ເຊື່ອໝັ້ນຕໍ່ການນຳພາຂອງພັກ-ລັດ ໃນການຟື້ນຟູ ຊີວິດການເປັນຢູ່ຂອງປະຊາຊົນເຂດປະສົບໄພ ນ້ຳຖ້ວມ ເຂົ້າສູ່ສະພາບປົກກະຕິ


09.10.2019 8:51     

   ໃນປີ 2019 ນີ້, ສປປ ລາວ ໄດ້ຮັບຜົນກະທົບຈາກໄພພິບັດທຳມະຊາດເກີດຂຶ້ນ ເປັນຕົ້ນໄພພິບັດນ້ຳຖ້ວມ, ລົມພາຍຸພັດ, ຟ້າຜ່າ, ດິນເຈື່ອນ, ໄຟໄໝ້, ສັດຕູພືດທຳລາຍຜົນລະປູກ ຊຶ່ງໄດ້ສົ່ງຜົນກະທົບໂດຍກົງຕໍ່ປະຊາຊົນ.
ສະເພາະໄພພິບັດນ້ຳຖ້ວມທີ່ເກີດຂຶ້ນໃນທ້າຍເດືອນສິງຫາ-ຕົ້ນເດືອນກັນຍາ 2019 ຢູ່ບັນດາແຂວງພາກກາງ ແລະ ພາກໃຕ້ ຈຳນວນ 6 ແຂວງຄື: ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ຊຶ່ງໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນຢ່າງຫຼວງຫຼາຍ ໃນ 47 ເມືອງ, 1.655 ບ້ານ, 169.916 ຄອບຄົວ, 546.000 ກວ່າຄົນ, ມີຜູ້ເສຍຊີວິດ 18 ຄົນ ແລະ ສູນຫາຍ 1 ຄົນ. ປະຊາຊົນທີ່ຖືກຍົກຍ້າຍມີ 10.000 ກວ່າຄອບຄົວ, 39.000 ກວ່າຄົນ. ຜ່ານການປະເມີນມູນຄ່າເສຍຫາຍຂອງທີມປະເມີນຜົນເສຍຫາຍເບື້ອງຕົ້ນໃນ 5 ແຂວງມີ 1.000 ຕື້ກວ່າກີບ.
ຜົນກະທົບຈາກໄພນ້ຳຖ້ວມ ໃນປີ 2019 ແມ່ນໜັກໜ່ວງສຳລັບບັນດາແຂວງພາກກາງ ແລະ ພາກໃຕ້ ຊຶ່ງເຮັດໃຫ້ມີຜົນກະທົບເປັນບໍລິເວນກວ້າງ ແລະ ເສຍຫາຍທາງດ້ານຊີວິດ, ຊັບສິນ, ພື້ນຖານໂຄງລ່າງ ແລະ ພື້ນຖານການຜະລິດຢ່າງໜັກໜ່ວງ.
ຕໍ່ສະພາບການດັ່ງກ່າວ, ພັກ ແລະ ລັດຖະບານ ກໍໄດ້ເອົາໃຈໃສ່ຊີ້ນຳຢ່າງໃກ້ຊິດ ແລະ ບັນດາກະຊວງທີ່ກ່ຽວຂ້ອງ, ກຳລັງ ປກສ-ປກຊ, ບັນດາແຂວງ ແລະ ອົງການຊ່ວຍເຫຼືອສັງຄົມຕ່າງໆ ກໍໄດ້ສຸມທຸກກຳລັງແຮງ, ພາຫະນະ ແລະ ວັດຖຸອຸປະກອນເຂົ້າໄປຊ່ວຍເຫຼືອປະຊາຊົນທີ່ໄດ້ຮັບຜົນກະທົບຢ່າງທັນການ ຊຶ່ງສາມາດຫຼຸດຜ່ອນຄວາມເສຍຫາຍທາງດ້ານຊີວິດ ແລະ ຊັບສິນໄດ້ດີສົມຄວນ. ໃນວັນທີ 16/9/2019 ທີ່ສຳນັກງານນາຍົກລັດຖະມົນຕີ ລັດຖະບານໄດ້ຈັດກອງປະຊຸມ ເພື່ອປຶກສາຫາລືການແກ້ໄຂໄພພິບັດນ້ຳຖ້ວມໃນທົ່ວປະເທດ ປີ 2019 ຊຶ່ງກອງປະຊຸມດັ່ງກ່າວ ໄດ້ຊີ້ນຳໃຫ້ບັນດາຂະແໜງການ ແລະ ທ້ອງຖິ່ນຈັດຕັ້ງປະຕິບັດເນື້ອໃນຈິດໃຈ ມະຕິກອງປະຊຸມຄັ້ງນີ້ ໃຫ້ປະກົດຜົນເປັນຈິງ. ປັດຈຸບັນ ບັນດາອົງການຈັດຕັ້ງທັງສູນກາງ ແລະ ທ້ອງຖິ່ນ ກໍໄດ້ຕັ້ງໜ້າເອົາໃຈໃສ່ປະຕິບັດເນື້ອໃນຈິດໃຈ ມະຕິກອງປະຊຸມດັ່ງກ່າວ ຕາມພາລະບົດບາດໜ້າທີ່ຂອງຕົນທີ່ຮັບຜິດຊອບອັນໄດ້ເຮັດໃຫ້ວຽກງານສຶກສາ, ວຽກງານຄົມມະນາຄົມ, ກະສິກຳ, ສາທາ, ສະຫວັດດີການສັງຄົມ, ວຽກງານປ້ອງກັນຄວາມສະຫງົບ ແລະ ອື່ນໆ ແມ່ນໄດ້ຮັບການຈັດຕັ້ງປະຕິບັດເປັນຢ່າງດີ. ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ຖະແຫຼງຕໍ່ສື່ມວນຊົນຄັ້ງວັນທີ 1/10/2019 ວ່າ: ລັດຖະບານອະນຸມັດເງິນໃຫ້ເບື້ອງຕົ້ນຈຳນວນ 5 ຕື້ກີບ ນຳໄປຊ່ວຍເຫຼືອ ແລະ ມອບໃຫ້ບັນດາແຂວງທີ່ຖືກຜົນກະທົບຈາກໄພພິບັດນ້ຳຖ້ວມໃນຄັ້ງນີ້ ລວມທັງໄດ້ມອບເງິນໃນບ້ວງກອງທຶນແຮນ້ຳມັນສຸກເສີນໃຫ້ບັນດາແຂວງ ລວມທັງໝົດ 450 ລ້ານກີບ ເພື່ອນຳໃຊ້ເຂົ້າໃນການບໍລິຫານຂົນສົ່ງເຄື່ອງຊ່ວຍເຫຼືອບັນເທົາທຸກໄປໃຫ້ຜູ້ປະສົບໄພພິບັດ. ນອກນີ້ ຍັງມີວັດຖຸອຸປະກອນເຄື່ອງຊ່ວຍເຫຼືອຕ່າງໆ ເພື່ອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກຜົນກະທົບຢູ່ບັນດາແຂວງເຊັ່ນ: ເຕັ້ນນອນຄອບຄົວ 220 ຊຸດ, ນ້ຳດື່ມ 3.000 ກວ່າແພັກ, ເຄື່ອງໃຊ້ຄົວເຮືອນ 1.500 ກວ່າຊຸດ, ເຄື່ອງອຸປະໂພກ ແລະ ບໍລິໂພກ ມູນຄ່າ 1 ຕື້ກີບ. ເຄື່ອງຄົວເຮືອນຈາກສູນຊ່ວຍເຫຼືອດ້ານມະນຸດສະທຳອາຊຽນ ຈຳນວນ 81.000 ກວ່າໂດລາ ແລະ ໄດ້ແຈກຢາຍເຂົ້າ ເພື່ອຊ່ວຍເຫຼືອປະຊາຊົນ ຈຳນວນ 5.000 ກວ່າໂຕນ ນັບແຕ່ວັນທີ 7-23 ກັນຍາ 2019 ກໍໄດ້ມີຫຼາຍພາກສ່ວນທີ່ເຂົ້າມາໃຫ້ການຊ່ວຍເຫຼືອ ທັງເປັນເງິນ ແລະ ເຄື່ອງອຸປະໂພກ ແລະ ບໍລິໂພກ ຊຶ່ງມາຮອດວັນທີ 27/9/2019 ລວມມູນຄ່າ 10 ຕື້ກວ່າກີບ, 500.000 ໂດລາ… ໜັງສືພິມປະເທດລາວ ສະບັບວັນທີ 1/10/2019 ໄດ້ລາຍງານວ່າ: ປັດຈຸບັນ ບັນດາໂຮງຮຽນທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ ຈຳນວນ 741 ແຫ່ງ ໄດ້ເປີດການຮຽນ-ການສອນ ເປັນປົກກະຕິແລ້ວ ພາຍຫຼັງໄດ້ໂຈະການຮຽນ-ການສອນ ເນື່ອງຈາກນ້ຳຖ້ວມຂັງ. ພ້ອມນີ້ ກະຊວງສຶກສາທິການ ແລະ ກິລາ ກະກຽມສົ່ງສັງກະສີ, ປຶ້ມແບບຮຽນ, ປຶ້ມຄູ່ມືຄູ, ອຸປະກອນການຮຽນ, ກະດານດຳ, ສື່ການຮຽນ-ການສອນ ທີ່ຈຳເປັນອື່ນໆ ສະໜອງໃຫ້ໂຮງຮຽນທີ່ຖືກຜົນກະທົບ ເພື່ອໃຫ້ສາມາດດຳເນີນການສອນໄດ້. ໜັງສືພິມເສດຖະກິດ-ສັງຄົມ ສະບັບວັນທີ 25/9/2019 ໄດ້ລາຍງານວ່າ: ຂະແໜງໂຍທາທິການ ແລະ ຂົນສົ່ງ ໄດ້ຮັບຜົນເສຍຫາຍຢ່າງຫຼວງຫຼາຍ ຊຶ່ງປະກອບມີທາງຫຼວງແຫ່ງຊາດ, ທາງຫຼວງທ້ອງຖິ່ນຂອງ 16 ແຂວງ ລວມມີ 600 ກວ່າຕອນທາງ, ຄວາມຍາວ 10.000 ກວ່າກິໂລແມັດ ລວມມູນຄ່າເສຍຫາຍ 900 ຕື້ກວ່າກີບ. ໃນນີ້ ໄດ້ແກ້ໄຂສຸກເສີນ ເພື່ອລະບາຍການສັນຈອນແລ້ວ 230 ຕື້ກວ່າກີບ ແລະ ຍັງຕ້ອງການ ເພື່ອສ້ອມແປງ ແລະ ຟື້ນຟູເສັ້ນທາງໃຫ້ກັບຄືນສະພາບເດີມ ຈຳນວນ 600 ຕື້ກວ່າກີບ. ນອກນີ້ ໜັງສືພິມເສດຖະກິດ-ສັງຄົມ ສະບັບວັນທີ 18/9/2019 ໄດ້ລາຍງານວ່າ: ຂະແໜງກະສິກຳ ແລະ ປ່າໄມ້ ກໍໄດ້ຮັບຜົນກະທົບຢ່າງໜັກໜ່ວງ ໂດຍສະເພາະເນື້ອທີ່ປູກເຂົ້າ, ພືດ ແລະ ສັດລ້ຽງທຸກປະເພດ ຊຶ່ງເນື້ອທີ່ການຜະລິດຖືກເສຍຫາຍໃນເບື້ອງຕົ້ນມີປະມານ 1,6 ແສນເຮັກຕາ ເພື່ອແກ້ໄຂເບື້ອງຕົ້ນ ກະຊວງກະສິກຳ ແລະ ປ່າໄມ້ ໄດ້ເລັ່ງໃສ່ການຟື້ນຟູ ໂດຍກຳນົດການແກ້ໄຂເປັນ 4 ເຂດຄື: ສຳລັບເຂດເນື້ອທີ່ຍັງບໍ່ໄດ້ຖືກຖ້ວມ ແມ່ນໃຫ້ເອົາໃຈໃສ່ເຝົ້າລະວັງສັດ, ພືດ ທີ່ຈະເຂົ້າມາທຳລາຍຜົນຜະລິດ. ສ່ວນເຂດທີ ສອງ ເປັນເຂດທີ່ຖ້ວມ ແຕ່ຍັງບໍ່ຕາຍ (ຖ້ວມໄລຍະ 5-21 ວັນ) ແມ່ນສາມາດບູລະນະຮັກສາ ໂດຍສົ່ງວິຊາການລົງສົມທົບກັບປະຊາຊົນ ເອົາໃຈໃສ່ສຳຫຼວດຕົ້ນເຂົ້າຂາດຝຸ່ນໃຫ້ໃສ່ຝຸ່ນຄືນ. ເຂດພື້ນທີ່ທີ ສາມ ເປັນເຂດນ້ຳຖ້ວມຂັງ ແຕ່ສາມາດລະບາຍນ້ຳໄດ້ແມ່ນໃຫ້ເລັ່ງລະບາຍນ້ຳອອກ ພ້ອມທັງໃຫ້ເຝົ້າລະວັງສັດຕູພືດຈະມາທຳລາຍຜົນຜະລິດ. ເຂດທີ ສີ່ ທີ່ເປັນເຂດເສຍຫາຍ 100% ແມ່ນຈະເລັ່ງໃສ່ເກັບກຳຂໍ້ມູນພື້ນທີ່ເສຍຫາຍ ຊຶ່ງຈະສຸມໃສ່ປູກພືດທົດແທນ ຫຼື ເຮັດນາຕ່າວສຳລັບພື້ນທີ່ທີ່ເໝາະສົມ. ສຳລັບແນວພັນເຂົ້າ ແລະ ພືດ ທີ່ຈະສະໜອງໃຫ້ກັບບັນດາແຂວງທີ່ໄດ້ຮັບຜົນກະທົບ ແມ່ນມີພຽງພໍ. ປັດຈຸບັນ ປະຊາຊົນບາງເຂດທ້ອງຖິ່ນ ທີ່ປະສົບໄພນ້ຳຖ້ວມ ກໍໄດ້ຮັບແນວພັນເຂົ້າປູກ ເປັນຕົ້ນປະຊາຊົນບ້ານນາໂພຈະເລີນ ເມືອງສາລະວັນ ແຂວງສາລະວັນ ໄດ້ຮັບແນວພັນເຂົ້າປູກຈຳນວນ 2,5 ໂຕນ. ສ່ວນແຂວງເຊກອງ ກໍໄດ້ກຽມແນວພັນເຂົ້າ ຈຳນວນ 3,5 ໂຕນ ເພື່ອການຜະລິດນາແຊງ ໃນເນື້ອທີ່ 500 ກວ່າເຮັກຕາ.
ຕໍ່ກັບເຫດການໄພພິບັດນ້ຳຖ້ວມປີນີ້, ບັນດາຜູ້ນຳຂອງບັນດາປະເທດເພື່ອນມິດ ກໍໄດ້ສົ່ງສານສະແດງຄວາມເຫັນໃຈເຖິງຜູ້ນຳພັກ-ລັດເຊັ່ນ: ຫວຽດນາມ, ຈີນ, ໄທ, ມາເລເຊຍ ຊຶ່ງເນື້ອໃນສານຕ່າງກໍໄດ້ເນັ້ນວ່າ: ພວກຂ້າພະເຈົ້າເຊື່ອໝັ້ນວ່າ ພາຍໃຕ້ການນຳພາ ແລະ ເປັນຫ່ວງເປັນໄຍຢ່າງໃກ້ຊິດຂອງພັກ, ລັດຖະບານ ແຫ່ງ ສປປ ລາວ ແລະ ບັນດາສະຫາຍປະຊາຊົນລາວ ຈະຜ່ານຜ່າຄວາມຫຍຸ້ງຍາກໃນປັດຈຸບັນ ເຮັດໃຫ້ຊີວິດການເປັນຢູ່ຂອງປະຊາຊົນເຂດອຸທົກກະໄພ ເຂົ້າສູ່ສະພາບປົກກະຕິ.
ສະນັ້ນ, ຮຽກຮ້ອງມາຍັງປະຊາຊົນບັນດາເຜົ່າ ຈົ່ງເຊື່ອໝັ້ນຕໍ່ການນຳພາຂອງພັກ-ລັດ ໃນການຟື້ນຟູຊີວິດການເປັນຢູ່ຂອງປະຊາຊົນເຂດປະສົບໄພນ້ຳຖ້ວມເຂົ້າສູ່ສະພາບປົກກະຕິ. ບັນດາອົງການຈັດຕັ້ງຂັ້ນສູນກາງ ແລະ ທ້ອງຖິ່ນ ຈົ່ງເປັນເຈົ້າການ ໃນການຈັດຕັ້ງປະຕິບັດເນື້ອໃນຈິດໃຈ ມະຕິກອງປະຊຸມລັດຖະບານ ເພື່ອປຶກສາຫາລືການແກ້ໄຂໄພພິບັດນ້ຳຖ້ວມໃນທົ່ວປະເທດປີ 2019 ໃຫ້ປະກົດຜົນເປັນຈິງ. ສັງຄົມທຸກພາກສ່ວນນັບທັງພາກລັດ ແລະ ເອກະຊົນ ຈົ່ງສືບຕໍ່ປະກອບສ່ວນທາງດ້ານວັດຖຸປັດໄຈ ເພື່ອຊ່ວຍເຫຼືອປະຊາຊົນຜູ້ປະສົບໄພນ້ຳຖ້ວມ. ປະຊາຊົນເຂດປະສົບໄພນ້ຳຖ້ວມ ຈົ່ງສາມັກຄີກັນ, ຮັກແພງ ແລະ ຊ່ວຍເຫຼືອຊຶ່ງກັນ ແລະ ກັນ ເພື່ອພ້ອມກັນຜ່ານຜ່າອຸປະສັກຄວາມຫຍຸ້ງຍາກໃນຄັ້ງນີ້ ໃຫ້ຜ່ານໄປດ້ວຍດີ. ນອກນີ້ ເອົາໃຈໃສ່ຍົກສູງສະຕິລະວັງຕົວ, ເດັດດ່ຽວສະກັດກັ້ນ ແລະ ຕ້ານກົນອຸບາຍແບ່ງແຍກ, ການໃສ່ຮ້າຍປ້າຍສີຂອງພວກຄົນທີ່ບໍ່ຫວັງດີ ທັງຢູ່ພາຍໃນ ແລະ ຕ່າງປະເທດ.