ສະຫາຍ ບໍ່ວຽງຄຳ ວົງດາລາ ໂອ້ລົມຕໍ່ ກອງປະຊຸມໃຫຍ່ ຄັ້ງທີ II ໜ່ວຍພັກ ສນຕ


...

13.09.2019 10:59     

   ກອງປະຊຸມໃຫຍ່ ຄັ້ງທີ II ໜ່ວຍພັກສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ (ສນຕ) ໄດ້ຈັດຂຶ້ນໃນວັນທີ 12 ກັນຍານີ້ ທີ່ຫ້ອງປະຊຸມໃຫຍ່ຂອງສະຖາບັນດັ່ງກ່າວ ໂດຍການເຂົ້າຮ່ວມເປັນປະທານຂອງສະຫາຍ ບໍ່ວຽງຄຳ ວົງດາລາ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງວິທະຍາສາດແລະ ເຕັກໂນໂລຊີ (ກວຕ) ໃນກອງປະຊຸມສະຫາຍ ນາງ ແກ້ວວິວອນ ອຸດທະຈັກ ຮອງເລຂາໜ່ວຍພັກ ຫົວໜ້າ (ສນຕ) ໄດ້ຂຶ້ນຜ່ານບົດລາຍງານການເມືອງ ຂອງໜ່ວຍພັກ (ສນຕ) ຊຶ່ງໄດ້ສະຫຼຸບຕີລາຄາການຊີ້ນຳ-ນຳ ພາການເຄື່ອນໄຫວວຽກງານ ໃນໄລຍະ 2014 - 2019 ແລະ ທິດທາງແຜນການຊີ້ນຳ-ນໍາພາການເຄື່ອນໄຫວວຽກງານຂອງໜ່ວຍພັກ ໄລຍະ 2019 - 2024. ໜ່ວຍພັກ ສນຕ ເປັນ ໜ່ວຍພັກທີ່ເຮັດໜ້າທີ່ຊີ້ນຳ - ນໍາພາສະມາຊິກພັກ - ພະນັກງານ ເຮັດໜ້າທີ່ຄຸ້ມຄອງບໍລິຫານ, ຄົ້ນຄວ້າ, ພັດທະນາ ແລະ ບໍລິ ການ ໃນຂົງເຂດນິເວດວິທະ ຍາ ແລະ ເຕັກໂນໂລຊີ ຊີວະພາບທີ່ຕິດພັນກັບວຽກງານການຄຸ້ມຄອງລັດ ແລະ ໄດ້ນຳ ພາຈັດຕັ້ງປະຕິບັດວຽກງານວິ ຊາສະເພາະສໍາເລັດ ໃນຫຼາຍດ້ານ. ສນຕ ມີສະມາຊິກພັກ 39 ສະຫາຍ, ຍິງ 19 ສະຫາຍ, ສຳຮອງ 6 ສະຫາຍ, ຍິງ 1 ສະຫາຍ.
    ກອງປະຊຸມຄັ້ງນີ້ຍັງໄດ້ຜ່ານບົດສຳຫຼວດການນຳພາລວມຂອງຄະນະໜ່ວຍພັກຊຸດເກົ່າ ໃນໄລຍະຜ່ານມາ ພ້ອມນີ້, ກໍໄດ້ມີການປ່ອນບັດເລືອກເອົາຄະນະໜ່ວຍພັກຊຸດໃໝ່ ຊຶ່ງໄດ້ສະຫາຍ ນາງ ແກ້ວວິວອນ ອຸດທະຈັກ ເປັນເລຂາໜ່ວຍພັກ, ສະຫາຍ ໂກສົນ ໄຊພະກັດສາ ເປັນຮອງເລຂາ ທັງເປັນປະທານກວດກາ ແລະ ສະຫາຍ ນາງ ສົມສະໄໝ ແພງສີ ເປັນຄະນະໜ່ວຍພັກ ເພື່ອສືບ ຕໍ່ນຳພາສະມາຊິກພັກ ຈັດຕັ້ງປະຕິບັດວຽກງານໃຫ້ໄດ້ຮັບຜົນ ສຳເລັດຢ່າງສະຫງ່າງາມ.
    ກອງປະຊຸມຄັ້ງນີ້, ຍັງໄດ້ຮັບການໂອ້ລົມຈາກສະຫາຍ ບໍ່ວຽງຄຳ ວົງດາລາ ຊຶ່ງສະຫາຍໄດ້ເນັ້ນໃຫ້ບັນດາສະຫາຍສະ ມາຊິກພັກຂອງໜ່ວຍພັກ ສນຕ ໃຫ້ຄິດວ່າ ສນຕ ເປັນສະຖາບັນຄົ້ນຄວ້າທາງດ້ານວິຊາການທີ່ລົງເລິກດ້ານນິເວດວິທະຍາ ແລະ ວຽກງານເຕັກໂນໂລຊີ ຊີ ວະພາບ ອັນນີ້ເປັນເສົາຄໍ້າອັນໜຶ່ງໃນສາມເສົາຄໍ້າ ໃນຍຸກການປະຕິວັດອຸດສາຫະກຳ ຄັ້ງທີ 4 ຊຶ່ງເປັນໜ້າທີ່ມອບໝາຍທີ່ມີກຽດ ແລະ ໜັກໜ່ວງທີ່ສຸດເປັນວຽກງານໜ້າທີ່ການເມືອງຂອງຕົນ ເພື່ອພັດທະນາວຽກງານດ້ານນີ້. ຢາກພັດທະນາວຽກງານດັ່ງກ່າວ, ກ່ອນອື່ນໝົດແມ່ນສືບຕໍ່ຊີ້ນຳ-ນຳພາວຽກງານແນວຄິດ - ການເມືອງໃຫ້ໜັກແໜ້ນຂຶ້ນກວ່າເກົ່າ, ເຮັດໃຫ້ການເຄື່ອນໄຫວວຽກງານຊີວິດການເມືອງໃຫ້ເລິກເຊິ່ງເຖິງຖອງ ແລະ ເພື່ອໃຫ້ວຽກງານດັ່ງກ່າວໜັກແໜ້ນຕ້ອງໄດ້ເອົາໃຈໃສ່ປັບປຸງການຈັດຕັ້ງ ປັບປຸງວຽກພັກ - ພະນັກງານກໍ່ ສ້າງພັກໃຫ້ເປັນໜ່ວຍພັກປອດ ໃສ, ເຂັ້ມແຂງ ແລະ ໜັກແໜ້ນ. ສອງ, ແມ່ນຕ້ອງໄດ້ເອົາໃຈ ໃສ່ພັດທະນາຊັບພະຍາກອນມະນຸດ ເພື່ອສ້າງນັກວິຊາການທີ່ມີຄວາມຊ່ຽວຊານ ໃນການຄົ້ນຄວ້າດ້ານນິເວດວິທະຍາ ແລະ ວຽກງານເຕັກໂນໂລຊີ ຊີວະພາບ. ສາມ, ຕ້ອງປ້ອງກັນຜົນການຄົ້ນຄວ້າວ່າອັນໃດຄວນມີລິຂະສິດ, ອັນໃດຄວນມີສິດທິບັດ ເພື່ອປົກປ້ອງຊີວະນາໆພັນທີ່ມີຄວາມຫຼາກຫຼາຍຢູ່ປະເທດເຮົາ ແລະ ການຫັນຜົນການຄົ້ນຄວ້າສູ່ການຜະລິດໃຫ້ເປັນຜະລິດຕະພັນສິນຄ້າ.
(ຂ່າວ - ພາບ: ສຸກສະຫວັນ)