ຢ່າເຊື່ອຄຳປ່າວຂ່າວອະກຸສົນ ຂອງຄົນບໍ່ຫວັງດີ ຕໍ່ປະເທດຊາດ ແລະ ປະຊາຊົນ


25.09.2019 9:13     

   ຜ່ານເສັ້ນທາງເກືອບ 44 ປີແຫ່ງການປົກປັກຮັກສາ ແລະ ສ້າງສາລະບອບໃໝ່ ພາຍໃຕ້ການຊີ້ນຳ ແລະ ນຳພາຂອງພັກ ປປ ລາວ, ຜົນສໍາເລັດອັນສໍາຄັນ ແລະ ເປັນພື້ນຖານກວ່າໝູ່ແມ່ນຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄວ້ໄດ້ຢ່າງໝັ້ນຄົງ, ລະບອບປະຊາທິປະໄຕ ປະຊາຊົນ ມີສະຖຽນລະພາບອັນໜັກແໜ້ນ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ ໂດຍພື້ນຖານຜົນສຳເລັດອັນພົ້ນ ເດັ່ນທີ່ເປັນໜ້າພາກພູມໃຈແມ່ນການພັດທະນາເສດຖະກິດ ຍັງສືບຕໍ່ຂະຫຍາຍຕົວໃນລະດັບສູງ, ເມື່ອທຽບໃສ່ຫຼາຍປະ ເທດໃນພາກພື້ນ. ຂົງເຂດວັດທະນະທຳ-ສັງຄົມກໍໄດ້ຮັບການ ຂະຫຍາຍຕົວທັງໃນດ້ານປະລິມານ ແລະ ຄຸນນະພາບ, ຜົນ ສຳເລັດເຫຼົ່ານັ້ນໄດ້ຍົກຖານະບົດບາດ ແລະ ອິດທິພົນຂອງ ສປປ ລາວ ໄດ້ຮັບການເຊີດຊູສູງເດັ່ນຂຶ້ນກວ່າເກົ່າ ໃນເວທີພາກພື້ນ ແລະ ສາກົນ. ສັງລວມໄດ້ວ່າມາຮອດປັດຈຸບັນນີ້ ໂສມໜ້າຂອງປະເທດຊາດໄດ້ມີການປ່ຽນແປງຢ່າງໃຫຍ່ຫຼວງ, ບໍ່ວ່າຢູ່ໃນຕົວ ເມືອງກໍຄືຊົນນະບົດລ້ວນແຕ່ໄດ້ມີການສ້າງສາພັດທະນາ, ລະ ບົບການເມືອງມີຄວາມເຂັ້ມແຂງ ແລະ ໜັກແໜ້ນ, ສັງຄົມມີຄວາມສາມັກຄີປອງດອງ, ມີຄວາມສະຫງົບສຸກ ແລະ ເປັນລະບຽບຮຽບຮ້ອຍໂດຍພື້ນຖານ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນບັນດາເຜົ່າໄດ້ຮັບການປົວແປງໃຫ້ດີຂຶ້ນກວ່າເກົ່າ. ທົ່ວປວງຊົນລາວທັງຊາດ ສາມາດເວົ້າເປັນສຽງດຽວກັນດ້ວຍຄວາມເອກອ້າງທະນົງໃຈວ່າ: ບໍ່ມີຍຸກໃດສະໄໝໃດທີ່ປະເທດຊາດຂອງພວກເຮົາຈະມີຄວາມສະຫງົບ ແລະ ໄດ້ມີການພັດທະນາຄືໃນຍຸກທີ່ມີພັກເຮົານຳພາຄືສູ່ມື້ນີ້.
ຢ່າງໃດກໍຕາມ, ອິດທິກໍາລັງປໍລະປັກ ແລະ ພວກຄົນບໍ່ຫວັງດີຕໍ່ປະເທດຊາດ ແລະ ປະຊາຊົນເຮົາ, ຍາມໃດພວກເຂົາກໍບໍ່ລົດລະຄວາມພະຍາຍາມໃນການໂຄສະນາບິດເບືອນໃສ່ຮ້າຍປ້າຍສີ ແລະ ທໍາລາຍຄວາມສະຫງົບສຸກຂອງລະບອບໃໝ່ຂອງພວກເຮົາ. ເວົ້າສະເພາະໃນສະພາບທີ່ປະຊາຊົນ 6 ແຂວງພາກກາງ ແລະ ພາກໃຕ້ຖືກໄພພິບັດນ້ຳຖ້ວມ, ນອກຈາກຄົນບໍ່ຫວັງດີບໍ່ໄດ້ຊ່ວຍຫຍັງແລ້ວ ພວກເຂົາຍັງປ່າວຂ່າວອະກຸສົນຕ່າງໆນາໆ. ເພາະສະນັ້ນເວລານີ້ ຍິ່ງກວ່າເວລາໃດໝົດທີ່ທຸກຄົນພາຍໃນຊາດ ຕ້ອງມີສະຕິລະວັງຕົວ ໃນການຮັບຮູ້ຂໍ້ມູນຂ່າວສານຜ່ານສື່ສັງຄົມອອນລາຍ, ເຟສບຸກ, ເວັບໄຊໃຫ້ຖືກຕ້ອງ ໂດຍສະເພາະຕ້ອງໄດ້ຮັບຮູ້ຂໍ້ມູນຂ່າວສານຈາກສື່ຂອງລັດເປັນຫຼັກ.
ທ່ານພັນເອກ ສິງຄຳ ພິມມະວົງ ຫົວໜ້າຫ້ອງການບໍລິຫານກົມໃຫຍ່ການເມືອງກອງທັບ ຜູ້ທີ່ໄດ້ຮັບການມອບໝາຍຈາກກົມໃຫຍ່ການເມືອງກອງທັບ ລົງເຄື່ອນໄຫວເກັບກຳຂໍ້ມູນສະພາບນ້ຳຖ້ວມຢູ່ບັນດາແຂວງ ທີ່ຖືກຜົນກະທົບໄດ້ກ່າວເມື່ອບໍ່ດົນມານີ້ວ່າ: ກຳລັງກະຊວງປ້ອງກັນປະເທດແມ່ນພາກສ່ວນທຳອິດທີ່ເຂົ້າໄປເຖິງ ແລະ ໃຫ້ການຊ່ວຍເຫຼືອຜູ້ທີ່ປະສົບໄພນ້ຳຖ້ວມກ່ອນໝູ່ ແລະ ຢືນຢັນວ່າທຸກພາກສ່ວນໄດ້ເປັນຈິດໜຶ່ງໃຈດຽວກັນໃນການກອບກູ້ຊ່ວຍເຫຼືອ ແລະ ຟື້ນຟູໄພພິບັດໃນຄັ້ງນີ້. ເພາະສະນັ້ນຕໍ່ກັບສື່ສັງຄົມອອນລາຍຂອງຜູ້ບໍ່ຫວັງດີ ໄດ້ອອກຂ່າວບິດເບືອນໃສ່ຮ້າຍປ້າຍສີ ໂດຍອ້າງວ່າມີສຽງຈົ່ມຈາກຜູ້ປະ ສົບໄພ ບໍ່ໄດ້ຮັບການຊ່ວຍເຫຼືອຈາກຂັ້ນເທິງ ແມ່ນບໍ່ມີມູນຄວາມຈິງ. ທ່ານກ່າວຕື່ມອີກວ່າ: ຄະນະຮັບຜິດຊອບທີ່ກ່ຽວຂ້ອງທຸກຂັ້ນ ໄດ້ມີຄວາມຮັບຜິດຊອບສູງຕໍ່ການຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດນ້ຳຖ້ວມຢ່າງທັນການ, ພ້ອມໄດ້ລາຍງານສະພາບຕ່າງໆໃຫ້ຂັ້ນເທິງໄດ້ຮັບຊາບຢ່າງຕໍ່ເນື່ອງ ພ້ອມນັ້ນກໍມີການຕິດຕາມ ແລະ ລາຍງານສະພາບດິນຟ້າອາກາດ, ລະດັບນ້ຳ ໃຫ້ປະຊາຊົນໄດ້ຮັບຊາບຜ່ານສື່ມວນຊົນ ແລະ ໂທລະໂຄ່ງປະຈຳແຕ່ລະບ້ານ.
ມາຮອດປັດຈຸບັນ, ເຖິງແມ່ນວ່ານ້ຳໄດ້ບົກແຫ້ງລົງ, ປະຊາ ຊົນທີ່ໄດ້ຮັບຜົນກະທົບໄດ້ຮັບການຊ່ວຍເຫຼືອໃນທຸກດ້ານ, ແຕ່ທຸກການຈັດຕັ້ງ ພວມສືບຕໍ່ກຳນົດແຜນການໃນການຊ່ວຍເຫຼືອໃນຂັ້ນຕໍ່ໄປ ລວມທັງການປັບປຸງພື້ນຖານໂຄງລ່າງ, ຖະໜົນຫົນ ທາງ, ໄຟຟ້າ, ນ້ຳປະປາ, ນ້ຳລິນ, ໂຮງໝໍ, ໂຮງຮຽນ, ບ່ອນຢູ່ອາໄສ, ບ່ອນທຳການຜະລິດຖາວອນ ແລະ ຄວາມຕ້ອງການອື່ນໆ.
ໂດຍ: ລູກເຂົ້າໜຽວ