ທຸກສິ່ງຢ່າງ ເພື່ອປະຊາຊົນ


23.09.2019 14:08     

   ລະບອບປະຊາທິປະໄຕ ປະຊາຊົນ ເວົ້າອີກຢ່າງໜຶ່ງກໍແມ່ນລະບອບໃໝ່ຂອງພວກເຮົາແມ່ນມາຈາກປະຊາຊົນ ໂດຍປະຊາຊົນ ແລະ ເພື່ອປະຊາຊົນ; ເພາະສະນັ້ນທຸກສິ່ງຢ່າງແມ່ນເພື່ອປະຊາຊົນ. ຍ້ອນແນວນັ້ນ, ພັກ ແລະ ລັດ ຈຶ່ງໄດ້ສຸມທຸກທຶນຮອນມະຫາສານເຂົ້າໃນການພັດທະນາເສດຖະກິດໃຫ້ຂະຫຍາຍຕົວຕໍ່ເນື່ອງ, ວັດທະນະທຳ-ສັງຄົມໃຫ້ມີການຫັນປ່ຽນທີ່ຕັ້ງໜ້າ, ດ້ານຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປົວແປງໃຫ້ດີຂຶ້ນໄປເລື້ອຍໆທັງດ້ານວັດຖຸ ແລະ ຈິດໃຈ.
ຈາກຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ມາຮອດກາງປີ 2019 ກໍຊີ້ໃຫ້ເຫັນວ່າ: ຄວາມທຸກຍາກຂອງປະຊາຊົນລາວບັນດາເຜົ່າໄດ້ມີຈໍານວນຫຼຸດລົງເປັນລໍາດັບ, ເດັກນ້ອຍລາວໃນເກນອາຍຸໄດ້ເຂົ້າຮຽນ, ການບໍລິການດ້ານສາທາລະນະສຸກ ໂດຍສະເພາະແມ່ນມີຖົງຢາ ແລະ ສຸກສາລາປະຈໍາບ້ານ. ດ້ານການພັດທະນາເສດຖະກິດຍັງສືບຕໍ່ຂະຫຍາຍຕົວ ໃນລະດັບ 6,5% ຊຶ່ງຖືວ່າເປັນອັດຕາການເຕີບໂຕທີ່ສູງ ເມື່ອທຽບກັບຫຼາຍປະເທດໃນພາກພື້ນ.
ຢັ້ງຢືນໄດ້ວ່າ: ຕະຫຼອດໄລຍະທີ່ຜ່ານມາ ພາຍໃຕ້ລະ ບອບໃໝ່, ພາຍໃຕ້ການຊີ້ນຳ ແລະ ນໍາພາຂອງພັກ ປປ ລາວ, ລັດຖະບານ ກໍຄືອົງການປົກຄອງທ້ອງຖິ່ນໄດ້ເອົາໃຈໃສ່ປະຕິບັດພາລະບົດບາດຄຸ້ມຄອງມະຫາພາກ, ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຕາມກົດໝາຍ, ສ້າງສະພາບແວດລ້ອມທີ່ສະຫງົບສຸກ, ສ້າງເງື່ອນໄຂເອື້ອອໍານວຍໃຫ້ແກ່ການທໍາມາຫາກິນຂອງປະຊາຊົນລາວບັນດາເຜົ່າ, ທັງສ້າງຄວາມເຊື່ອໝັ້ນໃຫ້ນັກລົງທຶນ, ຜູ້ປະກອບການທັງພາຍໃນ ແລະ ຕ່າງປະເທດ, ຮັບປະກັນໃຫ້ການຈັດຕັ້ງປະຕິບັດແນວທາງປ່ຽນແປງໃໝ່ກໍຄືການເຊື່ອມໂຍງກັບພາກພື້ນ ແລະ ສາກົນໄດ້ຢ່າງເປັນເຈົ້າການ ທັງໝົດນັ້ນແມ່ນບໍ່ມີຈຸດປະສົງອື່ນໃດ, ນອກຈາກທຸກສິ່ງທຸກຢ່າງ ເພື່ອປະຊາຊົນ, ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລ.
    ຢ່າງໃດກໍຕາມ, ຜູ້ບໍ່ຫວັງດີຍາມໃດກໍຍັງແມ່ນຜູ້ບໍ່ຫວັງດີຕໍ່ປະເທດຊາດ ແລະ ປະຊາຊົນເຮົາ. ພວກເຂົາຍາມໃດກໍຂຸດຄົ້ນເປົ່າຂ່າວອະກຸສົນ, ເອົາເລື່ອງບໍ່ມີມູນຄວາມຈິງຜ່ານສື່ສັງ ຄົມອອນລາຍ ເພື່ອປັ່ນປ່ວນສັງຄົມ ໂດຍສະເພາະຕໍ່ບັນຫາແກ້ໄຂໄພພິບັດນ້ຳຖ້ວມຢູ່ 6 ແຂວງພາກກາງ ແລະ ພາກໃຕ້, ພັກ ແລະ ລັດໄດ້ສຸມທຸກກໍາລັງແຮງ, ກໍາລັງຊັບລົງຊ່ວຍເຫຼືອພໍ່ແມ່ປະຊາຊົນແຕ່ຫົວທີ ໂດຍສະເພາະແມ່ນອ້າຍນ້ອງ ໃນກໍາລັງປ້ອງກັນຊາດ, ກຳລັງປ້ອງກັນຄວາມສະຫງົບໄດ້ສົມທົບກັບອໍານາດການປົກຄອງຂັ້ນບ້ານ, ເມືອງ ແລະ ແຂວງ, ຕະລຸມບອນເຂົ້າຊ່ວຍເຫຼືອທັງເວັນ ແລະ ຄືນຢ່າງມີຄວາມຮັບຜິດຊອບເຮັດໃຫ້ປະຊາຊົນຜູ້ໄດ້ຮັບຜົນກະທົບໄດ້ຮັບຄວາມປອດໄພ, ມີທີ່ພັກອາໄສ, ມີອາຫານ, ນ້ຳດື່ມ, ເຄື່ອງນຸ່ງຫົ່ມ, ຢາປົວພະຍາດ, ທັງໄດ້ຮັບການດູແລຢ່າງໃກ້ຊິດຈາກແພດ, ໝໍ, ອຳນາດການປົກຄອງທຸກຂັ້ນເປັນຢ່າງດີ ແຕ່ຜູ້ບໍ່ຫວັງດີກໍຫຼັບຕາເວົ້າວ່າ ພວກເຮົາບໍ່ຊ່ວຍເຫຼືອປະຊາຊົນທີ່ຖືກໄພນ້ຳຖ້ວມ.
    ກໍລະນີ ນາງ ໝ້ວຍ ປະຊາຊົນ ແຂວງຈໍາປາສັກ ທີ່ຖືກສວຍໃຊ້ຈາກບຸກຄົນບໍ່ຫວັງດີທີ່ ກ່າວໂຈມຕີພັກ ແລະ ລັດເຮົາຜ່ານສື່ສັງຄົມອອນລາຍວ່າ: ບໍ່ເຂົ້າໄປຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມນັ້ນ, ສຸດທ້າຍ ນາງ ໝ້ວຍ ກໍຍອມຮັບສາລະພາບວ່າ ຕົນເອງຖືກຫຼອກໃຫ້ກາຍເປັນເຄື່ອງມືຂອງຄົນບໍ່ຫວັງດີ ກ່າວໂຈມຕີປະເທດຊາດຂອງຕົນເອງຢ່າງບໍ່ຮູ້ສຶກຕົວ.
     ຜູ້ຂຽນຄິດວ່າ ພວກເຮົາຄົນລາວນໍາກັນ ໃນສະພາບມີຜູ້ຖືກຜົນກະທົບຈາກໄພທໍາມະຊາດ ບໍ່ຄວນຫູເບົາເຊື່ອງ່າຍ ຈາກການເປົ່າຂ່າວອະກຸສົນບໍ່ມີມູນຄວາມຈິງວ່າ ຄົນລາວບໍ່ຊ່ວຍກັນ, ຄົນລາວທົ່ວປະເທດລ້ວນແຕ່ໄດ້ອວ່າຍໜ້າມາໃສ່ 6 ແຂວງພາກກາງ ແລະ ພາກໃຕ້ ເພື່ອສາມັກຄີລະດົມທຸກກໍາລັງແຮງ, ກໍາລັງໃຈ, ວັດຖຸສິ່ງຂອງທຶນຮອນເຂົ້າຊ່ວຍຜູ້ປະສົບໄພນ້ຳຖ້ວມ ໃນຄັ້ງນີ້ໃຫ້ພົ້ນຈາກຄວາມທຸກຢ່າງໄວວາ. ດັ່ງຄຳເຫັນຂອງທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະທານສະມາຄົມນັກຂ່າວ ແຫ່ງ ສປປ ລາວ ໄດ້ກ່າວວ່າ: ນັບແຕ່ມື້ຝົນຕົກແຮງຈົນຮອດມື້ຝົນລິນຫຼາຍວັນເກີດໄພນ້ຳຖ້ວມ, ສື່ມວນຊົນຫຼັກປະກອບມີວິທະຍຸກະຈາຍສຽງແຫ່ງຊາດ, ໂທລະພາບແຫ່ງຊາດ, ໜັງສືພິມປະຊາຊົນ, ຂ່າວສານປະເທດລາວ, ໜັງສືພິມພາສາຕ່າງປະເທດ ໄດ້ຮ່ວມກັບສື່ມວນຊົນຂະແໜງການເຊັ່ນ: ໜັງສືພິມກອງທັບ, ສື່ຂອງກຳລັງປ້ອງກັນຄວາມສະຫງົບ ສົມທົບກັບນັກຂ່າວແຂວງ ແລະ ເມືອງລົງສະໜາມລາຍງານຂ່າວສົດໄວທັນໃຈຜ່ານສື່ສັງຄົມອອນລາຍ, ດີຈີຕອນທີ່ເປັນສື່ທາງການຂອງປະເທດເຮົາ. ສຳຄັນສື່ພວກເຮົາໄດ້ສອດແຊກການລາຍງານຂ່າວການເຄື່ອນໄຫວຕອບໂຕ້ ແລະ ແກ້ໄຂຜົນຮ້າຍຂອງໄພພິບັດໃນແຕ່ລະດ້ານ, ແຕ່ລະໄລຍະ ເພາະວ່ານັບແຕ່ທ່ານນາຍົກລັດຖະມົນຕີໄດ້ເປີດກອງປະຊຸມດ່ວນທຸກກຳລັງຢູ່ສູນກາງໄດ້ຈັດຕັ້ງກັນລົງໄປປະຕິບັດໂດຍທັນທີ, ໃນນັ້ນໄດ້ລະດົມທຸກກຳລັງຊັບ, ກຳລັງພົນ, ວັດຖຸສິ່ງຂອງລົງໄປໃຫ້ການເບິ່ງແຍງ, ກອບກູ້ເອົາຊັບສິນ, ຊັບສົມບັດ, ຊີວິດຂອງປະຊາຊົນຢູ່ໃນເຂດໄພພິບັດ.
ຢັ້ງຢືນໄດ້ວ່າ: ນັບແຕ່ມື້ນັ້ນຮອດມື້ນີ້, ສື່ມວນຊົນຂອງພວກເຮົາມີຄວາມໄວ ໃນການລາຍງານຂ່າວໃຫ້ທົ່ວສັງຄົມກໍຄື ຕ່າງປະເທດໄດ້ເຂົ້າໃຈ ແລະ ຮັບຮູ້ຢ່າງຖືກຕ້ອງ ຊຶ່ງພັກ, ລັດ, ທຸກຂະແໜງການ, ທຸກການຈັດຕັ້ງຂອງພວກເຮົາໄດ້ຮ່ວມກັນແກ້ບັນຫາໄພພິບັດທີ່ຂົ່ມຂູ່ປະຊາຊົນທີ່ຖືກໄພນ້ຳຖ້ວມຄັ້ງນີ້ຢູ່ 6 ແຂວງພາກກາງ ແລະ ພາກໃຕ້ໄດ້ຢ່າງຈິງຈັງ ແລະ ມີຜົນສຳ ເລັດແທ້.
(ໂດຍ: ລູກເຂົ້າໜຽວ)