ສະເຫຼີມສະຫຼອງວັນປະຫວັດສາດ ຂອງຊາດ ແລະ ຂອງພັກ ໃນປີ 2020 ໃຫ້ເປັນ ຂະບວນທົ່ວປະເທດ


16.10.2019 9:57     

   ຮຽນ: ມີ 2 ເຫດການໃຫຍ່ຕິດພັນໃນເດືອນດຽວກັນ ແລະ ເປັນຄວາມຊົງຈໍາຂອງຄົນລາວ, ຊາດລາວ ແລະ ປະຊາຊົນທົ່ວທັງໂລກຕະຫຼອດໄປກໍແມ່ນວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີ ໃນວັນທີ 2 ທັນວາ 2020 ທີ່ຈະມາເຖິງ ແລະ ວັນເກີດຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງພັກ, ຂອງລັດ, ຂອງປະຊາຊົນ ແລະ ເປັນວິລະບູລຸດຂອງຊາດລາວເຮົາ ຄົບຮອບ 100 ປີ ໃນວັນທີ 13 ທັນວາ 2020. ນອກນັ້ນ ປີ 2020 ຍັງເປັນການກະກຽມຄວາມພ້ອມຢ່າງຮອບດ້ານໃຫ້ແກ່ການດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ປປ ລາວ ໃນຕົ້ນປີ 2021 ຕື່ມອີກ. ນັບຈາກມື້ນີ້ໄປຮອດວັນສໍາຄັນຂອງປີ 2020 ກໍຍັງມີເວລາບໍ່ຫຼາຍ, ເພາະສະນັ້ນຄະນະພັກທຸກຂັ້ນ, ອໍານາດການປົກຄອງທຸກທ້ອງຖິ່ນຕ້ອງໄດ້ມີຄວາມພ້ອມໃນການກະກຽມສ້າງຂະບວນການຂໍ່ານັບຮັບຕ້ອນວັນປະຫວັດສາດທີ່ສໍາຄັນຂອງຊາດ ແລະ ຂອງພັກເຮົາປີ 2020 ໃຫ້ມີຜົນສໍາເລັດ. ໃນນັ້ນກ່ອນອື່ນໝົດຕ້ອງໄດ້ແຕ່ງຕັ້ງຄະນະຮັບຜິດຊອບໃຫ້ແກ່ງານດັ່ງກ່າວ, ກໍານົດແຜນວຽກ, ແຜນຄົນ ແລະ ງົບປະມານເຂົ້າໃນການຈັດຕັ້ງປະຕິບັດ ໂດຍຖືສໍາຄັນເນື້ອໃນຮູບການປາຖະກະຖາ, ເລົ່າຄືນມູນເຊື້ອຂອງແຕ່ລະເຫດການສໍາຄັນ, ຫຼີກເວັ້ນການນຳໃຊ້ງົບປະມານແບບຟຸມເຟືອຍ ເພື່ອຈັດງານລ້ຽງ ແລະ ສ້າງສັນຕ່າງໆ. ໃນການສ້າງຂະບວນການຕ້ອງຖືສໍາຄັນ ໜຶ່ງ, ຕັ້ງໜ້າສຶກສາອົບຮົມການເມືອງ-ນຳພາແນວຄິດພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃຫ້ເຊີດຊູນ້ຳໃຈຮັກຊາດ ເອກະລາດ ເປັນເຈົ້າຕົນເອງສ້າງຄວາມເຂັ້ມແຂງດ້ວຍຕົນເອງ ເພື່ອສ້າງປະເທດຊາດໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກສັງຄົມມີຄວາມສາມັກຄີປອງດອງ, ຍຸຕິທຳ ແລະ ສີວິໄລ. ສອງ, ຕັ້ງໜ້າປຸກລະດົມຂະບວນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດໃຫ້ປະກົດຜົນເປັນຈິງ ເພື່ອບັນລຸເປົ້າໝາຍສະຫັດສະວັດດ້ານການພັດທະນາເຮັດໃຫ້ປະເທດຊາດຫຼຸດພົ້ນອອກຈາກຄວາມດ້ອຍພັດທະນາ ໃນປີ 2020 ສິ່ງສໍາຄັນຕ້ອງຮັບປະກັນໃຫ້ເສດຖະກິດມີການເຕີບໂຕຢ່າງຕໍ່ເນື່ອງ ແລະ ເສດຖະກິດມະຫາພາກມີຄວາມໝັ້ນທ່ຽງ. ສາມ, ເພີ່ມທະວີຄວາມສັກສິດ ແຫ່ງການຄຸ້ມຄອງລັດ ຄຸ້ມຄອງສັງຄົມຕາມທິດພັກນຳພາລັດຄຸ້ມຄອງດ້ວຍກົດໝາຍ ແລະ ປະຊາຊົນເປັນເຈົ້າເຂົ້າຮ່ວມ, ເຮັດໃຫ້ສັງຄົມມີຄວາມສະຫງົບສາມັກຄີປອງດອງ ແລະ ມີການພັດທະນາດ້ວຍຄວາມໜັກແໜ້ນຕໍ່ເນື່ອງ. ສີ່, ເພີ່ມທະວີຄວາມສາມັກຄີປອງດອງຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກ, ເອົາໃຈໃສ່ຈໍາກັດແກ້ໄຂປະກົດການຫຍໍ້ທໍ້ຕ່າງໆໃນສັງຄົມ, ສ້າງບັນຍາກາດສົດໃສ, ສະຫງ່າຜ່າເຜີຍ, ມີຄວາມຍິ້ມແຍ້ມແຈ່ມໃສ, ເຮັດໃຫ້ປະເທດຊາດມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ. ຫ້າ, ເອົາໃຈໃສ່ປະຕິບັດແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ ໂດຍສະເພາະກັບບັນດາປະເທດເພື່ອນມິດຍຸດທະສາດ, ບັນດາປະເທດໃກ້ຄຽງ ກໍຄືບັນດາປະເທດໃນອາຊຽນ, ອົງການຈັດຕັ້ງສາກົນ ແລະ ປະເທດເພື່ອນມິດໃນໂລກ ອັນນີ້ແມ່ນປັດໄຈອັນຈໍາເປັນ ແລະ ຂາດບໍ່ໄດ້ ເພື່ອສ້າງເປັນກໍາລັງແຮງສັງລວມເຂົ້າໃນພາລະກິດປົກປັກຮັກສາ ແລະ ພັດທະນາສ້າງສາປະເທດຊາດ. ທົ່ວພັກ, ທົ່ວກອງທັບ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ຈົ່ງສືບຕໍ່ເສີມຂະຫຍາຍມູນເຊື້ອວັນປະຫວັດສາດສໍາຄັນຂອງຊາດຂອງພັກເຮົາ ໃນປີ 2020 ໃຫ້ເປັນຂະບວນກວ້າງຂວາງ ໃນຂອບເຂດທົ່ວປະເທດຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຕິດພັນກັບວຽກງານ 3 ສ້າງ ແລະ ແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ.