ທົ່ວປະເທດ ສືບຕໍ່ບໍລິຈາກຊ່ວຍເຫຼືອຜູ້ປະສົບໄພນ້ຳຖ້ວມ


26.09.2019 9:31     

   ນັບແຕ່ມື້ເລີ່ມມີເຫດການບໍ່ຄາດຄິດເກີດຂຶ້ນຄືໄພພິບັດນ້ຳຖ້ວມຢູ່ 6 ແຂວງພາກກາງ ແລະ ພາກໃຕ້ປະເທດເຮົາ. ການນໍາຂັ້ນສູງສຸດກໍໄດ້ຮີບຮ້ອນລົງໄປເຖິງບ່ອນເກີດເຫດ ເພື່ອໃຫ້ກໍາລັງໃຈ ແລະ ຊ່ວຍເຫຼືອເບື້ອງຕົ້ນຕໍ່ຜູ້ປະສົບເຄາະຮ້າຍ ພ້ອມນັ້ນທຸກພາກສ່ວນຂະແໜງການກໍໄດ້ລົງໄປສົມທົບຊ່ວຍເຫຼືອ. ຢ່າງໃດກໍຕາມເຫດການທີ່ເກີດຂຶ້ນໄດ້ນໍາເອົາຄວາມເສຍຫາຍບໍ່ສະເພາະແຕ່ປະຊາຊົນ, ຫາກລວມໄປເຖິງພາກສ່ວນລັດຕື່ມອີກເພາະຕ້ອງໄດ້ໃຊ້ທຶນມະຫາສານໃນການປົວແປງຄືນໃໝ່ຖະໜົນຫົນທາງ, ໄຟຟ້າ, ນ້ຳປະປາ, ໂຮງໝໍ, ໂຮງຮຽນ, ບ່ອນທໍໍາການຜະລິດ, ທີ່ຢູ່ອາໄສ ບ່ອນທີ່ຖືກຜົນກະທົບໃຫ້ກັບຄືນສູ່ສະພາບປົກກະຕິ. ເວົ້າສະເພາະທຶນຊ່ວຍເຫຼືອປະຊາຊົນໃຫ້ມີອາຫານ, ການກິນ, ທີ່ຢູ່ອາໄສຖາວອນກໍຕ້ອງໄດ້ນໍາໃຊ້ທຶນຢ່າງຫຼວງຫຼາຍເຊັ່ນດຽວກັນ ຊຶ່ງລໍາພັງແຕ່ລັດແບກຫາບຝ່າຍດຽວກໍພົບຄວາມຫຍຸ້ງຍາກ ແລະ ໄດ້ຮຽກຮ້ອງມາຍັງທຸກພາກສ່ວນຂອງສັງຄົມ ແລະ ຜູ້ມີນ້ຳໃຈມະນຸດສະທໍາທັງຢູ່ພາຍໃນ ແລະ ຕ່າງປະເທດປະກອບສ່ວນຊ່ວຍເຫຼືອກັນ, ຜ່ານການລະດົມທຶນເຫັນວ່າຫຼາຍພາກສ່ວນໃຫ້ການຮ່ວມມື, ອີງຕາມແຫ່ຼງຂ່າວຂອງໜັງສືພິມເສດຖະກິດການຄ້າສະບັບລົງວັນທີ 24/9/2019 ທີ່ເອົາແຫຼ່ງຂ່າວມາຈາກກະຊວງແຮງງານ ແລະ ສະຫວັດດີການສັງຄົມ (ຮສສ) ໃຫ້ຮູ້ວ່າ: ຜ່ານການລະດົມບໍລິຈາກຊ່ວຍເຫຼືອຜູ້ປະສົບເຄາະຮ້າຍຈາກໄພພິບັດ (ນ້ຳຖ້ວມ) ປີ 2019 ນັບແຕ່ວັນທີ 7-19 ກັນຍາ ຜ່ານມາ ສັງລວມມີ 41 ພາກສ່ວນ, ໃນນັ້ນມອບຜ່ານກະຊວງ ຮສສ 37 ພາກສ່ວນລວມເປັນເງິນ 8,27 ຕຶ້ກີບ 232.000 ໂດລາ, ເງິນບາດຈໍານວນໜຶ່ງ. ອີກ 4 ພາກສ່ວນແມ່ນມອບຜ່ານຫ້ອງວ່າການສໍານັກງານນາຍົກລັດຖະມົນຕີລວມເປັນເງິນ 4 ຕື້ກີບ ແລະ 18.000 ໂດລາ. ສ່ວນບັນດາບໍລິສັດທີ່ຍົກປ້າຍມອບເງິນບໍລິຈາກຜ່ານ ຫສນຍ ແຕ່ຍັງບໍ່ທັນໄດ້ຮັບເງິນຈາກ 4 ພາກສ່ວນລວມເງິນ 4 ຕື້ກິີບ ແລະ 180.000 ໂດລາ. ພິເສດແຂວງຜົ້ງສາລີຕັ້ງຢູ່ເໜືອສຸດຂອງປະເທດເຮົາເຖິງຈະທຸກຍາກ ແຕ່ກໍບໍ່ໄດ້ແລ້ງນ້ຳໃຈໄດ້ນໍາເອົາເງິນ 100 ລ້ານກີບ ທີ່ໄດ້ຈາກການປະກອບສ່ວນຈາກທຸກພາກສ່ວນລັດ, ເອກະຊົນ, ປະຊາຊົນພາຍໃນແຂວງ ມາມອບຜ່ານການນໍາກະຊວງ ຮສສ ໄປຊ່ວຍຜູ້ປະສົບໄພນ້ຳຖ້ວມປີ 2019 ໂດຍແມ່ນເຈົ້າແຂວງເອງນຳມາມອບ. ຈາກການລະດົມທຶນບໍ່ຮອດເດືອນ ຕີລາຄາໄດ້ວ່າທຸກພາກສ່ວນໃຫ້ການຮ່ວມມື ແລະ ມີຄວາມຈິງໃຈຢາກຊ່ວຍເຫຼືອປະຊາຊົນຜູ້ຖືກປະສົບເຄາະຮ້າຍຈາກໄພນ້ຳຖ້ວມປີ 2019 ແທ້ ຊຶ່ງເປັນການຕອກຢໍ້າຄືນຕໍ່ບຸກຄົນບໍ່ຫວັງດີທີ່ນຳໃຊ້ສື່ສັງຄົມອອນລາຍກ່າວໂຈມຕີພັກ, ລັດ ແລະ ປະຊາຊົນ ເຮົາວ່າບໍ່ມີການຊ່ວຍເຫຼືອຕໍ່ຜູ້ຖືກໄພນ້ຳຖ້ວມໃນຄັ້ງນີ້. ທ່ານ ນາງ ໃບຄຳ ຂັດທິຍະ ຮອງລັດຖະມົນຕີ ກະຊວງ ຮສສ ກໍໄດ້ມີຄໍາເຫັນວ່າ: ພາຍຫຼັງທີ່ເກີດເຫດມີໄພນ້ຳຖ້ວມ, ການນໍາກະຊວງ ຮສສ ໄດ້ຮັບມອບໝາຍຈາກລັດຖະບານໃນການຈັດຕັ້ງປະຕິບັດຕາມພາລະບົດບາດຂອງກະຊວງ, ມາຮອດປັດຈຸບັນກໍຍັງສືບຕໍ່ຂົນສົ່ງເຄື່ອງພ້ອມທັງສະໜອງງົບປະມານທີ່ຈຳເປັນຢ່າງຮີບດ່ວນໃຫ້ກັບບັນດາ 6 ແຂວງພາກກາງ ແລະ ພາກໃຕ້ ເປັນຕົ້ນເງິນສົດ, ເຄື່ອງອຸປະໂພກ, ບໍລິໂພກ. ນີ້ແມ່ນການຊ່ວຍເຫຼືອໄລຍະການບັນເທົາທຸກ, ການຊ່ວຍເຫຼືອສຸກເສີນ ແລະ ໃນຕໍ່ໜ້າແມ່ນໄລຍະຂອງການຊ່ວຍເຫຼືອຟື້ນຟູຍິ່ງຕ້ອງການທຶນຫຼາຍ ເພື່ອຟື້ນຟູຊີວິດການເປັນຢູ່, ພື້ນຖານໂຄງລ່າງ ແລະ ຟື້ນຟູທາງດ້ານວິຊາຊີບຄືນໃໝ່. ຮຽກຮ້ອງມາຍັງທຸກພາກສ່ວນໃນສັງຄົມ, ຜູ້ໃຈບຸນທັງພາຍໃນ ແລະ ຕ່າງປະເທດ ສືບຕໍ່ໃຫ້ການຊ່ວຍເຫຼືອປະຊາຊົນຜູ້ຖືກຜົນກະທົບຈາກໄພນ້ຳຖ້ວມ ແນໃສ່ເຮັດໃຫ້ພວກເຂົາເຈົ້າໄດ້ມີຊີວິດການເປັນຢູ່ທີ່ດີຂຶ້ນກວ່າເກົ່າ. (ໂດຍ: ລູກເຂົ້າໜຽວ)