ພັກ ລັດ ແລະ ຄົນລາວທົ່ວປະເທດ ສະແດງ ຄວາມເປັນຫ່ວງ ແລະ ໃຫ້ການຊ່ວຍເຫຼືອ ຕໍ່ຜູ້ຖືກໄພນ້ຳຖ້ວມ


23.09.2019 15:07     

   ພໍຮັບຮູ້ຂ່າວກ່ຽວກັບປະຊາຊົນລາວ ບັນດາເຜົ່າຢູ່ 6 ແຂວງພາກກາງ ແລະ ພາກໃຕ້ຂອງປະເທດເຮົາ ຊຶ່ງປະກອບມີ ຄຳມ່ວນ, ສະຫວັນນະເຂດ, ອັດຕະປຶ, ສາລະວັນ, ເຊກອງ ແລະ ຈຳປາສັກ ທີ່ໄດ້ຮັບຜົນກະທົບໄພນ້ຳຖ້ວມຈາກພາຍຸໝຸນເຂດຮ້ອນໂພດູນ ແລະ ລົມພາຍຸດີເປຣເຊິນ, ພັກ, ລັດກໍຄືປະຊາຊົນລາວທົ່ວທັງປະເທດກໍໄດ້ສະແດງຄວາມເປັນຫວ່ງເປັນໃຍ ແລະໄດ້ຮີບຮ້ອນໃຫ້ການຊວ່ຍເຫຼືອຕໍ່ຜູ້ໄດ້ຮັບຜົນກະທົບຢ່າງສຸດຄວາມສາມາດ.
ທ່ານ ທອງລຸນ ສີສຸລິດ ນາຍົກລັດຖະມົນຕີກໍໄດ້ຈັດກອງປະຊຸມດ່ວນ ໃນຕອນເຊົ້າຂອງວັນທີ 5/9/2019 ເພື່ອປຶກສາຫາລືແກ້ໄຂໄພພິບັດນ້ຳຖ້ວມຢູ່ 6 ແຂວງດັ່ງກ່າວ ເພື່ອກອບກູ້ເອົາຊີວິດ ແລະ ຊັບສິນຂອງປະຊາຊົນໃຫ້ປອດໄພ. ກອງປະ ຊຸມໄດ້ຕົກລົງມາດຕະການແກ້ໄຂສຸກເສີນ ໂດຍສະເພາະການຊ່ວຍເຫຼືອປະຊາຊົນທີ່ຍັງຕິດຄ້າງຢູ່ບ່ອນນ້ຳຖ້ວມ ແລະ ແບ່ງຄວາມຮັບຜິດຊອບໃຫ້ແຕ່ລະຂະແໜງການກ່ຽວຂ້ອງໄປຊ່ວຍເຫຼືອໃຫ້ທັນການດ້ວຍການຮີບຮ້ອນນຳໃຊ້ທຸກພາຫະນະ, ວັດຖຸອຸປະກອນຮັບໃຊ້ເທົ່າທີ່ມີເຊັ່ນ: ຍົນ, ເຮືອ, ລົດ, ເຄື່ອງອຸ ປະໂພກ-ບໍລິໂພກ ແລະ ງົບປະມານໃຫ້ແກ່ບັນດາແຂວງທີ່ໄດ້ຮັບຜົນກະທົບຢ່າງຮີບດ່ວນ.
ໃນມື້ຕໍ່ມາທ່ານນາຍົກລັດຖະມົນຕີເອງກໍໄດ້ລົງເຄື່ອນໄຫວ ພົບປະໂອ້ລົມສະແດງຄວາມເຫັນໃຈຕໍ່ພໍ່ແມ່ປະຊາຊົນ ແລະ ຊຸກຍູ້ການແກ້ໄຂໄພນ້ຳຖ້ວມເປັນເວລາຫຼາຍວັນຢູ່ 6 ແຂວງ ທີ່ຖືກໄພນ້ຳຖ້ວມ. ນອກນັ້ນການນຳຂັ້ນສູງບໍ່ວ່າຈະເປັນປະທານສະພາແຫ່ງຊາດ, ຮອງນາຍົກລັດຖະມົນຕີ, ບັນດາການນຳທຸກກະຊວງ, ອົງການຈັດຕັ້ງມະຫາຊົນ ແລະ ພາກສ່ວນຕ່າງໆຂອງສັງຄົມໄດ້ຮ່ວມແຮງຮ່ວມໃຈເປັນໜຶ່ງດຽວຢ່າງເປັນຂະບວນລົງໄປຮອດໄປເຖິງ ແລະ ເຂົ້າຮ່ວມຊ່ວຍເຫຼືອປະຊາຊົນທີ່ຜູ້ໄດ້ຮັບຜົນກະທົບຈາກໄພນ້ຳຖ້ວມຄັ້ງນີ້. ນອກນັ້ນທີ່ຫ້ອງວ່າການສຳນັກງານນາຍົກລັດຖະມົນຕີ,ກະຊວງແຮງງານສະຫວັດດີການ ແລະ ສັງຄົມ, ສຳນັກງານປົກຄອງນະຄອນຫຼວງວຽງຈັນ, ບັນດາແຂວງ, ອົງການຈັດຕັ້ງມະຫາຊົນ ແລະ ບັນດາກະຊວງຕ່າງໆກໍໄດ້ຕັ້ງສູນບໍລິການຮັບການຊວ່ຍເຫຼືອຈາກປະຊາຊົນ, ພະນັກງານແລະພາກສວ່ນຕ່າງໆ ເພື່ອຊວ່ຍເຫຼືອຜູ້ໄດ້ຮັບຜົນກະທົບຈາກໄພນ້ຳຖວ້ມປີ 2019.
ຢ່າງໃດກໍຕາມ, ກໍຍັງມີຄົນທີ່ບໍ່ຫວັງດີຕໍ່ປະເທດຊາດ ແລະ ປະຊາຊົນເຮົາ. ໂຄສະນາບິດເບືອນໃສ່ຮ້າຍປ້າຍສີພັກ ແລະ ລັດເຮົາຜ່ານສື່ສັງຄົມອອນລາຍບໍ່ຖືກກັບຄວາມເປັນຈິງອອກຂ່າວ, ໂດຍຂາດເຫດຜົນ.
ນັກຂ່າວໜັງສືພິມປະຊາຊົນກໍຄືສື່ມວນຊົນລາວພາກສ່ວນອື່ນໆທີ່ລົງໄປເກາະຕິດສະຖານະການຢູ່ 6 ແຂວງດັ່ງກ່າວໄດ້ກີ້ງເກືອກລີເລືອຢູ່ນຳກຳລັງກອງທັບ, ກຳລັງປ້ອງກັນຄວາມສະຫງົບ ແລະ ປະຊາຊົນຜູ້ໄດ້ຮັບຜົນກະທົບຕ່າງກໍໃຫ້ຄຳເຫັນວ່າຜູ້ໄດ້ຮັບຜົນກະທົບລ້ວນແຕ່ໄດ້ຮັບການຊ່ວຍເຫຼືອບັນເທົາທຸກຈາກພັກ ແລະ ລັດເຮົາ ພ້ອມທັງຝາກຄວາມຂອບໃຈຜ່ານສື່ມວນຊົນມາຍັງທຸກພາກສ່ວນຂອງສັງຄົມທີ່ໃຫ້ການຊ່ວຍເຫຼືອ, ໂດຍສະເພາະແມ່ນອ້າຍນ້ອງທະຫານກອງທັບປະຊາຊົນລາວທີ່ໃຫ້ການຊວ່ຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມໄດ້ມີບ່ອນຢູ່ທີ່ປອດໄພ, ມີອາຫານການກິນ ແລະ ເຄື່ອງນຸ່ງຫົ່ມຢ່າງທັນເຫດການ.
ດ້ວຍຄວາມເປັນຈິງທັງໝົດຂ້າງເທິງນັ້ນ ແມ່ນສິ່ງທີ່ບໍ່ມີເຫດຜົນອັນໃດ ສຳລັບໃຜໆທີ່ຈະອ້າງວ່າລັດຖະບານຂາດການເອົາໃຈໃສ່ ນອກຈາກຜູ້ມີຈຸດປະສົງ ແລະ ເຈດຕະນາປັ່ນປ່ວນໃຫ້ສັງຄົມສັບສົນເຂົ້າໃຈຜິດຕໍ່ພັກ-ລັດເຮົາເທົ່ານັ້ນ.
(ໂດຍ: ລູກເຂົ້າໜຽວ)