ສະຖາບັນວິຈິດສິນແຫ່ງຊາດ ເປີດສົກຮຽນໃໝ່ 2019-2020


...

23.09.2019 10:29     

   ສະຖາບັນວິຈິດສິນແຫ່ງຊາດ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດພິທີສະຫຼຸບສົກຮຽນ 2018-2019, ເປີດສົກຮຽນ 2019-2020 ແລະ ມອບ-ຮັບໃບປະກາສະນີຍະ ບັດປະລິນຍາຕີ ຮຸ່ນທີ XIII ຂຶ້ນເມື່ອວັນທີ 20 ກັນຍາຜ່ານມາ ທີ່ສະຖາບັນດັ່ງກ່າວ ໂດຍ ໃຫ້ກຽດເຂົ້າຮ່ວມຂອງທ່ານ ບໍ່ແສງຄໍາ ວົງດາລາ ລັດຖະ ມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ; ທ່ານ ໄມ່ສິງ ຈັນບຸດດີ ຫົວໜ້າສະຖາບັນວິຈິດສິນແຫ່ງຊາດ; ຄູ-ອາຈານ ແລະ ນັກສຶກສາເຂົ້າຮ່ວມ.
ທ່ານ ສີທົນ ດີມາກ ຮອງຫົວໜ້າສະຖາບັນວິຈິດສິນແຫ່ງຊາດ ໄດ້ຜ່ານບົດລາຍງານ ການດໍາ ເນີນໂຄງການສິລະປະນິພົນປະລິນຍາຕີວິຈິດສິນ ຮຸ່ນທີ XIII ແລະ ອະນຸປະລິນຍາ ຮຸ່ນທີ VII ສາຂາ ສະຫວັນນະເຂດ ຮຸ່ນທີ I ສົກຮຽນ 2018-2019 ຜ່ານມາວ່າ: ຊັ້ນປະລິນຍາຕີວິຈິດສິນແຫ່ງຊາດສົກຮຽນ 2018-2019 ມີຈໍານວນນັກສຶກສາປີທີ 5 ທັງໝົດ 18 ຄົນ,ຍິງ 8 ຄົນ, ສັງກັດພາກວິຊາຈິດຕະກໍາ ມີ 13 ຄົນ, ຍິງ 5 ຄົນ, ພາກວິຊາສິລະປະພາບພິມຍິງ 1 ຄົນ, ພາກວິຊາປະຕິມາກໍາ 3 ຄົນ, ຍິງ 1 ຄົນ, ໃນພາກວິຊານີ້: ຂະແໜງຄວັດແກະສະຫຼັກ 2 ຄົນ, ຍິງ 1 ຄົນ ແລະ ປັ້ນ-ຫຼໍ່ 1 ຄົນ (ຊາຍ). ແຕ່ຜ່ານການດໍາເນີນງານຕົວຈິງໄດ້້ມີນັກສຶກສາຈາກພາກວິຊາຈິດຕະກໍາ 1 ຄົນ ບໍ່ຜ່ານຫົວຂໍ້ບົດ 1 ຄົນ ແລະ 2 ຄົນ ຂໍໂຈະ, ຈຶ່ງຍັງເຫຼືອແຕ່ 15 ຄົນ, ຍິງ 8 ຄົນ. ຄິດເປັນເປີເຊັນ 83,33% ສໍາລັບອະນຸປະລິນຍາ ຮຸ່ນທີ VII ສາຂາໂຮງຮຽນວິຈິດສິນສະຫວັນນະເຂດ ຮຸ່ນທີ I ສົກຮຽນ 2018-2019, ຊັ້ນອະນຸປະລິນຍາມີ ຈໍານວນນັກສຶກສາ ປີທີ 3 ທັງໝົດ 17 ຄົນ , ຍິງ 1 ຄົນ, ພາກວິຊາຈິດຕະກໍາມີ 9 ຄົນ (ຊາຍ), ພາກວິຊາສິລະປະພາບພິມ ມີ 2 ຄົນ,ຍິງ 1 ຄົນ, ພາກວິຊາປະຕິມາກໍາ ຂະແໜງຄວັດແກະສະຫຼັກ 3 ຄົນ (ຊາຍ), ຂະແໜງປັ້ນຫຼໍ່ 3 (ຊາຍ), ຜ່ານການດໍາເນີນຕົວຈິງມີນັກ ສຶກສາ ເຂົ້າປ້ອງ ກັນບົດຈົບຊັ້ນທັງໝົດ 17 ຄົນ, ຍິງ 1 ຄົນ. ຄະແນນສະເລ່ຍຜ່ານທັງໝົດຄິດເປັນເປີເຊັນ 100%. (ຂ່າວ: ຍຸພິນທອງ)