູ້ທີ່ໄດ້ເສຍສະຫຼະເລືອດເນື້ອ ເພື່ອແລກເອົາຄວາມເປັນເອກະລາດ ແລະ ນຳເອົາຄວາມສົມບູນພູນສຸກມາສູ່ປະຊາຊົນລາວບັນດາເຜົ່າຄືດັ່ງທຸກວັນນີ້ ຍ້ອນຄືແນວນັ້ນ, ຍາມໃດ ພັກ-ລັດຖະບານ ກໍຮູ້ບຸນຄຸນອັນລົ້ນເຫຼືອຕໍ່ພະນັກງານປະຕິວັດຜູ້ທີ່ມີຄຸນງາມຄວາມດີຕໍ່ປະເທດຊາດ ກົມການເມືອງສູນກາງພັກ ຈຶ່ງມອບພາລະບົດບາດໃຫ້ແກ່ອົງການນັກຮົບເກົ່າ ເປັນຜູ້ຄຸ້ມຄອງ, ດູແລເບິ່ງແຍງ, ເຕົ້າໂຮມຄວາມສາມັກຄີ ແລະ ສຶກສາອົບຮົມຖັນແຖວພະນັກງານນັກຮົບເກົ່າ ເພື່ອໃຫ້ເປັນຄັນທຸງ, ເປັນແບບຢ່າງໃຫ້ແກ່ລູກຫຼານຄົນຮຸ່ນໃໝ່ໄດ້ຮຽນຮູ້ ແລະ ສືບທອດມູນເຊື້ອພາລະກິດປະຕິວັດຕະຫຼອດໄປ. ໃນທຸກໆປີ ພວກເຮົາກໍໄດ້ຈັດຕັ້ງສະເຫຼີມສະຫຼອງ ເພື່ອລະນຶກເຖິງວັນກຳເນີດຂອງນັກຮົບເກົ່າດ້ວຍການຈັດຕັ້ງປາຖະກະຖາ, ເລົ່າມູນເຊື້ອ, ໂຄສະນາ ແລະ ໂຮມຊຸມນຸມມິດຕິງ ຢູ່ແຕ່ລະທ້ອງຖິ່ນຢ່າງຟົດຟື້ນ ແລະ ທົ່ວເຖິງ.
    ນັບແຕ່ມື້ສ້າງຕັ້ງອົງການນັກຮົບເກົ່າ ເປັນຕົ້ນມາ ພວກເຮົາກໍໄດ້ຕັ້ງໜ້າປັບປຸງອົງການນັກຮົບເກົ່າແຕ່ລະຂັ້ນໃຫ້ເຕີບໃຫຍ່ເຂັ້ມແຂງຮອບດ້ານ, ເຕົ້າໂຮມເອົາບັນດາພະນັກງານນັກຮົບເກົ່າທົ່ວປະເທດ ເຂົ້າຢູ່ໃນການຈັດຕັ້ງແຕ່ລະຂັ້ນ, ເອົາອົງການນັກຮົບເກົ່າເປັນບ່ອນດຳເນີນຊີວິດການເມືອງ, ເປັນບ່ອນສຶກສາອົບຮົມ ແລະ ເຕົ້າໂຮມຄວາມສາມັກຄີ ໂດຍພາຍໃຕ້ການນຳພາຂອງຄະນະພັກແຕ່ລະຂັ້ນ ອັນໄດ້ເຮັດໃຫ້ຖັນແຖວນັກຮົບມີຄວາມເບີກບານມ່ວນຊື່ນ ແລະ ເພິ່ງພໍໃຈຕໍ່ພັກ-ລັດ, ສືບຕໍ່ເປັນຄັນທຸງ, ເປັນແບບຢ່າງອັນດີໃຫ້ແກ່ລູກຫຼານຮຸ່ນສືບທອດ ກ່ຽວກັບທາດແທ້ປະຕິວັດ ແລະ ຄວາມຈົງຮັກພັກດີຕໍ່ປະເທດຊາດ, ຕໍ່ລະບອບໃໝ່ ແລະ ອຸດົມການສັງຄົມນິຍົມ.
    ນັບແຕ່ມື້ສ້າງຕັ້ງສະຫະພັນນັກຮົບເກົ່າແຫ່ງຊາດລາວເປັນຕົ້ນມາແມ່ນປະກອບມີ ຄະນະພັກ, ຄະນະບໍລິຫານງານ 4 ສະໄໝ ນັບທັງສະໄໝແຕ່ງຕັ້ງບົ່ງຕົວ ແລະ ເປີດກອງປະຊຸມໃຫຍ່ເປັນທາງການຄື: ສະໄໝແຕ່ງຕັ້ງບົ່ງຕົວຄັ້ງທຳອິດແມ່ນທ່ານ ພົນໂທ ນະຄອນ ສີສະນົນ ເປັນປະທານສະຫະພັນນັກຮົບເກົ່າແຫ່ງຊາດລາວ ແລະ ປະກອບມີຄະນະບໍລິຫານງານ 13 ທ່ານ. ກອງປະຊຸມໃຫຍ່ຂອງຄະນະບໍລິຫານງານນັກຮົບເກົ່າທົ່ວປະເທດ ຄັ້ງທີ I ໄດ້ຈັດຂຶ້ນຄັ້ງວັນທີ 10-12/11/2005 ໂດຍເລືອກຕັ້ງເອົາທ່ານ ພົນໂທ ນະຄອນ ສີສະນົນ ເປັນປະທານ ແລະ ປະກອບມີຄະນະບໍລິຫານງານ 25 ທ່ານ. ກອງປະຊຸມໃຫຍ່ຜູ້ແທນສະຫະພັນນັກຮົບເກົ່າ ສະໄໝທີ II ໄດ້ຈັດຂຶ້ນໃນວັນທີ 23-25/2/2010 ໂດຍເລືອກຕັ້ງເອົາທ່ານ ພົ/ວ ສົມພອນ ແກ້ວມີໄຊ ເປັນປະທານສະຫະພັນ ແລະ ປະກອບມີຄະນະບໍລິຫານງານ 27 ທ່ານ. ກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດ ສະໄໝທີ III ໄດ້ຈັດຂຶ້ນໃນວັນທີ 21-22/9/2015 ໂດຍເລືອກຕັ້ງເອົາ ທ່ານ ພົ/ວ ສົມພອນ ແກ້ວມີໄຊ ເປັນປະທານສະຫະພັນ ແລະ ປະກອບມີຄະນະບໍລິຫານງານ 25 ທ່ານ. ສະຫະພັນນັກຮົບເກົ່າແຫ່ງຊາດລາວ ຍັງໄດ້ເຂົ້າເປັນສະມາຊິກນັກຮົບເກົ່າອາຊຽນ ໃນວັນທີ 12/9/2012.
    ເພື່ອເສີມຂະຫຍາຍມູນເຊື້ອ ແລະ ຜົນງານຂອງນັກຮົບເກົ່າປະຕິວັດທີ່ສ້າງມາໄດ້ ໃນແຕ່ລະໄລຍະນັ້ນ ສະຫະພັນນັກຮົບເກົ່າແຫ່ງຊາດລາວ ຈົ່ງສືບຕໍ່ເພີ່ມທະວີສຶກສາອົບຮົມການເມືອງ ນຳພາແນວຄິດ-ປຸກລະດົມຖັນແຖວນັກຮົບເກົ່າ ຮັກສາມູນເຊື້ອປະຕິວັດເປັນແບບຢ່າງອັນດີໃຫ້ແກ່ລູກຫຼານຮຸ່ນສືບທອດປ່ຽນແທນ; ປັບປຸງການຈັດຕັ້ງຂອງສະຫະພັນນັກຮົບເກົ່າແຕ່ລະຂັ້ນ ໃຫ້ມີຄວາມເຂັ້ມແຂງ ແລະ ມີຄຸນນະພາບ; ປຸກລະດົມສະມາຊິກນັກຮົບເກົ່າທຸກຄົນ ເພີ່ມທະວີວຽກງານສ້າງເສດຖະກິດ-ການຜະລິດຂອງຄອບຄົວ ແລະ ລວມໝູ່ ໂດຍປະຕິບັດຕາມມູນເຊື້ອເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ແລະ ຫັນເປັນເສດຖະກິດ ສິນຄ້າແກ້ໄຂຄວາມທຸກຍາກໃຫ້ຫຼຸດລົງເທື່ອລະກ້າວ; ສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຮອບດ້ານກັບສະມາຄົມນັກຮົບເກົ່າຕ່າງປະເທດຢ່າງກວ້າງຂວາງ ໂດຍສະເພາະແມ່ນນັກຮົບເກົ່າອາຊຽນ ແລະ ປະເທດເພື່ອນມິດຍຸດທະສາດໃຫ້ແໜ້ນແຟ້ນກວ່າເກົ່າອອກແຮງປຸກລະດົມຂະບວນການຕ່າງໆຢ່າງກວ້າງຂວາງ ໂດຍສະເພາະແມ່ນຊຸກຍູ້ຂະບວນການແຂ່ງຂັນ 3 ດີ 6 ຮັກສາ ຢ່າງແຂງແຮງ.
(ໂດຍ: ມິງໂກ)