ທ່ານນາຍົກ ເຂົ້າຮ່ວມພິທີສະຫຼອງວັນຄູແຫ່ງຊາດ ຄົບຮອບ 25 ປີ


...

07.10.2019 10:03     

   ພິທີສະເຫຼີມສະຫຼອງວັນຄູແຫ່ງຊາດ (7 ຕຸລາ 1994 - 7 ຕຸລາ 2019) ຄົບຮອບ 25 ປີ ໄດ້ຈັດຂຶ້ນໃນວັນທີ 4 ຕຸລາຜ່ານມາ ທີ່ມະຫາວິທະຍາໄລແຫ່ງຊາດ ໂດຍການເຂົ້າຮ່ວມຂອງທ່ານ ທອງລຸນ ສີສຸລິດນາຍົກລັດຖະມົນຕີ ແຫ່ງ ສປປ ລາວ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ບັນດາຮອງລັດຖະມົນຕີ, ຄູ-ອາຈານ, ພະນັກງານຫຼັກແຫຼ່ງຂະແໜງການສຶກສາ, ພະນັກງານອາວຸໂສບຳນານເຂົ້າຮ່ວມ.
    ທ່ານ ນາງ ແສງເດືອນ ຫຼ້າຈັນທະບູນໄດ້ຂຶ້ນລາຍງານກ່ຽວກັບປະ ຫວັດ ແລະ ການຂະຫຍາຍຕົວຂອງວັນຄູແຫ່ງຊາດບາງຕອນວ່າ: ຄູແມ່ນໝາຍເຖິງຜູ້ທີ່ມີຄວາມຮູ້ ແລະ ປະສົບການ ຊຶ່ງສາມາດນຳໄປຖ່າຍທອດໃຫ້ຜູ້ອື່ນໆໄດ້ ຄຳວ່າຄູ ສ້າງຄູເພື່ອສ້າງຄົນ ແລະ ສ້າງຄົນເພື່ອສ້າງຊາດ ແລະ ອື່ນໆ ນັບແຕ່ປີ 1994 ເປັນຕົ້ນມາຮອດວັນທີ 7 ຕຸລາໃນແຕ່ລະປີທົ່ວປະເທດໄດ້ຈັດຕັ້ງສະເຫຼີມສະຫຼອງວັນຄູແຫ່ງຊາດ ເພື່ອປຸກລະດົມຈິດໃຈທົ່ວສັງຄົມໄດ້ສະແດງອອກເຖິງການສົ່ງເສີມ ກຽດສັກສີຂອງຄູ-ອາຈານໃຫ້ສູງຂຶ້ນທັງເປັນການໂຄສະນາເຜີຍແຜ່ຜົນງານຄຸນງາມຄວາມດີຂອງຄູ-ອາຈານ ພ້ອມທັງສະແດງເຖິງຄວາມກະຕັນຍູ ຮູ້ບຸນຄຸນຕໍ່ຄູ-ອາຈານທີ່ໄດ້ສິດສອນໃຫ້ຄວາມຮູ້ແກ່ຕົນນັບທັງອະດີດຈົນເຖິງປັດຈຸບັນ.
    ຕະຫຼອດໄລຍະ 25 ປີ ຜ່ານມາໂຮງຮຽນແຫ່ງທຳອິດຂອງເດັກນ້ອຍລາວແມ່ນຄູບາອາຈານເປັນຜູ້ສິດສອນ ແລະ ສົ່ງຄວາມຮູ້ເປັນເວລາແກ່ຍາວຫຼາຍຮ້ອຍປີ,ພາຍຫຼັງປະເທດຊາດຕົກເປັນຫົວເມືອງຂຶ້ນຂອງພວກຈັກກະພັດຜູ້ຮຸກຮານການສຶກສາໄດ້ປ່ຽນຮູບໂດຍໄດ້ໃຫ້ ການສຶກສາໃຫ້ຄົນຈຳນວນໜ່ອຍໜຶ່ງ, ໃນຈຳນວນຄົນທີ່ມີໜ່ອຍທີ່ສຸດນັ້ນກໍມີທ້າວ ຄຳທີ່ໄດ້ຮຽນຈົບປະຖົມ ແລະ ໄດ້ຝຶກອົບຮົມໄລຍະສັ້ນຕໍ່ມາ ຄູຄຳ ບັນຈຸເປັນຄູສອນໃນວັນທີ 7 ຕຸລາ 1907) ນາຍຄູຄໍາເປັນຜູ້ ທີ່ມີນ້ຳໃຈຮັກຊາດ ແລະ ຄຽດແຄ້ນຕໍ່ພວກລ່າເມືອງຂຶ້ນຈຶ່ງໄດ້ນຳພາການລຸກຮື້ຂຶ້ນຕໍ່ສູ້ ແລະ ຖືກຈັບເຂົ້າຄຸກ, ພາຍຫຼັງປະເທດຊາດໄດ້ຮັບການປົດ ປ່ອຍທົ່ວປະເທດ ແລະ ສະຖາ ປະນາເປັນສາທາລະນະລັດ ປະຊາທິປະໄຕ ປະຊາຊົນລາວໃນວັນທີ 2 ທັນວາ 1975 ພັກປະຊາຊົນປະຕິວັດລາວໄດ້ມີນະໂຍບາຍຕໍ່ການສຶກສາໂດຍມີລັກສະນະຊາດ, ວິທະຍາສາດ ແລະ ມະຫາຊົນ ຈຶ່ງເຮັດໃຫ້ ການສຶກສາຂອງລາວໄດ້ຮັບການພັດທະນາຈາກຕົວເມືອງໄປສູ່ຊົນນະບົດ, ຖັນແຖວຄູ-ອາ ຈານໄດ້ເພີ່ມຂຶ້ນເປັນຈຳນວນ ຫຼວງຫຼາຍ, ຄູ-ອາຈານເຫຼົ່ານັ້ນ ໄດ້ປະກອບສ່ວນສ້າງຊັບພະ ຍາກອນມະນຸດທີ່ດີມີຈິດໃຈຮັກຊາດ, ຮັກລະບອບໃໝ່ປະ ຕິບັດໜ້າທີ່ຢູ່ທຸກຂະແໜງການ ທັງສູນກາງ ແລະ ທ້ອງຖິ່ນ.
    ໂດຍເຫັນໄດ້ຄວາມສຳ ຄັນຂອງການສຶກສາກອງປະ ຊຸມໃຫຍ່ຂອງແຕ່ລະຄັ້ງຈຶ່ງໄດ້ມີມະຕິກ່ຽວກັບການພັດ ທະນາຊັບພະຍາກອນມະ ນຸດ ເພື່ອຕອບສະໜອງໃຫ້ ແກ່ການພັດທະນາເສດຖະກິດ-ສັງຄົມຂອງຊາດແຕ່ລະໄລຍະພັກໄດ້ຊີ້ໃຫ້ເຫັນວ່າ ຢາກພັດທະນາເສດຖະກິດ-ສັງຄົມຂອງຊາດໃຫ້ໄດ້ຕ້ອງ ເອົາໃຈໃສ່ພັດທະນາການສຶກ ສາ ແລະ ຢາກພັດທະນາການ ສຶກສາໃຫ້ມີຄຸນນະພາບປັດ ໄຈສຳຄັນກ່ອນອື່ນໝົດຕ້ອງ ພັດທະນາຄູ, ເນື່ອງຈາກວ່າບົດບາດຂອງຄູໃນໄລຍະໃໝ່ຍັງມີຄວາມສຳຄັນຫຼາຍຕໍ່ການ ພັດທະນາຊັບພະຍາກອນມະ ນຸດ, ນອກຈາກຈະເປັນຜູູ້ສິດ ສອນຖ່າຍທອດຄວາມຮູ້ ແລະ ສຶກສາອົບຮົມໃຫ້ແກ່ນັກຮຽນ ນັກສຶກສາແລ້ວຄູຍັງໄດ້ປະ ກອບສ່ວນຫຼາຍວຽກງານຢູ່ໃນສັງຄົມເຊັ່ນ: ເປັນນັກພັດ ທະນາກອນ, ເປັນເສນາທິການໃຫ້ແກ່ອຳນາດການປົກຄອງ ທ້ອງຖິ່ນ, ເປັນຜູ້ນຳເອົານະໂຍ ບາຍ ແລະ ນະວັດຕະກຳໃໝ່ໆ ລົງສູ່ຊຸມຊົນ ແລະ ອື່ນໆ.
    ໃນໂອກາດນີ້ ທ່ານ ທອງລຸນ ສີສຸລິດ ໄດ້ສະແດງຄວາມຂ່ຳນັບຊົມເຊີຍວັນຄູແຫ່ງຊາດ ຄົບຮອບ 25 ປີ ແລະ ຝາກຄຳຢື້ຢາມຖາມຂ່າວ ຄູ-ອາຈານ ໃນຂອບເຂດທົ່ວປະເທດ ແລະ ໄດ້ຕາງໜ້າໃຫ້ສູນກາງພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ມາຍັງຂະແໜງການສຶກສາ ກໍຄືບັນດາຄູ-ອາຈານ ທີ່ໄດ້ເສຍສະຫຼະທຸກກຳລັງໃນການພັດທະນາການສຶກສາ ແລະ ຊັບພະຍາກອນມະນຸດ ເພື່ອປະ ກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ແລະ ທ່ານນາຍົກລັດຖະມົນຕີ ຍັງຢໍ້າກ່າວບາງຕອນສຳຄັນວ່າ: ໃນພາວະກິດການສຶກສາຂອງປະເທດມີຄວາມເປັນມາຢ່າງລະ ອິດລະອ້ຽວຜ່ານເສັ້ນທາງເດີນທີ່ທຸລະກັນດານ, ພາລະກິດການສຶກສານັ້ນຈະສືບຕໍ່ມີຄວາມສຳຄັນເປັນຢ່າງຍິ່ງໃນພາລະກິດພັດທະນາປະເທດຊາດໃນໄລຍະໃໝ່ເປັນຍຸກແຫ່ງການເຊື່ອມໂຍງຍຸກແຫ່ງໂລກາພິວັດຍຸກແຫ່ງການປະຕິວັດວິທະຍາສາດເຕັກໂນໂລຊີ 4.0 ຫຼື ວ່າຍຸກແຫ່ງການນຳໃຊ້ປັນຍາປະດິດ, 25 ປີຜ່ານມາພວກເຮົາໄດ້ຜ່ານຜ່ານາໆປະການ, ແຕ່ນີ້ 25 ປີຕໍ່ໜ້າ, ບໍ່ວ່າປະເທດໃດກໍຕາມບໍ່ວ່ານ້ອຍ ຫຼື ໃຫຍ່ຢາກພັດທະນາປະເທດໄດ້ຕ້ອງມີກຳລັງຄົນມີຊັບພະຍາກອນມະນຸດເປັນຫຼັກ,ລະບົບການສຶກສາຕ້ອງເປັນລະບົບທີ່ໄດ້ຮັບການປະຕິຮູບປ່ຽນແປງໃຫ້ທັນກັບຍຸກ, ກັບສະໄໝຄວາມຮຽກຮ້ອງຕ້ອງການຕົວຈິງ,ໃນຍຸກປັດຈຸບັນ ເປັນຍຸກແຫ່ງເຕັກໂນໂລຊີ, ຂໍ້ມູນຂ່າວສານ ທີ່ທັນສະໄໝ ແລະ ມີການປ່ຽນແປງຢ່າງວ່ອງໄວ, ການຮຽນຮູ້ ເພື່ອໃຫ້ກ້າວທັນກັບຍຸກສະໄໝ ແລະ ຮູ້ໝູນໃຊ້ເຕັກ ໂນໂລຊີ ເຂົ້າໃນອາຊີບ,ການປະຕິຮູບລະບົບການສຶກສາຕ້ອງໄປຄຽງຄູ່ກັບການປະຕິວັດອຸດສາຫະກຳ, ເອົາໃຈໃສ່ປັບປຸງການສິດສອນຂອງ ຄູ-ອາຈານ ໂດຍມີການນຳ ໃຊ້ເຕັກໂນໂລຊີ ເຂົ້າຊ່ວຍ ແລະ ພາສາຕ່າງປະເທດ ເພື່ອຮອງຮັບກັບຍຸກໂລກາພິວັດ ໃນປັດ ຈຸບັນ ໃຫ້ສືບຕໍ່ບຸກທະລຸໃນການສ້າງຄູ ແລະ ຖືອຸດົມຄະຕິໃນການສ້າງຄູ ໂດຍເນັ້ນໜັກໃຫ້ມີການປະຕິບັດຕົວຈິງໃຫ້ຫຼາຍຂຶ້ນທັງຮຽນ ແລະ ປະຕິບັດຕົວຈິງ ຕິດພັນກັບການດຳລົງຊີວິດຕົວຈິງ.
    ການພັດທະນາຊັບພະ ຍາກອນມະນຸດໃຫ້ເປັນກຳລັງການຜະລິດຕົ້ນຕໍ ທີ່ສາມາດຕອບສະໜອງຕໍ່ການພັດທະນາເສດຖະກິດ-ສັງຄົມ ຢ່າງຍືນຍົງ ຕາມທິດຫັນເປັນອຸດສາຫະກຳ ແລະ ທັນສະໄໝ ສາມາດເຊື່ອມໂຍງ ແລະ ແຂ່ງຂັນກັບພາກພື້ນ ແລະ ສາກົນ ທັງປະລິມານ ແລະ ຄຸນນະພາບ, ເຮັດໃຫ້ປະຊາຊົນສາມາດເຂົ້າເຖິງການບໍລິການ ທາງສັງຄົມ ຢ່າງທົ່ວເຖິງ ແລະ ຍົກລະດັບຊີວິດການເປັນຢູ່ໃຫ້ດີຂຶ້ນ ແລະ ຕ້ອງພັດທະນາຕົນ ເອງທາງດ້ານຄວາມຮູ້ວິຊາສະ ເພາະໃຫ້ນັບມື້ນັບສູງຂຶ້ນ, ມີການຊອກສະແຫວງຫາຄວາມຮູ້ໃໝ່ໆຢູ່ຕະຫຼອດເວລາ ເພື່ອເອົາມາໝູນໃຊ້ເຂົ້າໃນການ ຮຽນ-ການສອນ.
ໃນໂອກາດດຽວກັນທ່ານ ນາຍົກລັດຖະມົນຕີກໍໄດ້ເຂົ້າຮ່ວມຊົມການວາງສະແດງຜົນງານ ມູນເຊື້ອຂອງຄູ ແລະຄະແໜງການສຶກສາອີກດ້ວຍ.
(ພາບ,ຂ່າວ: ບຸນອູ້ມ)