ກວຕ-ມະຫາວິທະຍາໄລສັບພະວິຊາຮ່າໂນ້ຍ ຮ່ວມຄົ້ນຄວ້າລະບົບເອເລັກໂຕຣນິກ


...

03.07.2019 9:34     

   ກະຊວງວິທະຍາສາດ ແລະ ເຕັກໂນໂລຊີ (ກວຕ) ສປປ ລາວ ຮ່ວມກັບມະຫາ ວິທະຍາໄລ ສັບພະວິຊາ ຮ່າໂນ້ຍ ສສ ຫວຽດນາມ ຮ່ວມກັນລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນຂົງເຂດຄອມພິວເຕີ ແລະ ເອເລັກໂຕຣນິກ ເປັນຕົ້ນແມ່ນ ການຄົ້ນຄວ້າ ແລະ ພັດທະນາ ອິນເຕີເນັດແຫ່ງສັບພະສິ່ງ (IoT), ປັນຍາປະດິດ (AI), ລະບົບການບໍລິການສາທາລະນະ ແລະ ສ້າງຄວາມເຂັ້ມແຂງທາງດ້ານວິຊາການ ໃຫ້ ສປປ ລາວ ເພື່ອເຮັດໃຫ້ວຽກງານດັ່ງກ່າວນັບມື້ນັບມີການພັດທະນາຂຶ້ນໄປເລື້ອຍໆ. ພິທີເຊັນບົດບັນທຶກຄວາມເຂົ້າໃຈການຮ່ວມມືດັ່ງກ່າວ ໄດ້ຈັດຂຶ້ນທ້າຍເດືອນມິຖຸນາຜ່ານມານີ້ ທີ່ກະຊວງວິທະຍາສາດ ແລະ ເຕັກໂນໂລຊີ ລະຫວ່າງ ທ່ານ ຄຳເພັດ ວົງດາລາ, ຫົວໜ້າ ກົມແຜນການ ແລະ ທ່ານ ຫວຽນ ວັນ ຄ໋າງ, ຮອງຜູ້ອຳນວຍການ ມະຫາວິທະຍາໄລ ສັບພະວິຊາ ຮ່າໂນ້ຍ ໂດຍໃຫ້ກຽດເຂົ້າຮ່ວມຂອງທ່ານ ບໍ່ວຽງຄຳ ວົງດາລາ, ລັດຖະມົນຕີ ກວຕ, ມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ. ເນື້ອໃນ ແລະ ວັດຖຸປະສົງຂອງການເຊັນບົດບັນທຶກດັ່ງ ກ່າວ ແມ່ນທັງສອງຝ່າຍເຫັນດີຈະຮ່ວມມືກັນໃນຫຼາຍດ້ານ ເຊັ່ນ: ການພັດທະນາອິນເຕີເນັດ ແຫ່ງສັບພະສິ່ງ (IoT) ຮ່ວມກັນຄົ້ນຄວ້າ ແລະ ພັດທະນາ ລະບົບການຄົມມະນາຄົມອັດສະລິຍະ ເພື່ອຮັບໃຊ້ການຄົມມະນາຄົມຂົນສົ່ງ ບົນພື້ນຖານເຕັກໂນໂລຊີອິນເຕີເນັດ ແຫ່ງຊັບພະສິ່ງ, ຂົງເຂດປັນຍາປະດິດ (AI) ທັງສອງຝ່າຍຈະຮ່ວມກັນໃນການຄົ້ນຄວ້າ ແລະ ພັດທະນາລະບົບແປພາສາ ລາວ-ຫວຽດນາມ ຫວຽດນາມ-ລາວ ດ້ວຍສຽງເວົ້າ (Lao-Vietnam Vietnam-Lao Speech translation system), ລະບົບຂໍ້ມູນພູມສາດ (GIS) ທັງສອງຝ່າຍຈະຮ່ວມກັນຄົ້ນຄວ້າ ແລະ ພັດທະນາ ເວັບໄຊ GIS ເພື່ອການວາງແຜນ ແລະ ພັດທະນາ ການຈັດສັນບ້ານ, ລະບົບການບໍລິການສາທາລະນະ (Public service) ຈະໄດ້ຮ່ວມກັນຄົ້ນຄວ້າ ແລະ ພັດທະນາ ການຫັນການໃຫ້ບໍລິການວຽກງານວິທະຍາສາດ ແລະ ເຕັກໂນໂລຊີ ຂອງກະຊວງໃຫ້ແກ່ສັງຄົມດ້ວຍລະບົບອອນລາຍ, ນອກຈາກນັ້ນ ຍັງຈະໄດ້ມີການແລກປ່ຽນບົດຮຽນ ແລະ ສ້າງຄວາມເຂັ້ມແຂງທາງດ້ານວິຊາການໃນລະດັບປະລິນຍາໂທ, ປະລິນຍາເອກ, ຝຶກອົບຮົມໄລຍະສັ້ນ ແລະ ໄລຍະຍາວ ໃຫ້ແກ່ພະນັກງານກະຊວງວິທະຍາສາດ ແລະ ເຕັກໂນໂລຊີ ແລະ ຂົງເຂດອື່ນໆທີ່ທັງສອງຝ່າຍມີຄວາມສົນໃຈໃນການຮ່ວມມື. (ຂ່າວ: ກວຕ)