ສນຊ ຫວນຄືນມູນເຊື້ອສອງວັນປະຫວັດສາດຂອງພັກ-ຂອງຊາດ


...

13.09.2019 10:59     

   ສູນກາງແນວລາວສ້າງຊາດ (ສນຊ) ໄດ້ຈັດຕັ້ງພິທີປາຖະກະຖາຫວນຄືນມູນເຊື້ອສອງວັນປະຫວັດສາດຂອງພັກ-ຂອງຊາດຄື: ມູນເຊື້ອວັນລັດຖະທຳມະນູນ ແຫ່ງ ສປປ ລາວ (15/8/1991-15/8/2019) ຄົບຮອບ 28 ປີ ແລະ ວັນຢຶດອຳ ນາດທົ່ວປະເທດ (23/8/1945-23/8/2019) ຄົບຮອບ 74 ປີ ຂຶ້ນໃນວັນທີ 12 ກັນຍານີ້ ທີ່ ສນຊ ໂດຍການໃຫ້ກຽດປາຖະກະຖາຂອງທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ມີບັນດາຮອງປະທານ ສນຊ, ຄະນະພັກ, ຄະນະປະຈຳ, ກຳມະການສູນກາງແນວລາວສ້າງຊາດອ້ອມ ຂ້າງ, ແຂກຖືກເຊີນ, ພະນັກງານທີ່ກ່ຽວຂ້ອງເຂົ້າຮ່ວມ.
    ໃນພິທີດັ່ງກ່າວ ທ່ານ ຈະເລີນ ເຢຍປາວເຮີ ໄດ້ຍົກໃຫ້ເຫັນເນື້ອໃນຄວາມໝາຍສຳຄັນສະພາບແວດລ້ອມແຫ່ງການກຳເນີດ-ຄວາມໝາຍຄວາມສຳຄັນຂອງວັນລັດຖະທຳມະນູນແຫ່ງ ສປປ ລາວ 15 ສິງຫາ ຄົບຮອບ 28 ປີ ລວມເຖິງສະພາບການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ, ບົດຮຽນທີ່ຖອດຖອນໄດ້ໃນການປະຕິບັດລັດຖະທຳມະນູນ ແລະ ກົດໝາຍ ພ້ອມດຽວກັນນັ້ນ ທ່ານຍັງໄດ້ຍົກໃຫ້ເຫັນປະຫວັດຄວາມເປັນມາຂອງວັນຢຶດອຳນາດ 23 ສິງຫາ ການປາຖະກະຖາສອງວັນດັ່ງກ່າວ ຖືເປັນສອງເຫດການສຳຄັນ ແລະ ມີຄວາມໝາຍທາງດ້ານປະຫວັດສາດຂອງລາວ ທັງນີ້ເພື່ອເປັນການເພີ່ມທະວີການສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ, ນັກຮົບ, ປະຊາຊົນລາວບັນດາເຜົ່າ ເປັນຕົ້ນຄົນຮຸ່ນໜຸ່ມໃຫ້ມີຄວາມຮັບຮູ້ເຂົ້າໃຈ ນຳເອົາເນື້ອໃນຈິດໃຈດັ່ງກ່າວໄປເປັນບົດຮຽນ ເພື່ອໝູນໃຊ້ເຂົ້າໃນວຽກງານຂອງຕົນໃຫ້ເກີດຜົນປະໂຫຍດ.
(ຂ່າວ-ພາບ: ພູວັນ)