ເອົາໃຈໃສ່ພິຈາລະນາແກ້ໄຂຄະດີໃຫ ້ວ່ອງໄວ ໂປ່ງໃສ ຖືກຕ້ອງ ແລະ ຮັບປະກັນ ຄວາມຍຸຕິທຳ ໃນສັງຄົມ


23.09.2019 16:32     

   ຫຼາຍແຫ່ງໄດ້ຈັດຕັ້ງປາຖະກະຖາຫວນຄືນມູນເຊື້ອວັນສ້າງຕັ້ງສານປະຊາຊົນ ຊຶ່ງວັນສຳຄັນດັ່ງກ່າວໄດ້ກຳນົດເອົາວັນທີ 15 ສິງຫາ ໂດຍປີນີ້ ມີອາຍຸຄົບຮອບ 37 ປີ (15/8/1982-15/8/2019).
ສານປະຊາຊົນແມ່ນອົງການຕຸລາການ ຊຶ່ງມີພາລະບົດ ບາດ, ສິດ ແລະ ໜ້າທີ່ ໃນການພິຈາລະນາຕັດສິນຄະດີ ແນໃສ່ສຶກສາອົບຮົມພົນລະເມືອງໃຫ້ມີນ້ຳໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ປົກປັກຮັກສາ ແລະ ເສີມຂະຫຍາຍໝາກຜົນຂອງການປະຕິວັດ, ປົກປັກຮັກສາສິດຜົນປະໂຫຍດອັນຊອບທຳຂອງພົນລະເມືອງ, ຮັບປະກັນຄວາມຍຸຕິທຳ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ເພີ່ມທະວີນິຕິກຳ, ກຳຈັດ ແລະ ສະກັດກັ້ນການລະເມີດກົດໝາຍ.
ພາຍຫຼັງປະເທດຊາດໄດ້ຮັບການປົດປ່ອຍ ຊຶ່ງໃນເບື້ອງຕົ້ນບໍ່ມີການຈັດຕັ້ງຂອງສານປະຊາຊົນ ແຕ່ການເຄື່ອນໄຫວດຳເນີນຕັດສິນຄະດີ ແມ່ນຂຶ້ນກັບກະຊວງຍຸຕິທຳ ໂດຍອີງໃສ່ສະພາບການຂະຫຍາຍຕົວທາງດ້ານເສດຖະກິດ ແລະ ສັງຄົມ ທີ່ຕ້ອງເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍໃຫ້ມີຄວາມໜັກແໜ້ນ ແລະ ເຂັ້ມແຂງເທື່ອລະກ້າວ. ຄະນະປະຈຳສະພາປະຊາຊົນສູງສຸດ ຊຸດທີ I ຈຶ່ງໄດ້ຕົກລົງສ້າງຕັ້ງສານປະຊາຊົນຂຶ້ນຢ່າງເປັນຮູບປະທຳ ໃນວັນທີ 15 ສິງຫາ 1982 ຊຶ່ງເອີ້ນວ່າ: "ສານສູງສຸດ". ຈາກນັ້ນ ກໍໄດ້ປ່ຽນຊື່ສານສູງສຸດ ມາເປັນ "ສານປະຊາຊົນສູງສຸດ" ເຖິງທຸກວັນນີ້.
ການປັບປຸງການຈັດຕັ້ງ ແລະ ການດຳເນີນຄະດີຂອງສານປະຊາຊົນແຕ່ລະໄລຍະ ເຮັດໃຫ້ການຈັດຕັ້ງຂອງສານປະຊາຊົນ ມີການປ່ຽນແປງ, ເຕີບໃຫຍ່ຂະຫຍາຍຕົວ ແລະ ພັດທະນາຂຶ້ນ ຢ່າງບໍ່ຢຸດຢັ້ງ ຊຶ່ງມາຮອດປັດຈຸບັນການຈັດຕັ້ງຂອງສານປະຊາຊົນ ໃນທົ່ວປະເທດ ປະກອບດ້ວຍສານປະຊາຊົນສູງສຸດ 1 ແຫ່ງ, ສານປະຊາຊົນພາກ 3 ແຫ່ງ, ສານປະຊາຊົນແຂວງ ແລະ ນະຄອນຫຼວງ 18 ແຫ່ງ, ສານປະຊາຊົນເຂດມີ 43 ແຫ່ງ ແລະ ສານທະຫານ ມີ 4 ແຫ່ງ.
ບົນເສັ້ນທາງແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງສານປະຊາຊົນແມ່ນໄດ້ຜ່ານຜ່າຄວາມຫຍຸ້ງຍາກ, ສັບສົນລະອິດລະອ້ຽວ ແລະ ສິ່ງທົດສອບ, ທ້າທາຍຫຼາຍປະການ ໃນການປະຕິບັດໜ້າທີ່ວຽກງານ ເພື່ອປະກອບສ່ວນເຂົ້າໃນການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ເສດຖະກິດມີການຂະຫຍາຍຕົວ, ສັງຄົມມີຄວາມສາມັກຄີປອງດອງ ແລະ ຍຸຕິທຳ.
ກອງປະຊຸມໃຫຍ່ ຄັ້ງທີ X ຂອງພັກ ໄດ້ຕີລາຄາວ່າ: ຂົງເຂດວຽກງານຕຸລາການ (ສານປະຊາຊົນ, ໄອຍະການປະຊາຊົນ) ແລະ ຂະແໜງຍຸຕິທຳ ໄດ້ເອົາໃຈໃສ່ປະຕິບັດບົດບາດ, ໜ້າທີ່ໃນການປະຕິບັດກົດໝາຍ ເຮັດໃຫ້ສັງຄົມມີຄວາມຍຸຕິທຳ; ໄດ້ເອົາໃຈໃສ່ປັບປຸງການຈັດຕັ້ງ, ກໍ່ສ້າງພະນັກງານ ແລະ ຍົກລະດັບຖັນແຖວບຸກຄະລາກອນ ໃນຂົງເຂດດັ່ງກ່າວຢ່າງຕັ້ງໜ້າ ເຮັດໃຫ້ການພິຈາລະນາແກ້ໄຂຄະດີຕ່າງໆມີຄວາມວ່ອງໄວ, ພາວະວິໄສ, ຖືກຕ້ອງ ແລະ ເປັນທຳຫຼາຍຂຶ້ນກວ່າເກົ່າ. ອັນພົ້ນເດັ່ນໄດ້ຕັ້ງໜ້າສົ່ງເສີມໃຫ້ສັງຄົມຮຽນຮູ້ກົດໝາຍ, ສ້າງສະຕິເຄົາລົບກົດໝາຍ ແລະ ເຂົ້າເຖິງຂະບວນຍຸຕິທຳ, ໄດ້ສົມທົບວຽກງານຍຸ ຕິທຳ ແລະ ວຽກງານ 3 ສ້າງດ້ວຍການເປີດຮຽນບຳລຸງກົດໝາຍໃຫ້ພະນັກງານຢູ່ທ້ອງຖິ່ນຮາກຖານຫຼາຍຂຶ້ນ, ໂຄສະນາອົບຮົມກົດໝາຍດ້ວຍຫຼາຍຮູບການຢູ່ຂັ້ນບ້ານ, ສ້າງບ້ານ ແລະ ຄອບຄົວຕົວແບບປອດຄະດີ, ປັບປຸງໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ, ເອົາໃຈໃສ່ວຽກງານຍຸຕິທຳເດັກ, ສ້າງຕູ້ກົດໝາຍໃຫ້ບ້ານ, ບຳລຸງກົດໝາຍໄລຍະສັ້ນ 45 ວັນ ໃຫ້ແກ່ພະນັກງານຫຼັກແຫຼ່ງຂັ້ນແຂວງ ແລະ ຂັ້ນເມືອງ.
ໃນປີ 2018 ຜ່ານມາ, ໄດ້ສຳເລັດການສ້າງຕັ້ງສານປະຊາຊົນເຂດ 3 ຢູ່ເມືອງກວັນ ແຂວງຫົວພັນ; ສົ່ງຜູ້ພິພາກສາລົງຮາກຖານແກ້ໄຂຄະດີຢູ່ສານແຂວງ, ສານເຂດທີ່ຂາດຜູ້ພິພາກສາ, ມີຄະດີຫຍຸ້ງຍາກ ແລະ ອັ່ງອໍຫຼາຍ; ອອກນິຕິກຳລຸ່ມກົດໝາຍຈຳນວນໜຶ່ງ ເພື່ອເຮັດໃຫ້ການເຄື່ອນໄຫວຕັດສິນຄະດີມີຄວາມວ່ອງໄວຍິ່ງຂຶ້ນ; ໄດ້ເອົາໃຈໃສ່ບຳລຸງສ້າງພະນັກງານຂອງສານທາງດ້ານທິດສະດີການເມືອງ-ການປົກຄອງ; ຍົກລະດັບວິຊາການໃຫ້ພະນັກງານຂອງສານດ້ວຍຮູບການຝຶກອົບຮົມສຳມະນາ ໃນຫົວຂໍ້ຕ່າງໆກ່ຽວກັບກົດໝາຍ ແລະ ວຽກບໍລິຫານ ຢູ່ພາຍໃນ ແລະ ຕ່າງປະເທດ; ເອົາໃຈໃສ່ປັບປຸງກົນໄກ, ແບບແຜນວິທີການດຳເນີນຄະດີຢູ່ສານໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທຳໃນສັງຄົມ. ໃນໄລຍະດັ່ງກ່າວ ການແກ້ໄຂຄະດີຢູ່ສານຂັ້ນຕົ້ນໄດ້ 71,80% (ແຜນການກຳນົດໄວ້ 85%). ຄະດີທີ່ເຂົ້າມາສານຂັ້ນຕົ້ນຫຼາຍກວ່າໝູ່ຄື: ຄະດີອາຍາແມ່ນບັນຫາຢາເສບຕິດມີ 1.650 ກວ່າເລື່ອງ ກວມ 48,07% ຂອງຄະດີອາຍາທັງໝົດ ແລະ ຄະດີແພ່ງແມ່ນສັນຍາກູ້ຢືມມີ 320 ກວ່າເລື່ອງ ກວມ 28,81% ຂອງຄະດີແພ່ງທັງໝົດ. ການແກ້ໄຂຄະດີຢູ່ສານຂັ້ນອຸທອນໄດ້ 64,47% (ແຜນການກຳນົດໄດ້ 85%). ອັດຕາການຂໍລຶບລ້າງ 45,33%.
ເພື່ອສືບຕໍ່ເສີມຂະຫຍາຍມູນເຊື້ອ ແລະ ຜົນງານທີ່ຍາດມາໄດ້ນັ້ນ ຈົ່ງສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ກ່ຽວກັບການຈັດຕັ້ງປະຕິບັດວຽກງານສານປະຊາຊົນ ໃຫ້ປະກົດເປັນຈິງ ເປັນຕົ້ນສືບຕໍ່ບູລະນະການຈັດຕັ້ງສານປະຊາຊົນ ໃຫ້ເປັນລະບົບຄົບຊຸດ, ໜັກແໜ້ນເຂັ້ມແຂງ ເພື່ອບໍລິຫານສານ ກໍຄືບໍລິຫານຄະດີໃຫ້ມີຄຸນນະພາບ ແລະ ປະສິດທິພາບສູງ, ສອດຄ່ອງກັບການພັດທະນາເສດຖະກິດ-ສັງຄົມ ໃນໄລຍະໃໝ່ ແລະ ເຊື່ອມໂຍງເທື່ອລະກ້າວ. ເອົາໃຈໃສ່ເປັນພິເສດຕໍ່ການພັດທະນາບຸກຄະລາກອນຂອງສານທາງດ້ານຈຳນວນ ແລະ ຄຸນນະພາບດ້ວຍການຖືສຳຄັນການສຶກສາອົບ ຮົມສ້າງຄຸນທາດການເມືອງ ຄຸນສົມບັດສິນທຳປະຕິວັດ, ຈັນຍາ ທຳຈັນຍາບັນໄປຄຽງຄູ່ກັນ, ສ້າງເງື່ອນໄຂໃຫ້ເຂົາເຈົ້າໄດ້ຮັບ ການກໍ່ສ້າງ, ບຳລຸງຍົກລະດັບຄວາມຮູ້ດ້ານວິຊາສະເພາະ, ວິ ຊາການ, ທິດສະດີການເມືອງ-ການປົກຄອງ, ແນວທາງຂອງພັກ ແລະ ຄວາມສາມາດໃນການພິຈາລະນາແກ້ໄຂຄະດີໃຫ້ມີຄວາມວ່ອງໄວ ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທຳໃນສັງຄົມ; ໃຫ້ມີພື້ນຖານວັດຖຸເຕັກນິກທີ່ທັນສະໄໝສາມາດປະຕິບັດພາລະບົດບາດ, ໜ້າທີ່ໃນການປົກປ້ອງກົດໝາຍໃຫ້ມີຄວາມສັກສິດ, ເຂັ້ມງວດ ແລະ ຍຸຕິທຳ. ເພີ່ມທະວີບົດບາດຄຸ້ມຄອງມະຫາພາກຂອງສານປະຊາຊົນສູງສຸດ ໃນການສ້າງ ແລະ ປັບປຸງກົດໝາຍ, ອອກນິຕິກຳລຸ່ມກົດໝາຍ ເພື່ອໃຫ້ສານປະຊາຊົນທຸກຂັ້ນປະຕິບັດເປັນເອກະພາບ, ຍົກສູງຄຸນນະພາບໃນການພິຈາລະນາຕັດສິນ ແລະ ພິພາກສາຄະດີ 3 ຂັ້ນ (ຂັ້ນຕົ້ນ, ອຸທອນ ແລະ ລຶບລ້າງ) ຂອງສານໃຫ້ມີຄວາມວ່ອງໄວ, ພາວະວິໄສ, ຖືກຕ້ອງ ແລະ ເປັນທຳ ຕາມຄຳຂວັນທີ່ວ່າ: "ຮອບຄອບ, ມີວິໄນ, ວິນິດໄສຈະແຈ້ງ, ຕັດສິນເປັນທຳ, ນຳໄປປະຕິບັດໄດ້".
(ໂດຍ: ມິງໂກ)