ສືບຕໍ່ເພີ່ມທະວີຢຶດໝັ້ນແນວທາງການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມື


14.10.2019 9:56     

   ວັນທີ 12 ຕຸລາ ແມ່ນວັນສ້າງຕັ້ງການທູດລາວ ຊຶ່ງເປັນວັນທີ່ມີຄວາມໝາຍສຳຄັນ ສຳລັບປະຊາຊົນລາວບັນດາເຜົ່າ. ເມື່ອຫວນຄືນມູນເຊື້ອປະຫວັດຄວາມເປັນມາຂອງວັນການທູດລາວແລ້ວ ກ່ອນໜ້ານີ້ 70 ກວ່າປີ ອົງຄະນະພັກແຄວ້ນລາວ ໄດ້ນຳພາປະຊາຊົນ ຢຶດເອົາເອກະລາດ ແລະ ປະກາດເອກະລາດຕໍໍ່ຊາວໂລກ ໃນວັນທີ 12 ຕຸລາ 1945 ພ້ອມທັງໄດ້ສ້າງຕັ້ງຄະນະລັດຖະບານລາວເອກະລາດ ໂດຍໄດ້ມີການຮ່າງລັດຖະທຳມະນູນຂອງຊາດລາວຂຶ້ນ. ໃນແນວທາງການເມືອງ, ລັດຖະບານຊຸດທຳອິດຂອງລາວບໍ່ມີແນວທາງການຕ່າງປະເທດຢ່າງຈະແຈ້ງ. ແຕ່ຄະນະລັດຖະບານ ກໍໄດ້ມີການຕົກລົງສ້າງຕັ້ງກອງທະຫານປະສົມ ລາວ-ຫວຽດນາມ ເພື່ອຊ່ວຍກັນຕີຕ້ານກັບສັດຕູພາຍນອກ ໂດຍພາຍໃຕ້ການຊີ້ນຳໆພາຂອງລັດຖະມົນ ຕີກະຊວງການຕ່າງປະເທດລາວ ຜູ້ທຳອິດຄື: ສົມເດັດເຈົ້າ ສຸພານຸວົງ. ເຫດການນີ້ ຖືເປັນເຫດການປະຫວັດສາດອັນສຳຄັນຂອງປວງຊົນລາວ ແລະ ທັງຖືເປັນວັນກຳເນີດ "ວັນການທູດລາວ" (ວັນທີ 12 ຕຸລາ 1945) ຊຶ່ງໄດ້ຮັບການກຳນົດຢ່າງເປັນທາງການຕາມແຈ້ງການຂອງຫ້ອງວ່າການລັດຖະບານ ສະບັບເລກທີ 1102/ຫລບ.ກລຂ, ລົງວັນທີ 25/7/2013.
    ກອງປະຊຸມໃຫຍ່ ຄັ້ງທີ I ຂອງພັກ ໄດ້ຈັດຂຶ້ນໃນວັນທີ 22/3/1955 ຢູ່ເຂດທີ່ໝັ້ນຊຳເໜືອ ໂດຍໄດ້ວາງນະໂຍບາຍພື້ນຖານ ແລະ ວາງໂຄງການດຳເນີນງານສະເພາະໜ້າ ຊຶ່ງປະກອບມີ 12 ຂໍ້. ໃນນັ້ນ, ຂໍ້ທີ 10 ໄດ້ກຳນົດແນວທາງການຕ່າງປະເທດຄື: "ຜູກມິດກັບທຸກປະເທດທີ່ເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ ບົນພື້ນຖານຫຼັກການສະເໝີພາບ, ຕ່າງຝ່າຍຕ່າງໄດ້ຮັບຜົນປະໂຫຍດ" ໂດຍມີສົມເດັດເຈົ້າ ສຸພານຸວົງ ເປັນຜູ້ນຳພາວຽກງານການຕ່າງປະເທດ. ກອງປະຊຸມໃຫຍ່ ຄັ້ງທີ II ຂອງພັກ ໄດ້ຈັດຂຶ້ນໃນວັນທີ 3/2/1972 ຢູ່ເມືອງວຽງໄຊ ແຂວງຫົວພັນ ໂດຍໄດ້ວາງນະໂຍບາຍການຕ່າງປະເທດຄື: "ສັນຕິພາບ, ເອກະລາດ, ປະຊາທິປະໄຕ, ເປັນກາງ, ເອກະພາບ ແລະ ວັດທະນາຖາວອນ, ຕັ້ງໜ້າປະກອບສ່ວນເຂົ້າໃນການຕໍ່ສູ້ ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ສັງຄົມນິຍົມຢູ່ອິນດູຈີນ, ອາຊີອາຄະເນ ແລະ ໃນໂລກ" ໂດຍແມ່ນທ່ານ ພູມີ ວົງວິຈິດ ເປັນຜູ້ນຳພາວຽກງານການຕ່າງປະເທດ (ເອີ້ນວ່າ: ຫ້ອງການພົວພັນການຕ່າງປະເທດ).
    ພາຍຫຼັງສະຖາປະນາ ສປປ ລາວ ໃນວັນທີ 2/12/1975 ຂະແໜງການຕ່າງປະເທດ ກໍໄດ້ເຕີບໃຫຍ່ຂຶ້ນ. ການກຳນົດນະໂຍບາຍການຕ່າງປະເທດຂອງ ສປປ ລາວ ແມ່ນອີງໃສ່ການຕີລາຄາທ່າອ່ຽງຂອງສະພາບການພາກພື້ນ ແລະ ສາກົນ ຢ່າງຖືກຕ້ອງຂອງພັກ ໂດຍເຫັນວ່າ: "ທ່າອ່ຽງລວມໃນການພົວພັນສາກົນ ແມ່ນທັງຮ່ວມມື ແລະ ຍາດແຍ່ງກັນ ບົນຫຼັກການຢູ່ຮ່ວມກັນ ໂດຍສັນຕິລະຫວ່າງປະເທດທີ່ມີລະບອບການເມືອງທີ່ແຕກຕ່າງກັນ. ສປປ ລາວ ໄດ້ກຳນົດແນວທາງນະໂຍບາຍການຕ່າງປະເທດໃນແຕ່ລະໄລຍະ ໂດຍອີງໃສ່ສະພາບການພາຍໃນ ແລະ ການປ່ຽນແປງຂອງສາກົນ. ກອງປະຊຸມໃຫຍ່ ຄັ້ງທີ III ຂອງພັກ ໄດ້ຈັດຂຶ້ນໃນປີ 1982 ໂດຍໄດ້ກຳນົດວ່າ: ສືບຕໍ່ຢຶດໝັ້ນນະໂຍບາຍການຕ່າງປະເທດສັນຕິພາບ, ເອກະລາດ, ມິດຕະພາບ, ເພີ່ມທະວີຢ່າງບໍ່ຢຸດຢັ້ງ ຄວາມສາມັກຄີພິເສດ, ການຮ່ວມມືສຳພັນສູ້ຮົບ ແລະ ການຮ່ວມມືຮອບດ້ານກັບຫວຽດນາມ, ກຳປູເຈຍອ້າຍນ້ອງ, ສາມັກຄີແໜ້ນແຟ້ນ ແລະ ຮ່ວມມືຮອບດ້ານກັບສະຫະພາບໂຊວຽດ, ບັນດາປະເທດສັງຄົມນິຍົມ ລວມເຖິງປະຊາຊົນທີ່ຮັກຫອມສັນຕິພາບ ແລະ ຄວາມເປັນທຳໃນໂລກ. ກອງປະຊຸມໃຫຍ່ ຄັ້ງທີ X ຂອງພັກ ກໍໄດ້ເນັ້ນວ່າ: ສືບຕໍ່ຢຶດໝັ້ນແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ເປັນເຈົ້າການໃນການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ.
    ສປປ ລາວ ໄດ້ມີການເປີດກວ້າງການພົວພັນກັບບັນດາປະເທດ ແລະ ອົງການຈັດຕັ້ງສາກົນ. ປັດຈຸບັນ ສປປ ລາວ ໄດ້ມີການສ້າງຕັ້ງສາຍພົວພັນການທູດກັບ 100 ກວ່າປະເທດ. ພ້ອມນີ້ ສປປ ລາວ ກໍຍັງມີສະຖານທູດຂອງຕົນຢູ່ຕ່າງປະເທດ, ມີສຳນັກງານຜູ້ຕາງໜ້າຖາວອນ, ກົງສຸນ, ຫ້ອງການກົງສຸນ ແລະ ມີພະນັກງານປະຈຳການຢູ່ຕ່າງປະເທດຫຼາຍຮ້ອຍຄົນ. ນອກນີ້ ຍັງໄດ້ມີການພົວພັນດ້ານພັກ 100 ກວ່າພັກການເມືອງໃນໂລກ.
    ຜ່ານການເຄື່ອນໄຫວວຽກງານຕ່າງປະເທດຢ່າງເປັນເຈົ້າການ ແລະ ມີຫຼັກການຂອງພັກ ໄດ້ເຮັດໃຫ້ຖານະບົດບາດຂອງປະເທດເຮົາພົ້ນເດັ່ນຂຶ້ນໃນເວທີພາກພື້ນ ແລະ ສາກົນ. ການພົວພັນກັບບັນດາປະເທດເພື່ອນມິດຍຸດທະສາດ ໄດ້ກ້າວເຂົ້າສູ່ລວງເລິກ ແລະ ເປັນຮູບປະທຳກວ່າເກົ່າ. ການພົວພັນກັບປະເທດມະຫາອຳນາດແມ່ນມີຄວາມໝັ້ນທ່ຽງ ແລະ ໄດ້ເປີດກວ້າງການພົວພັນປະເທດເພື່ອນມິດອື່ນໆຢ່າງມີຈຸດສຸມ. ສປປ ລາວ ມີຄວາມເປັນເຈົ້າການໃນການຕອບໂຕ້ຖ້ອຍທຳນອງໃສ່ຮ້າຍປ້າຍສີຂອງອິດທິກຳລັງປໍລະປັກ ແລະ ກຸ່ມຄົນບໍ່ດີ, ສາມາດຊີ້ແຈງອະທິບາຍ, ຍາດແຍ່ງຄວາມເປັນໃຈ ແລະ ການສະໜັບສະໜູນຂອງເພື່ອນມິດສາກົນ ນັບມື້ນັບຫຼາຍຂຶ້ນ. ມີຄວາມໜັກແໜ້ນ ແລະ ຄ່ອງແຄ້ວໃນການປົກປັກຮັກສາອະທິປະໄຕ, ເຂດນ້ຳແດນດິນ ແລະ ຜືນແຜ່ນດິນອັນຄົບຖ້ວນຂອງຊາດ. ເປັນເຈົ້າການ ແລະ ຮັກສາບົດບາດອັນພົ້ນເດັ່ນຢ່າງຕັ້ງໜ້າຂອງ ສປປ ລາວ ຢູ່ເວທີອາຊຽນ, ອົງການ ສປຊ ແລະ ອົງການຈັດຕັ້ງສາກົນອື່ນໆ, ສາມາດສ້າງໄດ້ສະພາບແວດລ້ອມທີ່ມີຄວາມໄວ້ວາງໃຈກັນ ແລະ ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ. ການເຄື່ອນໄຫວຕ່າງປະເທດໄດ້ມີການຕິດແໜ້ນກັບການຍາດແຍ່ງການຊ່ວຍເຫຼືອ ເພື່ອການພັດທະນາ ແລະ ການຮ່ວມມືດ້ານເສດຖະກິດ, ການເຊື່ອມໂຍງເສດຖະກິດສາກົນ ແລະ ການຕິດຈອດພາກພື້ນ ສືບຕໍ່ມີບາດກ້າວທີ່ໜັກແໜ້ນ ແລະ ມີຜົນສຳເລັດທີ່ເປັນຮູບປະທຳຢ່າງຈະແຈ້ງ.
     ບົນພື້ນຖານທັດສະນະຂອງພັກເຮົາ ກໍຄືທ່າອ່ຽງລວມຂອງຍຸກສະໄໝນັ້ນ ແມ່ນການເຊື່ອມໂຍງ ການຊຸກຍູ້ສົ່ງເສີມການຮ່ວມມື ເພື່ອການພັດທະນາ ແລະ ແກ້ໄຂບັນຫາຮ່ວມກັນ ເພື່ອສັນຕິພາບ, ສະຖຽນລະພາບ ແລະ ຄວາມໝັ້ນຄົງໃນພາກພື້ນ ແລະ ສາກົນ, ໃນຕໍ່ໜ້ານີ້ ພວກເຮົາສືບຕໍ່ຢຶດໝັ້ນໃນແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ສົ່ງເສີມການພົວພັນຮ່ວມມືກັບຕ່າງປະເທດແບບຫຼາຍທິດ, ຫຼາຍຝ່າຍ, ຫຼາຍລະດັບບົນພື້ນຖານຫຼັກການເຄົາລົບເອກະລາດ, ອຳນາດອະທິປະໄຕ ຊຶ່ງກັນ ແລະ ກັນ ແລະ ຕ່າງຝ່າຍຕ່າງມີຜົນປະໂຫຍດ. ເພີ່ມທະວີການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືກັບບັນດາປະເທດເພື່ອນມິດຍຸດທະສາດ. ຖືສຳຄັນການພົວພັນຮ່ວມມືທີ່ດີກັບບັນດາປະເທດໃກ້ຄຽງ, ບັນດາປະເທດອາຊຽນ ແລະ ປະເທດເພື່ອນມິດອື່ນໆ ກໍຄືອົງການຈັດຕັ້ງສາກົນຕ່າງໆ. ສືບຕໍ່ເພີ່ມທະວີການພົວພັນສາມັກຄີ, ການຮ່ວມມື ແລະ ສະໜັບສະໜູນ ຊຶ່ງກັນ ແລະ ກັນກັບບັນດາພັກການເມືອງທີ່ກ້າວໜ້າໃນປະເທດຕ່າງໆ. ເພີ່ມທະວີການປະສານງານລະຫວ່າງການເຄື່ອນໄຫວຕ່າງປະເທດຂອງພັກ, ລັດຖະບານ, ສະພາແຫ່ງຊາດ ແລະ ການທູດພາກປະຊາຊົນ. ສືບຕໍ່ເພີ່ມທະວີການເຄື່ອນໄຫວການທູດປ້ອງກັນເຫດ ແລະ ບຸກທະລຸ ເພື່ອປົກປ້ອງຄວາມໝັ້ນຄົງຂອງລະບອບ, ປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ. ເພີ່ມທະວີການສ້າງຖັນແຖວພະນັກງານທີ່ເຮັດວຽກພົວພັນຮ່ວມມືກັບຕ່າງປະເທດໃຫ້ມີຄວາມໜັກແໜ້ນ, ເຂັ້ມແຂງ ແລະ ມີຄຸນນະພາບ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງການເປີດກວ້າງການຮ່ວມມື ແລະ ເຊື່ອມໂຍງສາກົນ.